ಬಿಡಿಎ ಹೆಸರು ಕೇಳಿದ್ರೆ ಬೆಚ್ಚಿಬೀಳುವ ಕಾರಂತ ಬಡಾವಣೆ ಜನ; ಸಾಲ ಮಾಡಿ ಮನೆ ಕಟ್ಟಿದವರು ಅತಂತ್ರ!

ಬೆಂಗಳೂರು: ಉದ್ದೇಶಿತ ವ್ಯಾಪ್ತಿಯಲ್ಲಿ ಕಟ್ಟಿಕೊಂಡವರದ್ದು ಅಕ್ಷರಶಃ ತೂಗುಗತ್ತಿಯ ನಡುವಿನ ಜೀವನವಾಗಿದೆ. ಯಾವಾಗ ಬಿಡಿಎ ಮನೆ ತೆರವು ಮಾಡುತ್ತದೆಯೋ ಎಂಬ ಆತಂಕದಲ್ಲೇ ದಿನ ಕಳೆಯುವಂತಾಗಿದೆ. ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರವು ಯಾವುದೇ ಮಾಹಿತಿ ನೀಡದೆ, ಕಳೆದ ತಿಂಗಳು ಏಕಾಏಕಿ ಸುಮಾರು 22ಕ್ಕೂ ಹೆಚ್ಚು ಮನೆಗಳನ್ನು ನೆಲಸಮ ಮಾಡಿದೆ. ಸುಮಾರು 800 ಮನೆಗಳ ನಿವಾಸಿಗಳು ಮನೆ ಕಳೆದುಕೊಳ್ಳುವ ಆತಂಕದಲ್ಲೇ ವಾಸ ಮಾಡುತ್ತಿದ್ದಾರೆ. ಕೆಲವರು ಕೆಲಸಗಳಿಗೂ ಹೋಗದೆ ಮನೆಯಲ್ಲೇ ಉಳಿದಿದ್ದಾರೆ. ಅಧಿಕಾರಿಗಳು ಬಂದಾಗ ಕಾಡಿಬೇಡಿಯಾದರೂ ಮನೆ ಉಳಿಸಿಕೊಳ್ಳಬಹುದು ಎಂಬ ನಿರೀಕ್ಷೆಯಲ್ಲಿದ್ದಾರೆ. ಇನ್ನು ಕೆಲವರು ಕ್ಷೇತ್ರದ ಶಾಸಕರು, ಸಂಸದರ ಬಳಿ ದಾಖಲೆಗಳನ್ನು ಹೊತ್ತು ನ್ಯಾಯಕ್ಕಾಗಿ ಅಲೆಯುತ್ತಿದ್ದಾರೆ. ಶಿವರಾಮ ಕಾರಂತ ಬಡಾವಣೆಗೆ ಗುರುತಿಸಿರುವ ಜಾಗ ದಾಸರಹಳ್ಳಿ, ಯಲಹಂಕ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಹರಡಿಕೊಂಡಿದೆ. ಹಲವರು ಇಲ್ಲಿ ನಿವೇಶನ ಖರೀದಿಸಿ, ಲಕ್ಷಾಂತರ ರೂಪಾಯಿ ಸುರಿದು ಮನೆ ಕಟ್ಟಿದ್ದಾರೆ. ಸಾಲದ ಇಎಂಐ ಕೂಡ ಕಟ್ಟುತ್ತಿದ್ದಾರೆ. ಇದೀಗ ಏಕಾಏಕಿ ಮನೆ ಕೆಡವಿದರೆ ಬೀದಿಗೆ ಬೀಳುವಂತಾಗಿದೆ. ಭೂಮಿ ಕೊಟ್ಟ ಹಲವು ರೈತರು ಕೂಡ ಅತಂತ್ರ ಸ್ಥಿತಿಗೆ ಸಿಲುಕಿದ್ದಾರೆ. ಈ ಕುರಿತು ಪ್ರತಿಕ್ರಿಯಿಸಿರುವ ದಾಸರಹಳ್ಳಿ ಕ್ಷೇತ್ರದ ಶಾಸಕ ಆರ್‌. ಮಂಜುನಾಥ್‌, ''ನನ್ನ ಕ್ಷೇತ್ರವೊಂದರಲ್ಲೇ ಸೋಮಶೆಟ್ಟಿಹಳ್ಳಿ, ಗಾಣಿಗರಹಳ್ಳಿ, ಕೆಬ್ಬೆಪಾಳ್ಯ, ಲಕ್ಷ್ಮೇಪುರ ಹಳ್ಳಿಗಳಲ್ಲಿ ನಿವೇಶನ ಖರೀದಿಸಿದವರು ಮತ್ತು ರೈತರು ಸುಮಾರು 4,500 ಮಂದಿಯಿದ್ದಾರೆ. (ಒಟ್ಟಾರೆ ಸುಮಾರು 25 ಸಾವಿರಕ್ಕೂ ಹೆಚ್ಚು ಫಲಾನುಭವಿಗಳಿದ್ದಾರೆ.) ಇವರೆಲ್ಲರೂ ಶಿವರಾಮ ಕಾರಂತ ಬಡಾವಣೆ ನಿರ್ಮಾಣ ವಿಚಾರದಿಂದಾಗಿ ಅತಂತ್ರ ಸ್ಥಿತಿಯಲ್ಲಿದ್ದಾರೆ. ರೈತರ ಸಹಸ್ರಾರು ಎಕರೆ ಭೂಮಿಯನ್ನು ಬಿಡಿಎ ಗುರುತಿಸಿತು. ಆದರೆ ರೈತರಿಗೆ ಬಿಡಿಎ ಹಣವೂ ಕೊಡದೆ, ಅತ್ತ ತಮ್ಮ ಭೂಮಿಯಲ್ಲಿ ಕೃಷಿಯನ್ನೂ ಮಾಡಲಾಗದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಮುಖ್ಯವಾಗಿ ಬಡಾವಣೆ ನಿರ್ಮಾಣದ ವಾಸ್ತವ ಸ್ಥಿತಿಯನ್ನು ಮರೆಮಾಚಲಾಗಿದ್ದು, ನ್ಯಾಯಾಲಯಕ್ಕೆ ಸರಿಯಾದ ಮಾಹಿತಿ ನೀಡದ ಬಿಡಿಎ, ಬಡಪಾಯಿಗಳ ಮೇಲೆ ದರ್ಬಾರು ಮಾಡುತ್ತಿದೆ ಎಂದು ಆರೋಪಿಸಿದ್ದಾರೆ. ''ಬಡಾವಣೆ ನಿರ್ಮಾಣಕ್ಕಾಗಿ ಬಿಡಿಎ 3,546 ಎಕರೆ ಜಾಗ ನಿಗದಿಪಡಿಸಿ, ಕಾಯ್ದಿರಿಸಿತ್ತು. ಆದರೆ, ಬಿಡಿಎ ವಿಳಂಬ ನೀತಿಯಿಂದಾಗಿ ಕಾಯ್ದಿರಿಸಿದ್ದ ಜಾಗದ ಪೈಕಿ ಈಗಾಗಲೇ 1,500 ಎಕರೆ ಅಭಿವೃದ್ಧಿಯಾಗಿದೆ. ಇದಕ್ಕೆ ಯಾರು ಹೊಣೆ,'' ಎಂದು ಅವರು ಪ್ರಶ್ನಿಸಿದ್ದಾರೆ. ಅನಧಿಕೃತ ಮನೆಗಳ ಪಟ್ಟಿಗೆ ಸಿದ್ಧತೆ ಸುಪ್ರೀಂಕೋರ್ಟ್‌ನ ಪೀಠವು ಈ ಬಡಾವಣೆಯ ಭೂಸ್ವಾಧೀನ ಪ್ರಕ್ರಿಯೆ ಪೂರ್ಣಗೊಳಿಸುವಂತೆ ರಾಜ್ಯ ಸರಕಾರ ಹಾಗೂ ಬಿಡಿಎಗೆ 2018ರ ಆಗಸ್ಟ್‌ 3ರಂದು ನಿರ್ದೇಶನ ನೀಡಿತ್ತು. ಮೂರು ತಿಂಗಳ ಒಳಗೆ ಭೂಸ್ವಾಧೀನ ಪ್ರಕ್ರಿಯೆ ಪೂರ್ಣಗೊಳಿಸಿ ವರದಿ ಸಲ್ಲಿಸಬೇಕು. ಜತೆಗೆ ಅಲ್ಲಿ ಯಾವುದೇ ಕಾಮಗಾರಿ ನಡೆಸಬಾರದು ಎಂದು ನಿರ್ದೇಶಿಸಿತ್ತು. ಸುಪ್ರೀಂಕೋರ್ಟ್‌ ನಿರ್ದೇಶನದಂತೆ ಬಡಾವಣೆ ನಿರ್ಮಾಣಕ್ಕೆ ಬೇಕಾದ ಭೂಮಿಗಾಗಿ ಮೇಡಿ ಅಗ್ರಹಾರ, ಸೋಮಶೆಟ್ಟಿಹಳ್ಳಿ, ಲಕ್ಷ್ಮೇಪುರ ಸೇರಿದಂತೆ 17 ಗ್ರಾಮಗಳಲ್ಲಿಸ್ಯಾಟಲೈಟ್‌ ಮೂಲಕ ಸಮೀಕ್ಷೆ ನಡೆಸಿ, 800 ಕಟ್ಟಡಗಳನ್ನು ಪಟ್ಟಿ ಮಾಡಲಾಗಿತ್ತು. ಇದೀಗ ಬಡಾವಣೆಗೆ ಸಂಬಂಧಿಸಿದಂತೆ ಸುಪ್ರೀಂಕೋರ್ಟ್‌ ನೇಮಕ ಮಾಡಿರುವ ನ್ಯಾ ಎ.ವಿ. ಚಂದ್ರಶೇಖರ್‌ ಸಮಿತಿಯು ಭೂಮಾಲೀಕರು ಮತ್ತು ಸಾರ್ವಜನಿಕರಿಂದ ಅಹವಾಲು/ಅರ್ಜಿಗಳನ್ನು ಆಹ್ವಾನಿಸಿದೆ. ಇದಕ್ಕೆ ಸೆಪ್ಟೆಂಬರ್‌ 9ರವರೆಗೆ ಗಡುವು ನೀಡಲಾಗಿದೆ. ಅರ್ಜಿಗಳು ಇನ್ನೂ ಬರುತ್ತಿವೆ. ಎಲ್ಲವೂ ಬಂದ ನಂತರ ಅವುಗಳ ಪರಿಶೀಲನೆ ನಡೆಸಿ, ಅಂತಿಮವಾಗಿ ಎಷ್ಟು ಮನೆಗಳು ಅನಧಿಕೃತ ಎಂಬುದನ್ನು ಪಟ್ಟಿ ಮಾಡಲಾಗುವುದು ಎಂದು ಬಿಡಿಎ ಹಿರಿಯ ಅಧಿಕಾರಿಗಳು 'ವಿಕ'ಗೆ ಮಾಹಿತಿ ನೀಡಿದರು. ಶಿವರಾಮಕಾರಂತ ಬಡಾವಣೆ ವಿಚಾರವಾಗಿ ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿಯವರೊಂದಿಗೆ ಚರ್ಚಿಸಿ, ಶೀಘ್ರ ರಾಜ್ಯದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರನ್ನು ಭೇಟಿ ಮಾಡಲಿದ್ದೇವೆ. ಬಿಡಿಎಯಿಂದ ಆಗುತ್ತಿರುವ ಅನ್ಯಾಯವನ್ನು ತಡೆಗಟ್ಟಿ ಬಡವರಿಗೆ ನ್ಯಾಯ ದೊರಕಿಸಿಕೊಡಬೇಕೆಂದು ಮನವಿ ಸಲ್ಲಿಸುತ್ತೇವೆ. ಸುಪ್ರೀಂಕೋರ್ಟ್‌ಗೆ ಸರಿಯಾದ ಮಾಹಿತಿ ನೀಡಿ ಪುನರ್‌ಪರಿಶೀಲಿಸುವಂತೆಯೂ ಒತ್ತಾಯಿಸಲಾಗುವುದು. ಆರ್‌. ಮಂಜುನಾಥ್‌, ಶಾಸಕರು, ದಾಸರಹಳ್ಳಿ ಕ್ಷೇತ್ರ ಮನೆ ಕೆಡವಲು ಬಿಡೋಲ್ಲ ''ಬಿಡಿಎಯಿಂದ ಆದೇಶವಾದ ನಂತರವೂ ಕೆಲ ಡೆವಲಪರ್‌ಗಳು ನಮ್ಮಂತಹ ಅಮಾಯಕರಿಗೆ ನಿವೇಶನಗಳನ್ನು ಮಾರಿದರು. ಆದರೆ ಬಗ್ಗೆ ಯಾವುದೇ ತಕರಾರು ಬಾರದ ಹಿನ್ನೆಲೆಯಲ್ಲಿ ನಾವು ನಿವೇಶನ ಖರೀದಿಸಿ ರಿಜಿಸ್ಪ್ರೇಷನ್‌ ಕೂಡ ಮಾಡಿಸಿ, ಮನೆ ಕಟ್ಟಿಸಿದ್ದೇವೆ. ಇದಕ್ಕಾಗಿ ಸುಮಾರು 50 ಲಕ್ಷ ರೂ. ಸಾಲ ಮಾಡಿದ್ದೆವು. ಇದೀಗ ಬಿಡಿಎ ನಿಮ್ಮ ಮನೆ ಅನಧಿಕೃತ ಎಂದರೆ ಹೇಗೆ ಅದನ್ನು ಒಪ್ಪಬೇಕು? ಒಂದು ವೇಳೆ ಬಿಡಿಎಗೆ ಇಚ್ಛಾಶಕ್ತಿಯಿದ್ದು, ಬಡವರಿಗೆ ವಂಚನೆ ಮಾಡಬಾರದು ಎಂಬ ಮನಸ್ಸು ಇದ್ದಿದ್ದರೆ, 2018ರ ಆಗಸ್ಟ್‌ ನಂತರ 17 ಗ್ರಾಮಗಳ (ನಿಗದಿತ) ನಿವೇಶನಗಳನ್ನು ಮಾರಾಟ, ಖರೀದಿ ಆಗದಂತೆ ನೋಂದಣಾಧಿಕಾರಿಗಳ ಕಚೇರಿಯಲ್ಲೇ ಬ್ಲಾಕ್‌ ಮಾಡಿಸಬೇಕಿತ್ತು. ಅದು ಬಿಟ್ಟು ಈಗ ಮನೆ ತೆರವು ಮಾಡಲು ಬಂದರೆ ನಾವು ಖಂಡಿತಾ ಬಿಡುವುದಿಲ್ಲ,'' ಎಂದು ಸೋಮಶೆಟ್ಟಿಹಳ್ಳಿ ನಿವಾಸಿ ದೇವೇಂದ್ರಪ್ಪ ಹೇಳಿದರು.