ಎಲ್ಲವೂ ಓಕೆ ಬೆಂಗಳೂರಿನಲ್ಲಿ ನೈಟ್ ಕರ್ಫ್ಯೂ ಏಕೆ?: ನಿಯಮ ಸಡಿಲಿಕೆ ಉದ್ಯಮ ವಲಯ ಪಟ್ಟು!

ಶಿವಾನಂದ ಹಿರೇಮಠ ಬೆಂಗಳೂರು: ಬೆಂಗಳೂರು ಮಹಾನಗರದಲ್ಲಿ ಕೋವಿಡ್‌ ಈಗ ನಿಯಂತ್ರಣದಲ್ಲಿದೆ. ಜನಜೀವನ ಸಾಮಾನ್ಯ ಸ್ಥಿತಿಗೆ ಮರಳಿದೆ. ಶಾಲಾ- ಕಾಲೇಜು, ಚಿತ್ರಮಂದಿರ, ಮಾಲ್‌, ಬಾರ್‌, ರೆಸ್ಟೋರೆಂಟ್‌, ಧಾರ್ಮಿಕ ಕೇಂದ್ರಗಳೂ ಸೇರಿದಂತೆ ಭಾಗಶಃ ಎಲ್ಲ ವಲಯಗಳ ತೆರವಿಗೆ ಸರಕಾರ ಪೂರ್ಣ ಪ್ರಮಾಣದ ಅನುಮತಿ ನೀಡಿದೆ. ಆದರೆ, 'ಎಲ್ಲ ತೆರೆದರೂ ರಾತ್ರಿ ಕರ್ಫ್ಯೂ ಎಂಬ ಮಾನದಂಡ ಹೇರುವ ಮೂಲಕ ಭೌತಿಕ ಚಟುವಟಿಕೆಗಳನ್ನು ಸರಕಾರ ಕಟ್ಟಿಹಾಕಿದೆ ಎಂಬ ಅಪಸ್ವರ ಸಾರ್ವಜನಿಕ ವಲಯದಲ್ಲಿಕೇಳಿ ಬಂದಿದೆ. ರಾತ್ರಿ ಕರ್ಫ್ಯೂ ನಿರ್ಬಂಧ ಸಡಿಲ ಅಥವಾ ಅದನ್ನು ತೆಗೆದು ಹಾಕಬೇಕೆಂಬ ಒತ್ತಾಯವೂ ಕೇಳಿ ಬರುತ್ತಿದೆ. ಕೋವಿಡ್‌ ಗಂಭೀರತೆ ಇದ್ದಾಗ ಕಟ್ಟುನಿಟ್ಟಿನ ಆದೇಶ ಅಗತ್ಯವಿದೆ. ಸರಕಾರ ಆದೇಶಗಳನ್ನು ನಾಗರಿಕರು ಸ್ವಾಗತಿಸುವುದರೊಂದಿಗೆ ಪಾಲಿಸಲೇಬೇಕು. ಆದರೆ, ನಗರದ ಭೌತಿಕ ಚಟುವಟಿಕೆಗಳೆಲ್ಲವೂ ಯಥಾಸ್ಥಿತಿಗೆ ಮರಳಿದಾಗ ಪೂರಕ ಬೆಳವಣಿಗೆಗೆ ಇರುವ ಅಡೆತಡೆ ನಿರ್ಬಂಧಗಳನ್ನು ಸರಕಾರ ತೊಡೆದು ಹಾಕಬೇಕು. ಸದ್ಯದ ಸ್ಥಿತಿಯಲ್ಲಿ ರಾತ್ರಿ ಕರ್ಫ್ಯೂ ಎಂಬುದು ಅನಗತ್ಯವಾಗಿದ್ದು, ಪ್ರವಾಸೋದ್ಯಮ, ಹೋಟೆಲ್‌ ಉದ್ಯಮ, ಕೈಗಾರಿಕಾ ವಲಯ, ಜನಸಾಮಾನ್ಯರ ನಗರ ಸಾರಿಗೆ, ಸೇರಿ ಹಲವು ವಲಯಗಳಿಗೆ ಪ್ರತ್ಯಕ್ಷ ಮತ್ತು ಪರೋಕ್ಷವಾಗಿ ರಾತ್ರಿ ಕರ್ಫ್ಯೂನಿಂದ ಪೆಟ್ಟು ಬಿದ್ದಿದೆ. ರಾತ್ರಿ ಸಾರಿಗೆ ಆರಂಭಿಸಿ ರಾತ್ರಿಯಿಡೀ ಕಾರ್ಯಾಚರಿಸುತ್ತಿದ್ದ ನಗರ ಸಾರಿಗೆ ವ್ಯವಸ್ಥೆ ಹಾಗೂ ರಾತ್ರಿ 12ರವರೆಗಿದ್ದ ಮೆಟ್ರೊ ಸಂಚಾರವನ್ನು ರಾತ್ರಿ ಕರ್ಫ್ಯೂ ಜಾರಿಯಿಂದ 10 ಗಂಟೆಗೆ ಸ್ಥಗಿತಗೊಳಿಸಲಾಗಿದೆ. ಹೀಗಾಗಿ, ಮಧ್ಯಮ ಮತ್ತು ಬಡ ವರ್ಗದ ಜನರು ಸಾರಿಗೆ ಸಮಸ್ಯೆ ಅನುಭವಿಸುತ್ತಿದ್ದಾರೆ. ಕೈಗಾರಿಕೆಗಳಲ್ಲಿ ರಾತ್ರಿಪಾಳಿ ಮುಗಿಸಿ ಮನೆಗೆ ತೆರಳುವ, ಬಸ್‌, ರೈಲು ಮೂಲಕ ಹೊರ ಜಿಲ್ಲೆ/ರಾಜ್ಯಗಳಿಂದ ರಾತ್ರಿ 10 ಗಂಟೆ ನಂತರ ನಗರಕ್ಕೆ ಆಗಮಿಸುವ ಜನರಿಗೆ ಸರಕಾರಿ ಸಾರಿಗೆ ವ್ಯವಸ್ಥೆ ಅತ್ಯಗತ್ಯ. ನಗರ ವ್ಯಾಪ್ತಿಯು ವಿಸ್ತರಿಸಿದ್ದು, ಒಂದೆಂಡೆಯಿಂದ ಮತ್ತೊಂದೆಡೆ ಸಂಚರಿಸಲು ಮೆಟ್ರೊ ಸಂಚಾರ ಆರಂಭಿಸಬೇಕಿದೆ. ಸರಕಾರಿ ಸಾರಿಗೆ ವ್ಯವಸ್ಥೆ ಇಲ್ಲದ ಹಿನ್ನೆಲೆಯಲ್ಲಿ ಖಾಸಗಿ ಸಾರಿಗೆ ವ್ಯವಸ್ಥೆಗೆ ರಾತ್ರಿ ಸಂದರ್ಭದಲ್ಲಿ ದುಬಾರಿ ದರ ನೀಡುವ ಸ್ಥಿತಿ ನಿರ್ಮಾಣವಾಗಿದೆ. ಹೋಟೆಲ್‌ಗಳಿಗೆ ಕರ್ಫ್ಯೂ ಕಂಟಕ ರಾತ್ರಿ 8 ರಿಂದ 12 ಗಂಟೆ ಅವಧಿಯು ಬಾರ್‌, ರೆಸ್ಟೋರೆಂಟ್‌, ಪಬ್‌ಗಳಿಗೆ ಪ್ರೈಮ್‌ ಟೈಮ್‌. ದಿನದ ಹೆಚ್ಚಿನ ವ್ಯವಹಾರ ಇದೇ ಸಂದರ್ಭದಲ್ಲಿ ಜರುಗುತ್ತದೆ. ಹೀಗಾಗಿ, ರಾತ್ರಿ 11.30ರವರೆಗೂ ಕರ್ಫ್ಯೂ ನಿಯಮ ಸಡಿಲಿಸುವಂತೆ ಹೋಟೆಲ್‌, ಪಬ್‌ ಮಾಲೀಕರು, ವೈನ್‌ ಮರ್ಚೆಂಟ್ಸ್‌ ಅಸೋಸಿಯೇಷನ್‌ ಸರಕಾರವನ್ನು ಒತ್ತಾಯಿಸಿವೆ. ಬೆಂಗಳೂರಿನಲ್ಲಿ ಶೇ.70ಕ್ಕೂ ಅಧಿಕ ಪ್ರದೇಶಗಳು ವಸತಿ ಮತ್ತು ವಾಣಿಜ್ಯ ಪ್ರದೇಶವನ್ನು ಒಳಗೊಂಡಿವೆ. ಇಂತಹ ಸ್ಥಳಗಳಲ್ಲಿಇರುವ ಹೋಟೆಲ್‌/ಬಾರ್‌/ರೆಸ್ಟೋರೆಂಟ್‌/ಪಬ್‌ ಉದ್ಯಮಗಳಿಗೆ ರಾತ್ರಿ 8 ಗಂಟೆ ನಂತರವೇ ಜನರು ಕುಟುಂಬ ಸಮೇತ ಆಗಮಿಸುವುದರಿಂದ ವಿಶ್ರಮಿಸಲು, ಮನರಂಜನೆಗೆ ಕಾಲಾವಕಾಶ ಬೇಕು. ವೀಕೆಂಡ್‌ಗಳಲ್ಲಿ ಅಧಿಕ ಜನರು ಹೋಟೆಲ್‌ಗಳಿಗೆ ತೆರಳುತ್ತಾರೆ. ಹೀಗಾಗಿ, ರಾತ್ರಿ 9.30ಕ್ಕೆ ಕರ್ಫ್ಯೂ ಆರಂಭಿಸಿದರೆ ಭಯಭೀತರಾದ ಜನರು ಮನೆ ಬಿಟ್ಟು ಹೊರಗೆ ಬರುವುದೇ ಇಲ್ಲ. ಸದ್ಯ, ಕೋವಿಡ್‌ ನಿಯಂತ್ರಣದಲ್ಲಿರುವುದರಿಂದ ರಾತ್ರಿ 11.30ರವರೆಗೂ ಅವಕಾಶ ನೀಡಿ, ಉದ್ಯಮಕ್ಕೆ ಬಲ ತುಂಬುವಂತೆ ಹೋಟೆಲ್‌ ಮತ್ತು ವೈನ್‌ಶಾಪ್‌ ಅಸೋಸಿಯೇಷನ್‌ ಮನವಿ ಮಾಡಿದೆ. ಪ್ರವಾಸೋದ್ಯಮ/ಮನರಂಜನೆಗೆ ಪೆಟ್ಟು ನಗರದ ಪ್ರವಾಸೋದ್ಯಮ ಕ್ಷೇತ್ರಗಳೂ ಆರ್ಥಿಕ ಹಿನ್ನಡೆ ಅನುಭವಿಸುತ್ತಿವೆ. ಈಗೀಗ ಧಾರ್ಮಿಕ ಕ್ಷೇತ್ರಗಳಲ್ಲಿ ಜನ ಸಂಚಾರ ಹೆಚ್ಚುತ್ತಿದೆ. ಮನರಂಜನಾ ಕ್ಷೇತ್ರಗಳಲ್ಲಿ ಜನ ದಟ್ಟಣೆ ಹೆಚ್ಚಾಗುತ್ತಿದೆ. ಇವುಗಳಿಗೆ ಆರ್ಥಿಕ ಬಲ ತುಂಬುವ ಕಾರ್ಯ ನಡೆಯಬೇಕಿದೆ. ಸ್ಥಳೀಯ ಜನರೊಂದಿಗೆ ಇತರೆ ಜಿಲ್ಲೆ/ರಾಜ್ಯಗಳಿಂದ ಆಗಮಿಸುವ ಜನಸಾಮಾನ್ಯರೇ ಈ ಕ್ಷೇತ್ರಗಳ ಆರ್ಥಿಕ ಸಂಪನ್ಮೂಲ ಸೃಷ್ಟಿಸುವವರು. ಇವರಿಗೆ ಮೆಟ್ರೊ, ನಗರ ಸಾರಿಗೆ ವ್ಯವಸ್ಥೆಗೆ ಅವಕಾಶ ಕಲ್ಪಿಸಲು ನಿರ್ಬಂಧ ತೆರವು ಅಗತ್ಯವಿದೆ. ವ್ಯಾಪಾರ ವಹಿವಾಟಿನ ಮೇಲೆ ಪರಿಣಾಮ 9.30 ಗಂಟೆಗೆ ರಾತ್ರಿ ಕರ್ಫ್ಯೂ ಜಾರಿ ಹಿನ್ನೆಲೆಯಲ್ಲಿ ನಗರದ ವ್ಯಾಪಾರ ವಹಿವಾಟು 9 ಗಂಟೆಯಿಂದಲೇ ಸ್ಥಗಿತಗೊಳ್ಳಲು ಆರಂಭವಾಗುತ್ತಿದೆ. ಸ್ವಲ್ಪ ವಿಳಂಬವಾದರೂ ಹಲವು ಮಧ್ಯಮ, ಬಡ ವ್ಯಾಪಾರಸ್ಥರ ಮೇಲೆ ಪ್ರಕರಣಗಳು ದಾಖಲಾಗುವ ಸಂಭವ ಹೆಚ್ಚು. ನಿಯಮ ಉಲ್ಲಂಘಿಸಿದ್ದಕ್ಕೆ ಈಗಾಗಲೇ ಹಲವು ಉದ್ಯಮ/ಉದ್ಯಮಿಗಳ ಮೇಲೆ ದೂರು ದಾಖಲಾಗಿವೆ. ಬೆಂಗಳೂರಿನಂತಹ ಮಹಾನಗರಗಳಲ್ಲಿ ಸಂಜೆ 6 ರಿಂದ ರಾತ್ರಿ 12ರವರೆಗೆ ಶೇ.40 ರಷ್ಟು ಆರ್ಥಿಕ ಚಟುವಟಿಕೆ ಜರುಗುತ್ತದೆ ಎಂಬುದನ್ನು ಸರಕಾರ ಗಮನಿಸಬೇಕಿದೆ. ಬೆಂಗಳೂರಿನಂತಹ ಮಹಾನಗರದಲ್ಲಿ ಮಧ್ಯಮ ಕುಟುಂಬಸ್ಥರು ಸಂಜೆ ವೇಳೆ ಹೋಟೆಲ್‌ಗಳಿಗೆ ಬರುತ್ತಾರೆ. ಅವರ ಹಿತದೃಷ್ಟಿಯಿಂದ ಹೋಟೆಲ್‌ ಅವಧಿ ವಿಸ್ತರಿಸಬೇಕು. ಬೀಜಾಡಿ ಚಂದ್ರಶೇಖರ್‌ ಹೆಬ್ಬಾರ್‌ರಾಜ್ಯಾಧ್ಯಕ್ಷ, ಹೋಟೆಲ್‌ ಅಸೋಸಿಯೇಷನ್‌ ನಗರದಲ್ಲಿ ಅಂದಾಜು 300 ಪಬ್‌ಗಳಿವೆ. ಮೈಕ್ರೋಬ್ರಿವರೀಸ್‌ಗಳೂ ಇಲ್ಲಿವೆ. ಹೀಗಾಗಿ, ಬೆಂಗಳೂರಿನಲ್ಲಿ ರಾತ್ರಿ ಜೀವನ 1.30ರವರೆಗೆ ವಿಸ್ತರಿಸುತ್ತದೆ. ಬಾಡಿಗೆ, ವೇತನ ಭರಿಸಲಾಗದೆ ಹಲವು ವೈನ್‌ ಶಾಪ್‌ಗಳು ನಷ್ಟದಿಂದ ಮುಚ್ಚಲ್ಪಟ್ಟಿವೆ. ಈ ಎಲ್ಲ ಆಯಾಮಗಳಲ್ಲಿ ಸರಕಾರ ದೃಷ್ಟಿಹರಿಸಿ ರಾತ್ರಿ ಕರ್ಫ್ಯೂ ಸಡಿಲಿಸಲಿ. ಕರುಣಾಕರ ಹೆಗ್ಡೆ, ಉಪಾಧ್ಯಕ್ಷ, ವೈನ್‌ ಮರ್ಚೆಂಟ್ಸ್‌ ಫೆಡರೇಷನ್‌ ತಾಂತ್ರಿಕ ಸಲಹಾ ಸಮಿತಿಯ ಶಿಫಾರಸು ಮೇರೆಗೆ ರಾತ್ರಿ 10ರಿಂದ 5ರವರೆಗೆ ಕರ್ಫ್ಯೂ ವಿಧಿಸಲಾಗಿದೆ. ಸದ್ಯದಲ್ಲೇ ಸಿಎಂ ಅಧ್ಯಕ್ಷತೆಯಲ್ಲಿ ಸಭೆ ಜರುಗಲಿದ್ದು, ಕರ್ಫ್ಯೂ ಸಡಿಲಿಸುವ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ. ಆರಗ ಜ್ಞಾನೇಂದ್ರ, ಗೃಹ ಸಚಿವ