ಸಿದ್ದಾಪುರದ ಬೇಡ್ಕಣಿಯ ಶಾಲೆ, ಬೆಂಗಳೂರಿನಲ್ಲಿ ನಟ ಶರಣ್, ನಿಶ್ವಿಕಾ ನಾಯ್ಡು ಅಭಿನಯದ 'ಗುರು ಶಿಷ್ಯರು' ಸಿನಿಮಾ ಶೂಟಿಂಗ್

(ಹರೀಶ್‌ ಬಸವರಾಜ್‌) ಶರಣ್‌ ನಾಯಕರಾಗಿರುವ 'ಗುರು ಶಿಷ್ಯರು' ಸಿನಿಮಾ ತನ್ನ ಚಿತ್ರೀಕರಣದ ವಿಷಯದಲ್ಲಿ, ಕಥೆಯ ವಿಚಾರದಲ್ಲಿಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ಈ ಸಿನಿಮಾಗಾಗಿ ತಾಲೂಕು ಮಟ್ಟದ ಕ್ರೀಡಾಕೂಟವನ್ನು ಚಿತ್ರತಂಡದ ವತಿಯಿಂದ ಮರುಸೃಷ್ಟಿ ಮಾಡಲಾಗಿದ್ದು, ಶರಣ್‌ ಮತ್ತು ಅವರ ಶಿಷ್ಯರು ಪಾಲ್ಗೊಂಡಿದ್ದರು. ಮೈಸೂರು ಭಾಗದ ಹಳ್ಳಿಯೊಂದರಲ್ಲಿ1995ರ ಕಾಲಘಟ್ಟದಲ್ಲಿ ಸಿನಿಮಾದ ಕಥೆ ನಡೆಯುತ್ತದೆ. ಶರಣ್‌ ಮೊದಲ ಬಾರಿಗೆ ದೈಹಿಕ ಶಿಕ್ಷಕರ ಪಾತ್ರದಲ್ಲಿ ನಟಿಸಿದ್ದಾರೆ. ಶಿಕ್ಷಕರಾಗಿ ನಟಿಸುವುದು ವಿಶಿಷ್ಟ ಅನುಭವ ಎಂದು ಅವರು ಹೇಳಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಐದಾರು ಜನ ಶಿಷ್ಯರು ಮತ್ತು ದೈಹಿಕ ಶಿಕ್ಷಕರ ನಡುವೆ ನಡೆಯುವ ಬಾಂಧವ್ಯದ ಕಥೆಯನ್ನು ನಿರ್ದೇಶಕ ಜಡೇಶ್‌ ಕುಮಾರ್‌ ಹಂಪಿ ಹೇಳುತ್ತಿದ್ದಾರೆ. 'ಈಗಾಗಲೇ ಒಂದಷ್ಟು ಭಾಗವನ್ನು ಸಿದ್ದಾಪುರ ಬಳಿಯ ಬೇಡ್ಕಣಿಯ ಶಾಲೆಯಲ್ಲಿ ಚಿತ್ರೀಕರಿಸಲಾಗಿತ್ತು. ಎರಡನೇ ಹಂತವನ್ನು ಬೆಂಗಳೂರಿನಲ್ಲಿ ಶೂಟ್‌ ಮಾಡಿದ್ದೇವೆ. ಪಿಟಿ ಮಾಸ್ತರ್‌ ತಮ್ಮ ಶಿಷ್ಯರನ್ನು ಕರೆದುಕೊಂಡು ತಾಲೂಕು ಕ್ರೀಡಾಕೂಟಕ್ಕೆ ಬರುತ್ತಾರೆ. ಆ ಕ್ರೀಡಾಕೂಟದಲ್ಲಿಉಂಟಾಗುವ ತಮಾಷೆಯ ಸಂಗತಿಗಳನ್ನು ಮತ್ತು ಕ್ರೀಡಾಕೂಟದ ವ್ಯವಸ್ಥೆ ಹೇಗಿರುತ್ತದೆ ಎಂಬಂತಹ ದೃಶ್ಯಗಳನ್ನು ಚಿತ್ರೀಕರಿಸಿದ್ದೇವೆ. ಬೆಂಗಳೂರಿನಲ್ಲಿ ಮೈಸೂರು ಭಾಗದ 95ರ ಕಾಲಘಟ್ಟವನ್ನು ಸೃಷ್ಟಿ ಮಾಡಲಾಗಿತ್ತು. ಆಗಿನ ಕ್ರೀಡಾಕೂಟಗಳ ವ್ಯವಸ್ಥೆ, ಮಕ್ಕಳು ಪಡುತ್ತಿದ್ದ ಕಷ್ಟ, ಶಿಕ್ಷಕರ ಆಲೋಚನೆಗಳು ಎಲ್ಲವನ್ನೂ ನೈಜವಾಗಿ ಕಟ್ಟಿಕೊಡಲಾಗಿದೆ' ಎನ್ನುತ್ತಾರೆ ನಿರ್ದೇಶಕ ಜಡೇಶ್‌ ಕುಮಾರ್‌. ಈಗಾಗಲೇ ಒಂದು ವಾರ ಚಿತ್ರೀಕರಣ ಮಾಡಲಾಗಿದ್ದು, ಇನ್ನೂ 20 ದಿನಗಳ ಕಾಲ 'ಗುರು ಶಿಷ್ಯರು' ಸಿನಿಮಾದ ಶೂಟಿಂಗ್‌ ಬಾಕಿ ಇದೆ. ಪಿಟಿ ಮಾಸ್ತರ್‌ ಶರಣ್‌ಗೆ ಜೋಡಿಯಾಗಿ ನಟಿಸಿದ್ದಾರೆ. ಟಗರು, ಸಲಗ ಖ್ಯಾತಿಯ ಮಾಸ್ತಿ ಈ ಸಿನಿಮಾಗೆ ಸಂಭಾಷಣೆ ಬರೆದಿದ್ದಾರೆ. ಪಿಟಿ ಮಾಸ್ತರ್‌ ಹುಡುಗರನ್ನು ಕರೆದುಕೊಂಡು ತಾಲೂಕು ಮಟ್ಟದ ಕ್ರೀಡಾಕೂಟಕ್ಕೆ ಬರುವ ದೃಶ್ಯಗಳನ್ನು ಸೆರೆಹಿಡಿಯಲಾಗಿದೆ. 95ರಲ್ಲಿ ಕ್ರೀಡಾಕೂಟವನ್ನು ಇಲ್ಲಿ ಮತ್ತೆ ಕಟ್ಟಿಕೊಟ್ಟಿದ್ದೇವೆ. ಅದಕ್ಕಾಗಿ ಸಿಕ್ಕಾಪಟ್ಟೆ ವರ್ಕ್ ಮಾಡಲಾಗಿತ್ತು. ಕ್ರೀಡಾಕೂಟದಲ್ಲಿಆಗುತ್ತಿದ್ದ ಗಲಾಟೆ, ತಮಾಷೆ ಎಲ್ಲವನ್ನೂ ಇಲ್ಲಿ ತೋರಿಸುತ್ತಿದ್ದೇವೆ ಎಂದು ಹೇಳಿದ್ದಾರೆ ನಿರ್ದೇಶಕ ಜಡೇಶ್‌ ಕುಮಾರ್‌ ಹಂಪಿ