ಉಚಿತ ಲಸಿಕೆಗೆ ಕೇಂದ್ರದಿಂದ ಪರಿಷ್ಕೃತ ಮಾರ್ಗಸೂಚಿ: ಜನಸಂಖ್ಯೆ ಆಧರಿಸಿ ವ್ಯಾಕ್ಸಿನ್‌ ಪೂರೈಕೆ

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ಇನ್ನೆರಡು ವಾರಗಳಲ್ಲಿ ಎಲ್ಲ ರಾಜ್ಯಗಳಿಗೂ ಉಚಿತವಾಗಿ ಕೊರೊನಾ ನಿರೋಧಕ ಪೂರೈಸುವ ಘೋಷಣೆ ಮಾಡಿದ ಬೆನ್ನಲ್ಲೇ ಕೇಂದ್ರ ಸರಕಾರವು ಈ ಹಿಂದಿನ ಲಸಿಕೆ ಪೂರೈಕೆ ಮಾರ್ಗಸೂಚಿಗಳಲ್ಲಿ ಮಹತ್ವದ ಬದಲಾವಣೆ ಮಾಡಿದೆ. ' ಅದರಂತೆ, , ಈವರೆಗೆ ಲಸಿಕೆ ಪಡೆದಿರುವವರ ಪ್ರಮಾಣ, ಸಕ್ರಿಯ ಪ್ರಕರಣಗಳ ಸಂಖ್ಯೆ, ಲಸಿಕಾ ಅಭಿಯಾನದ ಪ್ರಗತಿಯ ಸ್ಥಿತಿಗತಿ ಮತ್ತು ಬಹಳ ಮುಖ್ಯವಾಗಿ ಇದುವರೆಗೂ ಆಗಿರುವಂತಹ ಲಸಿಕೆ ವ್ಯರ್ಥ ಪ್ರಮಾಣವನ್ನು ಕೇಂದ್ರ ಪರಿಗಣಿಸಿ ಹಂಚಿಕೆ ಮಾಡಲಾಗುವುದು ಕೇಂದ್ರ ತಿಳಿಸಿದೆ. ರಾಜ್ಯಗಳು ಎಷ್ಟು ಪರಿಣಾಮಕಾರಿಯಾಗಿ ಈ ಹಿಂದೆ ಲಸಿಕೆಗಳನ್ನು ನಿರ್ವಹಣೆ ಮಾಡಿವೆ ಎನ್ನುವುದೂ ಪ್ರಮುಖ ಮಾನದಂಡವಾಗಲಿದೆ. ಹೀಗಾಗಿ ರಾಜ್ಯಗಳಿಂದ ಬೇಡಿಕೆ ಬಂದ ಬಳಿಕ ಲಸಿಕೆಯ ಡೋಸ್‌ಗಳ ಸಂಖ್ಯೆ ನಿರ್ಧರಿಸಿ, ಹಂತಹಂತವಾಗಿ ಎಲ್ಲ ರಾಜ್ಯಗಳಿಗೆ ಉಚಿತವಾಗಿ ನೀಡಲಾಗುವುದು ಎಂದು ಕೇಂದ್ರ ಆರೋಗ್ಯ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ರಾಜ್ಯಕ್ಕೆ ಹಂಚಿಕೆಯಾಗುವ ಡೋಸ್‌ಗಳಲ್ಲಿ ವ್ಯರ್ಥವಾಗುವ ಲಸಿಕೆ ಸಹ ಸೇರಿರುತ್ತದೆ. ಕೇಂದ್ರ ಸರಕಾರವು ಲಸಿಕೆಗಳನ್ನು ಉಚಿತವಾಗಿ ಪೂರೈಸಿದ ಬಳಿಕ 18 ವರ್ಷ ಮೇಲ್ಪಟ್ಟವರಿಗೆ ಆದ್ಯತೆ ಮೇರೆಗೆ ಡೋಸ್‌ಗಳನ್ನು ನೀಡುವ ವ್ಯವಸ್ಥೆ ರಚಿಸಿಕೊಳ್ಳುವ ಸ್ವಾತಂತ್ರ್ಯವನ್ನು ರಾಜ್ಯ ಸರಕಾರಗಳಿಗೆ ನೀಡಲಾಗಿದೆ. ಅಂದರೆ, 18 ರಿಂದ 44 ವರ್ಷದ ನಡುವಿನಲ್ಲಿ ಮೊದಲ ಹಂತದಲ್ಲಿ 30-44 ವರ್ಷದವರಿಗೆ ಹಾಗೂ ಎರಡನೇ ಹಂತದಲ್ಲಿ 18-30 ವರ್ಷದವರಿಗೆ ಲಸಿಕೆ ನೀಡುವ ತೀರ್ಮಾನವನ್ನು ಆಯಾ ರಾಜ್ಯ ಸರಕಾರಗಳು ನಿರ್ಧರಿಸಬಹುದಾಗಿದೆ. ರಾಜ್ಯಗಳು ಕೊರೊನಾ ನಿಯಂತ್ರಣಕ್ಕೆ ರಚಿಸಿಕೊಂಡಿರುವ ಟಾಸ್ಕ್‌ಫೋರ್ಸ್‌ಗಳಲ್ಲಿನ ಹಿರಿಯ ಆರೋಗ್ಯ ತಜ್ಞರ ಸೂಚನೆಗಳನ್ನು ಪಡೆದು, 18-44 ವರ್ಷದವರಿಗೆ ಲಸಿಕೆಯನ್ನು ತ್ವರಿತ ಗತಿಯಲ್ಲಿ ನೀಡುವ ಬಗ್ಗೆ ರಾಜ್ಯಗಳು ಸಿದ್ಧತೆ ಮಾಡಿಕೊಳ್ಳಬೇಕಿದೆ. ಇನ್ನು, ದೇಶೀಯ ಲಸಿಕಾ ಉತ್ಪಾದಕರು ಖಾಸಗಿ ಆಸ್ಪತ್ರೆಗಳಿಗೆ ನೇರವಾಗಿ ಲಸಿಕೆಗಳನ್ನು ಪೂರೈಕೆ (ಮಾಸಿಕ ಉತ್ಪಾದನೆಯ ಶೇ.25ರಷ್ಟು ಮಾತ್ರ) ಮಾಡಲು ಅವಕಾಶ ಒದಗಿಸಲಾಗಿದೆ. ಇದರಿಂದಾಗಿ ಅಂತಾರಾಷ್ಟ್ರೀಯ ಹಾಗೂ ದೇಶೀಯವಾಗಿ ಹೊಸ ಲಸಿಕಾ ತಯಾರಕರಿಗೆ ಮಾರುಕಟ್ಟೆ ಪ್ರವೇಶಕ್ಕೆ ಅವಕಾಶ ಸಿಗಲಿದೆ. ದೇಶೀಯ ಲಸಿಕಾ ತಯಾರಿಕೆ ಘಟಕಗಳ ಮೇಲಿನ ಒತ್ತಡವೂ ಕಡಿಮೆ ಆಗಲಿದೆ. ಖಾಸಗಿ ಆಸ್ಪತ್ರೆಗಳು ಲಸಿಕೆಗಳನ್ನು ನೀಡಲು ಸೇವಾ ಶುಲ್ಕವಾಗಿ ಒಂದು ಡೋಸ್‌ಗೆ ಗರಿಷ್ಠ 150 ರೂ.ಗಳನ್ನು ಮಾತ್ರ ಪಡೆಯಬಹುದಾಗಿದೆ. ಈ ಬಗ್ಗೆ ರಾಜ್ಯ ಸರಕಾರಗಳು ಖಡಕ್‌ ನಿಗಾ ಇರಿಸಬೇಕಿದೆ. ಖಾಸಗಿ ಆಸ್ಪತ್ರೆಗಳಿಗೆ ಪೂರೈಕೆ ಮಾಡಲಾಗುವ ಕೊರೊನಾ ಲಸಿಕೆಗಳ ಡೋಸ್‌ಗೆ ದರವನ್ನು ನಿಗದಿಪಡಿಸುವ ಸ್ವಾತಂತ್ರ್ಯ ತಯಾರಕರ ಬಳಿಯೇ ಇರಲಿದೆ. ದರ ಬದಲಾವಣೆಯನ್ನು ತಯಾರಕರು ಮುಂಚಿತವಾಗಿಯೇ ಘೋಷಿಸಬೇಕಿದೆ. ಎಲ್ಲರಿಗೂ ಲಸಿಕೆ: ಆರ್ಥಿಕ ಸ್ಥಾನಮಾನ ಲೆಕ್ಕಿಸದೇ18 ವರ್ಷ ಮೇಲ್ಪಟ್ಟ ದೇಶದ ಪ್ರತಿ ವ್ಯಕ್ತಿಗೂ ಉಚಿತವಾಗಿ ಲಸಿಕೆ ನೀಡಲಾಗುವುದು. ಖಾಸಗಿ ಆಸ್ಪತ್ರೆಗಳಲ್ಲಿಸೇವಾ ಶುಲ್ಕ ಪಾವತಿಸಿ ಲಸಿಕೆ ಪಡೆಯುವವರು ಪಡೆದುಕೊಳ್ಳಬಹುದು ಎಂದೂ ಮಾರ್ಗಸೂಚಿ ಸ್ಪಷ್ಟಪಡಿಸಿದೆ. ರಾಜ್ಯ ಲಸಿಕೆ ವ್ಯರ್ಥ ಪ್ರಮಾಣ (ಪೂರೈಕೆ ಸಂಖ್ಯೆ ಜತೆಗಿನ ಹೋಲಿಕೆ)

• ಜಾರ್ಖಂಡ್‌ 37%
• ಛತ್ತೀಸ್‌ಗಢ 30%
• ತಮಿಳುನಾಡು 15.5%
• ಜಮ್ಮು-ಕಾಶ್ಮೀರ 10.8%
• ಮಧ್ಯಪ್ರದೇಶ 10.7%
• ರಾಷ್ಟ್ರೀಯ ಸರಾಸರಿ ಲಸಿಕೆ ವ್ಯರ್ಥ ಪ್ರಮಾಣ 6.3%

1.45 ಲಕ್ಷ ಕೋಟಿ ರೂ. ಹೆಚ್ಚುವರಿ ವೆಚ್ಚ ದೇಶದಲ್ಲಿ 18ರಿಂದ 45 ವರ್ಷ ವಯಸ್ಸಿನವರಿಗೂ ಜೂನ್‌ 21ರಿಂದ ಉಚಿತ ಲಸಿಕೆ ಹಾಗೂ ಬಡವರಿಗೆ ಉಚಿತ ಪಡಿತರ ವಿತರಣೆಯಿಂದ ಕೇಂದ್ರ ಸರಕಾರದ ಬೊಕ್ಕಸಕ್ಕೆ 1.45 ಲಕ್ಷ ಕೋಟಿ ರೂ. ಹೆಚ್ಚುವರಿ ವೆಚ್ಚವಾಗಲಿದೆ ಎಂದು ಹಣಕಾಸು ಸಚಿವಾಲಯದ ಮೂಲಗಳು ತಿಳಿಸಿವೆ. 18ರಿಂದ 45 ವರ್ಷದವರಿಗೆ ಕೊರೊನಾ ನಿರೋಧಕ ಲಸಿಕೆಯನ್ನು ಉಚಿತವಾಗಿ ನೀಡುವುದರಿಂದ 45ರಿಂದ 50 ಸಾವಿರ ಕೋಟಿ ರೂ. ವೆಚ್ಚವಾಗಲಿದೆ. ಹಾಗೆಯೇ, ಪ್ರಧಾನಮಂತ್ರಿ ಗರೀಬ್‌ ಕಲ್ಯಾಣ ಯೋಜನೆಯಲ್ಲಿ 80 ಕೋಟಿ ಕುಟುಂಬಗಳಿಗೆ 5 ಕೆ.ಜಿ ಅಕ್ಕಿ ಅಥವಾ ಗೋಧಿ, ಒಂದು ಕೆಜಿ ಬೇಳೆಯನ್ನು ನವೆಂಬರ್‌ವರೆಗೂ ವಿಸ್ತರಿಸುವುದರಿಂದ 1.1ರಿಂದ 1.3 ಕೋಟಿ ರೂ. ವೆಚ್ಚವಾಗಲಿದೆ. ಇವೆರಡೂ ಸೇರಿ 1.45 ಲಕ್ಷ ಕೋಟಿ ರೂ. ಹೆಚ್ಚುವರಿ ವೆಚ್ಚವಾಗಲಿದೆ ಎಂದು ಮೂಲಗಳು ತಿಳಿಸಿವೆ. ಕೇಂದ್ರ ಸರಕಾರವು ಲಸಿಕೆ ಅಭಿಯಾನಕ್ಕಾಗಿ 35,000 ಕೋಟಿ ರೂ. ಅನುದಾನವನ್ನು ಬಜೆಟ್‌ನಲ್ಲಿ ಮೀಸಲಿರಿದೆ. ಆದರೆ, ಆರ್‌ಬಿಐ 99,122 ಕೋಟಿ ರೂ.ಡಿವಿಡೆಂಡ್‌ ನೀಡಿದೆ. ಇಂಧನ ತೆರಿಗೆಯಿಂದಲೂ ದಾಖಲೆಯ ಮೊತ್ತ ಸಂಗ್ರಹವಾಗಿದೆ. ಹೀಗಾಗಿ ಅನುದಾನಕ್ಕೆ ಕೊರತೆ ಇಲ್ಲ ಎಂದೂ ಹಣಕಾಸು ಸಚಿವಾಲಯದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಎಲ್ಲರಿಗೂ ಉಚಿತ ಲಸಿಕೆ ವಿತರಣೆ ಮತ್ತು ನವೆಂಬರ್‌ವರೆಗೆ ಬಡವರಿಗೆ ಉಚಿತ ಪಡಿತರ ವಿತರಣೆಯ ನಿರ್ಧಾರವನ್ನು ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಘೋಷಿಸಿದ್ದಾರೆ.