ಭಜರಂಗಿ-2 ಚಿತ್ರದಲ್ಲಿ ಅಜಾನುಬಾಹು ಖಡಕ್ ವಿಲನ್‌ಗಳ ಪಡೆ

(ಹರೀಶ್‌ ಬಸವರಾಜ್‌) ಸಿನಿಮಾದಲ್ಲಿ ಚಿತ್ರ ವಿಚಿತ್ರ ಗೆಟಪ್‌ ಮೂಲಕ ಸಿನಿಮಾದ ಖಳ ನಟರ ಪಾತ್ರಗಳನ್ನು ನಿರ್ದೇಶಕ ಹರ್ಷ ತೋರಿಸಿದ್ದಾರೆ. ಆ ಎಲ್ಲಾ ಖಳ ನಟರು ಲವಲವಿಕೆ ಜತೆ ಮಾತನಾಡಿದ್ದಾರೆ. ಭಜರಂಗಿ ಸಿನಿಮಾದಲ್ಲಿ ಮೂವರು ಖಡಕ್‌ ವಿಲನ್‌ಗಳನ್ನು ಚಿತ್ರರಂಗಕ್ಕೆ ನಿರ್ದೇಶಕ ಹರ್ಷ ಪರಿಚಯಿಸಿದ್ದರು. ಈಗ ‘ಭಜರಂಗಿ-2’ನಲ್ಲಿಯೂ ಅಷ್ಟೇ ಖಡಕ್‌ ಮತ್ತು ಆರಡಿಯ ಆಜಾನುಬಾಹುಗಳನ್ನು ಖಡಕ್‌ ವಿಲನ್‌ಗಳಾಗಿಸಿದ್ದಾರೆ. ಅವರೆಲ್ಲರ ಪರಿಚಯ ಇಲ್ಲಿದೆ. ಡಬಲ್‌ ಶೇಡ್‌ನಲ್ಲಿ ಭಜರಂಗಿ ಲೋಕಿ ‘ಭಜರಂಗಿ’ ಸಿನಿಮಾ ಎಂದಾಕ್ಷಣ ಶಿವರಾಜ್‌ಕುಮಾರ್‌ ಮತ್ತು ಹರ್ಷ ಜತೆಗೆ ನಮಗೆ ಲೋಕಿ ಎಂಬ ನಟ ಕೂಡ ನೆನಪಿಗೆ ಬರುತ್ತಾರೆ. ಭಾಗ-2ರಲ್ಲಿಯೂ ಲೋಕಿ ಅವರು ನಟಿಸಿದ್ದಾರೆ. ‘ಭಜರಂಗಿ ವಿಚಾರಕ್ಕೆ ಬಂದರೆ ನಾನು ಅದೃಷ್ಟವಂತ. ಶಿವ ಅವರನ್ನು ಹೊರತುಪಡಿಸಿದರೆ, ಭಜರಂಗಿ ಸಿನಿಮಾದಲ್ಲಿದ್ದವರು ಯಾರೂ ‘ಭಜರಂಗಿ-2’ನಲ್ಲಿಇಲ್ಲ. ಹರ್ಷ ಮಾಸ್ಟರ್‌ ಕರೆದು ಸಿನಿಮಾ ಬಗ್ಗೆ ಹೇಳಿದಾಗ ಖುಷಿಯಾಯಿತು ಮತ್ತು ಭಯ ಕೂಡ. ನಿರ್ದೇಶಕರು ಅಂದುಕೊಂಡಿದ್ದನ್ನು ತೆರೆಮೇಲೆ ಸಮರ್ಥವಾಗಿ ತರುತ್ತೇನಾ ಎನಿಸಿತ್ತು. ಅದಕ್ಕಾಗಿ ಥಿಯೇಟರ್‌ ವರ್ಕ್ಶಾಪ್‌ ಮಾಡಿ ರೆಡಿಯಾದೆ. ಇದರಲ್ಲಿ ನನ್ನದು ಎರಡು ಶೇಡ್‌ ಇರುವ ಪಾತ್ರ. ಟ್ರೇಲರ್‌ನಲ್ಲಿಇರುವುದು ಒಂದೇ ಶೇಡ್‌. ಇನ್ನೊಂದು ಶೇಡ್‌ ಅನ್ನು ಸಿನಿಮಾದಲ್ಲಿಯೇ ನೋಡಬೇಕು. ಈ ಸಿನಿಮಾ ಒಪ್ಪಿಕೊಂಡ ಮೇಲೆ ಬೇರೆ ಯಾವುದೇ ಸಿನಿಮಾಗಳನ್ನು ಒಪ್ಪಿಕೊಳ್ಳದೆ ಇದಕ್ಕೋಸ್ಕರ ತಯಾರಿ ನಡಿಸಿದೆ’ ಎಂದು ಹೇಳಿದ್ದಾರೆ ಭಜರಂಗಿ ಲೋಕಿ. 110 ವರ್ಷದ ವಜ್ರಗಿರಿ ಈ ಸಿನಿಮಾದಲ್ಲಿ ವಜ್ರಗಿರಿ ಎಂಬ ನಟ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಅವರು ಈ ಹಿಂದೆ ಧಾರಾವಾಹಿಗಳಲ್ಲಿ ಮತ್ತು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ‘ಭಜರಂಗಿ-2ನಲ್ಲಿ ನಾನು ಇಡೀ ಕಥೆಯನ್ನು ನಿರೂಪಣೆ ಮಾಡುತ್ತೇನೆ. ನನಗೆ ಈಗ 26 ವರ್ಷ. ಆದರೆ ಸಿನಿಮಾದಲ್ಲಿ 110 ವರ್ಷದವನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ. ನನ್ನ ಹೈಟ್‌, ಪರ್ಸನಾಲಿಟಿ ನೋಡಿ, ಆಡಿಷನ್‌ ಮಾಡಿ ಆಯ್ಕೆ ಮಾಡಿಕೊಂಡರು. ವಿಭಿನ್ನವಾದ ಪಾತ್ರ. ನನ್ನ 110 ವರ್ಷದ ಪಾತ್ರಕ್ಕೆ ನಾನೇ ಡಬ್ಬಿಂಗ್‌ ಕೂಡ ಮಾಡಿದ್ದೇನೆ. ನನ್ನ ಪಾತ್ರದ ಹೆಸರನ್ನು ಸಿನಿಮಾದಲ್ಲಿಯೇ ರಿವೀಲ್‌ ಮಾಡುತ್ತಾರೆ’ ಎಂದಿದ್ದಾರೆ ನಟ ವಜ್ರಗಿರಿ. ವಿಕ್ಷಿಪ್ತ ಅರಕನಾದ ಚೆಲುವರಾಜ್‌ ಈ ಸಿನಿಮಾದಲ್ಲಿ ಮೊದಲ ಭಜರಂಗಿಯಲ್ಲಿದ್ದಂತೆ ವಿಕ್ಷಿಪ್ತ ಪಾತ್ರಗಳಿವೆ, ಅವುಗಳಲ್ಲಿ ಪ್ರಮುಖವಾದದ್ದು ‘ಅರಕ’. ಈ ಪಾತ್ರದ ಪೋಸ್ಟರ್‌ ಅನ್ನು ಈಗಾಗಲೇ ಬಿಡುಗಡೆ ಮಾಡಿದ್ದು, ಅದನ್ನು ಕಂಡು ಎಲ್ಲರೂ ಇಷ್ಟಪಟ್ಟಿದ್ದಾರೆ. ಈ ಪಾತ್ರದಲ್ಲಿ ನಟಿಸಿರುವ ಕಲಾವಿದರ ಹೆಸರು ಚೆಲುವರಾಜ್‌. ‘ನಾನು ಹಲವು ಸೀರಿಯಲ್‌ಗಳಲ್ಲಿ ನಟಿಸಿದ್ದೇನೆ. ಮಹಾಭಾರತದಲ್ಲಿ ಧುರ್ಯೋಧನನಾಗಿದ್ದೆ. ನಾಗಿಣಿ ಸೀರಿಯಲ್‌ನಲ್ಲಿ ಪ್ರಮುಖ ಪಾತ್ರದಲ್ಲಿದ್ದೆ. ಹೀಗೆ ಹಲವು ಸೀರಿಯಲ್‌ಗಳು ಮತ್ತು ಪೈಲ್ವಾನ್‌, ಫೈಟರ್‌ ಸಿನಿಮಾಗಳಲ್ಲಿ ನಟಿಸಿದ್ದೇನೆ. ‘ಭಜರಂಗಿ-2’ ಸಿನಿಮಾದಲ್ಲಿ ನನ್ನ ಪಾತ್ರ ವಿಭಿನ್ನದಲ್ಲಿ ವಿಭಿನ್ನವಾಗಿದೆ. ಹರ್ಷ ಮಾಸ್ಟರ್‌ ಅವರ ಕಲ್ಪನೆಯ ಕಥೆಗೆ ನಾನು ಜೀವ ತುಂಬಿದ್ದೇನೆ ಎನಿಸುತ್ತದೆ. ನನ್ನ ಪಾತ್ರ ಅಳುತ್ತದೆ, ನಗುತ್ತದೆ, ಎಲ್ಲ ಭಾವನೆಗಳನ್ನೂ ವ್ಯಕ್ತಪಡಿಸುತ್ತ್ತದೆ. ಈ ಸಿನಿಮಾದ ಪಾತ್ರ ಸಿಗಲು ‘ಮಹಾಕಾಳಿ’ ಸೀರಿಯಲ್‌ನಲ್ಲಿ ನನ್ನ ಜತೆ ನಟಿಸುತ್ತಿದ್ದ ಸಂಜಯ್‌ ಅವರೇ ಕಾರಣ’ ಎಂದು ಹೇಳಿದರು ಚೆಲುವರಾಜ್‌. 8 ಕೆಜಿ ಕಾಸ್ಟ್ಯೂಮ್‌ನಲ್ಲಿ ಪ್ರಸನ್ನ ಈ ಮೂವರ ಜತೆ ಪ್ರೇಕ್ಷಕರನ್ನು ಕಾಡಲು ಪ್ರಸನ್ನ ಭಾಗಿನ ಎಂಬ ಆಜಾನುಬಾಹುವನ್ನು ಹರ್ಷ ಈ ಸಿನಿಮಾದಲ್ಲಿ ಕರೆತಂದಿದ್ದಾರೆ. ಕಳೆದ ಒಂಭತ್ತು ವರ್ಷಗಳಿಂದ ಹಲವು ಧಾರಾವಾಹಿಗಳು ಮತ್ತು ಸಿನಿಮಾಗಳಲ್ಲಿ ಪ್ರಸನ್ನ ನಟಿಸಿದ್ದಾರೆ. ‘ಈ ಚಿತ್ರದಲ್ಲಿ ನಾನು 85 ವರ್ಷದ ಖಡಕ್‌ ವಿಲನ್‌ ರೋಲ್‌ನಲ್ಲಿ ಮಿಂಚಿದ್ದೇನೆ. ನನ್ನ ಪಾತ್ರ ಫ್ಲ್ಯಾಶ್‌ಬ್ಯಾಕ್‌ನಲ್ಲಿ ಬರುತ್ತದೆ. ನಟಿಸುವಾಗ ನನ್ನ ಮೇಲೆ 8 ಕೆಜಿಯ ಕಾಸ್ಟ್ಯೂಮ್‌ ಇತ್ತು. ಜತೆಗೆ ಹೀಲ್ಡ್‌ ಚಪ್ಪಲಿ ಎಲ್ಲವೂ ಸೇರಿ 6 ಅಡಿ ಇರುವ ನಾನು 8 ಅಡಿ ಎತ್ತರ ಕಾಣುತ್ತಿದ್ದೆ. ನನ್ನ ಮತ್ತು ಶಿವಣ್ಣ ಅವರ ನಡುವಿನ ಫೈಟ್‌ ಸಿನಿಮಾದ ಮೇಜರ್‌ ಅಂಶಗಳಲ್ಲಿ ಒಂದು. ವಿಭಿನ್ನವಾಗಿದೆ, ಇದಕ್ಕಾಗಿ ನಾನು 109 ಕೆಜಿಯಾಗಿದ್ದೆ. ಇದರ ನಂತರ ನನ್ನ ವೃತ್ತಿ ಬದುಕಿನಲ್ಲಿಒಂದಷ್ಟು ಬದಲಾವಣೆಗಳಾಗುತ್ತವೆ ಎನಿಸುತ್ತದೆ. ನನ್ನ ಪಾತ್ರದ ಹೆಸರು ಜಾಗ್ರವ’ ಎನ್ನುತ್ತಾರೆ ಪ್ರಸನ್ನ.