ಬೆಂಗಳೂರಿನಲ್ಲಿ ಅಕ್ರಮ ರೆಮ್‌ಡೆಸಿವಿರ್‌ ಮಾರಾಟ: ವೈದ್ಯ ದಂಪತಿ ಸೇರಿ ನಾಲ್ವರ ಬಂಧನ
ವೈದ್ಯರು ರೋಗಿಗಳ ಶುಶ್ರೂಷೆ ಮಾಡುವ ಬದಲು ಹಣದಾಸೆಗಾಗಿ ಕಳ್ಳದಂಧೆಗಿಳಿದಿರುವುದು ನಿಜಕ್ಕೂ ನಾಚಿಕೆಗೇಡಿನ ಸಂಗತಿ. ರೆಮ್‌ ಡೆಸಿವಿರ್‌ ಚುಚ್ಚುಮದ್ದೊಂದಕ್ಕೆ 25 ಸಾವಿರ ರು.ಗೆ ಮಾರುತ್ತಿದ್ದ ವೈದ್ಯ ದಂಪತಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಮಾಡಿದ್ದುಣ್ಣೋ ಮಾರಾಯ!
Admin
0
8
: ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿಅಕ್ರಮವಾಗಿ ರೆಮ್‌ಡೆಸಿವಿರ್‌ ಮಾರಾಟ ಮಾಡುತ್ತಿದ್ದ ಇಬ್ಬರು ವೈದ್ಯರು ಹಾಗೂ ಆರ್‌ಟಿಪಿಸಿಆರ್‌ ನಕಲಿ ವರದಿ ನೀಡುತ್ತಿದ್ದ ಇಬ್ಬರನ್ನು ಹಲಸೂರು ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಚಾಮರಾಜಪೇಟೆಯ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯ ದಂಪತಿಯಾದ ಡಾ. ಶೇಖರ್‌ ಹಾಗೂ ಡಾ. ಪ್ರಜ್ವಲಾ ಹಣದಾಸೆಗೆ ಕೊರೊನಾ ಸೋಂಕಿತರಿಗೆ ನೀಡುವ ರೆಮ್‌ ಡೆಸಿವಿರ್‌ ಚುಚ್ಚುಮದ್ದೊಂದಕ್ಕೆ 25 ಸಾವಿರ ರೂ. ನಂತೆ ಮಾರಾಟ ಮಾಡುತ್ತಿದ್ದರು. ಆರೋಪಿಗಳನ್ನು ಬಂಧಿಸಿ, 11 ರೆಮ್‌ಡೆಸಿವಿರ್‌ ಚುಚ್ಚುಮದ್ದುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಸಾರ್ವಜನಿಕರ ಬಳಿ ಆಧಾರ್‌ ಕಾರ್ಡ್‌ ಹಾಗೂ 500 ರೂ. ಪಡೆದು ನಕಲಿ ಆರ್‌ಟಿಪಿಸಿಆರ್‌ ವರದಿ ನೀಡುತ್ತಿದ್ದ ಕಿಶೋರ್‌ ಮತ್ತು ಮೋಹನ್‌ ಜತೆ ಡಾ. ಶೇಖರ್‌ ಶಾಮೀಲಾಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಮತ್ತೊಂದು ಪ್ರಕರಣದಲ್ಲಿ, ಮಂಜುನಾಥ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರದ ಮೂಲಕ ಅರ್ಹರಿಗೆ ನೀಡಬೇಕಿದ್ದ ಲಸಿಕೆಗಳನ್ನು ಮನೆಗೆ ತೆಗೆದುಕೊಂಡು ಹೋಗಿ 500 ರೂ.ಗೆ ಒಂದು ಡೋಸ್ ಮಾರಿಕೊಳ್ಳುತ್ತಿದ್ದ ಬಿಬಿಎಂಪಿ ಗುತ್ತಿಗೆ ಆಧಾರಿತ ವೈದ್ಯ ಸೇರಿ ಇಬ್ಬರನ್ನು ಪಶ್ಚಿಮ ವಿಭಾಗ ಪೊಲೀಸರು ಬಂಧಿಸಿದ್ದಾರೆ.
ಒಂದೆಡೆ ವೈದ್ಯರು ನಿಸ್ವಾರ್ಥದಿಂದ ರೋಗಿಗಳ ಸೇವೆ ಸಲ್ಲಿಸುತ್ತ ಸಾವಿಗೀಡಾಗುತ್ತಿದ್ದಾರೆ, ಮತ್ತೊಂದೆಡೆ ಧನದಾಹಿ ವೈದ್ಯರು ರೋಗಿಗಳ, ಬಡವರ ರಕ್ತವನ್ನು ಹೀರುತ್ತಿದ್ದಾರೆ.
