ಭಾರತವು ಭವಿಷ್ಯದಲ್ಲಿ ಸೂಪರ್‌ಶಕ್ತಿಯಾಗಲು ಸಮರ್ಥ ಯುವಕರನ್ನು ಸಿದ್ಧಪಡಿಸುತ್ತಿದೆ ಬೆನ್ನೆಟ್‌ ವಿವಿ: ವಿನೀತ್‌ ಜೈನ್‌

ನೊಯ್ಡಾ: ಪ್ರಧಾನಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷೆಯ ರಾಷ್ಟ್ರೀಯ ಶಿಕ್ಷಣ ನೀತಿಗೆ ಅನುಗುಣವಾಗಿ ದಿ ಟೈಮ್ಸ್‌ ಆಫ್‌ ಇಂಡಿಯಾ ಸಮೂಹದ ಬೆನ್ನೆಟ್‌ ವಿಶ್ವವಿದ್ಯಾಲಯವು (ಬಿಯು) ಪಠ್ಯಕ್ರಮಗಳನ್ನು ರೂಪಿಸಿರುವುದು ವಿದ್ಯಾರ್ಥಿಗಳ ಭವಿಷ್ಯದ ದೃಷ್ಟಿಯಿಂದ ಸಹಕಾರಿ ಎಂದು ಕೇಂದ್ರ ಶಿಕ್ಷಣ ಸಚಿವ ಹೇಳಿದ್ದಾರೆ. ಆನ್‌ಲೈನ್‌ ಮೂಲಕ ಭಾನುವಾರ ನಡೆದ ಬೆನ್ನೆಟ್‌ ವಿವಿಯ ಮೂರನೇ ಘಟಿಕೋತ್ಸವದಲ್ಲಿಮುಖ್ಯ ಅತಿಥಿಗಳಾಗಿ ಭಾಗಿಯಾಗಿದ್ದ ಅವರು ‘‘ವಿಶ್ವವಿದ್ಯಾಲಯವು ಸಂಶೋಧನೆ ಹಾಗೂ ಆವಿಷ್ಕಾರದ ಸಂಸ್ಕೃತಿಯನ್ನು ಮೈಗೂಡಿಸಿಕೊಂಡಿರುವುದು ದೇಶ ಮತ್ತು ವಿಶ್ವದ ಅಭಿವೃದ್ಧಿಗೆ ಕೊಡುಗೆ ನೀಡಲಿದೆ. ನೋಂದಾಯಿತ 98 ಪಿಎಚ್‌.ಡಿ ವಿದ್ಯಾರ್ಥಿಗಳ ಪೈಕಿ 55 ಮಂದಿಗೆ ವಿವಿಯಿಂದಲೇ ಹಣಕಾಸು ನೆರವು ನೀಡಲಾಗುತ್ತಿರುವುದು ಇದಕ್ಕೆ ನಿದರ್ಶನವಾಗಿದೆ. ಇನ್ನು ವಿಶ್ವವಿದ್ಯಾಲಯದ ಪ್ರಾಧ್ಯಾಪಕರು, ವಿದ್ಯಾರ್ಥಿಗಳು ಈಗಾಗಲೇ ಅಂತಾರಾಷ್ಟ್ರೀಯ ಮತ್ತು ರಾಷ್ಟ್ರೀಯ ಮಾಧ್ಯಮಗಳಲ್ಲಿ ಅಧ್ಯಯನ ವರದಿಗಳನ್ನು ಪ್ರಕಟಿಸಿದ್ದಾರೆ. ಜತೆಗೆ 18 ಪೇಟೆಂಟ್‌ಗಳಿಗೂ ಅರ್ಜಿ ಸಲ್ಲಿಸಲಾಗಿರುವುದು ದೊಡ್ಡ ಸಾಧನೆ,’’ ಎಂದಿದ್ದಾರೆ. 2021ರ ಸಾಲಿನಲ್ಲಿ ತೇರ್ಗಡೆಯಾದ 412 ವಿದ್ಯಾರ್ಥಿಗಳಿಗೆ ಸಚಿವ ಪ್ರಧಾನ್‌ ಅವರು ಶುಭಾಶಯ ಕೋರಿದರು. ಪ್ರಾಸ್ತಾವಿಕವಾಗಿ ಮಾತನಾಡಿದ ಬೆನ್ನೆಟ್‌ ವಿವಿಯ ಕುಲಾಧಿಪತಿ ಹಾಗೂ ದಿ ಟೈಮ್ಸ್‌ ಸಮೂಹದ ವ್ಯವಸ್ಥಾಪಕ ನಿರ್ದೇಶಕ ವಿನೀತ್‌ ಜೈನ್‌ ‘‘ಆಗಸ್ಟ್‌ 8 ನಮ್ಮ ವಿವಿಯ ಸಂಸ್ಥಾಪಕರ ದಿನವೂ ಹೌದು. ಇದೇ ದಿನ ನಡೆಯುತ್ತಿರುವುದು ಖುಷಿ ನೀಡಿದೆ. ಭಾರತವು ಭವಿಷ್ಯದಲ್ಲಿ ಸೂಪರ್‌ಶಕ್ತಿಯಾಗಿ ಮುನ್ನುಗ್ಗಲು ಶಿಕ್ಷಣ ಮತ್ತು ಉದ್ಯೋಗಶೀಲತೆಯೇ ಪ್ರಮುಖ ಆಧಾರಸ್ತಂಭಗಳಾಗಿವೆ. ಅದಕ್ಕಾಗಿ ನಮ್ಮ ವಿವಿಯು ಸಮರ್ಥ ಯುವಕರನ್ನು ಸಿದ್ಧಪಡಿಸುತ್ತಿದೆ. 2020ರ ಎನ್‌ಇಪಿಯ ಮೂಲ ಉದ್ದೇಶಕ್ಕೆ ಪೂರಕವಾದ ಗುಣಮಟ್ಟದ ಶಿಕ್ಷಣವನ್ನು ವಿವಿಯ ಮೂಲಕ ನೀಡುವುದೇ ನಮ್ಮ ಆದ್ಯತೆಯಾಗಿದೆ,’’ ಎಂದರು. ನಾಸ್ಕಾಂ ಅಧ್ಯಕ್ಷರಾದ ದೇಬಜಾನಿ ಘೋಷ್‌ ಅವರು ವಿಶೇಷ ಅತಿಥಿಯಾಗಿ ಘಟಿಕೋತ್ಸವದಲ್ಲಿ ಭಾಗಿಯಾಗಿದ್ದರು. ವಿವಿಯ ಉಪಕುಲಪತಿ ಡಾ. ಪ್ರಭು ಕುಮಾರ್‌ ಅಗರ್‌ವಾಲ್‌ ಇದ್ದರು. ಕಠಿಣ ಪರಿಶ್ರಮಕ್ಕೆ ಸೋಲಿಲ್ಲ ಮತ್ತು ಪರ್ಯಾಯವೂ ಇಲ್ಲ. ದೊಡ್ಡ ಕನಸುಗಳನ್ನು ಈ ಸಣ್ಣ ವಯಸ್ಸಿನಲ್ಲಿಯೇ ಕಾಣಿರಿ. ಪ್ರಯೋಗಕ್ಕೆ, ಸೋಲಿಗೆ ಹಿಂಜರಿಯದಿರಿ. ನಿಮ್ಮ ಆತ್ಮಸಾಕ್ಷಿಯ ಮಾತು ಕೇಳಿ, ತಪ್ಪುಗಳಿಂದ ಕಲಿಯಿರಿ. - ವಿನೀತ್‌ ಜೈನ್‌, ಬೆನ್ನೆಟ್‌ ವಿವಿಯ ಕುಲಾಧಿಪತಿ, ಟೈಮ್ಸ್‌ ಸಮೂಹದ ಎಂಡಿ ಕರ್ನಾಟಕದ ಷಾ, ನೆಸ್ಟ್ಲೆಎಂಡಿಗೆ ಡಾಕ್ಟರೇಟ್‌ ಪ್ರದಾನ ಘಟಿಕೋತ್ಸವದಲ್ಲಿ ಕರ್ನಾಟಕದ ಬಯೊಕಾನ್‌ ಲಿಮಿಟೆಡ್‌ ಮುಖ್ಯಸ್ಥೆ ಡಾ. ಕಿರಣ್‌ ಮಜುಂದಾರ್‌ ಷಾ ಮತ್ತು ನೆಸ್ಟ್ಲೆ ಇಂಡಿಯಾ ಎಂಡಿ ಸುರೇಶ್‌ ನಾರಾಯಣನ್‌ ಅವರಿಗೆ ಬೆನ್ನೆಟ್‌ ವಿವಿಯಿಂದ ಗೌರವ ಡಾಕ್ಟರೇಟ್‌ ಪದವಿ ನೀಡಿ ಗೌರವಿಸಲಾಯಿತು. ಶಿಕ್ಷಣ, ಕ್ರೀಡೆ, ಸಾಂಸ್ಕೃತಿಕ ನಿಪುಣರಿಗೆ ಪದಕ ಶೈಕ್ಷಣಿಕ ಸಾಲಿನಲ್ಲಿಅತಿಹೆಚ್ಚು ಅಂಕ ಗಳಿಸಿದವರಿಗಲ್ಲದೆ ಕ್ರೀಡೆ, ಸಂಸ್ಕೃತಿ, ಸಂಶೋಧನೆ-ಆವಿಷ್ಕಾರ ವಿಚಾರವಾಗಿ ವಿಶ್ವವಿದ್ಯಾಲಯದಲ್ಲಿಹೆಚ್ಚಿನ ಸಾಧನೆ ಮಾಡಿದ ವಿದ್ಯಾರ್ಥಿಗಳನ್ನು ಗುರುತಿಸಿ ಅವರಿಗೆ ಕುಲಾಧಿಪತಿಗಳಾದ ವಿನೀತ್‌ ಜೈನ್‌ ಅವರಿಂದ ಚಿನ್ನ ಹಾಗೂ ಬೆಳ್ಳಿಯ ಪದಕಗಳನ್ನು ಘಟಿಕೋತ್ಸವದಲ್ಲಿ ಘೋಷಿಸಲಾಯಿತು. 3 ಸಾವಿರ ವಿದ್ಯಾರ್ಥಿಗಳು, 20 ಪದವಿಗಳು 2016ರಲ್ಲಿ ಗ್ರೇಟರ್‌ ನೊಯ್ಡಾದಲ್ಲಿ68 ಎಕರೆ ವಿಸ್ತೀರ್ಣದಲ್ಲಿ ಪ್ರಾರಂಭಗೊಂಡ ಪ್ರತಿಷ್ಠಿತ ಖಾಸಗಿ ವಿಶ್ವವಿದ್ಯಾಲಯ ‘ಬೆನ್ನೆಟ್‌ ವಿವಿ’ಯು ಕೇವಲ ಐದು ವರ್ಷಗಳಲ್ಲಿ ಮೂರು ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಶಿಕ್ಷಣ ನೀಡುವ ಮಟ್ಟಕ್ಕೆ ಬೆಳೆದಿದೆ. ಅಂತಾರಾಷ್ಟ್ರೀಯ ಹಾಗೂ ದೇಶದ ನಾನಾ ರಾಜ್ಯಗಳಿಂದ ಪ್ರತಿಭಾನ್ವಿತ ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ. 150ಕ್ಕೂ ಹೆಚ್ಚು ಸಿಬ್ಬಂದಿ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನೀಡುತ್ತಿದ್ದಾರೆ.