ಮಹಿಳೆಯರ ಹಿಂಭಾಗ ಸ್ಪರ್ಶಿಸಿ ವಿಕೃತ ಆನಂದ; ಬೆಂಗಳೂರಿನಲ್ಲಿ ಸೈಕೋಪಾತ್‌ ಬಂಧನ
ಮೇ 31ರಂದು ಕೊರಮಂಗಲದ ನಾಲ್ಕನೇ ಹಂತದಲ್ಲಿ ರಾತ್ರಿ ವೇಳೆ ಡೆಲಿವರಿಗೆ ಹೋಗಿದ್ದಾಗ, ಅದೇ ವೇಳೆ ನಡೆದುಕೊಂಡು ಹೋಗುತ್ತಿದ್ದ ಉತ್ತರ ಭಾರತ ಮೂಲದ ಯುವತಿಯ ಹಿಂಭಾಗಕ್ಕೆ ಹೊಡೆದು ಪರಾರಿಯಾಗಿದ್ದ. ನಂತರ ಯುವತಿಯು ಪೊಲೀಸ್‌ ಕಂಟ್ರೋಲ್‌ ರೂಂಗೆ ಕರೆ ಮಾಡಿ ದೂರು ನೀಡಿದ್ದರು. ಕೃತ್ಯ ನಡೆದ ಸ್ಥಳ ಆಧರಿಸಿ ಕೋರಮಂಗಲ ಪೊಲೀಸ್‌ ಠಾಣೆಗೆ ದೂರು ವರ್ಗಾಯಿಸಲಾಗಿತ್ತು.
Admin
0
7
ಬೆಂಗಳೂರು: ಡೆಲಿವರಿ ಬಾಯ್‌ ಸೋಗಿನಲ್ಲಿ ರಾತ್ರಿ ವೇಳೆ ಬೈಕ್‌ನಲ್ಲಿ ತೆರಳಿ ಮಹಿಳೆಯರ ಹಿಂಭಾಗ ಸ್ಪರ್ಶಿಸಿ ವಿಕೃತ ಆನಂದ ಪಡೆಯುತ್ತಿದ್ದವನನ್ನು ಕೋರಮಂಗಲ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಕೆಜಿಎಫ್‌ನ ರಾಬರ್ಟ್‌ಸನ್‌ ಪೇಟೆಯ ಸೈಕೋಪಾತ್‌ ಅರುಣ್‌ ಕುಮಾರ್‌ ಬಂಧಿತ. ಕಳೆದ ಮೂರು ತಿಂಗಳ ಹಿಂದೆ ಕೋರಮಂಗಲದ ಮೇಸ್ತ್ರಿ ಪಾಳ್ಯದಲ್ಲಿ ಚಿಕ್ಕಪ್ಪನ ಮನೆಯಲ್ಲಿ ಆರೋಪಿ ವಾಸವಾಗಿದ್ದ. ಈತನ ಸಹೋದರ ಕೆವಿನ್‌, ಡಂಜೋ ಕಂಪನಿಯ ಡೆಲಿವರಿ ಬಾಯ್‌ ಆಗಿದ್ದ. ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಆರ್ಡರ್‌ಗಳು ಹೆಚ್ಚಾಗಿದ್ದರಿಂದ ಬೆಳಗಿನ ಸಮಯದಲ್ಲಿ ಕೆವಿನ್‌ ಡೆಲಿವರಿ ಕೆಲಸ ಮಾಡಿದರೆ, ಮಧ್ಯಾಹ್ನದ ಬಳಿಕ ಅರುಣ್‌ ಕೆಲಸ ಮಾಡುತ್ತಿದ್ದ. ಒಂದೇ ಐಡಿ ಕಾರ್ಡ್‌ನಲ್ಲಿ ಇಬ್ಬರು ಫುಡ್‌ ಡೆಲಿವರಿ ಮಾಡುತ್ತಿದ್ದರು.
ಮೇ 31ರಂದು ಕೊರಮಂಗಲದ ನಾಲ್ಕನೇ ಹಂತದಲ್ಲಿ ರಾತ್ರಿ ವೇಳೆ ಡೆಲಿವರಿಗೆ ಹೋಗಿದ್ದಾಗ, ಅದೇ ವೇಳೆ ನಡೆದುಕೊಂಡು ಹೋಗುತ್ತಿದ್ದ ಉತ್ತರ ಭಾರತ ಮೂಲದ ಯುವತಿಯ ಹಿಂಭಾಗಕ್ಕೆ ಹೊಡೆದು ಪರಾರಿಯಾಗಿದ್ದ. ನಂತರ ಯುವತಿಯು ಪೊಲೀಸ್‌ ಕಂಟ್ರೋಲ್‌ ರೂಂಗೆ ಕರೆ ಮಾಡಿ ದೂರು ನೀಡಿದ್ದರು. ಕೃತ್ಯ ನಡೆದ ಸ್ಥಳ ಆಧರಿಸಿ ಕೋರಮಂಗಲ ಪೊಲೀಸ್‌ ಠಾಣೆಗೆ ದೂರು ವರ್ಗಾಯಿಸಲಾಗಿತ್ತು. ದೂರನ್ನು ಗಂಭೀರವಾಗಿ ಪರಿಗಣಿಸಿದ ಪೊಲೀಸರು ಕೃತ್ಯ ನಡೆದ ಸ್ಥಳದಲ್ಲಿ ಅಳವಡಿಸಲಾಗಿದ್ದ ಸಿಸಿ ಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅಸಭ್ಯ ವರ್ತನೆ ತೋರಿರುವುದು ಸ್ಪಷ್ಟವಾಗಿತ್ತು.
40 ಸಿಸಿಟಿವಿ, 80 ಬೈಕ್‌ಗಳ ವೀಕ್ಷಣೆ:
ಆರೋಪಿ ಪತ್ತೆಗಾಗಿ ಸುಮಾರು 40 ಸಿಸಿಟಿವಿ ಪರಿಶೀಲಿಸಿದಾಗ, ಆರೋಪಿ ಡಂಜೋ ಕಂಪನಿ ಡೆಲಿವರಿ ಬಾಯ್‌ ಎಂಬುದು ತಿಳಿದು ಬಂದಿದೆ. ಸಿಸಿಟಿವಿಯಿಂದ ಹೋಂಡಾ ಡಿಯೊ ಬೈಕ್‌ ಎಂದು ಪತ್ತೆ ಹಚ್ಚಿ, ಘಟನೆ ನಡೆದ ಆಸುಪಾಸಿನಲ್ಲಿ ಡೆಲಿವರಿಗೆ ಓಡಾಡಿದ ಬೈಕ್‌ಗಳ ಬಗ್ಗೆ ಕಂಪನಿಯಿಂದ ಮಾಹಿತಿ ಪಡೆದಿದ್ದಾರೆ. 80 ಬೈಕ್‌ಗಳು ಕೃತ್ಯ ನಡೆದ ದಿನ ರಾತ್ರಿ ಓಡಾಡಿದ್ದವು. ಪೂರ್ಣವಾಗಿ ಪರಿಶೀಲಿಸಿದಾಗ ಆರೋಪಿಯ ಸಹೋದರ ಬಳಸುತ್ತಿದ್ದ ಬೈಕ್‌ ಪತ್ತೆ ಹಚ್ಚಿದ್ದಾರೆ. ಬೈಕ್‌ ಮಾಲೀಕ ಕೆವಿನ್‌ನನ್ನು ವಶಕ್ಕೆ ಪಡೆದು ವಿಚಾರಿಸಿದಾಗ ತನ್ನ ಸಹೋದರ ಅರುಣ್‌ ಕೃತ್ಯವೆಸಗಿರುವ ಬಗ್ಗೆ ಮಾಹಿತಿ ನೀಡಿದ್ದಾನೆ.
ಇದನ್ನು ಆಧರಿಸಿ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದರು. ಸೈಕೋನಂತಿರುವ ಆರೋಪಿ ಅರುಣ್‌ ಕುಮಾರ್‌ ಕಳೆದ ಒಂದು ತಿಂಗಳಲ್ಲಿ ನಾಲ್ವರು ಯುವತಿಯರಿಗೆ ಇಂತಹ ಕೃತ್ಯವೆಸಗಿರುವುದು ಗೊತ್ತಾಗಿದೆ. ಆರೋಪಿ ವಿರುದ್ಧ ಕೋರಮಂಗಲ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
