ಭಾರತದ ಆರ್ಥಿಕತೆಗೆ 1991ಕ್ಕಿಂತಲೂ ಅಧಿಕ ಸಂಕಷ್ಟ: ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಕಳವಳ
'ಇದು ಆನಂದಿಸಲು ಸಮಯವಲ್ಲ. ಆದರೆ ಆತ್ಮಾವಲೋಕನದ ಸಂದರ್ಭ. ಪ್ರತಿಯೊಬ್ಬ ನಾಗರಿಕರ ಆರೋಗ್ಯಕರ ಮತ್ತು ಗೌರವಯುತ ಬದುಕಿಗೆ ರಾಷ್ಟ್ರೀಯ ಆದ್ಯತೆಗಳಿರಬೇಕು' - ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್
Admin
0
6
ಟಿಎನ್‌ಎನ್‌ : ಕಳೆದ ಮೂರು ದಶಕಗಳಿಂದ ಸರಕಾರಗಳು ಭಾರತವನ್ನು 3 ಲಕ್ಷ ಕೋಟಿ ಡಾಲರ್‌ಗಳ ಆರ್ಥಿಕತೆಯನ್ನಾಗಿಸುವ ನಿಟ್ಟಿನಲ್ಲಿ, ಆರ್ಥಿಕ ಉದಾರೀಕರಣದ ಪಥವನ್ನು ಅನುಸರಿಸಿವೆ. ಆದರೆ ಈಗಿನ ಭಾರತದ ಪರಿಸ್ಥಿತಿ 1991ರ ಬಿಕ್ಕಟ್ಟಿಗಿಂತಲೂ ತೀವ್ರವಾಗಿದೆ ಎಂದು ಮನಮೋಹನ್ ಸಿಂಗ್ ಶುಕ್ರವಾರ ಹೇಳಿದ್ದಾರೆ.
'ಇದು ಆನಂದಿಸಲು ಸಮಯವಲ್ಲ. ಆದರೆ ಆತ್ಮಾವಲೋಕನದ ಸಂದರ್ಭ. ಪ್ರತಿಯೊಬ್ಬ ನಾಗರಿಕರ ಆರೋಗ್ಯಕರ ಮತ್ತು ಗೌರವಯುತ ಬದುಕಿಗೆ ರಾಷ್ಟ್ರೀಯ ಆದ್ಯತೆಗಳಿರಬೇಕು' ಎಂದು ಸಿಂಗ್ ಹೇಳಿದರು.
ಉದಾರೀಕರಣ ನೀತಿಗಳ ಆರಂಭಕ್ಕೆ 30 ವರ್ಷ ಭರ್ತಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಮಾತನಾಡಿದ ಅವರು, 'ಕಳೆದ ಮೂರು ದಶಕಗಳಲ್ಲಿ ಭಾರತವು ಅದ್ಭುತ ಆರ್ಥಿಕ ಪ್ರಗತಿಯನ್ನು ಸಾಧಿಸಿದೆ. 1991ರಲ್ಲಿ ಕಾಂಗ್ರೆಸ್‌ ಪಕ್ಷ ಜಾರಿಗೊಳಿಸಿದ ಆರ್ಥಿಕ ಸುಧಾರಣೆಗಳು ಇದಕ್ಕೆ ಕಾರಣ. ಕಳೆದ ಮೂರು ದಶಕಗಳಲ್ಲಿ 30 ಕೋಟಿ ಭಾರತೀಯರು ಬಡತನದಿಂದ ಹೊರ ಬಂದಿದ್ದಾರೆ. ಹಾಗೂ ಕೋಟ್ಯಂತರ ಹೊಸ ಉದ್ಯೋಗಗಳು ಸೃಷ್ಟಿಯಾಗಿವೆ' ಎಂದು ವಿವರಿಸಿದರು. ಪ್ರಧಾನಿ ಪಿ. ವಿ. ನರಸಿಂಹರಾವ್‌ ನೇತೃತ್ವದಲ್ಲಿ, ಅಂದಿನ ಹಣಕಾಸು ಸಚಿವ ಮನಮೋಹನ್ ಸಿಂಗ್ ಆರ್ಥಿಕ ಉದಾರೀಕರಣ ನೀತಿ ಜಾರಿಗೊಳಿಸಿದ್ದರು.
'ಸುಧಾರಣೆಯ ಕ್ರಮಗಳಿಂದ ಉದ್ದಿಮೆ ವಲಯದಲ್ಲಿ ಜಾಗತಿಕ ಮಟ್ಟದ ಕಂಪನಿಗಳು ಹೊರಹೊಮ್ಮುವಂತಾಗಿದೆ. ಹಲವು ಕ್ಷೇತ್ರಗಳಲ್ಲಿ ಜಾಗತಿಕ ಶಕ್ತಿಯಾಗಿದೆ. ಆದರೆ ಕೋವಿಡ್‌-19 ಉಂಟು ಮಾಡಿರುವ ದುರಂತ ನನ್ನಲ್ಲಿ ಅತೀವ ದುಃಖವನ್ನು ಉಂಟು ಮಾಡಿದೆ. ಲಕ್ಷಾಂತರ ಭಾರತೀಯರು ಕೆಲಸ ಕಳೆದುಕೊಂಡಿದ್ದಾರೆ. ಆರೋಗ್ಯ ಮತ್ತು ಶಿಕ್ಷಣ ವಲಯ ಹಿಂದುಳಿದಿದೆ. ಅನೇಕ ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ' ಎಂದು ಸಿಂಗ್ ಹೇಳಿದರು.
1991ರ ಸುಧಾರಣಾ ಕ್ರಮಗಳು ಆರ್ಥಿಕ ಬಿಕ್ಕಟ್ಟಿನ ನಿರ್ವಹಣೆಗೆ ಸೀಮಿತವಾಗಿರಲಿಲ್ಲ. ಇಡೀ ದೇಶದ ಆರ್ಥಿಕ ಅಭ್ಯುದಯವನ್ನು ಒಳಗೊಂಡಿತ್ತು. ಆರ್ಥಿಕತೆಯ ಮೇಲೆ ಸರಕಾರದ ನಿಯಂತ್ರಣವನ್ನು ಕೈಬಿಡುವುದಾಗಿತ್ತು. ಈ ಐತಿಹಾಸಿಕ ಉದಾರೀಕರಣ ಪ್ರಕ್ರಿಯೆಯಲ್ಲಿ ಸಹೋದ್ಯೋಗಿಗಳ ಜತೆಗೆ ಭಾಗವಹಿಸುವ ಅವಕಾಶ ನನಗೆ ಸಿಕ್ಕಿರುವುದು ಸೌಭಾಗ್ಯವಾಗಿದೆ ಎಂದು ಸಿಂಗ್ ವಿವರಿಸಿದರು.
90ರ ದಶಕದಲ್ಲಿ ವಿದೇಶಿ ವಿನಿಮಯ ಸಂಗ್ರಹದ ಭಾರಿ ಕೊರತೆ ಉಂಟಾಗಿದ್ದರಿಂದ ಪ್ರಧಾನಿ ನರಸಿಂಹರಾವ್‌ ನೇತೃತ್ವದ ಕಾಂಗ್ರೆಸ್‌ ಸರಕಾರವು ಕೈಗಾರಿಕಾ ವಲಯಕ್ಕಿದ್ದ ನಿರ್ಬಂಧಗಳನ್ನು ತೆರವುಗೊಳಿಸಿ, ಬ್ಯಾಂಕಿಂಗ್‌ ಮತ್ತು ಹಣಕಾಸು ಮಾರುಕಟ್ಟೆಯನ್ನು ಸುಧಾರಣೆಗೊಳಿಸಿ, ದೇಶವನ್ನು ಉನ್ನತ ಆರ್ಥಿಕ ಬೆಳವಣಿಗೆಯ ಪಥಕ್ಕೆ ಕರೆದೊಯ್ದಿತ್ತು. ಇದು ಆರ್ಥಿಕತೆಯನ್ನು ಸ್ಪರ್ಧಾತ್ಮಕಗೊಳಿಸಲು ಮತ್ತು ಜೀವನದ ಗುಣಮಟ್ಟ ವೃದ್ಧಿಸಲು ಸಹಕರಿಸಿತು.
ಆದರೆ ಕೋವಿಡ್‌-19 ಪರಿಣಾಮ ಕಳೆದ 41 ವರ್ಷಗಳಲ್ಲಿಯೇ ಮೊದಲ ಬಾರಿಗೆ ಮೈನಸ್‌ ಶೇ. 7.3ರ ಕುಸಿತವನ್ನು ದಾಖಲಿಸಿತು. ಇದಕ್ಕೂ ಮೊದಲು 2019-20ರಲ್ಲೂ ಶೇ.4ರ, 11 ವರ್ಷದಲ್ಲಿಯೇ ಕೆಳಮಟ್ಟದ ಜಿಡಿಪಿ ಬೆಳವಣಿಗೆ ದಾಖಲಾಗಿತ್ತು. ಹೀಗಾಗಿ ಆರ್ಥಿಕ ಸುಧಾರಣೆಯ ಕ್ರಮಗಳನ್ನು ಉಳಿಸಿಕೊಳ್ಳುವುದೂ ಮುಖ್ಯ ಎಂದು ಸಿಂಗ್ ಹೇಳಿದರು.
