ಷೇರು ಮಾರುಕಟ್ಟೆಯಲ್ಲಿ ಹಬ್ಬದ ಕಳೆ, ಒಂದೇ ದಿನ 958 ಅಂಕ ಮೇಲೇರಿದ ಸೆನ್ಸೆಕ್ಸ್‌, 60,000 ದತ್ತ ದಾಗುಂಡಿ
ಗುರುವಾರ ಸೆನ್ಸೆಕ್ಸ್‌ 958 ಅಂಕ ಮೇಲೇರಿ 59,885.36 ಅಂಕಗಳಿಗೆ ದಿನದ ವಹಿವಾಟು ಮುಗಿಸಿತು. ಈ ಮೂಲಕ 60 ಸಾವಿರ ಅಂಕಗಳ ಗಡಿಗೆ ಬಂದು ನಿಂತಿದೆ. ನಿಫ್ಟಿ 50 ಸೂಚ್ಯಂಕ 176 ಅಂಕ ಏರಿಕೆ ಕಂಡು 17,823 ಅಂಕಗಳಿಗೆ ಸ್ಥಿರವಾಗಿದ್ದು, ಎರಡೂ ಸಾರ್ವಕಾಲಿಕ ದಾಖಲೆ ಮಟ್ಟಕ್ಕೆ ಏರಿಕೆಯಾಗಿವೆ.
Admin
0
7
ಮುಂಬಯಿ: ಭಾರತದ ಸೂಚ್ಯಂಕಗಳು ಗುರುವಾರ ರಾಕೆಟ್‌ ವೇಗದಲ್ಲಿ ಮೇಲೇರಿದ್ದು, ಹೊಸ ಸಾರ್ವಕಾಲಿಕ ದಾಖಲೆ ಮಟ್ಟಕ್ಕೆ ಏರಿಕೆಯಾಗಿವೆ.
ದಿನದ ವಹಿವಾಟಿನ ವೇಳೆ ಒಂದು ಹಂತದಲ್ಲಿ 1,030 ಅಂಕ ಮೇಲೇರಿ 59,957.25 ಅಂಕಗಳಿಗೆ ಏರಿಕೆಯಾಗಿ 60 ಸಾವಿರ ಅಂಕಗಳ ಅಂಚಿಗೆ ಏರಿಕೆಯಾಗಿತ್ತು. ನಂತರ ಸ್ವಲ್ಪ ಮಟ್ಟಿಗೆ ಇಳಿಕೆ ಕಂಡಿತು. ಒಟ್ಟಾರೆ ದಿನದಂತ್ಯಕ್ಕೆ 958 ಅಂಕ ಮೇಲೇರಿ 59,885.36 ಅಂಕಗಳಿಗೆ ದಿನದ ವಹಿವಾಟು ಮುಗಿಸಿತು. ಈ ಮೂಲಕ 60 ಸಾವಿರ ಅಂಕಗಳ ಗಡಿ ದಾಟಲು ಇನ್ನೊಂದೇ ಮೆಟ್ಟಿಲು ಬಾಕಿ ಉಳಿದಿದೆ.
ಇನ್ನೊಂದೆಡೆ 50 ಸೂಚ್ಯಂಕ 176 ಅಂಕ ಏರಿಕೆ ಕಂಡು 17,800 ಅಂಕಗಳ ಗಡಿ ದಾಟಿ 17,823 ಅಂಕಗಳಿಗೆ ಸ್ಥಿರವಾಯಿತು. ಬ್ಯಾಂಕಿಂಗ್‌, ಹಣಕಾಸು ಸೇವೆಗಳು ಹಾಗೂ ತೈಲ ಮತ್ತು ಗ್ಯಾಸ್‌ ಕಂಪನಿಗಳ ಷೇರುಗಳು ಭಾರಿ ಗಳಿಕೆ ದಾಖಲಿಸಿದ್ದೇ ಈ ಏರಿಕೆಗೆ ಪ್ರಮುಖ ಕಾರಣವಾಗಿದೆ.
ಅಮೆರಿಕದ ಫೆಡರಲ್‌ ರಿಸರ್ವ್‌ ನಿನ್ನೆ ರಾತ್ರಿ ತನ್ನ ಮಾಸಿಕ ಬಾಂಡ್ ಖರೀದಿಯನ್ನು ನವೆಂಬರ್‌ನಿಂದಲೇ ಆರಂಭಿಸಬಹುದೆಂದು ಹೇಳಿದೆ. ಜತೆಗೆ ನಿರೀಕ್ಷೆಗಿಂತ ವೇಗವಾಗಿ ಬಡ್ಡಿದರಗಳನ್ನು ಹೆಚ್ಚಿಸಬಹುದು ಎಂದೂ ಸೂಚಿಸಿದೆ. ಇದು ಮಾರುಕಟ್ಟೆ ಮೇಲೆ ನೇರ ಪರಿಣಾಮ ಬೀರಿದೆ.
ಸೆನ್ಸೆಕ್ಸ್‌ ಗುಚ್ಛದಲ್ಲಿ ರಿಲಯನ್ಸ್‌ ಇಂಡಸ್ಟ್ರೀಸ್‌, ಎಚ್‌ಡಿಎಫ್‌ಸಿ, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಇನ್ಫೋಸಿಸ್‌, ಐಸಿಐಸಿಐ ಬ್ಯಾಂಕ್‌, ಲಾರ್ಸೆನ್‌ ಆಂಡ್‌ ಟರ್ಬೋ ಗರಿಷ್ಠ ಗಳಿಕೆ ದಾಖಲಿಸಿದವು. ಇವು ಒಟ್ಟಾಗಿ ಸೆನ್ಸೆಕ್ಸ್‌ 750 ಅಂಕ ಮೇಲೇರಲು ಕೊಡುಗೆ ನೀಡಿವೆ.
ಮಾಧ್ಯಮ ವಲಯ ಹೊರತುಪಡಿಸಿ 15 ವಲಯಗಳಲ್ಲಿಯೂ ಖರೀದಿ ಚುರುಕಾಗಿತ್ತು. ಅದರಲ್ಲೂ ನಿಫ್ಟಿ ರಿಯಾಲ್ಟಿ ಇಂಡೆಕ್ಸ್‌ ಶೇ. 9ರಷ್ಟು ಗರಿಷ್ಠ ಏರಿಕೆ ದಾಖಲಿಸಿತು. ನೋಯ್ಡಾದ ಗೋದ್ರೆಜ್ ವುಡ್ಸ್ ಯೋಜನೆಯಲ್ಲಿ ದಾಖಲೆಯ ಮಾರಾಟವನ್ನು ಸಾಧಿಸಲಾಗಿದೆ ಎಂದು ಗೋದ್ರೆಜ್ ಪ್ರಾಪರ್ಟೀಸ್ ಹೇಳಿದ ಬಳಿಕ ರಿಯಲ್‌ ಎಸ್ಟೇಟ್‌ ವಲಯದ ಷೇರುಗಳಿಗೆ ಬೇಡಿಕೆ ಹೆಚ್ಚಾಗಿದ್ದು, ಸತತ ಎರಡನೇ ದಿನವೂ ಟ್ರೆಂಡ್‌ ಮುಂದುವರಿದಿದೆ.
ನಿಫ್ಟಿಯಲ್ಲಿ ಬ್ಯಾಂಕ್‌, ಹಣಕಾಸು ಸೇವೆಗಳು, ಲೋಹ, ಐಟಿ, ಪಿಎಸ್‌ಯು ಬ್ಯಾಂಕ್‌, ಖಾಸಗಿ ಬ್ಯಾಂಕ್‌, ಕನ್ಸೂಮರ್‌ ಡ್ಯುರೇಬಲ್ಸ್‌, ತೈಲ & ಗ್ಯಾಸ್‌ ಸೂಚ್ಯಂಕಗಳು ಶೇ. 1.5 ರಿಂದ 2.5ರವರೆಗೆ ಏರಿಕೆ ದಾಖಲಿಸಿದವು. ಒಟ್ಟಾರೆ ನಿಫ್ಟಿ ಮಿಡ್‌ಕ್ಯಾಪ್‌ 100 ಸೂಚ್ಯಂಕ ಶೇ. 1.5ರಷ್ಟು ಏರಿಕೆ ಕಂಡರೆ, ನಿಫ್ಟಿ ಸ್ಮಾಲ್‌ಕ್ಯಾಪ್‌ 100 ಸೂಚ್ಯಂಕ ಶೇ. 0.8ರಷ್ಟು ಗಳಿಕೆ ದಾಖಲಿಸಿದೆ.
ನಿಫ್ಟಿಯಲ್ಲಿ ಬಜಾಜ್‌ ಫಿನ್‌ಸರ್ವ್‌ ಗರಿಷ್ಠ ಗಳಿಕೆ ದಾಖಲಿಸಿದ ಕಂಪನಿಯಾಗಿದ್ದು, ಕಂಪನಿಯ ಷೇರುಗಳು ಶೇ. 4.63ರಷ್ಟು ಮೌಲ್ಯ ಹೆಚ್ಚಿಸಿಕೊಂಡಿದ್ದು ದಾಖಲೆಯ 18,430 ರೂ.ಗೆ ಹೆಚ್ಚಳವಾಗಿದೆ. ಹಿಂಡಾಲ್ಕೋ, ಲಾರ್ಸೆನ್‌ ಆಂಡ್‌ ಟರ್ಬೋ, ಟಾಟಾ ಮೋಟಾರ್ಸ್‌, ಕೋಲ್‌ ಇಂಡಿಯಾ, ಎಚ್‌ಡಿಎಫ್‌ಸಿ, ಆಕ್ಸಿಸ್‌ ಬ್ಯಾಂಕ್‌, ಒಎನ್‌ಜಿಸಿ, ಇಂಡಸ್‌ಇಂಡ್‌ ಬ್ಯಾಂಕ್‌, ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಎಚ್‌ಡಿಎಫ್‌ಸಿ ಬ್ಯಾಂಕ್‌, ರಿಲಯನ್ಸ್‌ ಇಂಡಸ್ಟ್ರೀಸ್‌ ಷೇರುಗಳು ಶೇ. 2.4 ರಿಂದ ಶೇ. 4.5ರಷ್ಟು ಮೌಲ್ಯ ವೃದ್ಧಿಸಿಕೊಂಡವು.
ಇದರ ನಡುವೆಯೂ ಎಚ್‌ಡಿಎಫ್‌ಸಿ ಲೈಫ್‌, ಡಾ. ರೆಡ್ಡೀಸ್‌ ಲ್ಯಾಬ್ಸ್‌, ಜೆಎಸ್‌ಡಬ್ಲ್ಯೂ ಸ್ಟೀಲ್‌, ಟಾಟಾ ಕನ್ಸೂಮರ್‌ ಪ್ರೊಡಕ್ಟ್ಸ್‌, ಐಟಿಸಿ, ನೆಸ್ಟ್ಲೇ ಇಂಡಿಯಾ ಮತ್ತು ಬ್ರಿಟಾನಿಯಾ ಇಂಡಸ್ಟ್ರೀಸ್‌ ಷೇರುಗಳು ಇಳಿಕೆ ಕಂಡವು. ಒಟ್ಟಾರೆ 1,974 ಷೇರುಗಳು ಗಳಿಕೆ ದಾಖಲಿಸಿದರೆ, 1,266 ಷೇರುಗಳು ಇಳಿಕೆ ಕಂಡವು.
