ಭೂಸ್ವಾಧೀನ ಸಮಸ್ಯೆ, ಯಲಹಂಕ- ಪೆನುಗೊಂಡ ರೈಲ್ವೆ ಯೋಜನೆ ವಿಳಂಬ

ಬೆಂಗಳೂರು: ಕೋವಿಡ್‌ ಮತ್ತು ಭೂಸ್ವಾಧೀನ ಪ್ರಕ್ರಿಯೆಯಿಂದ ನನೆಗುದಿಗೆ ಬಿದ್ದ ನೈಋುತ್ಯ ರೈಲ್ವೆ ವಲಯದ ಯಲಹಂಕ ಮತ್ತು ಪೆನುಗೊಂಡ ನಡುವಿನ ನಿರ್ಣಾಯಕ ಟ್ರ್ಯಾಕ್‌ ಡಬಲ್‌ ಯೋಜನೆ 2021ರ ಅಕ್ಟೋಬರ್‌ ವೇಳೆಗೆ ಪೂರ್ಣಗೊಳ್ಳಲಿದೆ ಎಂದು ಇಲಾಖೆ ತಿಳಿಸಿದೆ. ಯಲಹಂಕದಿಂದ ಪೆನುಗೊಂಡವರೆಗಿನ ಸುಮಾರು 120.55 ಕಿ.ಮೀ. ಮಾರ್ಗದಲ್ಲಿ ಒಟ್ಟು 48 ಕಿ.ಮೀ. ಮಾರ್ಗ ಇನ್ನೂ ಪೂರ್ಣಗೊಂಡಿಲ್ಲ. ಈ ಯೋಜನೆಗೆ 2015-16ರಲ್ಲಿಯೇ ಅನುಮತಿ ನೀಡಲಾಗಿತ್ತು. ಆದರೆ, ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯ ರಂಗಪಲ್ಲಿಯಲ್ಲಿ ಅಗತ್ಯವಿರುವ ಭೂಮಿಯ ಒಂದು ಭಾಗವನ್ನು ಸ್ವಾಧೀನ ಪಡೆಯುವ ವಿಚಾರವಾಗಿ ಅಲ್ಲಿನ ರೈತರು ಪ್ರತಿಭಟನೆ ನಡೆಸಿದ್ದಾರೆ. ಹೀಗಾಗಿ, ಯೋಜನೆಯ ಅಂತಿಮ ಗಡುವು ಮುಂದಕ್ಕೆ ಹೋಗಿದೆ ಎನ್ನಲಾಗಿದೆ. ಜು.20 ರಂದು ಕೂಡ ರಂಗಪಲ್ಲಿ ಬಳಿಯ ರೈಲ್ವೆ ಹಳಿಗಳ ಮೇಲೆ ಇದೇ ವಿಚಾರವಾಗಿ ರೈತರು ಪ್ರತಿಭಟನೆ ನಡೆಸಿದರು. ಒಟ್ಟು 48.2 ಕಿ.ಮೀ. ಮಾರ್ಗವು ಆಂಧ್ರ ಪ್ರದೇಶದಲ್ಲಿದ್ದು, ಉಳಿದದ್ದು ಕರ್ನಾಟಕದಲ್ಲಿ ಬರುತ್ತದೆ. ಯೋಜನೆಗೆ ಅಗತ್ಯವಿರುವ 23.2 ಎಕರೆಗಳನ್ನು ಎಸ್‌ಡಬ್ಲ್ಯುಆರ್‌ ಇನ್ನೂ ಸ್ವಾಧೀನಪಡಿಸಿಕೊಂಡಿಲ್ಲ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಇಲಾಖೆ, ಹದಿನೈದು ದಿನಗಳಲ್ಲಿ ಸಮಸ್ಯೆ ಬಗೆಹರಿಸಲಾಗುವುದು ಎಂದು ವಿಶ್ವಾಸ ವ್ಯಕ್ತಪಡಿಸಿದೆ. ''ನಾವು ಈ ವರ್ಷದ ಸೆಪ್ಟೆಂಬರ್‌ನಲ್ಲಿ ಯೋಜನೆ ಪೂರ್ಣಗೊಳಿಸಲು ಗುರಿ ನಿಗದಿಪಡಿಸಿದ್ದೇವೆ. ಆದರೆ, ಈಗ ಅಕ್ಟೋಬರ್‌ ಅಂತ್ಯದವರೆಗೂ ಯೋಜನೆ ಮುಂದುವರಿಯಬಹುದು ಎಂದು ಭಾವಿಸಲಾಗಿದೆ. ಕೋವಿಡ್‌ ಮತ್ತು ಕಾರ್ಮಿಕರ ಕೊರತೆಯಿಂದ ಈ ಯೋಜನೆ ವಿಳಂಬವಾಗಲು ಕಾರಣವಾಯಿತು'' ಎಂದು ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದರು.