ಹಿರಿ ಮಗಳ ಚಿಕಿತ್ಸೆಗೆ ಹಣವಿಲ್ಲದೆ ಕಿರಿ ಮಗಳನ್ನು ಕೇವಲ ₹10 ಸಾವಿರಕ್ಕೆ ಮಾರಿದ ಬಡ ಪಾಲಕರು!

ವಿಜಯವಾಡ: ಕೆಲವು ಘಟನೆಗಳು ಮಾನವ ಸಮಾಜವನ್ನೇ ನಾಚಿಸುವಂತಿರುತ್ತವೆ. ಆಂಧ್ರ ಪ್ರದೇಶದಲ್ಲಿ ಇಂತಹದೇ ಕರುಣಾಜನಕ ಘಟನೆ ನಡೆದಿದೆ. ಸ್ವತಃ ತಂದೆ- ತಾಯಿಯೇ ತಮ್ಮ ಒಬ್ಬ ಮಗಳನ್ನು ಉಳಿಸಿಕೊಳ್ಳುವ ಸಲುವಾಗಿ ಮತ್ತೊಬ್ಬ ಮಗಳನ್ನು ಕೇವಲ 10,000 ರೂಪಾಯಿಗೆ ಮಾರಿಕೊಂಡಿದ್ದಾರೆ! ನೆಲ್ಲೂರು ಜಿಲ್ಲೆಯ ಕೊಟ್ಟೂರಿನ ದಂಪತಿಗೆ ಇಬ್ಬರು ಹೆಣ್ಣುಮಕ್ಕಳು. ತಮ್ಮ16 ವರ್ಷದ ಮಗಳ ಚಿಕಿತ್ಸೆಗೂ ಹಣ ಹೊಂದಿಸಲಾರದಷ್ಟು ಕಡುಬಡತನ ಇವರದು. ಈ ಅಸಹಾಯಕ ಪಾಲಕರು ತಮ್ಮ 12 ವರ್ಷದ ಮತ್ತೊಬ್ಬ ಮಗಳನ್ನೇ ಮಾರಿದ್ದಾರೆ. ಕಳೆದ ಬುಧವಾರವೇ ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಈ ವಿಚಾರ ತಿಳಿಯುತ್ತಿದ್ದಂತೆ 'ಸಮಗ್ರ ಶಿಶು ಅಭಿವೃದ್ಧಿ ಸೇವಾ' (ಐಸಿಡಿಎಸ್‌) ಅಧಿಕಾರಿಗಳು ಮಾರಾಟವಾಗಿದ್ದ ಬಾಲಕಿಯನ್ನು ರಕ್ಷಿಸಿದ್ದಾರೆ. ಈ ಬಾಲಕಿಯನ್ನು 46 ವರ್ಷದ ಚಿನ್ನ ಸುಬ್ಬಯ್ಯ ಎಂಬ ವ್ಯಕ್ತಿ ಕೊಂಡುಕೊಂಡಿದ್ದ. ಅಲ್ಲದೆ ಅಪ್ರಾಪ್ತ ಬಾಲಕಿಯನ್ನು ಮದುವೆಯಾಗಿದ್ದ ಎಂಬ ಆರೋಪವೂ ಈತನ ಮೇಲಿದೆ. ಇವನನ್ನು ಪೊಲೀಸರು ಬಂಧಿಸಿದ್ದು, ವಿಚಾರಣೆಗೆ ಒಳಪಡಿಸಿದ್ದಾರೆ. ಬಾಲಕಿಯ ಪಾಲಕರಿಬ್ಬರೂ ದಿನಗೂಲಿ ಕಾರ್ಮಿಕರು. ಸುಬ್ಬಯ್ಯನ ಪತ್ನಿ ವಿವಾಹವನ್ನು ಮುರಿದುಕೊಂಡು ಮನೆ ಬಿಟ್ಟು ಹೋಗಿದ್ದರು. ಹೀಗಾಗಿ ಸುಬ್ಬಯ್ಯ ಅಪ್ರಾಪ್ತ ಬಾಲಕಿ ಮೇಲೆ ಕಣ್ಣು ಹಾಕಿದ್ದ. ಈ ಹಿಂದೆಯೇ ಬಾಲಕಿಯನ್ನು ವಿವಾಹವಾಗುವುದಾಗಿ ಕೇಳಿದ್ದ. ಬಾಲಕಿಯನ್ನು ಕೊಂಡುಕೊಂಡ ನಂತರ ಮೊದಲೇ ತಿಳಿಸಿದಂತೆ ಆಕೆಯನ್ನು ವಿವಾಹವಾಗಿದ್ದ. ಬುಧವಾರ ರಾತ್ರಿಯೇ ನೆಲ್ಲೂರು ಬಳಿಯ ದಾಂಪುರದಲ್ಲಿರುವ ತಮ್ಮ ಸಂಬಂಧಿಕರ ಮನೆಗೆ ಬಾಲಕಿಯನ್ನು ಕರೆದುಕೊಂಡು ಹೋಗಿದ್ದ. ಆ ರಾತ್ರಿ ಬಾಲಕಿಯು ಕಿರುಚಿಕೊಂಡು ಅಳುತ್ತಿದ್ದಾಗಿ ನೆರೆಹೊರೆಯವರು ತಿಳಿದ್ದಾಗಿ ಪೊಲೀಸರು ಮಾಹಿತಿ ನೀಡಿದ್ದಾರೆ. ಅಧಿಕಾರಿಗಳು ಬಾಲಕಿಯನ್ನು ಜಿಲ್ಲಾ ಶಿಶುಪಾಲನ ಕೇಂದ್ರಕ್ಕೆ ಕರೆತಂದು ಆಶ್ರಯ ನೀಡಿದ್ದಾರೆ. ಜತೆಗೆ ಸಮಾಲೋಚನೆ ನಡೆಸಿದ್ದಾರೆ. ಬಾಲಕಿಯ ಪಾಲಕರನ್ನು ಪತ್ತೆಹಚ್ಚಿದ್ದಾರೆ. ಸಂತ್ರಸ್ತ ಬಾಲಕಿಯ ಅಕ್ಕ ಉಸಿರಾಟದ ತೊಂದರೆಯಿಂದ ಬಳಲುತ್ತಿರುವುದು ಪತ್ತೆಯಾಗಿದೆ. ಈ ಬಾಲಕಿಗೆ ಚಿಕಿತ್ಸೆ ಕೊಡಿಸುವಷ್ಟು ಹಣ ಇರಲಿಲ್ಲವಾದ ಕಾರಣ ತನ್ನ ಸಣ್ಣ ಮಗಳನ್ನು ಮಾರಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.