ಬೆಂಗಳೂರು: ಕೊರೊನಾ ಲಸಿಕೆ 2ನೇ ಡೋಸ್‌ ಪಡೆದವರಿಗೆ ಶೀಘ್ರದಲ್ಲೇ 2ನೇ ಬಾರಿ ಪ್ರತಿಕಾಯ ಪರೀಕ್ಷೆ

: ಎರಡೂ ಡೋಸ್‌ ಪಡೆದ ನಗರದ ಜಯದೇವ ಆಸ್ಪತ್ರೆಯ 200 ಆರೋಗ್ಯ ಸಿಬ್ಬಂದಿಗೆ ಎರಡನೇ ಬಾರಿ ನಡೆಸಲು ಆಸ್ಪತ್ರೆಯ ಕಾರ್ಡಿಯೋವ್ಯಾಸ್ಕುಲರ್‌ ವಿಭಾಗ ಸಿದ್ಧತೆ ನಡೆಸಿದೆ. ಫೆಬ್ರವರಿ ತಿಂಗಳಲ್ಲಿ ಎರಡನೇ ಲಸಿಕೆ ಪಡೆದ ಸಂದರ್ಭದಲ್ಲೂ ಈ ಸಿಬ್ಬಂದಿಗಳನ್ನೇ ಪ್ರತಿಕಾಯಗಳ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಎರಡನೇ ಡೋಸ್‌ ನಂತರ ಜರುಗಿದ ಮೊದಲ ಪರೀಕ್ಷೆಯಲ್ಲಿ ಶೇ.80 ರಷ್ಟು ಪ್ರತಿಕಾಯಗಳನ್ನು ಗುರುತಿಸಲಾಗಿತ್ತು. ಇದೊಂದು ಉತ್ತಮ ಬೆಳವಣಿಗೆ. ಮೊದಲ ಬಾರಿ ಪರೀಕ್ಷೆಗೆ ಒಳಪಡಿಸಲಾದ ತಲಾ 100 ಮಹಿಳಾ ಮತ್ತು ಪುರುಷ ಸಿಬ್ಬಂದಿಗೆ ಎರಡನೇ ಪರೀಕ್ಷೆ ನಡೆಸಲಾಗುವುದು. ಪ್ರತಿಕಾಯಗಳ ಜೀವಿತಾವಧಿ ಗುರುತಿಸಲು ಈ ಪ್ರಕ್ರಿಯೆ ನಡೆಸಲಾಗುತ್ತಿದೆ ಎಂದು ಜಯದೇವ ಆಸ್ಪತ್ರೆ ಮುಖ್ಯಸ್ಥ ಡಾ. ಸಿ.ಎನ್‌. ಮಂಜುನಾಥ 'ವಿಕ'ಗೆ ತಿಳಿಸಿದ್ದಾರೆ. ಲಸಿಕೆ ಪಡೆದವರ ರಕ್ತವನ್ನು ಎಲಿಸಾ ಅಥವಾ ಕಿಣ್ವ ಸಂಬಂಧಿತ ಇಮ್ಯುನೋಸರ್ಬೆಂಟ್‌ ಎಸ್ಸೆ ಪರೀಕ್ಷೆಗೆ ಒಳಪಡಿಸಲಾಗುವುದು ಎಂದು ಮಾಹಿತಿ ನೀಡಿದ್ದಾರೆ. ಏಪ್ರಿಲ್‌ನಲ್ಲಿ ಮೊದಲ ಪರೀಕ್ಷೆ: ಫೆಬ್ರವರಿ ತಿಂಗಳಲ್ಲಿ ಎರಡನೇ ಲಸಿಕೆ ಪಡೆದವರನ್ನು ಏಪ್ರಿಲ್‌ನಲ್ಲಿ ಮೊದಲ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಕೆಲವರಲ್ಲಿ ಶೇ.90ಕ್ಕೂ ಹೆಚ್ಚು ಪ್ರತಿಕಾಯಗಳು ಅಭಿವೃದ್ಧಿಗೊಂಡಿದ್ದವು. ಜೀವಕೋಶಗಳ ನಡುವೆ ಪ್ರತಿರಕ್ಷಕ ಹರಡಿಕೊಂಡಿದ್ದನ್ನು ಗುರುತಿಸಲಾಗಿದೆ. ಪ್ರತಿಕಾಯಗಳ ಜೀವಿತಾವಧಿ ಗುರುತಿಸಲು ಈ ಪ್ರಕ್ರಿಯೆ ನಡೆಸಲಾಗುತ್ತಿದೆ ಎಂದು ತಿಳಿಸಿದರು. ಎರಡೂ ಲಸಿಕೆ ಪಡೆಯಲು ನಾಲ್ಕು ವಾರ ಮಧ್ಯಂತರ ಅವಧಿ ನಿಯಮ ಜಾರಿ ಇದ್ದ ಸಂದರ್ಭದಲ್ಲಿ 154 (200 ಜನರಲ್ಲಿ) ಜನರು ಕೋವಿಶೀಲ್ಡ್‌ ಪಡೆದಿದ್ದರು. ಎರಡೂ ಲಸಿಕೆಗೆ ಅಂತರ ಕಡಿಮೆ ಇದ್ದ ಕಾರಣ ಅವರಲ್ಲಿ ಸಾಮಾನ್ಯವಾಗಿ ರೋಗ ನಿರೋಧಕ ಶಕ್ತಿ ಅಭಿವೃದ್ಧಿಗೊಂಡಿರುವುದು ಕಂಡು ಬಂತು. ಆನಂತರ ಎರಡೂ ಲಸಿಕೆ ಪಡೆಯಲು 12-16 ವಾರಗಳ ನಡುವಿನ ಅಂತರ ನಿಯಮ ಜಾರಿಗೆ ಬಂದಿದ್ದರಿಂದ ಸಾಮಾನ್ಯವಾಗಿ ರೋಗ ನಿರೋಧಕ ಶಕ್ತಿ ದೀರ್ಘಾವಧಿವರೆಗೂ ಉಳಿಯಬಹುದು. ಹೀಗಾಗಿ, ಪ್ರತಿಕಾಯ ಅಭಿವೃದ್ಧಿ ಮತ್ತು ರೋಗ ನಿರೋಧಕ ಶಕ್ತಿ ಅಭಿವೃದ್ಧಿ/ಕ್ಷೀಣಿಸುವ ಬಗ್ಗೆ ತಿಳಿಯಲು ಈ ಪರೀಕ್ಷೆ ಸಹಕಾರಿ ಎಂದು ಡಾ. ಮಂಜುನಾಥ ತಿಳಿಸಿದ್ದಾರೆ.