ಹೆಚ್ಚು ಹಣ ಕೊಟ್ರೂ ಸಿಗುತ್ತಿಲ್ಲ ಗುಣಮಟ್ಟದ ತರಕಾರಿ; ದುಬಾರಿ ಬೆಲೆಗೆ ವ್ಯಾಪಾರ ನಿಲ್ಲಿಸಿದ ತಳ್ಳುಗಾಡಿಗಳು!

ಬೆಂಗಳೂರು: ದುಬಾರಿಯಾದ ತರಕಾರಿ ಬೆಲೆಯಿಂದಾಗಿ ತಳ್ಳುಗಾಡಿಗಳು, ಇತರೆ ಸಣ್ಣ ಪುಟ್ಟ ತರಕಾರಿ ಮಾರಾಟ ಮಳಿಗೆಗಳು ಕಳೆದ ಸುಮಾರು 15 ದಿನಗಳಿಂದ ತರಕಾರಿ ವ್ಯಾಪಾರವನ್ನೇ ನಿಲ್ಲಿಸಿವೆ. ತರಕಾರಿ ಈ ಹಿಂದೆ ಪೂರೈಕೆಯಾಗುತ್ತಿದ್ದ ಪ್ರಮಾಣಕ್ಕಿಂತ ಶೇ.40-50ರಷ್ಟು ಇಳಿಕೆಯಾಗಿದೆ. ಹೀಗಾಗಿ, ಬೆಲೆ ಏರಿಕೆಯಾಗಿದ್ದು, ಸಣ್ಣ ವ್ಯಾಪಾರಿಗಳು ತರಕಾರಿ ವ್ಯಾಪಾರವನ್ನೇ ನಿಲ್ಲಿಸಿದ್ದಾರೆ. ಇದರಿಂದಾಗಿ ಕೆಲವು ಬಡಾವಣೆಗಳಲ್ಲಿ ಗ್ರಾಹಕರು ಬೇಕಾದ ತರಕಾರಿ ಹುಡುಕಿಕೊಂಡು ಹೋದರೂ ಸಿಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ‘ನಿರಂತರ ಮಳೆಯಿಂದಾಗಿ ಟೊಮೆಟೊ, ಕ್ಯಾಪ್ಸಿಕಂ ಮತ್ತಿತರ ತಧಿರಕಾರಿಗಳಿಗೆ ಸಗಟು ದರದಲ್ಲೇ 90 ರೂ. ಕೊಡಬೇಕು. ನಾವು ಅವುಗಳನ್ನು ತಂದು ಕೆ.ಜಿ.ಗೆ 120- 150 ರೂ.ವರೆಗೆ ಮಾರಬೇಕು. ಸಾಮಾನ್ಯ ಜನರು ಅಷ್ಟು ದುಬಾರಿ ಕೊಟ್ಟು ಖರೀದಿಸುವುದಿಲ್ಲ. ಮಳೆಯಿಂದಾಗಿ ತರಕಾರಿ ತೊಟ್ಟುಗಳಲ್ಲಿ ನೀರು ಸೇರಿಕೊಂಡು ಒಳಗಡೆ ಕೊಳೆಯುತ್ತದೆ. ಹಾಗಾಗಿ ತರಕಾರಿ ತಂದ ದಿನವೇ ಮಾರಾಟವಾಗಬೇಕು. ಮೊದಲಾಗಿದ್ದರೆ ತರಕಾರಿ ಉಳಿದರೂ ಒಂದೆರಡು ದಿನ ಇಟ್ಟು ಮಾರಬಹುದಿತ್ತು. ಹೀಗಾಗಿ ಸದ್ಯ ಆ ವ್ಯಾಪಾರವನ್ನೇ ನಿಲ್ಲಿಸಿದ್ದೇವೆ’ ಎನ್ನುತ್ತಾರೆ ವ್ಯಾಪಾರಿಗಳು. ಮಾಲ್‌ಗಳಲ್ಲಿ ಎಷ್ಟಾದರೂ ಕೊಡುವ ಜನರಿದ್ದಾರೆ‘ಮಾಲ್‌ಗಳಲ್ಲಾದರೆ ಎಷ್ಟೇ ದುಬಾರಿಯಾದರೂ ಜನ ಖರೀದಿಸುತ್ತಾರೆ. ಆದರೆ, ನಾವು ಮಾರುವ ತರಕಾರಿ ಖರೀದಿಸುವ ವರ್ಗ ಅಷ್ಟು ಹಣ ಕೊಡಲು ಸಿದ್ಧರಿಲ್ಲ. ಹೀಗಾಗಿ ವ್ಯಾಪಾರವನ್ನೇ ನಿಲ್ಲಿಸಿದ್ದೇವೆ ಎನ್ನುತ್ತಾರೆ ಚಾಮರಾಜಪೇಟೆ ಬಳಿಯ ತಳ್ಳುಗಾಡಿ ತರಕಾರಿ ವ್ಯಾಪಾರಿ ಶಿವು. ಕಾರ್ತಿಕ ಮಾಸದ ಹಿನ್ನೆಲೆಯಲ್ಲಿ ನಾನಾ ಶುಭ ಕಾರ್ಯಕ್ರಮಗಳು ನಡೆಯುತ್ತಿವೆ. ಹೀಗಾಗಿ ತರಕಾರಿಗೆ ಬೇಡಿಕೆಯಿದೆ. ಆದರೆ ಬೇಡಿಕೆಗೆ ತಕ್ಕಂತೆ ತರಕಾರಿ ಪೂರೈಕೆಯಾಗದೆ ಬೆಲೆಗಳು ಗಗನಕ್ಕೇರಿವೆ. ಸೊಪ್ಪುಗಳೂ ಸಿಗುತ್ತಿಲ್ಲಗುಣಮಟ್ಟದ ಸೊಪ್ಪುಗಳೇ ಮಾರುಕಟ್ಟೆಯಲ್ಲಿ ಸಿಗುತ್ತಿಲ್ಲ. ಸೊಪ್ಪು ಒಂದು ಕಂತೆಗೆ 30-40 ರೂ. ಬೆಲೆ ಇದೆ. ಆದರೆ, ಕಂತೆಯ ಒಳಭಾಗದಲ್ಲಿ ಅರ್ಧದಷ್ಟು ಕೊಳೆತಿರುತ್ತದೆ. ಗ್ರಾಹಕರು ಪ್ರಶ್ನೆ ಮಾಡುವಂತೆಯೇ ಇಲ್ಲ. ಯಾಕೆಂದರೆ ಮಳೆಯಲ್ಲಿ ಬರುವುದೇ ಆ ಸೊಪ್ಪು ಎನ್ನುತ್ತಾರೆ ವ್ಯಾಪಾರಿಗಳು. ಹಾಪ್‌ಕಾಮ್ಸ್‌ನಲ್ಲಿ ಒಂದು ಕೆ.ಜಿ. ಮೆಂತ್ಯ, ದಂಟು, ಸಬ್ಬಸಿಗೆ ಮತ್ತಿತರ ಸೊಪ್ಪುಗಳ ದರ 100 ರೂ. ದಾಟಿದೆ. ವ್ಯಾಪಾರಿಗಳು ಏನು ಹೇಳುತ್ತಾರೆ? ಈ ಹಿಂದೆ ಬೆಂಗಳೂರು ನಗರಕ್ಕೆ ಸುಮಾರು 800-900 ಗಾಡಿ ತರಕಾರಿ ಬರುತ್ತಿತ್ತು. ಆದರೆ ಎರಡು-ಮೂರು ವಾರಗಳಿಂದ ತರಕಾರಿ ಪೂರೈಕೆಯಲ್ಲಿ ಶೇ.40-50ರಷ್ಟು ಕಡಿಮೆಯಾಗಿದೆ. ಮಳೆಯಿಂದಾಗಿ ತರಕಾರಿ ಹೆಚ್ಚು ಬರುತ್ತಿಲ್ಲ. ಬಂದರೂ, ಗುಣಮಟ್ಟ ಹೊಂದಿರುವುದಿಲ್ಲ ಎನ್ನುತ್ತಾರೆ ಫೋರ್‌ ಸ್ಟಾರ್‌ ಗ್ರೂಫ್ಸ್‌ ಟ್ರೇಡರ್ಸ್‌ನ ಸಗಟು ಮಾರಾಟಗಾರ ಪ್ರಕಾಶ್‌. ವ್ಯಾಪಾರಿಗಳು ಈ ಮೊದಲು ಎರಡರಿಂದ ಮೂರು ಸಾವಿರ ರೂ. ಬಂಡವಾಳಕ್ಕೆ ತರಕಾರಿ ತಂದು ಮಾರಿದರೆ ಸುಮಾರು 300 ರೂ. ಲಾಭ ಸಿಗುತ್ತಿತ್ತು. ಇದೀಗ ಮೂರು ಸಾವಿರ ರೂ.ಗೆ ತಂದರೂ, ಅಸಲು ಕೂಡ ಸಿಗುವುದಿಲ್ಲ. ಹೀಗಾಗಿ ತರಕಾರಿ, ಹಣ್ಣಿನ ವ್ಯಾಪಾರದಿಂದ ಶೇ.25-30ರಷ್ಟು ವ್ಯಾಪಾರಿಗಳು ವಿಮುಖರಾಗಿದ್ದಾರೆ ಎಂದು ಕರ್ನಾಟಕ ಬೀದಿ ಬದಿ, ವ್ಯಾಪಾರಿ ಸಂಘಟನೆಗಳ ಒಕ್ಕೂಟದ ರಾಜ್ಯಾಧ್ಯಕ್ಷ ಸಿ.ಇ. ರಂಗಸ್ವಾಮಿ ಹೇಳುತ್ತಾರೆ.