ಮಹಾರಾಷ್ಟ್ರದಲ್ಲಿ ಸೆಮಿ ಲಾಕ್‌ಡೌನ್‌, ಅಗತ್ಯ ಚಟವಟಿಕೆಗಳಿಗೆ ಮಾತ್ರ ಅವಕಾಶ; ಸೆಕ್ಷನ್‌ 144 ಜಾರಿ

ಮುಂಬಯಿ: ರಾಜ್ಯದ ಜನತೆಯನ್ನು ಉದ್ದೇಶಿಸಿ ಮಂಗಳವಾರ ಮಾತನಾಡಿರುವ ಮುಖ್ಯಮಂತ್ರಿ ಲಾಕ್‌ಡೌನ್‌ ಘೋಷಣೆ ಮಾಡಿಲ್ಲ. ಆದರೆ ಮುಂದಿನ 15 ದಿನಗಳ ಕಾಲ ರಾಜ್ಯದಲ್ಲಿ ಕಠಿಣ ನಿರ್ಬಂಧಗಳು ಜಾರಿಯಲ್ಲಿ ಇರಲಿವೆ ಎಂದು ಘೋಷಿಸಿದ್ದಾರೆ. ಎಲ್ಲಾ ಪ್ರಕಾರದ ಜನ ಸೇರುವ ಕಾರ್ಯಕ್ರಮಗಳಿಗೆ ನಿರ್ಬಂಧ ಹೇರಲಾಗಿದೆ. ಜತೆಗೆ ಅಗತ್ಯ ಚಟವಟಿಕೆಗಳಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಸೋಂಕು ಅಪಾಯಕರವಾಗಿ ಹರಡುತ್ತಿದೆ ಎಂದು ಹೇಳಿರುವ ಉದ್ಧವ್‌ ಠಾಕ್ರೆ, ಯುದ್ಧ ಮತ್ತೆ ಆರಂಭವಾಗಿದೆ ಎಂದಿದ್ದಾರೆ. ಐದಕ್ಕಿಂತ ಹೆಚ್ಚು ಜನರು ಒಂದೆಡೆ ಸೇರುವುದನ್ನು ನಿಷೇಧಿಸುವ ಸಿಆರ್‌ಪಿಸಿ ಸೆಕ್ಷನ್‌ 144 ನಾಳೆಯಿಂದ ಅಂದರೆ ಏಪ್ರಿಲ್‌ 14 ರಿಂದ ರಾಜ್ಯದಲ್ಲಿ ಜಾರಿಗೆ ಬರಲಿದೆ. ಬೆಳಿಗ್ಗೆ 7 ರಿಂದ ಅಂಜೆ 8 ಗಂಟೆವರೆಗೆ ಕೇವಲ ಅಗತ್ಯ ಪ್ರಯಾಣ ಮತ್ತು ಸೇವೆಗಳಿಗೆ ಮಾತ್ರ ಅವಕಾಶ ಇರಲಿದೆ ಎಂದು ಅವರು ಹೇಳಿದ್ದಾರೆ. ಇದರರ್ಥ ವೈದ್ಯಕೀಯ ಸೇವೆಗಳು, ಬ್ಯಾಂಕ್‌, ಮಾಧ್ಯಮ, ಇ-ಕಾಮರ್ಸ್‌, ಪೆಟ್ರೋಲ್‌-ಡೀಸೆಲ್‌ ಬಂಕ್‌ಗಳಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಜನರಿಗೆ ವರ್ಕ್‌ ಫ್ರಂ ಹೋಮ್‌ಗೆ ಮರಳುವಂತೆಯೂ ಅವರು ಸೂಚಿಸಿದ್ದಾರೆ. ಹೋಟೆಲ್‌ ಮತ್ತು ರೆಸ್ಟೋರೆಂಟ್‌ಗಳಿಗೂ ಇದು ಅನ್ವಯವಾಗಲಿದ್ದು, ಹೋಂ ಡೆಲಿವರಿ ಮತ್ತು ಪಾರ್ಸೆಲ್‌ ಕೊಂಡೊಯ್ಯಲು ಮಾತ್ರ ಅವಕಾಶ ನೀಡಲಾಗಿದೆ. ಮೇ 1 ರವರೆಗೆ ಇದು ಜಾರಿಯಲ್ಲಿ ಇರಲಿದೆ. ದುರದೃಷ್ಟವಶಾತ್ ನಾನು ಹೆಚ್ಚಿನ ನಿರ್ಬಂಧಗಳನ್ನು ಘೋಷಿಸಬೇಕಾಗಿದೆ. ಇದು ಪ್ರತಿಕ್ರಿಯೆಯ ಸಮಯ. ನಾನು ಇದೀಗ ಲಾಕ್‌ಡೌನ್ ಜಾರಿಗೊಳಿಸುತ್ತಿಲ್ಲ, ಆದರೆ ಕಟ್ಟುನಿಟ್ಟಿನ ನಿರ್ಬಂಧಗಳು ಅನಿವಾರ್ಯ. ಹೊಟ್ಟೆ ತುಂಬುವುದು ಮುಖ್ಯ ಎಂದು ನನಗೆ ತಿಳಿದಿದೆ ಆದರೆ ಜೀವಗಳನ್ನು ಉಳಿಸುವುದೂ ಮುಖ್ಯ ಎಂದು ಠಾಕ್ರೆ ವಿವರಿಸಿದ್ದಾರೆ. ರಾಜದಲ್ಲಿ ಮಂಗಳವಾರವೂ 60,212 ಹೊಸ ಕೊರೊನಾ ಪ್ರಕರಣಗಳು ದೃಢಪಟ್ಟಿದ್ದು, 281 ಜನರು ಸಾವನ್ನಪ್ಪಿದ್ದಾರೆ. ಇದು ಭೀಕರ ಪರಿಸ್ಥಿತಿ ಎಂದು ಹೇಳಿರುವ ಠಾಕ್ರೆ, ಆಕ್ಸಿಜನ್‌ ಮತ್ತು ಔಷಧ ಕೊರತೆ ನಿವಾರಿಸಲು ಸೇನೆಯ ಸಹಾಯ ಕೇಳಿದ್ದಾರೆ. “ನಮ್ಮ ಬಳಿಯಲ್ಲಿ ಈಗ 1,200 ಮೆಟ್ರಿಕ್‌ ಟನ್‌ ಆಕ್ಸಿಜನ್‌ ಇದೆ. ಇದನ್ನು ಪೂರ್ಣ ಪ್ರಮಾಣದಲ್ಲಿ ವೈದ್ಯಕೀಯ ಅಗತ್ಯಗಳಿಗೆ ಮಾತ್ರ ಬಳಕೆ ಮಾಡುತ್ತಿದ್ದೇವೆ. ಈ ಪರಿಸ್ಥಿತಿಯಲ್ಲಿ, ಮುಂದಿನ ದಿನಗಳಲ್ಲಿ ನಮಗೆ ಆಕ್ಸಿಜನ್‌ ಬೇಕಾಗುತ್ತದೆ ಎಂದು ನಾನು ಪ್ರಧಾನಿಗೆ ಹೇಳಿದ್ದೇನೆ,” ಎಂದು ಅವರು ಮಾಹಿತಿ ನೀಡಿದ್ದಾರೆ. “ರಸ್ತೆ ಮಾರ್ಗದಲ್ಲಿ ಆಕ್ಸಿಜನ್‌ ತರುವ ಬದಲು, ನಾವು ಸೇನೆಯ ಸಹಾಯ ಪಡೆದುಕೊಂಡರೆ ವಿಮಾನದ ಮೂಲಕ ತರಿಸಬಹುದು ಎಂದು ನಾವು ಪ್ರಧಾನಿಗೆ ಮನವಿ ಮಾಡುತ್ತಿದ್ದೇವೆ," ಎಂದು ಅವರು ಹೇಳಿದ್ದಾರೆ.