ತೆಲಂಗಾಣ ರಾಜಕಾರಣಕ್ಕೆ ವೈಎಸ್‌ಆರ್‌ ಕುಟುಂಬ ಎಂಟ್ರಿ, ಹೊಸ ಪಕ್ಷ ಹುಟ್ಟುಹಾಕಲಿದ್ದಾರೆ ಜಗನ್‌ ರೆಡ್ಡಿ ತಂಗಿ

ಹೈದರಾಬಾದ್‌: ನಿರೀಕ್ಷೆಯಂತೆ ರಾಜಕಾರಣದಲ್ಲಿ ಹೊಸ ಪಕ್ಷ ಉದಯವಾಗಲಿದ್ದು, ಇದಕ್ಕೆ ಬೇಕಾದ ವೇದಿಕೆ ಸಿದ್ಧವಾಗಿದೆ. ಅವಿಭಜಿತ ಆಂಧ್ರದ ಮಾಜಿ ಸಿಎಂ, ದಿವಂಗತ ವೈಎಸ್‌ ರಾಜಶೇಖರ್‌ ರೆಡ್ಡಿ ಕುಟುಂಬದಿಂದ ಮತ್ತೊಂದು ಪಕ್ಷ ಉದಯವಾಗಲಿದ್ದು, ಅವರ ಪುತ್ರಿ ಈ ಪಕ್ಷವನ್ನು ಮುನ್ನಡೆಸಲಿದ್ದಾರೆ. ಜುಲೈ 8 ರಂದು ತೆಲಂಗಾಣದಲ್ಲಿ ಹೊಸ ಪಕ್ಷಕ್ಕೆ ಚಾಲನೆ ನೀಡಲಿದ್ದೇನೆ ಎಂದು ಹಾಲಿ ಆಂಧ್ರ ಪ್ರದೇಶದ ಮುಖ್ಯಮಂತ್ರಿ ವೈಎಸ್‌ ಸೋದರಿ ಘೋಷಿಸಿದ್ದಾರೆ. ತಮ್ಮ ತಂದೆಯ ಜನ್ಮ ದಿನಾಚರಣೆಯಂದೇ ಅವರು ಪಕ್ಷಕ್ಕೆ ನಾಂದಿ ಹಾಡಲಿದ್ದಾರೆ. ಶರ್ಮಿಳಾ ನಡೆಯನ್ನು ಆಕೆಯ ತಾಯಿ ವೈಎಸ್‌ ವಿಜಯಲಕ್ಷ್ಮಿ ಬೆಂಬಲಿಸಿದ್ದು, ತೆಲಂಗಾಣ ಜನತೆಗೆ ಸೇವೆ ಸಲ್ಲಿಸಲು ಮುಂದಾಗಿರುವ ಮಗಳ ನಿರ್ಧಾರದಿಂದ ಸಂತಸವಾಗಿದೆ ಎಂದು ಹೇಳಿದ್ದಾರೆ. ಜತೆಗೆ ತಮ್ಮ ಮಗಳಿಗೆ ಆಕೆಯ ತಂದೆಯಷ್ಟೇ ಧೈರ್ಯವಿದೆ ಎಂದು ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಶರ್ಮಿಳಾ ರೆಡ್ಡಿ ಹೊಸ ಪಕ್ಷ ಸ್ಥಾಪಿಸುವ ನಿರ್ಧಾರವನ್ನು ಕಮ್ಮಮ್‌ನಲ್ಲಿ ಶುಕ್ರವಾರ ನಡೆದ ‘ಸಂಕಲ್ಪ ಸಭಾ’ ಸಮಾವೇಶದಲ್ಲಿ ಘೋಷಿಸಿದ್ದಾರೆ. ಆಂಧ್ರ ಪ್ರದೇಶದ ಗಡಿಯಲ್ಲಿರುವ ತೆಲಂಗಾಣದ ಕಮ್ಮಮ್‌ನಲ್ಲಿ ನಡೆದ ಚುನಾವಣೆಯಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಹಿನ್ನೆಲೆಯಲ್ಲಿ ಹೈದರಾಬಾದ್‌ನಿಂದ ಕಮ್ಮಮ್‌ವರೆಗೆ ಬೃಹತ್‌ ವಾಹನ ಜಾಥಾವನ್ನು ಶರ್ಮಿಳಾ ಹಮ್ಮಿಕೊಂಡಿದ್ದರು. ಇದರಲ್ಲಿ ಅವರು ಪಕ್ಷ ಸ್ಥಾಪನೆ ಘೋಷಣೆ ಮಾಡಿದ್ದಾರೆ. ತನ್ನ ತಂಗಿಯ ರಾಜಕೀಯ ನಡೆಯಿಂದ ಜಗನ್‌ಮೋಹನ್‌ ರೆಡ್ಡಿ ಅಂತರ ಕಾಯ್ದುಕೊಂಡಿದ್ದಾರೆ. ಶರ್ಮಿಳಾ ಸಕ್ರಿಯ ರಾಜಕಾರಣದಲ್ಲಿ ಭಾಗಿಯಾಗುವುದಾಗಿ ಹೇಳಿದ ಬಳಿಕ ಜಗನ್‌ ರೆಡ್ಡಿ ಮೌನಕ್ಕೆ ಶರಣಾಗಿದ್ದಾರೆ. ಶರ್ಮಿಳಾ ಪಕ್ಷದ ಚಿನ್ಹೆ, ಧ್ವಜ, ಸಿದ್ಧಾಂತ ಜುಲೈ 8 ರಂದು ಬಹಿರಂಗವಾಗಲಿದೆ. ತೆಲಂಗಾಣದಲ್ಲಿ 2023ರಲ್ಲಿ ಚುನಾವಣೆ ನಡೆಯಲಿದ್ದು, ಅದಕ್ಕೂ ಸುಮಾರು 2-3 ವರ್ಷ ಮೊದಲೇ ಶರ್ಮಿಳಾ ಚುನಾವಣೆಗೆ ಬೇಕಾದ ವೇದಿಕೆ ಸಿದ್ಧಗೊಳಿಸುತ್ತಿದ್ದಾರೆ. ತಾನು ಟಿಆರ್‌ಎಸ್‌, ಬಿಜೆಪಿ, ಕಾಂಗ್ರೆಸ್‌ ಯಾರ ಪರವಾಗಿಯೂ ತೆಲಂಗಾಣಕ್ಕೆ ಬಂದಿಲ್ಲ ಎಂದು ಶರ್ಮಿಳಾ ಹೇಳಿದ್ದಾರೆ. ಆದರೆ ಜನರ ಪರವಾಗಿ ಎಲ್ಲಾ ಪಕ್ಷಗಳನ್ನು ಗುರಿಯಾಗಿಸುವುದಾಗಿ ಗುಡುಗಿದ್ದಾರೆ. ಈ ಹಿಂದೆ ಏಪ್ರಿಲ್‌ 15 ರಂದು ತೆಲಂಗಾಣ ಸರಕಾರದಲ್ಲಿ ಖಾಲಿ ಇರುವ 1.91 ಲಕ್ಷ ಹುದ್ದೆಗಳನ್ನು ಭರ್ತಿ ಮಾಡಬೇಕು ಎಂದು ಆಗ್ರಹಿಸಿ ಯುವಕರು ಪ್ರತಿಭಟನೆ ನಡೆಸುತ್ತಿದ್ದಾಗ ಇದೇ ಶರ್ಮಿಳಾ ರೆಡ್ಡಿ ಮೂರು ದಿನ ಉಪವಾಸ ಸತ್ಯಾಗ್ರಹ ನಡೆಸಿ ತೆಲಂಗಾಣದಲ್ಲಿ ಅಲ್ಲೋಲ ಕಲ್ಲೋಲ ಎಬ್ಬಿಸಿದ್ದರು. ಶರ್ಮಿಳಾ ತಂದೆಯ ರಾಜಕೀಯ ರಂಗಭೂಮಿ 'ಕಡಪ' ಈಗಿನ ಆಂಧ್ರ ಪ್ರದೇಶದಲ್ಲಿದೆ. ಹಾಗಾಗಿ ಆಕೆ ತೆಲಂಗಾಣದ ಹೊರಗಿನವರು ಎಂಬ ಟೀಕೆಗಳೂ ಇವೆ. ಆದರೆ ನಾನು ಬೆಳೆದಿದ್ದು, ಮಕ್ಕಳಿಗೆ ಜನ್ಮ ನೀಡಿದ್ದೆಲ್ಲ ತೆಲಂಗಾಣದಲ್ಲಿ. ಇಲ್ಲಿನ ಹಿತಾಸಕ್ತಿಗೆ ವಿರುದ್ಧವಾಗಿ ಯಾವತ್ತೂ ವರ್ತಿಸಲ್ಲ ಎಂದು ಅವರು ಭರವಸೆ ನೀಡಿದ್ದಾರೆ. ಜತೆಗೆ ತೆಲಂಗಾಣಕ್ಕೆ ಬರುವ ಒಂದೊಂದು ಹನಿ ನೀರನ್ನೂ ಯಾವುದೇ ರಾಜ್ಯಕ್ಕೆ ಹೋಗಲು ಬಿಡುವುದಿಲ್ಲ ಎಂದು ಘೋಷಿಸಿದ್ದಾರೆ. ಈಕೆಯ ನಡೆ ತೆಲಂಗಾಣದ ಆಡಳಿತರೂಢ ಟಿಆರ್‌ಎಸ್‌ ಹಾಗೂ ಇತರ ಪಕ್ಷಗಳ ಪಾಲಿಗೆ ಬಿಸಿತುಪ್ಪವಾಗುವ ಸಾಧ್ಯತೆ ಇದೆ. ಈಗಾಗಲೇ ರಾಜ್ಯದಲ್ಲಿ ಟಿಆರ್‌ಎಸ್‌ ಪ್ರಾಬಲ್ಯ ಸಾಧಿಸಿದೆ. ರಾಜ್ಯದಲ್ಲಿ ಕಾಂಗ್ರೆಸ್‌ ದುರ್ಬಲವಾಗಿದ್ದು ಟಿಡಿಪಿ, ವೈಎಸ್‌ಆರ್‌ ರಾಜ್ಯದಲ್ಲಿ ಗಟ್ಟಿ ನೆಲೆ ಹೊಂದಿಲ್ಲ. ಇಂಥಹದ್ದೊಂದು ಪರಿಸ್ಥಿತಿಯಲ್ಲಿ ರಾಜ್ಯ ರಾಜಕೀಯಕ್ಕೆ ಪ್ರವೇಶ ಪಡೆಯಲು ಬಿಜೆಪಿ ಯತ್ನಿಸುತ್ತಿರುವಾಗಲೇ ಶರ್ಮಿಳಾ ರೆಡ್ಡಿ ಹೊಸ ರಾಜಕಾರಣಿಯ ಪ್ರವೇಶವಾಗಿದೆ. ಇದು ತೆಲಂಗಾಣ ರಾಜ್ಯದಲ್ಲಿ ಮುಂದಿನ ದಿನಗಳಲ್ಲಿ ಯಾವ ಪರಿಣಾಮಗಳನ್ನು ಬೀರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.