‘ಬಿಕಿನಿ ಫೋಟೋ ಕಳುಹಿಸಿ’ ಎಂದವನಿಗೆ ಬೋಲ್ಡ್ ಉತ್ತರ ಕೊಟ್ಟ ಪುನೀತ್ ನಾಯಕಿ ಅನುಪಮಾ

ಸೆಲೆಬ್ರಿಟಿಗಳು ನಾನಾ ಕಾರಣಗಳಿಗೆ ಆಗಾಗ ಸೋಷಿಯಲ್ ಮೀಡಿಯಾದಲ್ಲಿ ಟ್ರೋಲ್ ಆಗುತ್ತಲೇ ಇರುತ್ತಾರೆ. ಅದರಲ್ಲೂ, ತಾರೆಯರು ಸಾಮಾಜಿಕ ಜಾಲತಾಣಗಳಲ್ಲಿ ಲೈವ್‌ಗೆ ಬಂದುಬಿಟ್ಟರೆ ಅಥವಾ ಅಭಿಮಾನಿಗಳ ಜೊತೆಗೆ ಪ್ರಶ್ನೋತ್ತರ ಕಾರ್ಯಕ್ರಮ ಆರಂಭಿಸಿದರೆ ನೆಟ್ಟಿಗರಿಂದ ತೂರಿಬರುವ ಪ್ರಶ್ನೆಗಳು ಒಂದೆರಡಲ್ಲ. ಕೆಲ ಕಿಡಿಗೇಡಿಗಳಂತೂ ನಟಿಮಣಿಯರಿಗೆ ಮುಜುಗರ ಉಂಟಾಗುವ ಪ್ರಶ್ನೆಗಳನ್ನೇ ಮುಂದಿಡುತ್ತಾರೆ. ವೈಯಕ್ತಿಕ ವಿಚಾರಗಳೂ ಸೇರಿದಂತೆ ಮುಜುಗರ ಉಂಟಾಗುವ ಪ್ರಶ್ನೆಗಳನ್ನು ಕೇಳಿದವರ ವಿರುದ್ಧ ಕೆಲ ನಟಿಯರು ಗುಟುರು ಹಾಕಿದರೆ, ಕೆಲ ನಟಿಮಣಿಯರು ಮಾತಲ್ಲೇ ಚಾಟಿಯೇಟು ಕೊಟ್ಟಿರುತ್ತಾರೆ. ಇನ್ನೂ ಕೆಲ ನಟಿಯರಂತೂ ಯಾವುದೇ ಪ್ರಶ್ನೆಯಾದರೂ ಬೋಲ್ಡ್‌ ಆಗೇ ಉತ್ತರಿಸುತ್ತಾರೆ. ಅಂಥವರಲ್ಲಿ ಒಬ್ಬರು ಅನುಪಮಾ ಪರಮೇಶ್ವರನ್. ಅದಕ್ಕೆ ಸಾಕ್ಷಿ ಇತ್ತೀಚೆಗಷ್ಟೇ ನಡೆದ ಒಂದು ಘಟನೆ! ಪ್ರಶ್ನೋತ್ತರ ಕಾರ್ಯಕ್ರಮ ಆರಂಭಿಸಿದ ಅನುಪಮಾ ಪರಮೇಶ್ವರನ್ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಜೊತೆಗೆ ‘ನಟಸಾರ್ವಭೌಮ’ ಚಿತ್ರದಲ್ಲಿ ಅಭಿನಯಿಸಿದ್ದ ಚೆಲುವೆ ಅನುಪಮಾ ಪರಮೇಶ್ವರನ್ ಇತ್ತೀಚೆಗಷ್ಟೇ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಅಭಿಮಾನಿಗಳೊಂದಿಗೆ ಪ್ರಶ್ನೋತ್ತರ ಕಾರ್ಯಕ್ರಮ ನಡೆಸಿದರು. ಫ್ಯಾನ್ಸ್ ಕೇಳಿದ ಪ್ರಶ್ನೆಗಳಿಗೆ ಅನುಪಮಾ ಪರಮೇಶ್ವರನ್ ಉತ್ತರ ನೀಡುತ್ತಿದ್ದರು. ಈ ವೇಳೆ, ನೆಟ್ಟಿಗನೊಬ್ಬ ‘’ಬಿಕಿನಿ ಫೋಟೋ ಕಳುಹಿಸಿ’’ ಎಂದು ಕೇಳಿದ. ಆ ಪ್ರಶ್ನೆಯಿಂದ ತಪ್ಪಿಸಿಕೊಳ್ಳಲು ಅನುಪಮಾ ಪರಮೇಶ್ವರನ್ ಪ್ರಯತ್ನಿಸಲಿಲ್ಲ. ಹಾಗೇ, ನೆಟ್ಟಿಗನ ವಿರುದ್ಧ ಅನುಪಮಾ ಪರಮೇಶ್ವರನ್ ಸಿಟ್ಟು ಮಾಡಿಕೊಂಡು ಕೂಗಾಡಲಿಲ್ಲ. ಬದಲಾಗಿ ನಗು ನಗುತ್ತಲೇ, ‘’ಹಾ.. ಕಳುಹಿಸುತ್ತೇನೆ. ನಿನ್ನ ಅಡ್ರೆಸ್ ಕಳುಹಿಸು.. ಫ್ರೇಮ್ ಹಾಕಿರುವ ದೊಡ್ಡ ಫೋಟೋ ಒಕೆ ನಾ?’’ ಅಂತ ಅನುಪಮಾ ಪರಮೇಶ್ವರನ್ ನೆಟ್ಟಿಗನಿಗೆ ಪ್ರತಿಕ್ರಿಯೆ ನೀಡಿದರು. ಅನುಪಮಾ ಪರಮೇಶ್ವರನ್ ಕೊಟ್ಟಿರುವ ಈ ಬೋಲ್ಡ್ ಪ್ರತಿಕ್ರಿಯೆ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ. ಅನುಪಮಾ ಪರಮೇಶ್ವರನ್ ಕೊಟ್ಟ ಉತ್ತರಗಳು ‘’ಮುಂಬರುವ ಚಿತ್ರಗಳಲ್ಲಿ ನಿಮ್ಮ ಹೊಕ್ಕಳನ್ನು ಎಕ್ಸ್‌ಪೋಸ್ ಮಾಡುತ್ತೀರಾ?’’ ಎಂದು ಕೇಳಿದವನಿಗೆ ‘’ಈ ಪ್ರಶ್ನೆ ನನಗೆ ತುಂಬಾ ಇಷ್ಟ ಆಯ್ತು’’ ಎಂದೂ ವ್ಯಂಗ್ಯವಾಗಿ ಅನುಪಮಾ ಪರಮೇಶ್ವರನ್ ಹೇಳಿದ್ದಾರೆ. ‘’ನಿಮಗೆ ಬಾಯ್‌ಫ್ರೆಂಡ್ ಇದ್ದಾರಾ?’’ ಎಂದು ಕೇಳಿದವನಿಗೆ ಮೀಸೆ ಮತ್ತು ಗಡ್ಡದ ಫಿಲ್ಟರ್ ಹಾಕಿಕೊಂಡು ‘’ಇವರೇ ನನ್ನ ಬಾಯ್‌ಫ್ರೆಂಡ್ ಅನುಪಮ್’’ ಅಂತ ಅನುಪಮಾ ಪರಮೇಶ್ವರನ್ ಉತ್ತರಿಸಿದ್ದಾರೆ. ‘’ಮದುವೆ ಆಗೋಣ್ವಾ?’’ ಎಂದು ಕೇಳಿದವನಿಗೆ ‘’ಪ್ರೈವೇಟ್ ಪ್ರಶ್ನೆಗಳನ್ನು ಈ ರೀತಿ ಪಬ್ಲಿಕ್ ಆಗಿ ಕೇಳಬೇಡಿ. ನನಗೆ ನಾಚಿಕೆ ಆಗುತ್ತದೆ’’ ಎಂದಿದ್ದಾರೆ . ಅನುಪಮಾ ಪರಮೇಶ್ವರನ್ ಕುರಿತು… ಅನುಪಮಾ ಪರಮೇಶ್ವರನ್ ಮೂಲತಃ ಕೇರಳದವರು. 2015ರಲ್ಲಿ ತೆರೆಕಂಡ ‘ಪ್ರೇಮಂ’ ಚಿತ್ರದ ಮೂಲಕ ಬಣ್ಣದ ಬದುಕಿಗೆ ಅನುಪಮಾ ಪರಮೇಶ್ವರನ್ ಕಾಲಿಟ್ಟರು. ಬಳಿಕ ‘ಜೇಮ್ಸ್ & ಆಲಿಸ್’, ತಮಿಳಿನ ‘ಕೋಡಿ’, ‘ತೇಜ್ ಐ ಲವ್ ಯೂ’, ‘ಹಲೋ ಗುರು ಪ್ರೇಮ ಕೋಸಮೇ’, ‘ರಾಕ್ಷಸುಡು’ ಮುಂತಾದ ಚಿತ್ರಗಳಲ್ಲಿ ಅನುಪಮಾ ಪರಮೇಶ್ವರನ್ ನಟಿಸಿದ್ದಾರೆ. ಕನ್ನಡದಲ್ಲಿ 2019ರಲ್ಲಿ ತೆರೆಗೆ ಬಂದ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಟನೆಯ ‘ನಟ ಸಾರ್ವಭೌಮ’ ಚಿತ್ರದಲ್ಲೂ ಅನುಪಮಾ ಪರಮೇಶ್ವರನ್ ನಾಯಕಿಯಾಗಿ ಮಿಂಚಿದ್ದರು. ಸದ್ಯ ‘18 ಪೇಜಸ್’, ‘ರೌಡಿ ಬಾಯ್ಸ್’ ಸೇರಿದಂತೆ ಮೂರ್ನಾಲ್ಕು ಚಿತ್ರಗಳಲ್ಲಿ ಅನುಪಮಾ ಪರಮೇಶ್ವರನ್ ಬಿಜಿಯಾಗಿದ್ದಾರೆ.