ಇನ್ಫೋಸಿಸ್‌ಗೆ ನೀಡಿದ್ದ ಡೆಡ್‌ಲೈನ್‌ ಮುಗಿದರೂ ಬಗೆಹರಿಯದ ಐಟಿ ಪೋರ್ಟಲ್ ಸಮಸ್ಯೆ
ಆದಾಯ ತೆರಿಗೆ ಇಲಾಖೆಯ ನೂತನ ಪೋರ್ಟಲ್‌ನಲ್ಲಿ ಕಂಡು ಬಂದಿರುವ ತಾಂತ್ರಿಕ ದೋಷಗಳನ್ನು ಬಗೆಹರಿಸಲು ಇನ್ಫೋಸಿಸ್‌ಗೆ ಸರಕಾರ ನೀಡಿದ್ದ ಸೆ. 15ರ ಗಡುವು ಮುಕ್ತಾಯವಾಗಿದೆ. ಹೀಗಿದ್ದರೂ ಅದರಲ್ಲಿನ ತಾಂತ್ರಿಕ ಸಮಸ್ಯೆಗಳು ಇನ್ನೂ ಬಗೆಹರಿದಿಲ್ಲ.
Admin
0
7
ಹೊಸದಿಲ್ಲಿ: ಇಲಾಖೆಯ ನೂತನ ವೆಬ್‌ ಪೋರ್ಟಲ್‌ನಲ್ಲಿ ಕಂಡು ಬಂದಿರುವ ತಾಂತ್ರಿಕ ದೋಷಗಳನ್ನು ಬಗೆಹರಿಸಲು ಇನ್ಫೋಸಿಸ್‌ಗೆ ಸರಕಾರ ನೀಡಿದ್ದ ಸೆಪ್ಟೆಂಬರ್ 15ರ ಗಡುವು ಮುಕ್ತಾಯವಾಗಿದೆ. ಹೀಗಿದ್ದರೂ ಅದರಲ್ಲಿನ ತಾಂತ್ರಿಕ ಸಮಸ್ಯೆಗಳು ಇನ್ನೂ ಬಗೆಹರಿದಿಲ್ಲ.
ಆದಾಯ ತೆರಿಗೆ ರಿಟರ್ನ್‌ ಸಲ್ಲಿಕೆಯ ಗಡುವನ್ನು 2021ರ ಡಿಸೆಂಬರ್‌ 31ರ ತನಕ ಮುಂದೂಡಲಾಗಿದೆ. ಹೀಗಾಗಿ ತೆರಿಗೆದಾರರಿಗೆ ನಿರಾಳವಾಗಿದ್ದರೂ, ಐಟಿ ವೆಬ್‌ ಪೋರ್ಟಲ್‌ನಲ್ಲಿರುವ ತಾಂತ್ರಿಕ ದೋಷಗಳು ಈಗಲೂ ಬಗೆಹರಿದಿಲ್ಲ ಎಂದು ಬೆಂಗಳೂರಿನ ಚಾರ್ಟರ್ಡ್‌ ಅಕೌಂಟೆಂಟ್‌ ಮತ್ತು ತೆರಿಗೆ ತಜ್ಞರಾದ ವಿಜಯ್‌ ಸಾಗರ್‌ ಶೆಣೈ ತಿಳಿಸಿದ್ದಾರೆ.
ಕಳೆದ ಜೂನ್‌ 7ರಂದು ಸರಕಾರ ಈ ವೆಬ್‌ ಪೋರ್ಟಲ್‌ಗೆ ಚಾಲನೆ ನೀಡಿತ್ತು. 2019ರಲ್ಲಿಇನ್ಫೋಸಿಸ್‌ ಇದನ್ನು ಸಿದ್ಧಪಡಿಸುವ ಗುತ್ತಿಗೆ ಪಡೆದಿತ್ತು. ಹಲವಾರು ಬಳಕೆದಾರರು ತಮ್ಮ ಐಟಿ ರಿಟರ್ನ್ಸ್ ಸಲ್ಲಿಸಲು ಪೋರ್ಟಲ್ ಪ್ರವೇಶಿಸುವಾಗ ತಾವು ಎದುರಿಸಿದ ಸಮಸ್ಯೆಗಳ ಚಿತ್ರಗಳನ್ನು ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಆಗಸ್ಟ್‌ 23ರಂದು ಇನ್ಫೋಸಿಸ್‌ಗೆ ಸಮನ್ಸ್‌ ಜಾರಿಗೊಳಿಸಲಾಗಿತ್ತು. ಹಾಗೂ ಇನ್ಫೋಸಿಸ್ ಸಿಇಒ ಸಲೀಲ್ ಪರೇಖ್ ಅವರೊಂದಿಗೆ ಸಭೆ ನಡೆಸಿದ್ದ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು, ಬಾಕಿ ಉಳಿದಿರುವ ಎಲ್ಲಾ ಸಮಸ್ಯೆಗಳನ್ನು ಪರಿಹರಿಸಲು ಸೆಪ್ಟೆಂಬರ್ 15 ರ ಗಡುವು ನೀಡಿದ್ದರು.
ಆದರೆ ಇದೀಗ ಗಡುವು ಮುಗಿದ್ದಿದ್ದರೂ ಸಮಸ್ಯೆಗಳು ಮುಗಿದಿಲ್ಲ. ಪೋರ್ಟಲ್ ಕಾರ್ಯಾರಂಭ ಮಾಡಿ ಮೂರು ತಿಂಗಳು ಕಳೆದಿದ್ದರೂ ಆದಾಯ ತೆರಿಗೆ ಪಾವತಿದಾರರು ಈ ಪೋರ್ಟಲ್‌ನಲ್ಲಿ ತಮ್ಮ ರಿಟರ್ನ್ಸ್ ಫೈಲ್ ಮಾಡುವ ಸಂದರ್ಭದಲ್ಲಿ ಹಲವು ತಾಂತ್ರಿಕ ತೊಂದರೆಗಳನ್ನು ಎದುರಿಸುತ್ತಿದ್ದಾರೆ. ಇದು ಆದಾಯ ತೆರಿಗೆ ಇಲಾಖೆಗೆ ಮಾತ್ರವಲ್ಲ, ಹಣಕಾಸು ಸಚಿವಾಲಯಕ್ಕೂ ತಲೆನೋವಾಗಿ ಪರಿಣಮಿಸಿದೆ.
ತಾಂತ್ರಿಕ ಸಮಸ್ಯೆಗಳೇನು?
* ಒಂದು ತಾಂತ್ರಿಕ ಸಮಸ್ಯೆಯನ್ನು ಬಗೆಹರಿಸಲು ಮುಂದಾದರೆ ಮತ್ತೊಂದು ಸಮಸ್ಯೆ ಎದುರಾಗುತ್ತಿದೆ.
* ವಾರಾಂತ್ಯದ ರಜಾ ದಿನಗಳಲ್ಲಿ ಮೇಂಟೆನೆನ್ಸ್‌ಗಾಗಿ ಪೋರ್ಟಲ್ ಮುಚ್ಚಿದರೆ ಅದು ಮತ್ತೆ ಸರಿಯಾಗಲು ಬಹಳಷ್ಟು ಸಮಯ ತೆಗೆದುಕೊಳ್ಳುತ್ತಿದೆ.
* ಮೂಲದಲ್ಲೇ ಸಮಸ್ಯೆಗಳು ಇರುವ ಕಾರಣ, ಸರ್ಕಾರಿ ಅಧಿಕಾರಿಗಳು ಪೋರ್ಟಲ್‌ನಲ್ಲೇ ಅಧಿಕ ಸಮಯ ವ್ಯಯಿಸುವಂತಾಗಿದೆ.
ಹೊಸ ಪೋರ್ಟಲ್‌ನಲ್ಲಿ ಎದುರಾಗಿರುವ ಸಮಸ್ಯೆಗಳನ್ನು ಬಗೆಹರಿಸುವ ನಿಟ್ಟಿನಲ್ಲಿ ಐಟಿ ದಿಗ್ಗಜ ಇನ್ಫೋಸಿಸ್ ಸೂಕ್ತವಾಗಿ ಸ್ಪಂದಿಸುತ್ತಿಲ್ಲ ಎನ್ನುವ ದೂರು ಆದಾಯ ತೆರಿಗೆ ಇಲಾಖೆಯದ್ದಾಗಿದೆ. ಈ ಹಿನ್ನೆಲೆಯಲ್ಲಿ ಇನ್ಫೋಸಿಸ್ ಸಿಇಒ ಸಲೀಲ್ ಪರೇಖ್ ಜೊತೆಯೇ ಮಾತನಾಡಿ ಹಣಕಾಸು ಸಚಿವರು ಖಡಕ್‌ ಸೂಚನೆ ನೀಡಿದ್ದರು.
ಆದರೆ, ಇನ್ಫೋಸಿಸ್ ವಾದವೇ ಬೇರೆ. ಹೊಸ ಪೋರ್ಟಲ್‌ಗಾಗಿ ತಾನು ಸಂಸ್ಥೆಯ 750ಕ್ಕೂ ಹೆಚ್ಚು ಜನರನ್ನು ನಿಯೋಜನೆ ಮಾಡಿರೋದಾಗಿ ಸಂಸ್ಥೆ ಹೇಳಿದೆ. ಸುಮಾರು 4 ಸಾವಿರ ಕೋಟಿ ರೂ. ಮೊತ್ತದ ಯೋಜನೆ ಇದಾಗಿದ್ದು, ಗಡುವು, ಎಚ್ಚರಿಕೆ ಏನೇ ನೀಡಿದರೂ ಸಮಸ್ಯೆಗಳು ಮಾತ್ರ ಬಗೆಹರಿಯುತ್ತಿಲ್ಲ. ಹೀಗಾಗಿ ಮುಂದೇನು ಎಂಬ ಪ್ರಶ್ನೆ ಕಾಡುತ್ತಿದೆ.
