ಬೆಂಗಳೂರಿನಲ್ಲಿ ಟೊಮೇಟೊ, ತರಕಾರಿ ದರ ತುಸು ಇಳಿಕೆ: ಆದ್ರೆ ಎಲೆಕೋಸು, ಬೀಟ್ ರೂಟ್ ದರ ಏರಿಕೆ

: ಟೊಮೇಟೊ, ಕೊತ್ತಂಬರಿ ಸೊಪ್ಪು, ಬೀನ್ಸ್‌ , ಈರುಳ್ಳಿ ಸೇರಿದಂತೆ ಕೆಲವು ತರಕಾರಿಗಳ ಕೊಂಚ ಇಳಿಕೆಯಾಗಿದೆ. ಆದರೆ ಇತರೆ ಬಹುತೇಕ ತರಕಾರಿಗಳ ದರ ಏರುಗತಿಯಲ್ಲೇ ಮುಂದುವರಿದಿದೆ. ಕೆಲವು ತರಕಾರಿಗಳ ದರ ಮತ್ತೆ ಕೆ.ಜಿ.ಯ ಮೇಲೆ 10 ರೂ. ಏರಿಕೆಯಾಗಿದೆ. ಅಕ್ಟೋಬರ್‌ - ನವೆಂಬರ್‌ನಲ್ಲಿ ಸುರಿದ ಮಳೆಯಿಂದಾಗಿ ಬೆಳೆಗಳು ಹಾಳಾಗಿವೆ. ಜತೆಗೆ ಶುಭ ಸಮಾರಂಭಗಳಿರುವುದರಿಂದ ಬೇಡಿಕೆ ಹೆಚ್ಚಾಗಿದೆ. ಅದಕ್ಕೆ ತಕ್ಕಂತೆ ಪೂರೈಕೆಯಾಗುತ್ತಿಲ್ಲ. ಹೀಗಾಗಿ ಹೊಸ ಬೆಳೆ ಬರುವವರೆಗೆ ಬೆಲೆ ಏರಿಕೆಯ ಬಿಸಿ ಗ್ರಾಹಕರಿಗೆ ತಟ್ಟುತ್ತಲೇ ಇರುತ್ತದೆ ಎನ್ನುತ್ತಾರೆ ವ್ಯಾಪಾರಿಗಳು. ತರಕಾರಿಗಳ ದರ ಸುಮಾರು ಎರಡು ತಿಂಗಳಿಂದ ಏರುಗತಿಯಲ್ಲೇ ಸಾಗುತ್ತಿದ್ದು, ಈ ವಾರ 100 ರೂ. ದಾಟಿದ್ದ ಟೊಮೇಟೊ 80 ರೂ.ಗೆ ಸಿಗುತ್ತಿದೆ. ಕಡಿಮೆ ಗುಣಮಟ್ಟ ಹೊಂದಿರುವ ಟೊಮೇಟೊ ಕೆಲವೆಡೆ 70 ರೂ. ಗೂ ಸಿಗುತ್ತಿದೆ. 50-60 ರೂ.ಗೆ ಏರಿದ್ದ ಕೊತ್ತಂಬರಿ ಸೊಪ್ಪು 40 ರೂ. ಗೆ ಇಳಿಕೆಯಾಗಿದೆ. ಬೀನ್ಸ್‌ ಕೂಡ ಕಳೆದ ವಾರ 99 ರೂ. ಇದ್ದುದು ಈ ವಾರ 70 ರೂ.ಗೆ ಇಳಿಕೆಯಾಗಿದೆ. ದಪ್ಪ ಮೆಣಸಿನಕಾಯಿ 120 ರೂ. ಇದ್ದುದು 105 ರೂ. ಮುಟ್ಟಿದೆ. ಅದೇ ರೀತಿ ಸೆಂಚುರಿ ತಲುಪಿದ್ದ ಬೆಂಡೆ ಕಾಯಿ ದರದಲ್ಲಿ ಕೂಡ ಸ್ವಲ್ಪ ಇಳಿಕೆಯಾಗಿದ್ದು, ಕೆ.ಜಿ.ಗೆ 87 ರೂ. ಇದೆ. ಈರುಳ್ಳಿ 50-60 ರೂ. ಇದ್ದುದು ಇದೀಗ 40 ರೂ. ಮುಟ್ಟಿದೆ. ಹೀರೇಕಾಯಿ 94 ರೂ. ಇದ್ದದು ಇದೀಗ 80 ರೂ.ಗೆ ಇಳಿಕೆಯಾಗಿದೆ. ಆದರೆ ಬೀಟ್‌ರೂಟ್‌ 60 ರೂ.ನಿಂದ 74 ರೂ. ಏರಿದರೆ, ಎಲೆಕೋಸು ದರ 56 ರೂ. ನಿಂದ 74 ರೂ.ತಲುಪಿದೆ. ಬಹುತೇಕ ಸೊಪ್ಪುಗಳ ದರ ಕೂಡ ಏರಿದ್ದು ಇಳಿಯಲೇ ಇಲ್ಲ. ಹೀಗಾಗಿ ತಳ್ಳು ಗಾಡಿಗಳು, ಸೈಕಲ್‌ಗಳಲ್ಲಿ ಹೊತ್ತು ತರುತ್ತಿದ್ದ ಸೊಪ್ಪಿನ ಮಾರಾಟಗಾರರು ಇದೀಗ ಮರೆಯಾಗಿದ್ದಾರೆ. ದಂಟು, ಹರಿವೆ ಸೊಪ್ಪುಗಳಂತೂ ಕೈಗೆಟುಕದಂತಾಗಿದೆ. ಒಂದು ಕಂತೆಗೆ 40-50 ರೂ.ಗೆ ಮಾರಾಟವಾಗುತ್ತಿದೆ. ಅಷ್ಟು ದುಡ್ಡು ಕೊಟ್ಟರೂ ಗುಣಮಟ್ಟದ ಸೊಪ್ಪು ಸಿಗುತ್ತಿಲ್ಲ. ಪ್ರಮಾಣ ಕುಸಿತ ಕಲಾಸಿ ಪಾಳ್ಯ ತರಕಾರಿ ಸಗಟು ಮಾರುಕಟ್ಟೆಗೆ ಈಗ ಕೇವಲ 40 ಲೋಡ್‌ನಷ್ಟು ಮಾತ್ರ ಬರುತ್ತಿದೆ. ಮಹಾರಾಷ್ಟ್ರದಿಂದ ಟೊಮೇಟೊ, ಆಂಧ್ರದಿಂದ ಬೆಂಡೆಕಾಯಿ, ತಮಿಳುನಾಡಿನಿಂದ ಬದನೆಕಾಯಿ ಬೆಂಗಳೂರಿನ ಮಾರುಕಟ್ಟೆಗಳಿಗೆ ಬರುತ್ತಿದೆ. ತರಕಾರಿಗಳ ಪ್ರಮಾಣ ಸಾಕಷ್ಟು ಇಳಿಕೆಯಾಗಿದೆ ಎಂದು ಕಲಾಸಿಪಾಳ್ಯ ತರಕಾರಿ ಸಗಟು ವರ್ತಕರ ಸಂಘದ ಅಧ್ಯಕ್ಷ ಆರ್‌.ವಿ. ಗೋಪಿ ತಿಳಿಸಿದರು. ಹಾಪ್‌ಕಾಮ್ಸ್‌ನಲ್ಲಿ , ತರಕಾರಿ ದರ (ಪ್ರತಿ ಕೆ.ಜಿ.ಗೆ) ಕಲ್ಲಂಗಡಿ ಕಿರಣ್‌ 42 ರೂ., ಮೂಸಂಬಿ 87 ರೂ. ಬಿಳಿ ಬದನೆಕಾಯಿ 111 ರೂ. ಗುಂಡು ಬದನೆಕಾಯಿ 103 ರೂ. ಬೀನ್ಸ್‌ 70 ರೂ. ಸಪೋಟ 47 ರೂ. ಸೀಬೆ 56 ರೂ. ಸೀತಾಫಲ 51 ರೂ. ಹಾಗಲಕಾಯಿ 74 ರೂ. ದಪ್ಪ ಮೆಣಸಿನಕಾಯಿ 105 ರೂ. ಬಜ್ಜಿ ಮೆಣಸಿನಕಾಯಿ 94 ರೂ. ಎಲೆಕೋಸು 74 ರೂ. ನುಗ್ಗೆಕಾಯಿ 360 ರೂ. ಬೆಂಡೆಕಾಯಿ 87 ರೂ. ಈರುಳ್ಳಿ ಮಧ್ಯಮ 35 ರೂ. ಮೂಲಂಗಿ 83 ರೂ. ಟೊಮೇಟೊ 80 ರೂ. ತೊಗರಿಕಾಯಿ 99 ರೂ. ಬೀಟ್‌ರೂಟ್‌ 74 ರೂ. ಗೋರಿಕಾಯಿ ಗೊಂಚಲು 96 ರೂ. ಊಟಿ ಕ್ಯಾರಟ್‌ 98 ರೂ. ಡೆಲ್ಲಿಕ್ಯಾರಟ್‌ 70 ರೂ. ನಾಟಿ ಕ್ಯಾರಟ್‌ 92 ರೂ. ಹೀರೇಕಾಯಿ 80 ರೂ. ಕೊತ್ತಂಬರಿ ನಾಟಿ 70 ರೂ. ಮೆಂತ್ಯ ಸೊಪ್ಪು 120 ರೂ. ಕೊತ್ತಂಬರಿ ಸೊಪ್ಪು ಫಾರಂ 55 ರೂ. ನಾಟಿ ಸೊಪ್ಪು 70 ರೂ. ದಂಟಿನ ಸೊಪ್ಪು 140 ರೂ. ಅರಿವೆ ಸೊಪ್ಪು 107 ರೂ. ಸಬ್ಬಸಿಗೆ ಸೊಪ್ಪು 150 ರೂ. ಮೊಟ್ಟೆ (ಒಂದಕ್ಕೆ)5.80 ರೂ.