ರಾಗಿ ಕಟಾವಿನಲ್ಲೂ ರೈತರ ಸುಲಿಗೆ; ಕಟಾವು ಯಂತ್ರಕ್ಕೆ ಬಾಡಿಗೆ ನಿಗದಿಗೆ ರೈತರ ಒತ್ತಾಯ!
ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಜಿಲ್ಲಾಧಿಕಾರಿಗಳು ರಾಗಿ ಬೆಳೆ ಕಟಾವು ಯಂತ್ರಕ್ಕೆ ಎಕರೆಗೆ 2700 ರೂ. ಬಾಡಿಗೆ ಪಡೆಯುವಂತೆ ಆದೇಶ ಹೊರಡಿಸಿದ್ದಾರೆ. ಆದರೆ ಬೆಂಗಳೂರು ನಗರ ಜಿಲ್ಲೆಯಲ್ಲಿ ಜಿಲ್ಲಾಡಳಿತ ಯಾವುದೇ ಆದೇಶ ನೀಡದ ಕಾರಣ, ಎಕರೆಗೆ 3700 ರೂ.ಗಳಿಂದ 4000 ರೂ. ವರೆಗೆ ಪಡೆದು ಅನ್ನದಾತನ ಶೋಷಣೆ ಮಾಡುತ್ತಿರುವುದು ಬೆಳಕಿಗೆ ಬಂದಿದ್ದು, ಜಿಲ್ಲಾಡಳಿತ ಕೂಡಲೇ ಕ್ರಮ ತೆಗೆದುಕೊಳ್ಳಬೇಕೆಂದು ಜಿಲ್ಲೆಯ ರೈತರು ಆಗ್ರಹಿಸಿದ್ದಾರೆ.
Admin
0
8
ರಾಮಚಂದ್ರಮೂರ್ತಿ ಚಲ್ಲಹಳ್ಳಿ ಯಲಹಂಕ
ಬೆಂಗಳೂರು: ಬೆಳೆ ಕಟಾವು ಯಂತ್ರಕ್ಕೆ ದುಬಾರಿ ಬಾಡಿಗೆ ವಸೂಲಿ ಮಾಡುವ ಮೂಲಕ ಮಳೆ ಹಾನಿಯಿಂದ ಮೊದಲೇ ನಷ್ಟಕ್ಕೀಡಾಗಿರುವ ರೈತನ ಮೇಲೆ ಮತ್ತೆ ಬರೆ ಎಳೆದು ಶೋಷಣೆ ಮಾಡಲಾಗುತ್ತಿದೆ.
ಗ್ರಾಮಾಂತರ ಜಿಲ್ಲೆಯಲ್ಲಿ ಜಿಲ್ಲಾಧಿಕಾರಿಗಳು ರಾಗಿ ಬೆಳೆ ಕಟಾವು ಯಂತ್ರಕ್ಕೆ ಎಕರೆಗೆ 2700 ರೂ. ಬಾಡಿಗೆ ಪಡೆಯುವಂತೆ ಆದೇಶ ಹೊರಡಿಸಿದ್ದಾರೆ. ಆದರೆ ಬೆಂಗಳೂರು ನಗರ ಜಿಲ್ಲೆಯಲ್ಲಿ ಜಿಲ್ಲಾಡಳಿತ ಯಾವುದೇ ಆದೇಶ ನೀಡದ ಕಾರಣ, ಎಕರೆಗೆ 3700 ರೂ.ಗಳಿಂದ 4000 ರೂ. ವರೆಗೆ ಪಡೆದು ಅನ್ನದಾತನ ಶೋಷಣೆ ಮಾಡುತ್ತಿರುವುದು ಬೆಳಕಿಗೆ ಬಂದಿದ್ದು, ಜಿಲ್ಲಾಡಳಿತ ಕೂಡಲೇ ಕ್ರಮ ತೆಗೆದುಕೊಳ್ಳಬೇಕೆಂದು ಜಿಲ್ಲೆಯ ರೈತರು ಆಗ್ರಹಿಸಿದ್ದಾರೆ.
ಬೆಂಗಳೂರು ನಗರ ಜಿಲ್ಲೆಯಲ್ಲಿ ರೈತರು ರಾಗಿ, ಜೋಳವನ್ನು ಬೆಳೆಯುತ್ತಿದ್ದಾರೆ. ಜಿಲ್ಲೆಯ ಯಲಹಂಕ, ಪೂರ್ವ ಆನೇಕಲ್‌ಮತ್ತು ಬೆಂಗಳೂರು ದಕ್ಷಿಣ ತಾಲೂಕಿನಲ್ಲಿ 8569 ಹೆಕ್ಟೇರ್‌ ಪ್ರದೇಶದಲ್ಲಿ ರಾಗಿ ಬೆಳೆದಿದ್ದಾರೆ. ಬಹುತೇಕ ಎಲ್ಲಾ ಕಡೆ ರಾಗಿ ಕಟಾವು ಮಾಡಲು ಬಂದಿದ್ದು, ಕಳೆದ ಒಂದು ವಾರದಿಂದ ಎಕರೆಗೆ ನಾಲ್ಕರಿಂದ ಐದು ಸಾವಿರ ರೂ. ಪಡೆಯಲಾಗುತ್ತಿದೆ. ಇನ್ನೊಂದೆಡೆ ಈ ವರ್ಷ ರಾಗಿ ತೆನೆ ಬರುವ ಸಂದರ್ಭದಲ್ಲಿ 25 ದಿನಗಳು ನಿರಂತರವಾಗಿ ಹಿಡಿದ ಜಡಿ ಮಳೆಯಿಂದ ರಾಗಿ ಬೆಳೆ ಸಂಪೂರ್ಣ ನೆಲಕಚ್ಚಿ, ಬಹುತೇಕ ಮೊಳೆಕೆಯೊಡೆದಿದೆ. ರೈತನ ಪರಿಸ್ಥಿತಿಯನ್ನು ಅರಿತು ಸರಕಾರ ಬೆಳೆ ನಷ್ಟದ ಪರಿಹಾರ ಘೋಷಿಸಿದೆ. ಆದರೆ ಉಳಿದಿರುವ ಅಲ್ಪ-ಸ್ವಲ್ಪ ರಾಗಿ ತೆನೆ ಮತ್ತು ಹುಲ್ಲನ್ನು ಸಂಗ್ರಹಿಸಲು ರೈತರು ಮುಂದಾಗಿದ್ದಾರೆ. ಆದರೆ ಕಟಾವು ಮಾಡಲು ರಾಗಿ ಯಂತ್ರಕ್ಕೆ ದುಬಾರಿ ಬಾಡಿಗೆ ಪಡೆಯಲಾಗುತ್ತಿದೆ ಎಂದು ರೈತರು ದೂರಿದ್ದಾರೆ.
ರೈತರೇ ಮಧ್ಯವರ್ತಿಗಳುಎರಡು ತಿಂಗಳ ಮೊದಲೇ ತಮಿಳುನಾಡಿನಿಂದ ನೂರಾರು ರಾಗಿ ಕಟಾವು ಮಾಡುವ ಯಂತ್ರಗಳು ಬಂದಿದ್ದು, ಅದರ ಮಾಲೀಕರು ರೈತರನ್ನೇ ಮಧ್ಯವರ್ತಿಗಳನ್ನಾಗಿ ಮಾಡಿಕೊಂಡು ಎಕರೆಗೆ 200ರಿಂದ 500 ರೂ. ಕಮಿಷನ್‌ ಕೊಡುವುದಾಗಿ ಆಮಿಷ ಒಡ್ಡಿ ಮಾತುಕತೆ ನಡೆಸುತ್ತಿದ್ದಾರೆ. ಹೀಗೆ ಸ್ಥಳೀಯ ರೈತರೇ ಮಧ್ಯವರ್ತಿಗಳಾಗಿ ರೈತರಿಂದ ದುಬಾರಿ ಹಣ ವಸೂಲಿ ಮಾಡಿಕೊಳ್ಳುತ್ತಿದ್ದಾರೆ.
ಬೆಂಗಳೂರು ಗ್ರಾಮಾಂತರ ಜಿಲ್ಲಾಧಿಕಾರಿಗಳು ರಾಗಿ ಬೆಳೆ ಕಟಾವು ಯಂತ್ರಕ್ಕೆ ಎಕರೆಗೆ 2700 ರೂ. ಬಾಡಿಗೆ ಪಡೆಯುವಂತೆ ಆದೇಶ ಹೊರಡಿಸಿದ್ದಾರೆ. ಆದರೆ ಬೆಂಗಳೂರು ನಗರ ಜಿಲ್ಲೆಯಲ್ಲಿ ಯಾವುದೇ ಆದೇಶವಿಲ್ಲದೆ ಮಧ್ಯವರ್ತಿಗಳು ರೈತರಿಂದ ದುಬಾರಿ ಹಣವನ್ನು ಪೀಕುತ್ತಿದ್ದಾರೆ. ಕೂಡಲೇ ನಗರ ಜಿಲ್ಲಾಧಿಕಾರಿಗಳು ಕ್ರಮ ತೆಗೆದುಕೊಳ್ಳಬೇಕು.
ನಾರಾಯಣ ರೆಡ್ಡಿ, ಅಧ್ಯಕ್ಷ, ರಾಜ್ಯ ಸಂಘ
ಬಹುತೇಕ ರೈತರಿಗೆ ಅನುಕೂಲವಾಗುವ ರಾಗಿ, ಜೋಳ ಕಟಾವು ಯಂತ್ರವನ್ನು ಸರಕಾರವೇ ರೈತರಿಗೆ ರಿಯಾಯಿತಿ ದರದಲ್ಲಿ ಬಾಡಿಗೆ ನೀಡಬೇಕು.
ಚಲುವರಾಜು, ರೈತ, ಶೀತಕೆಂಪನಹಳ್ಳಿ
ಬೇರೆ ಜಿಲ್ಲೆಯಲ್ಲಿ ರಾಗಿ ಬೆಳೆ ಕಟಾವು ಯಂತ್ರಕ್ಕೆ ಎಕರೆಗೆ 2700 ರೂ. ಬಾಡಿಗೆ ಪಡೆಯುವಂತೆ ಆದೇಶಿಸಲಾಗಿದೆ. ನಮ್ಮ ಜಿಲ್ಲೆಯಲ್ಲಿ ಇದೇ ರೀತಿ ಆದೇಶ ಮಾಡಲು ಮೇಲಧಿಕಾರಿಗಳಿಗೆ ಮನವಿ ಮಾಡಿದ್ದೇವೆ. ಒಂದೆರಡು ದಿನದೊಳಗೆ ಆದೇಶ ಬರುವ ಸಾಧ್ಯತೆ ಇದೆ.
ವಿನುತ ಎಂ.ಸಿ., ಬೆಂಗಳೂರು ನಗರ ಜಿಲ್ಲಾಕೃಷಿ ಜಂಟಿ ನಿರ್ದೇಶಕಿ
