ಬೆಂಗಳೂರಿನಲ್ಲಿ ಕುಸಿಯುತ್ತಲೇ ಇವೆ ಶಿಥಿಲ ಕಟ್ಟಡ; ಪೊಲೀಸ್‌ ವಸತಿ ಸಮುಚ್ಚಯದಲ್ಲಿ ಬಿರುಕು!

: ಕೇವಲ ಎರಡು ವರ್ಷಗಳ ಹಿಂದೆಯಷ್ಟೇ ನಿರ್ಮಾಣ ಪೂರ್ಣಗೊಂಡಿದ್ದ ಪೊಲೀಸ್‌ ವಸತಿ ಸಮುಚ್ಚಯವು ಕಳಪೆ ಕಾಮಗಾರಿಯಿಂದ ಬಿರುಕು ಬಿಟ್ಟಿದ್ದು, ಎರಡು ಅಡಿಯಷ್ಟು ವಾಲಿದೆ. ಸಮುಚ್ಚಯದಲ್ಲಿ ನೆಲೆಸಿರುವ ನಿವಾಸಿಗಳು ಜೀವಭಯದಲ್ಲೇ ದಿನದೂಡುತ್ತಿದ್ದಾರೆ. ನಗರದ ಬಿನ್ನಿಮಿಲ್‌ ಸಮೀಪದ ಪೊಲೀಸ್‌ ವಸತಿ ಸಮುಚ್ಚಯದ 'ಬಿ' ಬ್ಲಾಕ್‌ನ 8 ಅಂತಸ್ತುಗಳ ಕಟ್ಟಡದಲ್ಲಿ ಬಿರುಕು ಕಾಣಿಸಿಕೊಂಡು ಎರಡು ಅಡಿಯಷ್ಟು ಎಡ ಬದಿಗೆ ವಾಲಿರುವುದರಿಂದ ನಿವಾಸಿಗಳು ಆತಂಕಕ್ಕೆ ಒಳಗಾಗಿದ್ದಾರೆ. ಈ ಸಮುಚ್ಚಯದ 32 ಫ್ಲ್ಯಾಟ್‌ಗಳಲ್ಲಿರುವ ನಿವಾಸಿಗಳಿಗೆ ಖಾಲಿ ಮಾಡುವಂತೆ ಮೌಖಿಕವಾಗಿ ಸೂಚಿಸಲಾಗಿದೆ. ಆದರೆ, ಬಹುತೇಕ ನಿವಾಸಿಗಳು ಬೇರೆಡೆ ಸ್ಥಳಾಂತರಗೊಳ್ಳಲು ಹಿಂದೇಟು ಹಾಕುತ್ತಿದ್ದಾರೆ. ಕರ್ನಾಟಕ ರಾಜ್ಯ ಪೊಲೀಸ್‌ ವಸತಿ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ನಿಗಮದ ವತಿಯಿಂದ ಬಿನ್ನಿಮಿಲ್‌ ಬಳಿ ಎ, ಬಿ, ಸಿ, ಡಿ ಬ್ಲಾಕ್‌ಗಳಲ್ಲಿಒಟ್ಟು 128 ಫ್ಲ್ಯಾಟ್‌ಗಳನ್ನು ನಿರ್ಮಿಸಿ, ಅಧಿಕಾರಿ ಮತ್ತು ಸಿಬ್ಬಂದಿ ವರ್ಗಕ್ಕೆ ಹಂಚಿಕೆ ಮಾಡಲಾಗಿದೆ. 150 ಕೋಟಿ ರೂ. ವೆಚ್ಚದ ಈ ವಸತಿ ಸಮುಚ್ಚಯ ನಿರ್ಮಾಣದ ಗುತ್ತಿಗೆಯನ್ನು ವಾರ್ಸಾ ಎಂಜಿನಿಯರ್‌ ಎಂಬ ಕಂಪನಿಯು ಟೆಂಡರ್‌ ಪಡೆದಿತ್ತು. 2017ರ ಜ. 10ಕ್ಕೆ ಶಂಕುಸ್ಥಾಪನೆ ನೆರವೇರಿಸಿದ್ದರೂ, ಕಾಮಗಾರಿ ಶುರುವಾಗಿದ್ದು 2018ರ ಏಪ್ರಿಲ್‌ನಲ್ಲಿ. ಹಂತ ಹಂತವಾಗಿ ಕಾಮಗಾರಿ ಪೂರ್ಣಗೊಳಿಸಿ ಬ್ಲಾಕ್‌ಗಳನ್ನು ಬಿಟ್ಟುಕೊಡಲಾಗಿತ್ತು. ಅಂತಿಮವಾಗಿ 2021ರ ಮೇ ತಿಂಗಳಿನಲ್ಲಿ ಕಾಮಗಾರಿ ಮುಗಿಸಿತ್ತು. ಕಟ್ಟಡ ವಾಲಿರುವ ವಿಷಯ ತಿಳಿದು ನಗರ ಪೊಲೀಸ್‌ ಆಯುಕ್ತ ಕಮಲ್‌ ಪಂತ್‌, ಪಶ್ಚಿಮ ವಿಭಾಗದ ಡಿಸಿಪಿ ಸಂದೀಪ್‌ ಪಾಟೀಲ್‌ ಹಾಗೂ ಇತರೆ ಹಿರಿಯ ಅಧಿಕಾರಿಗಳು ಶನಿವಾರ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಸದ್ಯ ಮುಂಜಾಗ್ರತಾ ಕ್ರಮವಾಗಿ 32 ಕುಟುಂಬಗಳನ್ನು ಅನ್ನಪೂರ್ಣೇಶ್ವರಿನಗರದಲ್ಲಿರುವ ಪೊಲೀಸ್‌ ವಸತಿ ಸಮುಚ್ಚಯಕ್ಕೆ ಸ್ಥಳಾಂತರಿಸಲು ಉದ್ದೇಶಿಸಲಾಗಿದೆ. ಆದರೆ, ಇಲ್ಲಿನ ನಿವಾಸಿಗಳು ಬೇರೆಡೆಗೆ ತೆರಳಲು ಒಲವು ತೋರುತ್ತಿಲ್ಲ. ಒಂದೂವರೆ ವರ್ಷದ ಹಿಂದೆಯೇ ಬಿರುಕು ವಾರ್ಸಾ ಎಂಜಿನಿಯರಿಂಗ್‌ ಕಂಪನಿಯು 'ಬಿ' ಬ್ಲಾಕ್‌ ಕಟ್ಟಡದ ನಿರ್ಮಾಣ ಕಾರ್ಯವನ್ನು ಎರಡು ವರ್ಷಗಳ ಹಿಂದೆಯಷ್ಟೇ ಪೂರ್ಣಗೊಳಿಸಿ, ನಿಗಮಕ್ಕೆ ಹಸ್ತಾಂತರಿಸಿತ್ತು. 2019ರಲ್ಲಿ ಕಟ್ಟಡದಲ್ಲಿ ಸ್ವಲ್ಪ ಬಿರುಕು ಕಾಣಿಸಿಕೊಂಡಿದೆ. ಕ್ರಮೇಣ ದೊಡ್ಡದಾಗಿದ್ದರಿಂದ ಕಟ್ಟಡವು ಎರಡು ಅಡಿಯಷ್ಟು ವಾಲಿದೆ. ಶುಕ್ರವಾರ ಮಧ್ಯಾಹ್ನವೇ 'ಬಿ' ಬ್ಲಾಕ್‌ನಲ್ಲಿ ಜೋರು ಶಬ್ದ ಕೇಳಿಬಂದಿದೆ. ಇದರಿಂದ ಆತಂಕಗೊಂಡ ನಿವಾಸಿಗಳು ಫ್ಲ್ಯಾಟ್‌ಗಳಿಂದ ಹೊರಬಂದು ನೋಡಿದಾಗ ಕಟ್ಟಡದ ಹಲವೆಡೆ ಬಿರುಕು ಬಿಟ್ಟಿರುವುದು ಕಂಡುಬಂದಿದೆ. ಐಐಎಸ್ಸಿಯಿಂದ ಅಧ್ಯಯನ ಪೊಲೀಸ್‌ ವಸತಿ ಗೃಹದ 'ಬಿ' ಬ್ಲಾಕ್‌ ಕಟ್ಟಡದ ಪೂರ್ವ ಭಾಗದಲ್ಲಿ ವರ್ಟಿಕಲ್‌ ಅಲೈನ್‌ಮೆಂಟ್‌ನಲ್ಲಿ ಬಿರುಕು ಕಾಣಿಸಿಕೊಂಡಿದ್ದು, ಇದರ ಅಧ್ಯಯನಕ್ಕಾಗಿ ತಾಂತ್ರಿಕ ಸಲಹೆಗಾರರ ಸಮಿತಿಯನ್ನು ರಚಿಸಲಾಗಿದೆ. ಭಾರತೀಯ ವಿಜ್ಞಾನ ಸಂಸ್ಥೆಯಿಂದ ಅಧ್ಯಯನ ನಡೆಯಲಿದೆ ಎಂಬುದು ತಿಳಿದುಬಂದಿದೆ. ತಕ್ಷಣ ಫ್ಲ್ಯಾಟ್‌ ಖಾಲಿ ಮಾಡಲು ಆದೇಶ 'ಬಿ' ಬ್ಲಾಕ್‌ನಲ್ಲಿ ನೆಲೆಸಿರುವವರು ತಕ್ಷಣ ಫ್ಲ್ಯಾಟ್‌ಗಳನ್ನು ಖಾಲಿ ಮಾಡಬೇಕು. ಎಲ್ಲರಿಗೂ ಅನ್ನಪೂರ್ಣೇಶ್ವರಿ ನಗರದಲ್ಲಿ ಹೊಸದಾಗಿ ನಿರ್ಮಿಸಿರುವ 'ಸಿ' ಬ್ಲಾಕ್‌ ಕಟ್ಟಡದಲ್ಲಿಯೇ ಫ್ಲ್ಯಾಟ್‌ಗಳನ್ನು ಹಂಚಿಕೆ ಮಾಡಲಾಗುವುದು ಎಂದು ಪಶ್ಚಿಮ ವಿಭಾಗದ ಉಪ ಪೊಲೀಸ್‌ ಆಯುಕ್ತರು ಆದೇಶಿಸಿದ್ದಾರೆ. ಕಾಟನ್‌ಪೇಟೆ ಠಾಣೆಯ ಪೊಲೀಸ್‌ ಇನ್‌ಸ್ಪೆಕ್ಟರ್‌ ಈ ಬಗ್ಗೆ ಕೂಡಲೇ ಕ್ರಮ ಕೈಗೊಂಡು, ವರದಿ ಸಲ್ಲಿಸಬೇಕು,'' ಎಂದು ಸೂಚಿಸಿದ್ದಾರೆ. ಕಳಪೆ ಕಾಮಗಾರಿಯಿಂದ ಅವಾಂತರ ಬಿನ್ನಿಮಿಲ್‌ ವಸತಿ ಸಮುಚ್ಚಯ ನಿರ್ಮಾಣದ ವೇಳೆಯೇ ಕಳಪೆ ಕಾಮಗಾರಿಯ ಕುರಿತು ಅಪಸ್ವರ ಕೇಳಿಬಂದಿತ್ತು. ಆದರೆ, ಸಮುಚ್ಚಯ ನಿರ್ಮಾಣದ ಹೊಣೆ ಹೊತ್ತಿದ್ದ ನಿಗಮವು ಯಾವುದೇ ಕ್ರಮ ಕೈಗೊಳ್ಳದೆ ನಿರ್ಲಕ್ಷ್ಯ ವಹಿಸಿದೆ. ನಿಗಮದ ಅಧ್ಯಕ್ಷರನ್ನಾಗಿ ಎಡಿಜಿಪಿ ಹಂತದ ಅಧಿಕಾರಿಗಳನ್ನೇ ನೇಮಕ ಮಾಡಲಾಗುತ್ತಿದೆ. ಆದಾಗ್ಯೂ, ಗುಣಮಟ್ಟದ ವಸತಿ ಸಮುಚ್ಚಯಗಳ ನಿರ್ಮಾಣವಾಗುತ್ತಿಲ್ಲ ಎಂಬ ಆರೋಪ ಕೇಳಿಬಂದಿದೆ. ಫ್ರೀಕಾಸ್ಟ್‌ ಎಲಿಮೆಂಟ್‌ಗಳನ್ನು ಬಳಸಿ ಕಟ್ಟಡ ನಿರ್ಮಿಸಲಾಗಿದೆ. ಎರಡು ಬಾಕ್ಸ್‌ಗಳ ನಡುವೆ ಬೀಮ್‌ ಹಾಕಿಲ್ಲ. ಪರಿಣಾಮ, ಕಟ್ಟಡವು ಹಲವೆಡೆ ಬಿರುಕು ಬಿಟ್ಟಿದೆ. ಕಮರ್ಷಿಯಲ್‌ ಸ್ಟ್ರೀಟ್‌ನಲ್ಲಿ 2 ಅಂತಸ್ತಿನ ಮಹಾಲಕ್ಷ್ಮಿ ಲೇಔಟ್‌ನ ಕಮಲಾನಗರದ ಶಂಕರ್‌ನಾಗ್‌ ಬಸ್‌ ನಿಲ್ದಾಣದ ಬಳಿ ಎರಡು ಕಟ್ಟಡಗಳು ಕುಸಿದ ಘಟನೆ ಮಾಸುವ ಮುನ್ನವೇ ಕಮರ್ಷಿಯಲ್‌ ಸ್ಟ್ರೀಟ್‌ನ ಇಬ್ರಾಹಿಂ ಸಾಹೇಬ್‌ ಸ್ಟ್ರೀಟ್‌ನಲ್ಲಿ ನೆಲಮಹಡಿ ಸೇರಿ ಎರಡು ಅಂತಸ್ತಿನ ವಾಣಿಜ್ಯ ಕಟ್ಟಡವು ಕುಸಿದಿದೆ. ಬಿಬಿಎಂಪಿ ಅಧಿಕಾರಿಗಳು ಶನಿವಾರ ರಾತ್ರಿ ಕಟ್ಟಡವನ್ನು ನೆಲಸಮಗೊಳಿಸಿದರು. ನಗರದಲ್ಲಿಎಡೆಬಿಡದೆ ಸುರಿಯುತ್ತಿರುವ ಧಾರಾಕಾರ ಮಳೆಗೆ ಶಿಥಿಲ ಕಟ್ಟಡಗಳು ಸಾಲು ಸಾಲಾಗಿ ಕುಸಿಯುತ್ತಿರುವುದು ಆತಂಕ ಮೂಡಿಸಿದೆ. ಕಳೆದ ಕೆಲ ದಿನಗಳಿಂದೀಚೆಗೆ 7 ಕಟ್ಟಡಗಳು ಧರೆಗುರುಳಿದಿದ್ದು, ಅದೃಷ್ಟವಶಾತ್‌ ಯಾವುದೇ ಅನಾಹುತ ಸಂಭವಿಸಿಲ್ಲ. ಪಾಲಿಕೆಯು 2019ರಲ್ಲೇ ಸಮೀಕ್ಷೆ ಕೈಗೊಂಡು 185 ಶಿಥಿಲ ಕಟ್ಟಡಗಳನ್ನು ಗುರುತಿಸಿದೆ. ಆದರೆ, ತೆರವು ಮಾಡಿದ್ದು ಕೇವಲ 10 ಮಾತ್ರ. ಉಳಿದ ಕಟ್ಟಡಗಳ ತೆರವಿಗೆ ಮೀನಮೇಷ ಎಣಿಸುತ್ತಿದೆ. ಇಬ್ರಾಹಿಂ ಸಾಹೇಬ್‌ ಸ್ಟ್ರೀಟ್‌ನಲ್ಲಿ 2400 ಚ.ಅಡಿ ವಿಸ್ತೀರ್ಣದಲ್ಲಿ ನಿರ್ಮಿಸಿರುವ ನೆಲಮಹಡಿ ಸೇರಿ ಎರಡು ಅಂತಸ್ತಿನ ಕಟ್ಟಡದ ಗೋಡೆಯು ಶುಕ್ರವಾರವೇ ಕುಸಿದಿದೆ. ತಕ್ಷಣ ಕಾರ್ಯಪ್ರವೃತ್ತರಾದ ಪಾಲಿಕೆ ಅಧಿಕಾರಿಗಳು ಕಟ್ಟಡದಲ್ಲಿದ್ದ 6 ಮಳಿಗೆಗಳನ್ನು ತೆರವುಗೊಳಿಸಿದ್ದು, ಯಾವುದೇ ಅನಾಹುತ ಸಂಭವಿಸಿಲ್ಲ. ಮೊದಲ ಮಹಡಿಯು ಪಾಳು ಬಿದ್ದಿತ್ತು. ಸುಮಾರು 100 ವರ್ಷಗಳ ಹಿಂದೆ ನಿರ್ಮಾಣಗೊಂಡಿರುವ ಈ ಕಟ್ಟಡವು ಆರ್‌.ಜಗದೀಶ್ವರಿ, ಮುಖ್ತರ್‌ ಅಹಮ್ಮದ್‌, ಮಹಮ್ಮದ್‌ ಅದಮ್‌, ಮಹಮ್ಮದ್‌ ಅಮೀದ್‌ ಎಂಬುವರಿಗೆ ಸೇರಿದ್ದಾಗಿದೆ. ಧಾರಾಕಾರವಾಗಿ ಸುರಿಯುತ್ತಿದ್ದ ಮಳೆಯಲ್ಲೇ ಕಟ್ಟಡವನ್ನು ತೆರವುಗೊಳಿಸಲಾಯಿತು. ಮುಂಜಾಗ್ರತಾ ಕ್ರಮವಾಗಿ ಪಕ್ಕದ ಎರಡು ಮಹಡಿಯ ಕಟ್ಟಡದಲ್ಲಿದ್ದ ನಿವಾಸಿಗಳು, ಮಳಿಗೆದಾರರನ್ನು ಖಾಲಿ ಮಾಡಿಸಲಾಗಿತ್ತು. ಇತ್ತೀಚೆಗೆ ನಡೆಸಿದ ಶಿಥಿಲ ಕಟ್ಟಡಗಳ ಸಮೀಕ್ಷೆಯಲ್ಲಿಈ ಕಟ್ಟಡವೂ ಇತ್ತು. ಹೀಗಾಗಿ, ಸಂಬಂಧಪಟ್ಟ ಮಾಲೀಕರಿಗೆ 7 ದಿನಗಳೊಳಗೆ ತೆರವುಗೊಳಿಸುವಂತೆ ನೋಟಿಸ್‌ ಸಹ ನೀಡಲಾಗಿತ್ತು. ಆದರೆ, ಮಾಲೀಕರುಗಳು ತೆರವು ಕಾರ್ಯ ಕೈಗೊಂಡಿರಲಿಲ್ಲ. ''ಕಟ್ಟಡದ ಮಧ್ಯದಲ್ಲಿ ಹಿಟಾಚಿಯಿಂದ ಒಂದೂವರೆ ಮೀಟರ್‌ನಷ್ಟು ಕತ್ತರಿಸಿ ತೆರವು ಮಾಡಲಾಯಿತು. ಕಟ್ಟಡದ ಹಿಂಭಾಗ ಹಾಗೂ ಮತ್ತೊಂದು ಬದಿಯಲ್ಲಿ ಸ್ಥಳಾವಕಾಶವಿದ್ದುದರಿಂದ ಯಾವುದೇ ಸಮಸ್ಯೆಯಾಗಲಿಲ್ಲ. ನೋಟಿಸ್‌ ನೀಡಿದ್ದರೂ ತೆರವು ಕಾರ್ಯ ಕೈಗೊಳ್ಳದೆ ನಿರ್ಲಕ್ಷ್ಯ ವಹಿಸಿದ್ದ ಮಾಲೀಕರ ವಿರುದ್ಧ ಕಮರ್ಷಿಯಲ್‌ ಸ್ಟ್ರೀಟ್‌ ಪೊಲೀಸ್‌ ಠಾಣೆಯಲ್ಲಿ ಎಫ್‌ಐಆರ್‌ ದಾಖಲಿಸಲಾಗಿದೆ,'' ಎಂದು ಬಿಬಿಎಂಪಿಯ ಶಿವಾಜಿನಗರ ವಾರ್ಡ್‌ನ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ ಜಾವೇದ್‌ ತಿಳಿಸಿದರು. ಹೊಸದಾಗಿ 404 ಕಟ್ಟಡಗಳ ಗುರುತು ಸಾಲು ಸಾಲಾಗಿ ಕಟ್ಟಡಗಳು ಕುಸಿದು ಬೀಳುತ್ತಿರುವ ಮಧ್ಯೆಯೇ ಪಾಲಿಕೆಯು ಹೊಸದಾಗಿ 404 ಶಿಥಿಲ ಕಟ್ಟಡಗಳನ್ನು ಗುರುತಿಸಿದೆ. ಪಾಲಿಕೆಯ ವಲಯವಾರು ಅಧಿಕಾರಿಗಳು ಸಲ್ಲಿಸಿರುವ ಪ್ರಾಥಮಿಕ ವರದಿಯಲ್ಲಿ 404 ಕಟ್ಟಡಗಳು ಅಪಾಯದಲ್ಲಿರುವುದು ಗೊತ್ತಾಗಿದೆ. 2019ರಲ್ಲಿ ಗುರುತಿಸಿದ್ದ 185 ಕಟ್ಟಡಗಳೂ ಸೇರಿ ಒಟ್ಟು 589 ಕಟ್ಟಡಗಳು ಶಿಥಿಲಾವಸ್ಥೆಯಲ್ಲಿವೆ. ಈ ಎಲ್ಲ ಕಟ್ಟಡಗಳ ಸದೃಢತೆ ಬಗ್ಗೆ ಕೂಲಂಕಶ ಪರೀಕ್ಷೆ ನಡೆಸಲು ತೀರ್ಮಾನಿಸಲಾಗಿದೆ. ತಜ್ಞ ಎಂಜಿನಿಯರ್‌ಗಳ ಮೂಲಕ ಅವುಗಳ ಸದೃಢತೆ ಕುರಿತು ಪರೀಕ್ಷೆ ನಡೆಸಿ, ಆನಂತರ ತೆರವಿಗೆ ಕ್ರಮ ಕೈಗೊಳ್ಳಲು ಉದ್ದೇಶಿಸಲಾಗಿದೆ. ಪೊಲೀಸ್‌ ಕ್ವಾಟ್ರಸ್‌ನಲ್ಲಿ ವಾಸವಾಗಿದ್ದ ಕುಟುಂಬಗಳಿಗೆ ಪರ್ಯಾಯ ವ್ಯವಸ್ಥೆ ಕಲ್ಪಿಸಲಾಗಿದೆ. ಸದ್ಯಕ್ಕೆ ಇನ್ನಿತರ ಕ್ವಾಟ್ರಸ್‌ಗಳಲ್ಲಿ ನಿವಾಸಿಗಳು ಉಳಿದುಕೊಳ್ಳಲು ಅವಕಾಶ ಮಾಡಿಕೊಡಲಾಗಿದೆ. ಎಂಜಿನಿಯರ್‌ಗಳು, ಇಂಡಿಯನ್‌ ಇನ್ಸ್‌ಟಿಟ್ಯೂಟ್‌ ಆಫ್‌ ಸೈನ್ಸ್‌ ಪರಿಣತರು ಪರಿಶೀಲನೆ ನಡೆಸಿ ಕಟ್ಟಡ ವಾಲಲು ಕಾರಣ ಏನು ಎಂಬುದರ ವರದಿ ನೀಡಲಿದ್ದಾರೆ. ಕಮಲ್‌ಪಂತ್‌, ನಗರ ಪೊಲೀಸ್‌ ಆಯುಕ್ತ ಬೇರೆಡೆ ಸ್ಥಳಾಂತರ ಬಿನ್ನಿಪೇಟೆ ಪೊಲೀಸ್‌ ಕ್ವಾಟ್ರಸ್‌ ಬಿರುಕು ಬಿಟ್ಟಿರುವುದು ಮತ್ತು ವಾಲಿರುವುದು ಗಮನಕ್ಕೆ ಬಂದಿದ್ದು, ನಿವಾಸಿಗಳು ಸುರಕ್ಷಿತವಾಗಿ ಬೇರೆಡೆ ಸ್ಥಳಾಂತರಿಸಲಾಗುವುದು ಎಂದು ಗೃಹಸಚಿವ ಆರಗ ಜ್ಞಾನೇಂದ್ರ ತಿಳಿಸಿದರು. ಕಟ್ಟಡ ವಾಲಿರುವ ಬಿನ್ನಿಪೇಟೆ ಪೊಲೀಸ್‌ ಕ್ವಾಟ್ರಸ್‌ಗೆ ಭೇಟಿ ನೀಡಿ ಪರಿಶೀಲಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ''ಗೃಹ-2025ರ ಯೋಜನೆಯಡಿ 10 ಸಾವಿರ ಪೊಲೀಸ್‌ ಕ್ವಾಟ್ರಸ್‌ ನಿರ್ಮಿಸಲಾಗುವುದು. ಹಳೆ ಕಟ್ಟಡಗಳನ್ನು ಕೆಡವಿ ಹೊಸ ಕಟ್ಟಡ ನಿರ್ಮಾಣ ಮಾಡಬೇಕು. ಇದಕ್ಕೆ ಆಡಳಿತಾತ್ಮಕ ಅನುಮೋದನೆ ಸಿಕ್ಕಿದ್ದು ಟೆಂಡರ್‌ ಸಹ ಮುಗಿದಿದೆ. ಹೊಸ ಕಟ್ಟಡ ನಿರ್ಮಿಸಿದರೆ ಕ್ವಾಟ್ರಸ್‌ ಸಮಸ್ಯೆ ನಿವಾರಣೆಯಾಗುತ್ತದೆ'' ಎಂದು ಹೇಳಿದರು. 10,000 ಪೊಲೀಸ್‌ ವಸತಿಗೃಹ ನಿರ್ಮಾಣಕ್ಕೆ ಟೆಂಡರ್‌ ಬೆಂಗಳೂರಿನ ಬಿನ್ನಿಮಿಲ್‌ ಭಾಗದಲ್ಲಿ 10,000 ಪೊಲೀಸ್‌ ವಸತಿ ಗೃಹ ನಿರ್ಮಿಸಲು ಈಗಾಗಲೇ ಟೆಂಡರ್‌ ಆಹ್ವಾನಿಸಲಾಗಿದೆ ಎಂದು ಗೃಹ ಸಚಿವ ಆರಗ ಜ್ಞಾನೇಂದ್ರ ತಿಳಿಸಿದರು. ರಾಜ್ಯ ಬಿಜೆಪಿ ಕಚೇರಿಯಲ್ಲಿ ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಪೊಲೀಸ್‌ ವಸತಿ ಗೃಹ ನಿರ್ಮಾಣ ಕಾರ್ಯ ಪೂರ್ಣಗೊಂಡರೆ ಪೊಲೀಸರ ವಸತಿ ಸಮಸ್ಯೆ ಬಹುತೇಕ ನಿವಾರಣೆಯಾಗಲಿದೆ. ಕೆಲವೆಡೆ ಪೊಲೀಸ್‌ ವಸತಿ ಗೃಹಗಳಿದ್ದರೂ ಪೊಲೀಸರು ಅಲ್ಲಿವಾಸ್ತವ್ಯ ಹೂಡುತ್ತಿಲ್ಲ. ಮನೆ ಬಾಡಿಗೆ ಭತ್ಯೆ ಹೆಚ್ಚಿನ ಪ್ರಮಾಣದಲ್ಲಿಸಿಗುವುದು ಇದಕ್ಕೆ ಕಾರಣ ಎಂದು ಹೇಳಿದರು. ಹಿಂದೆ ವರ್ಷಕ್ಕೆ ಐದಾರು ಪೊಲೀಸ್‌ ಠಾಣೆಗಳನ್ನು ನಿರ್ಮಿಸಲಾಗುತ್ತಿತ್ತು. ಕಳೆದ ಎರಡು ವರ್ಷಗಳಲ್ಲಿ100 ಪೊಲೀಸ್‌ ಠಾಣೆಗಳ ನಿರ್ಮಾಣಕ್ಕೆ 200 ಕೋಟಿ ರೂ. ಮಂಜೂರು ಮಾಡಲಾಗಿದೆ ಎಂದು ತಿಳಿಸಿದರು.