ಬಿಎಂಟಿಸಿ ಕಂಡಕ್ಟರ್‌ ಮೇಲೆ ಹಲ್ಲೆ : ವಿದ್ಯಾರ್ಥಿನಿ, ನಿರ್ವಾಹಕನಿಂದ ದೂರು, ಪ್ರತಿದೂರು

ಬೆಂಗಳೂರು: ಕಾಲೇಜು ವಿದ್ಯಾರ್ಥಿನಿ ಹಾಗೂ ಬಸ್‌ ನಿರ್ವಾಹಕನ ನಡುವೆ ಪಾಸ್‌ ವಿಚಾರಕ್ಕೆ ಜಗಳವುಂಟಾಗಿ ಇಬ್ಬರು ವಿಲ್ಸನ್‌ಗಾರ್ಡನ್‌ ಪೊಲೀಸ್‌ ಠಾಣೆಯಲ್ಲಿ ದೂರಿಗೆ ಪ್ರತಿ ದೂರು ದಾಖಲಿಸಿದ್ದಾರೆ. ಕಾರ್ಪೊರೇಷನ್‌ ವೃತ್ತದದಲ್ಲಿ ಬಿಎಂಟಿಸಿ ಬಸ್‌ ಹತ್ತಿದ ವಿದ್ಯಾರ್ಥಿನಿಯು ಕಾಲೇಜು ಶುಲ್ಕ ರಶೀದಿಯ ಅಸಲಿ ಪ್ರತಿ ತೋರಿಸಲಿಲ್ಲವೆಂದು ಪಾಸ್‌ ಕಿತ್ತುಕೊಂಡು ಮಾರ್ಗಮಧ್ಯೆಯೇ ಬಸ್‌ನಿಂದ ಕೆಳಗೆ ಇಳಿಸಿ, ದುರ್ವರ್ತನೆ ತೋರಿರುವುದಾಗಿ ಆರೋಪಿಸಿ ವಿದ್ಯಾರ್ಥಿನಿ ವಿಲ್ಸನ್‌ ಗಾರ್ಡನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಜಯನಗರದ ಕಾಲೇಜು ವಿದ್ಯಾರ್ಥಿನಿ ಎಚ್‌.ಬಿ. ವತ್ಸಲಾ ಬಿಎಂಟಿಸಿ ಬಸ್‌ ಕಂಡಕ್ಟರ್‌ ವಿರುದ್ಧ ದೂರು ನೀಡಿದ್ದಾರೆ. ದೂರಿನ ಮೇರೆಗೆ ಪೊಲೀಸರು ಎಫ್‌ಐಆರ್‌ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ. ವತ್ಸಲಾ ಬೊಮ್ಮಸಂದ್ರಕ್ಕೆ ತೆರಳಲು ಶುಕ್ರವಾರ ರಾತ್ರಿ 9.30ರಲ್ಲಿ ಕಾರ್ಪೊರೇಷನ್‌ ವೃತ್ತದಲ್ಲಿ ಬಿಎಂಟಿಸಿ ಬಸ್‌ ಹತ್ತಿದ್ದಾರೆ. ಈ ವೇಳೆ ಕಂಡಕ್ಟರ್‌ ಮನೋಜ್‌, ವಿದ್ಯಾರ್ಥಿನಿಗೆ ಟಿಕೆಟ್‌ ತೆಗೆದುಕೊಳ್ಳಲು ಹೇಳಿದಾಗ, ಪಾಸ್‌ ಇದೆ ಎಂದು ತಿಳಿಸಿದ್ದಾರೆ. ಪಾಸ್‌ ತೋರಿಸಿ ಎಂದಾಗ ಪಾಸ್‌ ತೋರಿಸಿದ್ದಾರೆ. ರಶೀದಿ ತೋರಿಸಲು ಹೇಳಿದಾಗ ಅವರ ಬಳಿ ರಶೀದಿ ಇಲ್ಲದ ಕಾರಣ ಮೊಬೈಲ್‌ ಫೋನ್‌ನಲ್ಲಿದ್ದ ರಶೀದಿ ಛಾಯಾಪ್ರತಿ ತೋರಿಸಿದ್ದಾರೆ. ಇದಕ್ಕೆ ಒಪ್ಪದ ಕಂಡಕ್ಟರ್‌ ಅಸಲಿ ರಶೀದಿ ಪ್ರತಿ ತೋರಿಸಿ ಇಲ್ಲದಿದ್ದರೆ ಬಸ್‌ನಿಂದ ಇಳಿಯಿರಿ ಎಂದು ಹೇಳಿದ್ದಾರೆ. ಈ ವಿಷಯಕ್ಕೆ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದಿದೆ. ಬಳಿಕ ಶಾಂತಿನಗರ ಬಸ್‌ ನಿಲ್ದಾಣದಲ್ಲಿಬಸ್‌ ನಿಲ್ಲಿಸಿ ವಿದ್ಯಾರ್ಥಿನಿಯನ್ನು ಇಳಿಸಿದ್ದಾರೆ. ಈ ವೇಳೆ ಸ್ಥಳದಲ್ಲಿದ್ದ ಕೆಲವು ಪುಂಡರು ಮತ್ತು ವಿದ್ಯಾರ್ಥಿನಿ ನಡುವೆ ಎಳೆದಾಟ ನಡೆದಾಗ, ಬಸ್‌ ಕಂಡಕ್ಟರ್‌ ವಿದ್ಯಾರ್ಥಿನಿಯ ಮೊಬೈಲ್‌ ಕಿತ್ತುಕೊಳ್ಳಲು ಯತ್ನಿಸಿದ್ದು, ಕೊಡದಿದ್ದಾಗ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾರೆ. ಅಲ್ಲದೆ, ವಿದ್ಯಾರ್ಥಿನಿ ಮೈ-ಕೈ ಮುಟ್ಟಿ ಅಸಭ್ಯವಾಗಿ ವರ್ತಿಸಿದ್ದಾರೆ. ಇದೆಲ್ಲದಕ್ಕೂ ಪ್ರತ್ಯಕ್ಷದರ್ಶಿಗಳಾಗಿದ್ದ ಶಾಂತಿನಗರ ಬಸ್‌ ನಿಲ್ದಾಣದಲ್ಲಿನಿಂತಿದ್ದ ಬಿಎಂಟಿಸಿ ಅಧಿಕಾರಿಗಳು ವಿದ್ಯಾರ್ಥಿನಿಗೆ ರಕ್ಷಣೆ ನೀಡದೆ ಪುಂಡರಿಗೆ ಕುಮ್ಮಕ್ಕು ನೀಡುತ್ತಿದ್ದರು ಎಂದು ಎಫ್‌ಐಆರ್‌ ಪ್ರತಿಯಲ್ಲಿ ಉಲ್ಲೇಖಿಸಿದ್ದಾರೆ. ವಿದ್ಯಾರ್ಥಿನಿ ಮಾಡಿರುವ ಆರೋಪಕ್ಕೆ ಪ್ರತ್ಯಾರೋಪ ಮಾಡಿರುವ ಕಂಡಕ್ಟರ್‌ ಮನೋಜ್‌, ವಿದ್ಯಾರ್ಥಿನಿ ವಿರುದ್ಧ ವಿಲ್ಸನ್‌ ಗಾರ್ಡನ್‌ ಪೊಲೀಸ್‌ ಠಾಣೆಯಲ್ಲಿ ಪ್ರತಿ ದೂರು ನೀಡಿದ್ದಾರೆ. ಕೆಂಪೇಗೌಡ ಬಸ್‌ ನಿಲ್ದಾಣದಿಂದ ಅತ್ತಿಬೆಲೆ ಮಾರ್ಗದಲ್ಲಿಚಲಿಸುವ ಬಿಎಂಟಿಸಿ ಬಸ್‌ನಲ್ಲಿ ಮನೋಜ್‌ ನಿರ್ವಾಹಕನಾಗಿ ಕೆಲಸ ಮಾಡುತ್ತಿದ್ದಾರೆ. ಡಿ.3ರಂದು ರಾತ್ರಿ 9.30ರಲ್ಲಿ ಕಾರ್ಪೊರೇಷನ್‌ ಬಳಿ ಬಸ್‌ಗೆ ಹತ್ತಿದ ವಿದ್ಯಾರ್ಥಿನಿಗೆ ಟಿಕೆಟ್‌ಗೆ ಹಣ ಕೊಡುವಂತೆ ಮನೋಜ್‌ ಕೇಳಿದ್ದರು. ಆಗ ತನ್ನ ಬಳಿ ಪಾಸ್‌ ಇದೆ ಎಂದು ವಿದ್ಯಾರ್ಥಿನಿ ಹೇಳಿದ್ದಳು. ಪಾಸ್‌ ತೋರಿಸುವಂತೆ ಸೂಚಿಸಿದಾಗ ನಿರಾಕರಿಸಿದ್ದಳು. ಟಿಕೆಟ್‌ ತೆಗೆದುಕೊಳ್ಳದಿದ್ದರೆ, ಪಾಸ್‌ ತೋರಿಸಿ ಎಂದು ಮನು ಮತ್ತೆ ಹೇಳಿದಾಗ ಆಕ್ರೋಶಗೊಂಡ ವಿದ್ಯಾರ್ಥಿನಿ ಅವಾಚ್ಯ ಶಬ್ದಗಳಿಂದ ನಿರ್ವಾಹಕನಿಗೆ ಬೆದರಿಸಿದ್ದಳು. ನಂತರ ಬಸ್‌ನಿಂದ ಇಳಿದು ಅಡ್ಡಲಾಗಿ ನಿಂತು ಕೆಟ್ಟದಾಗಿ ಕೈ ಸನ್ನೆ ಮಾಡಿ ಬಸ್‌ ಮುಂದೆ ಹೋಗಲು ಬಿಡದೇ ಇತರ ಪ್ರಯಾಣಿಕರಿಗೂ ತೊಂದರೆ ಮಾಡಿದ್ದಳು. ಇಷ್ಟಕ್ಕೇ ಸುಮ್ಮನಾಗದೆ ಸ್ನೇಹಿತರಿಗೆ ಕರೆ ಮಾಡಿ ಅವರನ್ನು ಸ್ಥಳಕ್ಕೆ ಕರೆಸಿದ್ದಳು. ಆಕೆಯ ಸ್ನೇಹಿತರು ಮನೋಜ್‌ ಮೇಲೆ ಹಲ್ಲೆಮಾಡಿ, ಸಮವಸ್ತ್ರ ಹರಿದು, ಬಿಎಂಟಿಸಿ ಬಸ್‌ನ ವೈರ್‌ಗಳನ್ನು ಕಿತ್ತುಹಾಕಿ ದಾಂಧಲೆ ನಡೆಸಿ ಪರಾರಿಯಾಗಿದ್ದಾರೆ. ದಾಂಧಲೆ ನಡೆಸಿರುವುದನ್ನು ವತ್ಸಲಾ ತನ್ನ ಮೊಬೈಲ್‌ನಲ್ಲಿ ಸೆರೆ ಹಿಡಿದಿದ್ದಾಳೆ ಎಂದು ಮನೋಜ್‌ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.