ಕಚ್ಚಾ ತೈಲ ದರ 80 ಡಾಲರ್‌ಗೆ ಜಿಗಿತ; ತೈಲ, ಅನಿಲ, ಕಲ್ಲಿದ್ದಲು ಪೂರೈಕೆಯಲ್ಲಿ ಜಾಗತಿಕ ಬಿಕ್ಕಟ್ಟು

ಹೊಸದಿಲ್ಲಿ: ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ದರ ಬ್ಯಾರೆಲ್‌ಗೆ 80 ಡಾಲರ್‌ಗೆ ಏರಿಕೆಯಾಗಿದೆ. ಕಳೆದ ಮೂರು ವರ್ಷಗಳಲ್ಲೇ ಕಚ್ಚಾ ತೈಲದ ಗರಿಷ್ಠ ದರ ಮಟ್ಟ ಇದಾಗಿದೆ. ಈ ನಡುವೆ ಬೆಂಗಳೂರಿನಲ್ಲಿ ಎರಡು ತಿಂಗಳಿನ ನಂತರ ಪೆಟ್ರೋಲ್‌ ದರ ಲೀಟರ್‌ಗೆ 12 ಪೈಸೆ ಹೆಚ್ಚಳವಾಗಿದ್ದು, 104.92 ರೂ.ಗೆ ಏರಿಕೆಯಾಗಿದೆ. ಡೀಸೆಲ್‌ ದರದಲ್ಲಿ16 ಪೈಸೆ ಏರಿದ್ದು 95.05 ರೂ.ಗೆ ಏರಿಕೆಯಾಗಿದೆ. ದಿಲ್ಲಿಯಲ್ಲಿ ಪೆಟ್ರೋಲ್‌ ದರ ಲೀಟರ್‌ಗೆ 101.39 ರೂ., ಮುಂಬಯಿನಲ್ಲಿ 107.47 ರೂ.ಗೆ ಹೆಚ್ಚಳವಾಗಿದೆ. ದಿಲ್ಲಿಯಲ್ಲಿ 89.57 ರೂ. ಮುಂಬಯಿನಲ್ಲಿ 97.21 ರೂ.ಗೆ ವೃದ್ಧಿಸಿದೆ. ಜಾಗತಿಕ ಇಂಧನ ಬಿಕ್ಕಟ್ಟು ಕೋವಿಡ್‌ ನಿರ್ಬಂಧ ಸಡಿಲವಾದ ನಂತರ ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲದ ಬೇಡಿಕೆ ಏರುಗತಿಯಲ್ಲಿದೆ. ಲಸಿಕೆ ವಿತರಣೆಯೂ ವ್ಯಾಪಕವಾಗಿರುವುದು ದರ ಏರಿಕೆಯ ಮೇಲೆ ಪ್ರಭಾವ ಬೀರಿದೆ. ಆದರೆ ಬೇಡಿಕೆಗೆ ತಕ್ಕಂತೆ ಒಪೆಕ್‌ ಮತ್ತು ಅದರ ಮಿತ್ರ ರಾಷ್ಟ್ರಗಳಿಂದ ತೈಲೋತ್ಪಾದನೆಯಾಗುತ್ತಿಲ್ಲ. ಸಾಕಷ್ಟು ತೈಲ ಪೂರೈಕೆಯಾಗುತ್ತಿಲ್ಲ. ಹೀಗಾಗಿ ಮಾರುಕಟ್ಟೆಯಲ್ಲಿ ಪರಿಸ್ಥಿತಿ ಬಿಗಿಯಾಗಿದ್ದು, ದರ ಹೆಚ್ಚಳವಾಗುತ್ತಿದೆ. ಕಚ್ಚಾ ತೈಲ ಮಾತ್ರವಲ್ಲದೆ ಕಲ್ಲಿದ್ದಲು, ನೈಸರ್ಗಿಕ ಅನಿಲದ ಪೂರೈಕೆಯಲ್ಲೂ ಭಾರಿ ವ್ಯತ್ಯಯ ಉಂಟಾಗಿದೆ. ಯುರೋಪ್‌ನಿಂದ ಏಷ್ಯಾದ ತನಕ ಸಮಸ್ಯೆ ಕಾಣಿಸಿಕೊಂಡಿದೆ. ಅಮೆರಿಕದಲ್ಲಿ ಚಂಡಮಾರುತಗಳ ಅಬ್ಬರದಿಂದ ಕರಾವಳಿ ಪ್ರದೇಶದಲ್ಲಿ ತೈಲೋತ್ಪಾದನೆಗೆ ಅಡಚಣೆ ಉಂಟಾಗಿದೆ. ಮಧ್ಯಂತರದಲ್ಲಿ ತೈಲ ದರ ಏರುಗತಿಯಲ್ಲಿ ಇರಲಿದೆ. ನೈಸರ್ಗಿಕ ಅನಿಲಕ್ಕೂ ಬೇಡಿಕೆ ಹೆಚ್ಚಲಿದೆ ಎಂದು ಮಾರುಕಟ್ಟೆ ತಜ್ಞರು ತಿಳಿಸಿದ್ದಾರೆ. ಭಾರತ ತನ್ನ ಬೇಡಿಕೆಯ ಶೇ. 85 ತೈಲವನ್ನು ಆಮದು ಮೂಲಕ ಭರಿಸುತ್ತದೆ. ಆದ್ದರಿಂದ ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರ ದೇಶದ ಮೇಲೆ ಭಾರಿ ಪ್ರಭಾವ ಬೀರುತ್ತದೆ. ಯುರೋಪ್‌ನಲ್ಲಿ ಚಳಿಗಾಲಕ್ಕೆ ಮುನ್ನ ನೈಸರ್ಗಿಕ ಅನಿಲ ದರ ಇದುವರೆಗಿನ ಗರಿಷ್ಠ ಮಟ್ಟಕ್ಕೆ ಜಿಗಿದಿದೆ. ಬೇಸಗೆಯಲ್ಲಿ ದಾಸ್ತಾನು ಮಟ್ಟ ಕುಸಿದಿದ್ದರಿಂದ ಸಮಸ್ಯೆ ಸೃಷ್ಟಿಯಾಗಿದೆ. ತೈಲ, ಅನಿಲ, ಕಲ್ಲಿದ್ದಲು ದರ ಗಗನಕ್ಕೇರಿದೆ. ಬ್ರಿಟನ್‌ನಲ್ಲಿ ಮೂರನೇ ಒಂದರಷ್ಟು ಪೆಟ್ರೋಲ್‌ ಬಂಕ್‌ಗಳು ಬರಿದಾಗಿದ್ದು, ಸೇನೆಯನ್ನು ಸನ್ನದ್ಧವಾಗಿ ಇರಿಸಲಾಗಿದೆ. ಚೀನಾದಲ್ಲೂ ಕಲ್ಲಿದ್ದಲು ಪೂರೈಕೆಯ ಕೊರತೆ ಉಂಟಾಗಿದ್ದು, ವಿದ್ಯುತ್‌ ಉತ್ಪಾದನೆಗೆ ಅಡಚಣೆ ಉಂಟಾಗಿದೆ. ಶೆನ್‌ಯಾಂಗ್‌ ಮತ್ತು ಇತರ ನಗರಗಳಲ್ಲಿ ಪವರ್‌ ಕಟ್‌ ಶುರುವಾಗಿದೆ.