ಶೀಘ್ರದಲ್ಲೇ ಚಂಪಕ ಸರಸಿ ಪುನಶ್ಚೇತನ ಕಾರ್ಯ ಪೂರ್ಣ: ಜನವರಿಯಲ್ಲಿ ನಟ ಯಶ್ ಭೇಟಿ
ಪಾಳು ಬಿದಿದ್ದ ಶಿವಮೊಗ್ಗದ ಚಂಪಕ ಸರಸಿ ಎಂಬ ಐತಿಹಾಸಿಕ ಕೆರೆಯ ಪುನಶ್ಚೇತನ ಕಾಮಗಾರಿ ಇದೀಗ ಭರದಿಂದ ಸಾಗುತ್ತಿದೆ. ಅದ್ಭುತ ಪ್ರೇಮ ಕತೆಯೊಂದನ್ನು ಸುಮಾರು 400 ವರ್ಷಗಳ ಐತಿಹ್ಯವಿರುವ ಈ ಪುಷ್ಕರಣಿ ಹೊಂದಿದೆ. ಶೀಘ್ರದಲ್ಲಿ ಈ ಪುಷ್ಕರಣಿಯ ಪುನಶ್ಚೇತನದ ಕೆಲಸ ಪೂರ್ಣಗೊಳ್ಳುವ ನಿರೀಕ್ಷೆ ಇದ್ದು, ಯಶ್ ಕೂಡ ಇಲ್ಲಿಗೆ ಭೇಟಿ ನೀಡಲಿದ್ದಾರೆ.
Admin
0
7
ರಾಕಿಂಗ್ ಸ್ಟಾರ್ ತೆರೆಮೇಲೆ ಮಾತ್ರವಲ್ಲ, ನಿಜ ಜೀವನದಲ್ಲೂ ಹೀರೋ ಆಗಿ ಅನೇಕ ಜನಪರ ಕಾರ್ಯಗಳನ್ನು ಕೈಗೊಳ್ಳುತ್ತಿದ್ದಾರೆ. ತಮ್ಮ ಚಾರಿಟಿ ಟ್ರಸ್ಟ್ ಮೂಲಕ ಜಿಲ್ಲೆಯ ಸಾಗರ ತಾಲೂಕಿನ ಆನಂದಪುರದ ಬಳಿ ಇರುವ ಐತಿಹಾಸಿಕ ಪುಷ್ಕರಣಿಯ ಪುನಶ್ಚೇತನದ ಹೊಣೆಯನ್ನು ನಟ ಯಶ್ ಹೊತ್ತಿದ್ದಾರೆ.
ಪಾಳು ಬಿದಿದ್ದ ಶಿವಮೊಗ್ಗದ ಚಂಪಕ ಸರಸಿ ಎಂಬ ಐತಿಹಾಸಿಕ ಕೆರೆಯ ಪುನಶ್ಚೇತನ ಕಾಮಗಾರಿ ಇದೀಗ ಭರದಿಂದ ಸಾಗುತ್ತಿದೆ. ಅದ್ಭುತ ಪ್ರೇಮ ಕತೆಯೊಂದನ್ನು ಸುಮಾರು 400 ವರ್ಷಗಳ ಐತಿಹ್ಯವಿರುವ ಈ ಪುಷ್ಕರಣಿ ಹೊಂದಿದೆ. ಶೀಘ್ರದಲ್ಲಿ ಈ ಪುಷ್ಕರಣಿಯ ಪುನಶ್ಚೇತನದ ಕೆಲಸ ಪೂರ್ಣಗೊಳ್ಳುವ ನಿರೀಕ್ಷೆ ಇದ್ದು, ಯಶ್ ಕೂಡ ಇಲ್ಲಿಗೆ ಭೇಟಿ ನೀಡಲಿದ್ದಾರೆ.
ಸಾಗರ ತಾಲೂಕಿನ ಆನಂದಪುರದಿಂದ ಶಿಕಾರಿಪುರ ಹೋಗುವ ಮಾರ್ಗದಲ್ಲಿ ಮಲ್ಲಂದೂರು ಎಂಬ ಹಳ್ಳಿಯ ಕಾಡುಗಳ ಮಧ್ಯೆ ಇರುವ ಕೆರೆ ‘ಚಂಪಕ ಸರಸಿ’. ಅರಣ್ಯ ಒತ್ತುವರಿಯಿಂದಾಗಿ ಇದು ಪಾಳು ಬಿದ್ದಂತಾಗಿತ್ತು. ಅಲ್ಲದೇ ಕೊಳದ ಸುತ್ತ ಮುತ್ತಲಿನ ಪ್ರದೇಶ ಅಕ್ರಮ ಚಟುವಟಿಕೆಗಳ ಅಡ್ಡವಾಗಿತ್ತು. ಅಸಲಿಗೆ, ಈ ಚಂಪಕ ಸರಸಿ ಕರೆಯ ಹಿಂದೆ ಕೆಳದಿ ರಾಜರ ಕಾಲದ ರೋಚಕ ಪ್ರೇಮ ಕಥೆಯಿದ್ದು, ಇತಿಹಾಸದ ಪರಿವೇ ಇಲ್ಲದ ಜನ ಇದನ್ನು ಹಾಳುಕೊಂಪೆಯನ್ನಾಗಿ ಮಾಡಿದ್ದರು. ಯಶ್‌ಗೆ ಈ ಕೊಳವನ್ನ ರಕ್ಷಣೆ ಮಾಡಬೇಕು ಎಂದೆನಿಸಿದ್ದೂ ಕೂಡ ಇದಕ್ಕೆ ಸಂಬಂಧಿಸಿದ ಪ್ರೇಮಕಥೆಯನ್ನ ಕೇಳಿದ ಮೇಲೆ ಎನ್ನುವುದೂ ಸಹ ಕುತೂಹಲದ ಸಂಗತಿ.
ಮಹಾಸತಿ ಮಠ, ಮಹಾಂತಿ ಮಠ ಎಂದೂ ಕರೆಯಿಸಿಕೊಳ್ಳುವ ಈ ಕೊಳಕ್ಕೆ ಇತಿಹಾಸದಲ್ಲಿ ದಾಖಲಾದ ಹೆಸರು ಚಂಪಕ ಸರಸಿ. ಚಂಪಕ ಎಂದರೆ ಸಂಪಿಗೆ ಹಾಗೂ ಸರಸಿ ಎಂದರೆ ಕೊಳ. ಈ ಹಿಂದೆ ಈ ಕೊಳದ ಸುತ್ತ ಸಂಪಿಗೆ ಮರಗಳಿದ್ದವು ಎನ್ನುವುದೂ ಕೂಡ ಇತಿಹಾಸದ ಭಾಗ. ಆದರೆ ಚಂಪಕ ಎಂಬುದು 16 ನೇ ಶತಮಾನದಲ್ಲಿದ್ದ ಯುವತಿಯ ಹೆಸರು. ಈಕೆ ಬೆಸ್ತರ ಹುಡುಗಿ ಎಂದು ಆನಂದಪುರ ಮೂಲದ ಲೇಖಕ ಅರುಣ್‌ ಪ್ರಸಾದ್‌ ತಮ್ಮ ಬೆಸ್ತರ ರಾಣಿ ಚಂಪಕ ಎಂಬ ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ.
ಈ ಕಥೆ ಶುರುವಾಗೋದು ಚಂಪಕಳಿಂದಲೇ.. ಕೆಳದಿಯ ರಾಜ ಹಿರಿಯ ವೆಂಕಟಪ್ಪ ನಾಯಕ ಮುಂಜಾನೆ ಈ ಮಾರ್ಗದಲ್ಲಿ ಸಂಚರಿಸುತ್ತಿರುವಾಗ ಚಂಪಕ ಮನೆ ಮುಂದೆ ಬೃಹದಾಕಾರದ ರಂಗೋಲಿ ಬಿಡಿಸುತ್ತಿದ್ದಳು. ವೆಂಕಟಪ್ಪ ಇದನ್ನ ನೋಡಿ ಬೆರಾಗಾಗಿ, ಆಕೆಯ ಮೋಹಕ್ಕೆ ಬಿದ್ದಿದ್ದ. ಅಲ್ಲದೇ ಪ್ರೇಮ ನಿವೇದನೆಯನ್ನೂ ಮಾಡಿ ಈಗಿರುವ ಈ ಕೊಳದ ಜಾಗದಲ್ಲಿ ಆಕೆಯನ್ನು ವರಿಸಿದ್ದ.
ಯುವತಿ ಹಾಗೂ ರಾಜನ ವಯಸ್ಸಿನಲ್ಲಿ ಅಜಗಜಾಂತರ ವ್ಯತ್ಯಾಸ ಇದ್ದಿದ್ದು, ಪಟ್ಟದ ರಾಣಿ ಹಾಗೂ ಜನರಿಗೆ ಈ ಸಂಬಂಧ ಸರಿ ಕಾಣಲಿಲ್ಲ. ಹೀಗಾಗಿ ಚಂಪಕಳನ್ನ ವೇಶ್ಯೆಯೆಂದು ನಿಂದಿಸುತ್ತಾರೆ ಹಾಗೂ ಛೀಮಾರಿ ಹಾಕುತ್ತಾರೆ. ಇದರಿಂದ ನೊಂದ ಚಂಪಕ ಇಲ್ಲೇ ಆತ್ಮಹತ್ಯೆ ಮಾಡಿಕೊಳ್ಳುತ್ತಾಳೆ. ಈ ಘಟನೆಯಿಂದ ನೊಂದ ರಾಜ ಚಂಪಕಳ ನೆನಪಿಗಾಗಿ ಪುಷ್ಕರಣಿಯನ್ನು ನಿರ್ಮಾಣ ಮಾಡುತ್ತಾನೆ ಎನ್ನುವುದು ಇತಿಹಾಸ ಪುಟಗಳ ತರ್ಕ.
ಈ ಕೊಳ ಶಿಥಿಲಾವಸ್ಥೆ ತಲುಪಿತ್ತು. ಕೊಳದ ಇತಿಹಾಸ ತಿಳಿದ ನಟ ಯಶ್ ಇದನ್ನ ಪುನಶ್ಚೇತನಗೊಳಿಸುತ್ತಿದ್ದಾರೆ. ಇನ್ನೊಂದು ತಿಂಗಳಲ್ಲಿ ಪುನಶ್ಚೇತನ ಕಾರ್ಯ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ. ಜನವರಿ ತಿಂಗಳಲ್ಲಿ ನಟ ಯಶ್ ಚಂಪಕ ಸರಸಿ ಪುಷ್ಕರಣಿಗೆ ಭೇಟಿ ನೀಡಲಿದ್ದಾರೆ.
