ಹಿಂದೂಗಳು ಅಲ್ಪಸಂಖ್ಯಾತರಾದರೆ ಸಂವಿಧಾನ, ಜಾತ್ಯತೀತತೆ ಮಾಯ; ಗುಜರಾತ್ ಡಿಸಿಎಂ
ಲವ್‌ ಜಿಹಾದ್‌ ಕಾಯಿದೆ ವಿರುದ್ಧ ಹೈಕೋರ್ಟ್‌ನಲ್ಲಿ ಮುಸ್ಲಿಂ ಸಂಘಟನೆ ರಿಟ್‌ ಅರ್ಜಿ ಸಲ್ಲಿಸಿದೆ. ಅಂಥವರ ಮನೆಯ ಹೆಣ್ಣುಮಕ್ಕಳನ್ನು ಯಾರಾದರೂ ಬಲವಂತದ ಮದುವೆ, ಮತಾಂತರ ಮಾಡಿದರೆ ಸುಮ್ಮನೇ ಇರುವರೇ ಎಂದು ಪಟೇಲ್‌ ಪ್ರಶ್ನೆ ಹಾಕಿದ್ದಾರೆ. ಹಿಂದೂ ಹೆಣ್ಣುಮಕ್ಕಳನ್ನು ಹಿಂದೂ ಹುಡುಗರು, ಮುಸ್ಲಿಂ ಹೆಣ್ಣುಮಕ್ಕಳನ್ನು ಮುಸ್ಲಿಮರೇ ಮದುವೆಯಾದರೆ ಏನು ಸಮಸ್ಯೆ ಎಂದು ಕೂಡ ನಿತಿನ್‌ ಪಟೇಲ್‌ ಅವರು ಪ್ರಶ್ನಿಸಿದ್ದಾರೆ.
Admin
0
7
ಅಹಮದಾಬಾದ್‌: ಸಂವಿಧಾನ, ಪ್ರಜಾಪ್ರಭುತ್ವ, ಜಾತ್ಯತೀತತೆ ವಿಚಾರಗಳು ಈ ದೇಶದಲ್ಲಿ ಇರುವುದು ಹಾಗೂ ಆ ಬಗ್ಗೆ ಆಗಾಗ್ಗೆ ಚರ್ಚೆ ನಡೆಯುವುದು ಈ ನೆಲದಲ್ಲಿ ಹಿಂದೂಗಳು ಬಹುಸಂಖ್ಯಾತರಾಗಿ ಇರುವವರೆಗೆ ಮಾತ್ರ ಎಂದು ಗುಜರಾತ್ ಉಪಮುಖ್ಯಮಂತ್ರಿ ನಿತಿನ್‌ ಪಟೇಲ್‌ ಹೇಳಿದ್ದಾರೆ.
ಮುಂದಿನ ಒಂದು ಅಥವಾ ಎರಡು ಸಾವಿರ ವರ್ಷಗಳ ಬಳಿಕ ಹಿಂದೂಗಳ ಸಂಖ್ಯೆ ಕಡಿಮೆಯಾಗಿ, ಅನ್ಯಧರ್ಮೀಯರು ಬಹುಸಂಖ್ಯಾತರಾದರೆ ಈ ದೇಶದಲ್ಲಿ ಕೋರ್ಟ್‌ಗಳು, ಲೋಕಸಭೆ, ಗಾಳಿಯಲ್ಲಿ ಮಾಯವಾಗಿ ಹೋಗುತ್ತದೆ. ಏನೂ ಕೂಡ ಇರಲ್ಲ ಎಂದು ಅವರು ಕಾರ್ಯಕ್ರಮವೊಂದರಲ್ಲಿ ಜನರನ್ನು ಎಚ್ಚರಿಸಿದ್ದಾರೆ. ಗುಜರಾತ್ ಉಪಮುಖ್ಯಮಂತ್ರಿ ನಿತಿನ್‌ ಪಟೇಲ್‌ ಹೇಳಿ ಈ ಹೇಳಿಕೆ ಇದೀಗ ತೀವ್ರ ವಿವಾದಕ್ಕೆ ಗುರಿಯಾಗಿದೆ.
ತನ್ನ ಹೇಳಿಕೆ ವಿವಾದಕ್ಕೆ ಗುರಿಯಾಗುತ್ತಿದ್ದಂತೆ ಬಳಿಕ ಸಮಜಾಯಿಷಿ ನೀಡಲು ಯತ್ನಿಸಿರುವ ಗುಜರಾತ್ ಉಪಮುಖ್ಯಮಂತ್ರಿ ನಿತಿನ್‌ ಪಟೇಲ್‌ ಅವರು, ನಾನು ಹೇಳಿದ್ದು ಮುಸ್ಲಿಂರು ಹಾಗೂ ಕ್ರಿಶ್ಚಿಯನ್ನರ ಬಗ್ಗೆ ಅಲ್ಲ. ಅವರಲ್ಲಿ ಬಹಳ ಮಂದಿ ದೇಶಭಕ್ತರು ಇದ್ದಾರೆ ಎಂದಿದ್ದಾರೆ. ವಿಶ್ವ ಹಿಂದೂ ಪರಿಷತ್‌ (ವಿಎಚ್‌ಪಿ) ವತಿಯಿಂದ ಗಾಂಧಿನಗರದಲ್ಲಿ ನಿರ್ಮಿಸಲಾಗಿರುವ ಭಾರತ ಮಾತಾ ಮಂದಿರದಲ್ಲಿ ವಿಗ್ರಹ ಪ್ರತಿಷ್ಠಾಪನೆ ಕಾರ್ಯಕ್ರಮದಲ್ಲಿ ಡಿಸಿಎಂ ನಿತಿನ್‌ ಪಟೇಲ್‌ ಭಾಗಿಯಾಗಿದ್ದರು.
ಲವ್‌ ಜಿಹಾದ್‌ಗೆ ಕಿಡಿ: ಲವ್‌ ಜಿಹಾದ್‌ಗೆ ಅಂಕುಶ ಹಾಕುವ ಉದ್ದೇಶದಿಂದ ರಾಜ್ಯ ಸರಕಾರವು ಧರ್ಮ ಸ್ವಾತಂತ್ರ್ಯ ಕಾಯಿದೆಗೆ ತಿದ್ದುಪಡಿ ತರಲಾಗಿದೆ. ಆದರೆ ಕಾಯಿದೆ ವಿರುದ್ಧ ಹೈಕೋರ್ಟ್‌ನಲ್ಲಿ ಮುಸ್ಲಿಂ ಸಂಘಟನೆ ರಿಟ್‌ ಅರ್ಜಿ ಸಲ್ಲಿಸಿದೆ. ಅಂಥವರ ಮನೆಯ ಹೆಣ್ಣುಮಕ್ಕಳನ್ನು ಯಾರಾದರೂ ಬಲವಂತದ ಮದುವೆ, ಮತಾಂತರ ಮಾಡಿದರೆ ಸುಮ್ಮನೇ ಇರುವರೇ ಎಂದು ಪಟೇಲ್‌ ಪ್ರಶ್ನೆ ಹಾಕಿದ್ದಾರೆ. ಹಿಂದೂ ಹೆಣ್ಣುಮಕ್ಕಳನ್ನು ಹಿಂದೂ ಹುಡುಗರು, ಮುಸ್ಲಿಂ ಹೆಣ್ಣುಮಕ್ಕಳನ್ನು ಮುಸ್ಲಿಮರೇ ಮದುವೆಯಾದರೆ ಏನು ಸಮಸ್ಯೆ ಎಂದು ಕೂಡ ನಿತಿನ್‌ ಪಟೇಲ್‌ ಅವರು ಪ್ರಶ್ನಿಸಿದ್ದಾರೆ.
