ಮಗುವಿನ ಮೊದಲ ವರ್ಷದ ಹುಟ್ಟಿದ ದಿನವೇ ಬಯಲಾಯ್ತು ಅಸಲಿ ಜನ್ಮ ರಹಸ್ಯ..!

: ಆ ಮನೆಯಲ್ಲಿ ಸಂಭ್ರಮ ಮನೆ ಮಾಡಿತ್ತು.. ತಮ್ಮ ಮಗುವಿನ ಮೊದಲ ವರ್ಷದ ಹುಟ್ಟುಹಬ್ಬದ ಸಂಭ್ರಮವದು. ಕೊಪ್ಪಳದ ನಿವಾಸದಲ್ಲಿ ಮಗುವಿನ ತಂದೆ-ತಾಯಿ ಕೇಕ್‌ ಕತ್ತರಿಸಿ, ಬಲೂನ್ ಹಾಗೂ ಬಣ್ಣದ ಕಾಗದ ಕಟ್ಟಿ ಮಗುವಿನೊಂದಿಗೆ ಸಂಭ್ರಮಿಸುತ್ತಿದ್ದರು.. ಆದ್ರೆ, ಪೊಲೀಸರ ಬೂಟಿನ ಸದ್ದು ಎಲ್ಲ ಸಂಭ್ರಮಕ್ಕೂ ಬ್ರೇಕ್ ಹಾಕಿಬಿಡ್ತು..! ಇದು ನಿಮ್ಮ ಅಲ್ಲ, ಇದು ಕದ್ದಿರುವ ಮಗು ಎಂದು ಪೊಲೀಸರು ಹೇಳುತ್ತಿದ್ದಂತೆಯೇ ದಂಪತಿಯ ತಲೆ ಮೇಲೆ ಆಕಾಶವೇ ಕಳಚಿ ಬಿದ್ದಂತೆ ಆಗಿತ್ತು..! ಏಕೆಂದರೆ, ಮೇ 29ರಂದು ಮಗುವಿನ ಹುಟ್ಟಿದ ಹಬ್ಬದ ದಿನವೇ ಆ ಮಗುವಿನ ಹುಟ್ಟಿನ ಹಿಂದಿನ ರಹಸ್ಯ ಬಯಲಾಗಿತ್ತು..! ತಾವು ಈ ಮಗುವನ್ನು ಬಾಡಿಗೆ ತಾಯಿಯ ಮೂಲಕ ಪಡೆದೆವು ಎಂದು ತಮ್ಮ ಬಳಿಯಿದ್ದ ಎಲ್ಲಾ ಸಾಕ್ಷ್ಯಗಳನ್ನೂ ತೋರಿಸಿದ್ರೂ ಕೂಡಾ ಪೊಲೀಸರು ಒಪ್ಪಲೇ ಇಲ್ಲ..! ಏಕೆಂದರೆ ಅಸಲಿ ದಾಖಲೆ ಹಾಗೂ ಮಕ್ಕಳ ಕಳ್ಳಿ ಅದಾಗಲೇ ಪೊಲೀಸರ ಬಲೆಗೆ ಬಿದ್ದಾಗಿತ್ತು..! ಆ ವೈದ್ಯೆಯ ಹೆಸರು, ಡಾ. ರಶ್ಮಿ ಶಶಿಕುಮಾರ್. ಬೆಂಗಳೂರಿನ ಈ ವೈದ್ಯೆ, ಈ ಹಿಂದೆ 2014-2015ರ ಸಾಲಿನಲ್ಲಿ ಹುಬ್ಬಳ್ಳಿಯ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಕೆಲಸ ಮಾಡ್ತಿದ್ದಳು. ಆ ಸಂದರ್ಭದಲ್ಲಿ ಮಗುವಿನ ಪೋಷಕರು ವೈದ್ಯೆ ಬಳಿ ಚಿಕಿತ್ಸೆಗೆ ತೆರಳಿದ್ದರು. ಆ ದಂಪತಿಗೆ ಒಂದು ಹೆಣ್ಣು ಮಗು ಆಗಿತ್ತು. ಆದ್ರೆ, ಆ ಮಗುವಿಗೆ ಅಂಗವೈಕಲ್ಯ ಇತ್ತು. ಜೊತೆಯಲ್ಲೇ ಹೆರಿಗೆ ಸಂದರ್ಭದಲ್ಲಿ ತಾಯಿಯ ಗರ್ಭಕೋಶಕ್ಕೆ ಹಾನಿಯಾಗಿತ್ತು. ಹೀಗಾಗಿ, ಆಕೆ ಮತ್ತೆ ಗರ್ಭ ಧರಿಸಲು ಸಾಧ್ಯವಿರಲಿಲ್ಲ. ಇದೇ ಪರಿಸ್ಥಿತಿಯನ್ನು ತನ್ನ ಲಾಭಕ್ಕೆ ಬಳಸಿಕೊಂಡಿದ್ದ ಡಾ. ರಶ್ಮಿ, ಮೂಲಕ ಮಗುವನ್ನು ಪಡೆಯುವಂತೆ ದಂಪತಿಯನ್ನು ಪುಸಲಾಯಿಸಿದ್ದಳು. ಆದ್ರೆ, ಆಗ ದಂಪತಿ ರೆಡಿ ಇರಲಿಲ್ಲ. ಯಾವಾಗ ಡಾ. ರಶ್ಮಿ ಬೆಂಗಳೂರಿಗೆ ವರ್ಗವಾದರೋ, ಆಗ ದಂಪತಿ ಮತ್ತೆ ರಶ್ಮಿ ಅವರನ್ನು ಸಂಪರ್ಕಿಸಿದರು. ಕೂಡಲೇ ದಂಪತಿಯನ್ನು ಬೆಂಗಳೂರಿಗೆ ಬರಲು ಹೇಳಿದ ಡಾ. ರಶ್ಮಿ, ಬಾಡಿಗೆ ತಾಯಿಯಿಂದ ಮಗು ಪಡೆಯಲು 15 ಲಕ್ಷ ರೂ. ವೆಚ್ಚವಾಗುತ್ತೆ ಎಂದು ಹೇಳಿದರು. ಮಗುವಿಗಾಗಿ ಹಾತೊರೆಯುತ್ತಿದ್ದ ದಂಪತಿ, ಜುಲೈ 2019ರಲ್ಲಿ ವೈದ್ಯೆಗೆ ಹಣ ನೀಡೋದಾಗಿ ಹೇಳಿದರು. ಕೂಡಲೇ ವೈದ್ಯೆ ದಂಪತಿಯನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಿ, ಗಂಡನ ವೀರ್ಯಾಣು ಮಾದರಿ ಪಡೆದುಕೊಂಡರು. ಮೇ 2020ಕ್ಕೆ ಬಾಡಿಗೆ ತಾಯಿಯ ಮೂಲಕ ನಿಮಗೆ ಮಗು ಜನಿಸಲಿದೆ ಎಂಬ ಭರವಸೆಯನ್ನೂ ಕೊಟ್ಟರು. ಆ ದಿನದಿಂದ ಆರಂಭಿಸಿ, ಮೇ 2020ರವರೆಗೂ ಡಾ. ರಶ್ಮಿ ನಿರಂತರವಾಗಿ ಸುಳ್ಳಿನ ಸರಮಾಲೆ ಬಿಚ್ಚಿಡಲು ಆರಂಭಿಸಿದಳು. ಬಾಡಿಗೆ ತಾಯಿ ಎಂದು ಯಾರದ್ದೋ ಫೋಟೋ ಕಳಿಸಿದರು. ತಾಯಿಯ ಹೊಟ್ಟೆಯಲ್ಲಿ ಮಗು ಬೆಳೆಯುತ್ತಿದೆ ಎಂದು ನಕಲಿ ಸ್ಕ್ಯಾನಿಂಗ್ ಕಾಪಿಯನ್ನು ಕೊಪ್ಪಳಕ್ಕೆ ಪೋಸ್ಟ್‌ ಮೂಲಕ ರವಾನಿಸಿದರು. ಮಗು ಚನ್ನಾಗಿ ಬೆಳೆಯುತ್ತಿದೆ ಎಂದು ದಂಪತಿಗೆ ನಂಬಿಸಿದರು. ಮೇ 2020 ಬರುತ್ತಿದ್ದಂತೆಯೇ ದಂಪತಿ ಬೆಂಗಳೂರಿಗೆ ಧಾವಿಸಿದರು. ಡೆಲಿವರಿ ದಿನಾಂಕ ಸಮೀಪಿಸಿದೆ ಎಂದು ವೈದ್ಯರಿಗೆ ಹೇಳಿದರು. ಆದ್ರೆ, ಡಾ. ರಶ್ಮಿ ಈ ವಿಚಾರವಾಗಿ ಯಾವುದೇ ಪ್ಲಾನ್ ಮಾಡಿರಲಿಲ್ಲ. ಸುಳ್ಳನ್ನು ಹೇಳುತ್ತಾ ಇನ್ನಷ್ಟು ದಿನ ತಳ್ಳಿದಳು. ಕೊನೆಗೆ ಮೇ 25ರಂದು ದಂಪತಿಯಿಂದ ಬಾಕಿ ಇದ್ದ 14.5 ಲಕ್ಷ ಹಣ ಪಡೆದ ವೈದ್ಯೆ, ಬಾಡಿಗೆ ತಾಯಿಯೇ ಸತ್ತು ಹೋದಳು, ಜೊತೆಗೆ ಮಗುವೂ ಸತ್ತು ಹೋಯಿತು ಎಂದು ಸುಳ್ಳು ಹೇಳಿದಳು. ಆದ್ರೆ, ಮಗುವಿನ ವಿಚಾರದಲ್ಲಿ ಬಹಳ ಭಾವನಾತ್ಮಕವಾಗಿ ನಂಟು ಬೆಳೆಸಿಕೊಂಡಿದ್ದ ದಂಪತಿ ಮಾತ್ರ ಪಟ್ಟು ಸಡಿಲಿಸಲಿಲ್ಲ. ಮಗುವಿನ ಶವವನ್ನಾದ್ರೂ ಕೊಡಿ, ಮಣ್ಣು ಮಾಡುತ್ತೇವೆ ಎಂದು ಪಟ್ಟು ಹಿಡಿದರು. ಆಗ ಗತ್ಯಂತರವಿಲ್ಲದೆ ಮಗುವನ್ನು ಕಳ್ಳತನ ಮಾಡುವ ಪ್ಲಾನ್ ಮಾಡಿದ ವೈದ್ಯೆ, ಮೇ 29ರಂದು ಚಾಮರಾಜಪೇಟೆ ಆಸ್ಪತ್ರೆಯಿಂದ ನವಜಾತ ಶಿಶುವನ್ನು ಕದ್ದು, ದಂಪತಿಗೆ ಒಪ್ಪಿಸಿದಳು. ಅಂದಿನಿಂದ ಒಂದು ವರ್ಷಗಳ ಕಾಲ ಮಗುವನ್ನ ಸಾಕಿ ಸಲಹಿದ ದಂಪತಿಗೆ ಇದೀಗ ಸತ್ಯಾಂಶ ಅರಿವಾಗಿ ಆಕಾಶವೇ ತಲೆ ಮೇಲೆ ಬಿದ್ದಂತಾಗಿದ್ದಾರೆ. ಅವರು ಕಟ್ಟಿದ್ದ ಆಶಾಗೋಪುರ, ಇದೀಗ ಗಾಳಿ ಗೋಪುರವಾಗಿದೆ.