ಫೇಸ್‌ಬುಕ್‌ನಲ್ಲಿ ನಗ್ನ ವಿಡಿಯೋ ಸೆರೆ ಹಿಡಿದು ಬ್ಲ್ಯಾಕ್ಮೇಲ್! ದೇಶಾದ್ಯಂತ 3951 ಪ್ರಕರಣ ಪತ್ತೆ; 3 ಬಂಧನ
ಆರೋಪಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸುಂದರ ಯುವತಿ, ಮಹಿಳೆಯರ ಫೋಟೋಗಳನ್ನು ಹಾಕುತ್ತಿದ್ದರು. ಬಳಿಕ ಆಯ್ದ ಪುರುಷರಿಗೆ ಫ್ರೆಂಡ್‌ ರಿಕ್ವೆಸ್ಟ್‌ ಕಳುಹಿಸುತ್ತಿದ್ದರು. ನಂತರ ಆತ್ಮೀಯವಾಗಿ ಚಾಟಿಂಗ್‌ ಮಾಡುತ್ತಾ, ಲೈಂಗಿಕ ಸಂಭಾಷಣೆ ನಡೆಸಿ, ಈ ಮೊದಲೇ ಆನ್‌ಲೈನ್‌ನಲ್ಲಿ ಡೌನ್‌ ಲೋಡ್‌ ಮಾಡಿಕೊಂಡಿದ್ದ ಯುವತಿಯೊಬ್ಬಳ ನಗ್ನ ವಿಡಿಯೋವನ್ನು ಕಳುಸುತ್ತಿದ್ದರು. ಬಳಿಕ ಪುರುಷನ ವಸ್ತ್ರಗಳನ್ನು ಕಳಚುವಂತೆ ಮಾಡಿ, ಆ ವಿಡಿಯೋವನ್ನು ಸಂಗ್ರಹಿಸಿಕೊಳ್ಳುತ್ತಿದ್ದರು.
Admin
0
7
ಬೆಂಗಳೂರು: ಕರ್ನಾಟಕ ಸೇರಿ ದೇಶದ ವಿವಿಧೆಡೆ ಸಾಮಾಜಿಕ ಜಾಲ ತಾಣಗಳಲ್ಲಿ ಪರಿಚಯವಾಗುವ ಪುರುಷರಿಗೆ ಮಹಿಳೆಯರ ಸೋಗಿನಲ್ಲಿ ವಿಡಿಯೋ ಕರೆ ಮಾಡಿ, ಅವರ ನಗ್ನ ವಿಡಿಯೋಗಳನ್ನು ಸೆರೆ ಹಿಡಿದುಕೊಂಡು ಬ್ಲ್ಯಾಕ್ಮೇಲ್ ಮಾಡಿ ಲಕ್ಷಾಂತರ ರೂ. ಸುಲಿಗೆ ಮಾಡುತ್ತಿದ್ದ ಮೂವರು ಅಂತಾರಾಜ್ಯ ವಂಚಕರನ್ನು ಸಿಐಡಿ ಸೈಬರ್‌ ಕ್ರೈಂ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಹರಿಯಾಣ ಮೂಲದ ಮೊಹಮ್ಮದ್‌ ಮುಜಾಹಿದ್‌ (30), ಮೊಹಮ್ಮದ್‌ ಇಕ್ಬಾಲ್‌(28), ಆಸಿಫ್‌(27) ಬಂಧಿತರು. ಆರೋಪಿಗಳಿಂದ ಐದಾರು ಮೊಬೈಲ್‌ಗಳು, ಸಾವಿರಾರು ನಕಲಿ ಸಿಮ್‌ ಕಾರ್ಡ್‌ಗಳು, ಕಂಪ್ಯೂಟರ್‌ಗಳು ಮತ್ತು ಇತರೆ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ. ಈ ಮೂಲಕ ದೇಶದ ವಿವಿಧೆಡೆ ದಾಖಲಾಗಿದ್ದ 3951 ಪ್ರಕರಣಗಳು ಪತ್ತೆಯಾಗಿವೆ. ಅಲ್ಲದೆ, ದೇಶದಲ್ಲಿ ನಡೆಯುತ್ತಿರುವ ಈ ರೀತಿಯ ದಂಧೆಕೋರರಿಗೆ ಆರೋಪಿಗಳೇ ಸಿಮ್‌ ಕಾರ್ಡ್‌ಗಳನ್ನು ಪೂರೈಕೆ ಮಾಡುತ್ತಿದ್ದರು ಎಂಬುದು ಸಿಐಡಿ ಸೈಬರ್‌ ಕ್ರೈಂ ಪೊಲೀಸರ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಸಿಐಡಿಯ ಸೈಬರ್‌ ವಿಭಾಗ ಇನ್‌ಸ್ಪೆಕ್ಟರ್‌ ನಯಾಜ್‌ ಅಹ್ಮದ್‌, ಪಿಎಸ್‌ಐ ರಾಜೇಶ್‌ ನೇತೃತ್ವದ ತಂಡ ಆರೋಪಿಗಳನ್ನು ಹರಿಯಾಣದ ನೂಹ್‌, ಪುನ್ಹಾನ ಮತ್ತು ಪಲ್ವಾನ ಹಾಗೂ ಇತರೆಡೆ ತೆರಳಿ ಬಂಧಿಸುವಲ್ಲಿ ಯಶಸ್ವಿಯಾಗಿದೆ.
ಐದು ಸಾವಿರ ಸಿಮ್‌ಕಾರ್ಡ್‌, ಡಿಜಿಟಲ್‌ ವ್ಯಾಲೆಟ್‌ಗಳು ಸಕ್ರಿಯಆರೋಪಿಗಳ ಪೈಕಿ ಮೊಹಮ್ಮದ್‌ ಮುಜಾಹಿದ್‌ ನಕಲಿ ಹೆಸರಿನಲ್ಲಿ ಸಿಮ್‌ ಕಾರ್ಡ್‌ಗಳ ಏಜೆನ್ಸಿ ಪಡೆದುಕೊಂಡಿದ್ದ. ವಿತರಕರಿಂದ ಸಿಮ್‌ ಕಾರ್ಡ್‌ಗಳ್ನು ಆಕ್ಟಿವ್‌ ಮಾಡುವ ಸಲುವಾಗಿ ಡೆಮೋ ಸಿಮ್‌ಗಳು ಮತ್ತು ಒಟಿಪಿಗಳನ್ನು ಪಡೆದುಕೊಳ್ಳುತ್ತಿದ್ದರು. ಬಳಿಕ ಈ ಮೊದಲು ಡಿಜಿಟಲ್‌ ವ್ಯಾಲೆಟ್‌ನೊಂದಿಗೆ ಸಂಪರ್ಕದಲ್ಲಿದ್ದ ಮೊಬೈಲ್‌ ಸಂಖ್ಯೆಗಳನ್ನು ಪತ್ತೆ ಮಾಡಿ ನಕಲಿ ದಾಖಲಾತಿಗಳ ಮೂಲಕ ಇತರೆ ಇಬ್ಬರು ಆರೋಪಿಗಳ ಜತೆ ಸೇರಿಕೊಂಡು ಕಳೆದ ಹತ್ತು ತಿಂಗಳಲ್ಲಿ ಐದು ಸಾವಿರಕ್ಕೂ ಹೆಚ್ಚು ಸಿಮ್‌ ಕಾರ್ಡ್‌ಗಳು ಮತ್ತು ಡಿಜಿಟಲ್‌ ವ್ಯಾಲೆಟ್‌ಗಳನ್ನು ಸಕ್ರಿಯಗೊಳಿಸಿ, ಸೈಬರ್‌ ವಂಚಕರಿಗೆ ಮಾರಾಟ ಮಾಡಿದ್ದಾನೆ.
ಆಸಿಫ್‌ ಸಿಮ್‌ ಕಾರ್ಡ್‌ಗಳನ್ನು ಆ್ಯಕ್ಟಿವ್‌ ಮಾಡುವಲ್ಲಿ ಮುಜಾಹಿದ್‌ನ ಸಬ್‌ ಏಜೆಂಟ್‌ ಆಗಿ ಕೆಲಸ ಮಾಡುತ್ತಿದ್ದು, ಹಾಗೆಯೇ ನಕಲಿ ದಾಖಲಾತಿಗಳನ್ನು ಸೃಷ್ಟಿಸಲು ಫೋಟೋಗಳನ್ನು ಮುಜಾಹಿದ್‌ಗೆ ನೀಡುತ್ತಿದ್ದ. ಮತ್ತೊಬ್ಬ ಆರೋಪಿ ಇಕ್ಬಾಲ್‌ ನಕಲಿ ಆಧಾರ್‌ ಕಾರ್ಡ್‌ ಸೃಷ್ಟಿಸುವುದನ್ನು ಕರಗತ ಮಾಡಿಕೊಂಡಿದ್ದಾನೆ. ಕಂಪ್ಯೂಟರ್‌ ಪ್ರಿಂಟಿಂಗ್‌ ಮತ್ತು ಜೆರಾಕ್ಸ್‌ ಅಂಗಡಿ ಹೊಂದಿದ್ದು, ಮುಜಾಹಿದ್‌ ಮತ್ತು ಆಸಿಫ್‌ ನೀಡುತ್ತಿದ್ದ ಪೋಟೋಗಳನ್ನು ಬಳಸಿ, ನಕಲಿ ಆಧಾರ್‌ ಕಾರ್ಡ್‌ಗಳನ್ನು ಸೃಷ್ಟಿಸುತ್ತಿದ್ದ ಎಂಬುದು ಪತ್ತೆಯಾಗಿದೆ.
ದೇಶಾದ್ಯಂತ 3951 ಪ್ರಕರಣಗಳು ಪತ್ತೆಸಾಮಾನ್ಯವಾಗಿ ಸಿಐಡಿಗೆ ದಾಖಲಾಗಿದ್ದ ದೂರಿನನ್ವಯ ಕೆಲವೊಂದು ಅಂತಾರಾಜ್ಯ ನಂಬರ್‌ಗಳು ಪತ್ತೆಯಾದಾಗ ಆ ಮಾಹಿತಿಯನ್ನು ಕೇಂದ್ರ ಗೃಹ ಸಚಿವಾಲಯದ ಭಾರತೀಯ ಸೈಬರ್‌ ಸಹಕಾರ ಕೇಂದ್ರಕ್ಕೆ ಹಂಚಿಕೊಳ್ಳಲಾಗುತ್ತದೆ. ಬಂಧಿತ ಆರೋಪಿಗಳು ದೇಶಾದ್ಯಂತ 3951 ಪ್ರಕರಣಗಳಲ್ಲಿ ಭಾಗಿಯಾಗಿರುವುದು ಪತ್ತೆಯಾಗಿದೆ ಎಂದು ಸಿಐಡಿ ಸೈಬರ್‌ ಪೊಲೀಸರು ತಿಳಿಸಿದ್ದಾರೆ.
ವಂಚನೆ ಹೇಗೆ?ಆರೋಪಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸುಂದರ ಯುವತಿ, ಮಹಿಳೆಯರ ಫೋಟೋಗಳನ್ನು ಹಾಕುತ್ತಿದ್ದರು. ಬಳಿಕ ಆಯ್ದ ಪುರುಷರಿಗೆ ಫ್ರೆಂಡ್‌ ರಿಕ್ವೆಸ್ಟ್‌ ಕಳುಹಿಸುತ್ತಿದ್ದರು. ನಂತರ ಆತ್ಮೀಯವಾಗಿ ಚಾಟಿಂಗ್‌ ಮಾಡುತ್ತಾ, ಲೈಂಗಿಕ ಸಂಭಾಷಣೆ ನಡೆಸಿ, ಈ ಮೊದಲೇ ಆನ್‌ಲೈನ್‌ನಲ್ಲಿ ಡೌನ್‌ ಲೋಡ್‌ ಮಾಡಿಕೊಂಡಿದ್ದ ಯುವತಿಯೊಬ್ಬಳ ನಗ್ನ ವಿಡಿಯೋವನ್ನು ಕಳುಸುತ್ತಿದ್ದರು. ಬಳಿಕ ಪುರುಷನ ವಸ್ತ್ರಗಳನ್ನು ಕಳಚುವಂತೆ ಮಾಡಿ, ಆ ವಿಡಿಯೋವನ್ನು ಸಂಗ್ರಹಿಸಿಕೊಳ್ಳುತ್ತಿದ್ದರು. ಕೆಲ ದಿನಗಳ ಬಳಿಕ ಆ ವ್ಯಕ್ತಿಗೆ ಕರೆ ಮಾಡಿ, ತಾವು ಸೂಚಿಸಿದ ಖಾತೆಗೆ ಹಣ ಜಮೆ ಮಾಡದಿದ್ದರೆ, ವಿಡಿಯೋವನ್ನು ಸಾಮಾಜಿಕ ಜಾಲ ತಾಣದಲ್ಲಿ ಹಾಕುವುದಾಗಿ ಬೆದರಿಕೆ ಒಡ್ಡಿ ಲಕ್ಷಾಂತರ ರೂ. ಸುಲಿಗೆ ಮಾಡುತ್ತಿದ್ದರು.
ಈ ಸಂಬಂಧ ಇತ್ತೀಚೆಗೆ ಸಿಐಡಿ ಸೈಬರ್‌ ಕ್ರೈಂ ಠಾಣೆಗೆ ನಿವಾಸಿಯೊಬ್ಬರು ದೂರು ನೀಡಿದ್ದರು. ಈ ದೂರಿನ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದಾಗ ಆರೋಪಿಗಳು ದೇಶಾದ್ಯಂತ ಸಾವಿರಾರು ಮಂದಿಗೆ ವಂಚನೆ ಮಾಡಿರುವುದು ಪತ್ತೆಯಾಗಿದೆ ಎಂದು ಸಿಐಡಿ ಅಧಿಕಾರಿಗಳು ತಿಳಿಸಿದ್ದಾರೆ.
ಸ್ಥಳೀಯರಿಂದ ಪೊಲೀಸರ ಮೇಲೆ ದಾಳಿಆರೋಪಿಗಳ ಬಂಧನಕ್ಕೆ ತೆರಳಿದಾಗ ಸಿಐಡಿ ಅಧಿಕಾರಿಗಳ ಮೇಲೆ ಪುಲ್ವಾಲ ಗ್ರಾಮದ ಸ್ಥಳೀಯರು ದಾಳಿ ನಡೆಸಿದ್ದಾರೆ. ಆರೋಪಿಗಳನ್ನು ಬಂಧಿಸದಂತೆ ತಡೆಯೊಡ್ಡಿದ್ದಲ್ಲದೆ, ಕಾರುಗಳ ಮೇಲೆ ಕಲ್ಲು ತೂರಾಟ ನಡೆಸಿ ದೊಣ್ಣೆಯಿಂದ ಗಾಜುಗಳನ್ನು ಧ್ವಂಸಗೊಳಿಸಿದ್ದರು. ಅನಂತರ ಸ್ಥಳೀಯ ಪೊಲೀಸರ ನೆರವು ಪಡೆದು ಆರೋಪಿಗಳನ್ನು ಬಂಧಿಸಲಾಗಿದೆ. ಈ ವೇಳೆ ಪುಲ್ವಾಲ, ನೂಹ್‌ ಮತ್ತು ಪುನ್ಹಾನ ಗ್ರಾಮದ ಬಹಳಷ್ಟು ಮಂದಿ ಇದೇ ದಂಧೆಯಲ್ಲಿ ತೊಡಗಿರುವುದು ಪತ್ತೆಯಾಗಿದೆ ಎಂದು ಸಿಐಡಿ ಮೂಲಗಳು ತಿಳಿಸಿವೆ.
