ಸೆನ್ಸೆಕ್ಸ್‌ ಜೈತಯಾತ್ರೆ, 60,000 ಅಂಕಗಳ ಗಡಿ ದಾಟಿದ ಬಾಂಬೆ ಷೇರು ಮಾರುಕಟ್ಟೆ ಸೂಚ್ಯಂಕ

ಮುಂಬಯಿ: ಇದೇ ಮೊದಲ ಬಾರಿಗೆ ಬಾಂಬೆ ಸಂವೇದಿ ಸೂಚ್ಯಂಕ 60,000 ಅಂಕಗಳ ಗಡಿ ದಾಟಿ ಹೊಸ ದಾಖಲೆ ಬರೆದಿದೆ. ಶುಕ್ರವಾರ ವಹಿವಾಟು ಆರಂಭಿಸುತ್ತಿದ್ದಂತೆ ಸೂಚ್ಯಂಕ 60,000 ಅಂಕಗಳ ಗಡಿ ದಾಟಿತು. ದಿನದಂತ್ಯಕ್ಕೆ ಸ್ವಲ್ಪ ಇಳಿಕೆ ಕಂಡರೂ 60,048.47 ಅಂಕಗಳಿಗೆ ದಿನದ ವಹಿವಾಟು ಮುಗಿಸಿತು. ಒಟ್ಟಾರೆ ಶುಕ್ರವಾರ ಸೆನ್ಸೆಕ್ಸ್‌ 163.11 ಅಂಕ ಅಥವಾ ಶೇ. 0.27ರಷ್ಟು ಏರಿಕೆ ಕಂಡಿತು. ಇನ್ನೊಂದೆಡೆ 30.25 ಅಂಕ ಮೇಲೇರಿ ದಿನದಂತ್ಯಕ್ಕೆ 17,853.20 ಅಂಕಗಳಿಗೆ ಸ್ಥಿರವಾಯಿತು. ಏಷ್ಯದಲ್ಲಿ ಕೆಲವು ಸೂಚ್ಯಂಕಗಳು ಏರಿಕೆಯಾದರೆ, ಇನ್ನು ಕೆಲವು ಇಳಿಕೆ ದಾಖಲಿಸಿದವು. ಜಪಾನ್‌ನ ನಿಕ್ಕಿ ಶೇ. 2.06ರಷ್ಟು ಏರಿಕೆ ದಾಖಲಿಸಿದರೆ, ಹಾಂಕಾಂಗ್‌ನ ಹ್ಯಾಂಗ್‌ ಸೆಂಗ್‌ ಶೇ. 2.45ರಷ್ಟು ಇಳಿಕೆ ಕಂಡಿತು. ಇನ್ಫೋಸಿಸ್‌, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಏಷ್ಯನ್‌ ಪೇಂಟ್ಸ್‌, ಎಚ್‌ಡಿಎಫ್‌ಸಿ ಮತ್ತು ಐಸಿಐಸಿಐ ಬ್ಯಾಂಕ್‌ ಷೇರುಗಳು ಗಳಿಕೆ ದಾಖಲಿಸಿದ್ದರಿಂದ ಷೇರು ಮಾರುಕಟ್ಟೆ ಸೂಚ್ಯಂಕಗಳು ಮತ್ತೆ ಮೇಲೇರಿದವು. ಕೊರೊನಾ ಲಸಿಕೆ ಅಭಿಯಾನ ವೇಗ ಪಡೆದುಕೊಂಡಿರುವುದು, ಜತೆಗೆ ಆರ್ಥಿಕ ಚಟುವಟಿಕೆಗಳು ಚೇತರಿಸಿಕೊಳ್ಳುತ್ತಿರುವುದು ಹೂಡಿಕೆದಾರರ ಮೇಲೆ ಧನಾತ್ಮಕ ಪರಿಣಾಮ ಬೀರಿದೆ. ಆರಂಭದಲ್ಲಿ ದೇಶದಲ್ಲಿ ಕೊರೊನಾ ವೈರಸ್‌ ಕಾಣಿಸಿಕೊಂಡಿದ್ದ ಸಂದರ್ಭದಲ್ಲಿ ಸೆನ್ಸೆಕ್ಸ್‌ ಮಾರ್ಚ್‌ 24, 2020ರಂದು 25,638ಕ್ಕೆ ಇಳಿಕೆಯಾಗಿತ್ತು. ಬಳಿಕ ಕೇವಲ 18 ತಿಂಗಳಲ್ಲಿ ಶೇ. 125ಕ್ಕೂ ಹೆಚ್ಚು ಏರಿಕೆ ಕಂಡಿದ್ದು ಈಗ 60,000 ಅಂಕಗಳ ಗಡಿ ದಾಟಿದೆ. ಬಿಎಸ್‌ಇ ಟೆಲಿಕಾಂ ಇಂಡೆಕ್ಸ್‌ ಶೇ. 3ರಷ್ಟು ಏರಿಕೆ ದಾಖಲಿಸಿದೆ. ಇದರ ಜತೆಗೆ ಐಟಿ, ಕನ್ಸೂಮರ್‌ ಡ್ಯುರೇಬಲ್ಸ್‌, ಆಟೋ ಮತ್ತು ರಿಯಾಲ್ಟಿ ಷೇರುಗಳಿಗೂ ಶುಕ್ರವಾರ ಬೇಡಿಕೆ ಕಂಡು ಬಂತು. ಇದೇ ವೇಳೆ ಮೆಟಲ್‌, ಆಯಿಲ್‌ & ಗ್ಯಾಸ್‌, ಪವರ್‌, ಎಫ್‌ಎಂಸಿಜಿ ಷೇರುಗಳ ಮಾರಾಟಕ್ಕೆ ಒತ್ತಡವೂ ಕಂಡು ಬಂತು. ಶುಕ್ರವಾರ ಬೆಂಗಳೂರು ಮೂಲದ ವಾಹನಗಳ ಬಿಡಿಭಾಗಗಳನ್ನು ತಯಾರಿಸುವ ಸನ್ಸೇರಾ ಇಂಜಿನಿಯರಿಂಗ್‌ ಷೇರು ಮಾರುಕಟ್ಟೆ ಪ್ರವೇಶಿಸಿತು. ಆರಂಭಿಕ ಕೊಡುಗೆ ದರವಾದ 744 ರೂಪಾಯಿಗಿಂತ ಶೇ. 8.62 ರಷ್ಟು ಬೆಲೆಯನ್ನು ಮೊದಲ ದಿನವೇ ಕಂಪನಿ ಪಡೆದುಕೊಂಡಿತು. ದಿನದಂತ್ಯಕ್ಕೆ ಕಂಪನಿ ಷೇರು ಬೆಲೆ 811.5 ರೂ.ಗೆ ಏರಿಕೆಯಾಗಿದೆ. ನಿಫ್ಟಿಯಲ್ಲಿ ಏಷ್ಯನ್‌ ಪೇಂಟ್‌ ಷೇರುಗಳು ಶೇ. 3.74ರಷ್ಟು ಮೌಲ್ಯ ವೃದ್ಧಿಸಿಕೊಂಡರೆ, ಐಷರ್‌ ಮೋಟಾರ್ಸ್‌, ಮಹೀಂದ್ರಾ & ಮಹೀಂದ್ರಾ, ಎಚ್‌ಸಿಎಲ್‌ ಟೆಕ್ನಾಲಜೀಸ್‌, ಭಾರ್ತಿ ಏರ್‌ಟೆಲ್‌, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಮಾರುತಿ ಸುಜುಕಿ, ಗ್ರಾಸಿಮ್‌ ಇಂಡಸ್ಟ್ರೀಸ್‌, ಇನ್ಫೋಸಿಸ್‌ ಮತ್ತು ಐಸಿಐಸಿಐ ಬ್ಯಾಂಕ್‌ ಷೇರುಗಳು ಶೇ. 0.7ರಿಂದ ಶೇ. 3ರವರೆಗೆ ಗಳಿಕೆ ದಾಖಲಿಸಿದವು. ಇದೇ ವೇಳೆ ಟಾಟಾ ಸ್ಟೀಲ್‌, ಜೆಎಸ್‌ಡಬ್ಲ್ಯೂ ಸ್ಟೀಲ್‌, ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ದಿವೀಸ್‌ ಲ್ಯಾಬ್ಸ್‌, ಶ್ರೀ ಸಿಮೆಂಟ್‌, ಆಕ್ಸಿಸ್‌ ಬ್ಯಾಂಕ್‌, ಐಟಿಸಿ, ಎನ್‌ಟಿಪಿಸಿ, ಒಎನ್‌ಜಿಸಿ ಮತ್ತು ಟಾಟಾ ಕನ್ಸೂಮರ್‌ ಪ್ರೊಡಕ್ಟ್ಸ್‌ ಷೇರುಗಳು ಕುಸಿತ ಕಂಡವು. ಬಿಎಸ್‌ಇ ಸೆನ್ಸೆಕ್ಸ್‌ನ ಇತಿಹಾಸ ಮತ್ತು ಸ್ವಾರಸ್ಯಕರ ಸಂಗತಿಗಳ ವಿವರ ಇಲ್ಲಿದೆ ಸ್ಥಾಪನೆ: 1 ಜನವರಿ 1986 ನಿರ್ವಾಹಕ: ಏಷ್ಯಾ ಇಂಡೆಕ್ಸ್‌ ಪ್ರೈ. ಲಿಮಿಟೆಡ್‌ ವಿನಿಮಯ ಕೇಂದ್ರ: ಬಿಎಸ್‌ಇ ಮೂಲ ವರ್ಷ: 1978-79 ಮಾರುಕಟ್ಟೆ ಬಂಡವಾಳ ಮೌಲ್ಯ: 2,55,00,300 ಕೋಟಿ ರೂ. ವಹಿವಾಟು ಸಮಯ: ಬೆಳಗ್ಗೆ 9.15ರಿಂದ ಸಂಜೆ 3.30 ಸೋಮವಾರದಿಂದ ಶುಕ್ರವಾರದ ತನಕ ಸೆನ್ಸೆಕ್ಸ್‌ ಹೆಸರು ಸೂಚಿಸಿದವರು: ದೀಪಕ್‌ ಮೊಹಿನಿ. ಷೇರು ಮಾರುಕಟ್ಟೆ ವಿಶ್ಲೇಷಕರು. 1000 ಅಂಕ ತಲುಪಿದ್ದು ಎಂದು? ಏಕೆ? 1990ರ ಜುಲೈ 25ಕ್ಕೆ ಸೆನ್ಸೆಕ್ಸ್‌ 1000 ಅಂಕಗಳನ್ನು ತಲುಪಿತು. ಆಗ ಉತ್ತಮ ಮುಂಗಾರು, ಕಂಪನಿಗಳ ಆದಾಯ ಕಾರಣವಾಗಿತ್ತು. 10,000 ಅಂಕಗಳ ಮೈಲುಗಲ್ಲು ಸೆನ್ಸೆಕ್ಸ್‌ 2006ರ ಫೆಬ್ರವರಿ 6ಕ್ಕೆ ಮೊದಲ ಸಲ 10,000 ಅಂಕಗಳ ಮೈಲುಗಲ್ಲನ್ನು ಕ್ರಮಿಸಿತು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರ ಖರೀದಿ ಭರಾಟೆ ಪ್ರಭಾವ ಬೀರಿತು. 20,000ಕ್ಕೆ ಜಿಗಿತ 2007ರ ಡಿಸೆಂಬರ್‌ 11ಕ್ಕೆ ಸೆನ್ಸೆಕ್ಸ್‌ ಮೊದಲ ಸಲ 20,000 ಅಂಕಗಳ ಗಡಿ ದಾಟಿ ಹೂಡಿಕೆದಾರರು ಸಂಭ್ರಮಿಸುವಂತಾಯಿತು. ವಿದೇಶಿ ಸಾಂಸ್ಥಿಕ ಹೂಡಿಕೆ, ಕಂಪನಿಗಳ ಆದಾಯ ವೃದ್ಧಿ ಪರಿಣಾಮ ಬೀರಿತು. 30000ಕ್ಕೆ ಏರಿಕೆ 2015ರ ಮಾರ್ಚ್ 4ರಂದು ಆರ್‌ಬಿಐ ರೆಪೊ ದರ ಕಡಿತ ಮಾಡಿದ ನಂತರ ಸೆನ್ಸೆಕ್ಸ್‌ 30,000 ಅಂಕಕ್ಕೇರಿತು. 40,000ಕ್ಕೆ ವೃದ್ಧಿ 2019ರ ಮೇ 23ರಂದು ಸೆನ್ಸೆಕ್ಸ್‌ ಮೊದಲ ಸಲ 40 ಸಾವಿರ ಅಂಕಗಳ ಗಡಿ ದಾಟಿತು. ಲೋಕಸಭೆ ಚುನಾವಣೆ ಫಲಿತಾಂಶ ಪ್ರಭಾವ ಬೀರಿತ್ತು. 50,000ಕ್ಕೆ ಲಗ್ಗೆ 2021ರ ಜನವರಿ 21ರಂದು ಮೊದಲ ಬಾರಿಗೆ ಸೆನ್ಸೆಕ್ಸ್‌ 50 ಸಾವಿರ ಅಂಕಗಳನ್ನು ದಾಟಿತು. ಸೆನ್ಸೆಕ್ಸ್‌ ಕುಸಿತದ ಹಿನ್ನೋಟ ಬಿಎಸ್‌ಇ ಸೂಚ್ಯಂಕ ಸೆನ್ಸೆಕ್ಸ್‌ ತನ್ನ ಇತಿಹಾಸದಲ್ಲಿ ಪತನಕ್ಕೀಡಾಗಿದೆ. ಷೇರು ಪೇಟೆಯ ಏರಿಳಿತ ಸಹಜ ಪ್ರವೃತ್ತಿ. ಅಂಥ ಪ್ರಮುಖ ಕುಸಿತಗಳ ಪಟ್ಟಿ ಇಂತಿದೆ. * 1991ರಲ್ಲಿ ಷೇರು ದಲ್ಲಾಳಿ ಹರ್ಷದ್‌ ಮೆಹ್ತಾ, ಕೇತನ್‌ ಪರೇಖ್‌ ಒಳಗೊಂಡಿದ್ದ ಷೇರು ಹಗರಣಗಳು ಬಯಲಾದಾಗ ಷೇರು ಸೂಚ್ಯಂಕ ಪತನಕ್ಕೀಡಾಗಿತ್ತು. * 2004ರ ಮೇ 17ರಂದು ಯುಪಿಎ ಅಧಿಕಾರಕ್ಕೆ ಬಂದಾಗ ಬಿಎಸ್‌ಇ ಸೂಚ್ಯಂಕ ಶೇ.15.52 ಕುಸಿದಿತ್ತು. * 2008ರಲ್ಲೂ ಜಾಗತಿಕ ಆರ್ಥಿಕ ಹಿಂಜರಿತದ ಸಂದರ್ಭ ಸೂಚ್ಯಂಕ ಕುಸಿದಿತ್ತು. * 2020ರ ಮಾರ್ಚ್ 23ರಂದು ಕೋವಿಡ್‌ ನಿಯಂತ್ರಿಸಲು ಲಾಕ್‌ಡೌನ್‌ ಜಾರಿಯಾಗಿದ್ದಾಗ ಸೂಚ್ಯಂಕ ಜಾಗತಿಕ ಆರ್ಥಿಕ ಹಿಂಜರಿತದ ಭೀತಿಯಿಂದ ಕುಸಿದಿತ್ತು.