ಓಲಾ ಎಲೆಕ್ಟ್ರಿಕ್‌ ಅಬ್ಬರ, ಎರಡೇ ದಿನದಲ್ಲಿ 1,100 ಕೋಟಿ ರೂ. ಮೊತ್ತದ ಸ್ಕೂಟರ್‌ ಮಾರಾಟ

ಚೆನ್ನೈ: ಕೇವಲ ಎರಡೇ ದಿನಗಳಲ್ಲಿ 1,100 ಕೋಟಿ ರೂ. ಮೊತ್ತದ ಎಲೆಕ್ಟ್ರಿಕ್‌ ಸ್ಕೂಟರ್‌ಗಳನ್ನು ಮಾರಾಟ ಮಾಡಿರುವುದಾಗಿ ಹೇಳಿದೆ. ಎಲೆಕ್ಟ್ರಿಕ್‌ ಆಪ್‌ ಆಧಾರಿತ ಟ್ಯಾಕ್ಸಿ ಸೇವೆ ನೀಡುವ ಓಲಾ ಕಂಪನಿಯ ಅಂಗ ಸಂಸ್ಥೆಯಾಗಿದೆ. ಓಲಾ ಎಲೆಕ್ಟ್ರಿಕ್‌ ಸೆಪ್ಟೆಂಬರ್‌ 15 ರಂದು ಆನ್‌ಲೈನ್‌ ಮೂಲಕ ಮಾರಾಟಕ್ಕೆ ಚಾಲನೆ ನೀಡಿತ್ತು. ಎಸ್‌1 ಮತ್ತು ಎಸ್‌1 ಪ್ರೊ ಮಾಡೆಲ್‌ಗಳ ಮಾರಾಟ ಆರಂಭವಾಗುತ್ತಿದ್ದಂತೆ ಜನರು ಸ್ಕೂಟರ್‌ಗಳಿಗೆ ಮುಗಿಬಿದ್ದಿದ್ದು, ಮೊದಲ ದಿನ 600 ಕೋಟಿ ರೂ. ಹಾಗೂ ಎರಡನೇ ದಿನ 500 ಕೋಟಿ ರೂ. ಮೊತ್ತದ ಸ್ಕೂಟರ್‌ಗಳು ಮಾರಾಟವಾಗಿದ್ದು, ಇಲ್ಲಿಯವರೆಗೆ ಒಟ್ಟು 1100 ಕೋಟಿ ರೂ. ಮೊತ್ತದ ಸ್ಕೂಟರ್‌ಗಳು ಮಾರಾಟವಾಗಿವೆ. ಈ ಹಿಂದೆ ಜುಲೈನಲ್ಲಿ ಸ್ಕೂಟರ್‌ ಬುಕ್ಕಿಂಗ್ ಆರಂಭವಾದಾಗ ಮುಂಗಡ ಬುಕ್ಕಿಂಗ್‌ ಮಾಡಿದವರಿಗೆ ಮಾರಾಟದಲ್ಲಿ ಮೊದಲ ಪ್ರಾಶಸ್ತ್ರ್ಯ ನೀಡಲಾಗಿತ್ತು. “ಒಟ್ಟು 2 ದಿನಗಳಲ್ಲಿ, ನಾವು 1100 ಕೋಟಿ ರೂ.ಗಳಷ್ಟು ಮಾರಾಟ ಮಾಡಿದ್ದೇವೆ! ಇದು ಕೇವಲ ಆಟೋಮೊಬೈಲ್‌ ಉದ್ಯಮದಲ್ಲಿ ಮಾತ್ರವಲ್ಲ, ಭಾರತೀಯ ಇ-ಕಾಮರ್ಸ್ ಇತಿಹಾಸದಲ್ಲಿ ಒಂದು ಉತ್ಪನ್ನದ ಒಂದು ದಿನದ (ಮೌಲ್ಯದ ಪ್ರಕಾರ) ಅತ್ಯಧಿಕ ಮಾರಾಟಗಳಲ್ಲಿ ಒಂದಾಗಿದೆ! ನಾವು ನಿಜವಾಗಿಯೂ ಡಿಜಿಟಲ್ ಭಾರತದಲ್ಲಿ ಜೀವಿಸುತ್ತಿದ್ದೇವೆ," ಎಂದು ಓಲಾ ಬಿಡುಗಡೆ ಮಾಡಿದ ಅಧಿಕೃತ ಹೇಳಿಕೆಯಲ್ಲಿ ಕಂಪನಿಯ ಸಿಇಒ ಭವಿಷ್‌ ಅಗರ್‌ವಾಲ್‌ ಹೇಳಿದ್ದಾರೆ. ಸ್ಕೂಟರ್‌ ಖರೀದಿ ಅವಧಿಯಲ್ಲಿ ಗ್ರಾಹಕರು ಕನಿಷ್ಠ 20,000 ರೂ. ಮೊತ್ತ ಪಾವತಿಸಿ ಸ್ಕೂಟರ್‌ ಖರೀದಿ ಮಾಡಿಕೊಳ್ಳಬಹುದಾಗಿತ್ತು. ಈ ವೇಳೆ ಖರೀದಿ ಮಾಡಲು ಸಾಧ್ಯವಾಗದವರು 499 ರೂ. ಪಾವತಿಸಿ ಮುಂಗಡ ಬುಕ್ಕಿಂಗ್‌ ಮಾಡಬಹುದು. ಮುಂದಿನ ಮಾರಾಟ 2021ರ ನವೆಂಬರ್‌ 1 ರಂದು ಆರಂಭವಾಗಲಿದೆ ಎಂದು ಕಂಪನಿ ಹೇಳಿದೆ. "ಖರೀದಿ ವಿಂಡೋವನ್ನು ಈಗ ಮುಚ್ಚಲಾಗಿದ್ದರೂ, ಮುಂಗಡ ಬುಕ್ಕಿಂಗ್‌ ಆಯ್ಕೆಗಳು olaelectric.comನಲ್ಲಿ ತೆರೆದಿರುತ್ತವೆ. ಮತ್ತು ದೀಪಾವಳಿಗೆ ಸರಿಯಾಗಿ ನವೆಂಬರ್ 1, 2021 ರಂದು ನಾವು ಖರೀದಿ ವಿಂಡೋವನ್ನು ಪುನಃ ತೆರೆಯುತ್ತೇವೆ ಎಂದು ನಿಮ್ಮೆಲ್ಲರಿಗೂ ತಿಳಿಸಲು ನಾನು ಬಯಸುತ್ತೇನೆ. ಆದ್ದರಿಂದ, ನೀವು ಓಲಾ ಎಸ್1 ಮತ್ತು ಎಸ್1 ಪ್ರೊ ಅನ್ನು ಖರೀದಿಸಲು ಬಯಸಿದರೆ, ಆದಷ್ಟು ಬೇಗ ಕಾಯ್ದಿರಿಸಲು ನಿಮ್ಮನ್ನು ನಾನು ಪ್ರೋತ್ಸಾಹಿಸುತ್ತೇನೆ. ಈಗಾಗಲೇ ಕಾಯ್ದಿರಿಸಿದ, ಆದರೆ ನಿನ್ನೆ ಕೊನೆಗೊಂಡ ವಿಂಡೋದಲ್ಲಿ ಖರೀದಿಸದವರು ಕೂಡ ನವೆಂಬರ್ 1 ರಂದು ಖರೀದಿಸಬಹುದು," ಎಂದು ಭವಿಷ್‌ ಅಗರ್‌ವಾಲ್‌ ಹೇಳಿದ್ದಾರೆ. ಓಲಾ ಎಸ್1 ಬೆಲೆ 1 ಲಕ್ಷ ರೂ. ಮತ್ತು ಎಸ್1 ಪ್ರೊ ಬೆಲೆ 1.30 ಲಕ್ಷ ರೂ. (ಎಲ್ಲಾ ಬೆಲೆಗಳು, ಎಕ್ಸ್ ಶೋರೂಂ) ಗಳಾಗಿವೆ. ದೇಶಾದ್ಯಂತ ಎಲೆಕ್ಟ್ರಿಕ್‌ ವಾಹನಗಳ ಮೇಲೆ ರಾಜ್ಯ ಸರಕಾರಗಳ ಸಬ್ಸಿಡಿಗಳನ್ನು ನೀಡುತ್ತಿದ್ದು, ವಾಹನಗಳ ವಿತರಣೆಯ ಸಮಯದಲ್ಲಿ ಬೆಲೆಗಳು ಮತ್ತಷ್ಟು ಕಡಿಮೆಯಾಗುವ ಸಾಧ್ಯತೆ ಇದೆ. ಈ ವರ್ಷದ ಅಕ್ಟೋಬರ್‌ನಿಂದ 1,000 ನಗರಗಳು ಮತ್ತು ಪಟ್ಟಣಗಳಲ್ಲಿ ಸ್ಕೂಟರ್‌ಗಳ ವಿತರಣೆ ಆರಂಭವಾಗಲಿವೆ. ಮೂಲ ಮಾದರಿ ಓಲಾ ಎಸ್1 ಒಂದು ಬಾರಿ ಚಾರ್ಜ್ ಮಾಡಿದರೆ 121 ಕಿ.ಮೀ. ಚಲಿಸಲಿದ್ದು, 90 ಕಿ.ಮೀ./ಗಂ ಗರಿಷ್ಠ ವೇಗವನ್ನು ಹೊಂದಿದೆ. ಎಸ್1 ಪ್ರೊ ಸುಮಾರು 181 ಕಿ.ಮೀ. ವ್ಯಾಪ್ತಿ ಹಾಗೂ 115 ಕಿಲೋ ಮೀಟರ್ ಗರಿಷ್ಠ ವೇಗವನ್ನು ಹೊಂದಿದೆ.