ಪಂಜಾಬ್ ಕಾಂಗ್ರೆಸ್ ತಿಕ್ಕಾಟ: ಅಮರಿಂದರ್ ಬದಲಿಸುವ ಸಿಧು ಪಾಳೆಯದ ಪ್ರಯತ್ನಕ್ಕೆ ಕಿಮ್ಮತ್ತು ನೀಡದ ಹೈಕಮಾಂಡ್
ಪಂಜಾಬ್ ಮುಖ್ಯಮಂತ್ರಿ ಅಮರಿಂದರ್ ಸಿಂಗ್ ಅವರನ್ನು ಬದಲಾವಣೆ ಮಾಡಬೇಕೆಂಬ ನವಜೋತ್ ಸಿಂಗ್ ಸಿಧು ಪಾಳೆಯಕ್ಕೆ ತೀವ್ರ ಮುಖಭಂಗ ಉಂಟಾಗಿದೆ. ಮುಂದಿನ ಚುನಾವಣೆಯಲ್ಲಿಯೂ ಕ್ಯಾಪ್ಟನ್ ನೇತೃತ್ವ ವಹಿಸಲಿದ್ದಾರೆ ಎಂದು ಪಕ್ಷ ಘೋಷಿಸಿದೆ.
Admin
0
5
ಹೊಸದಿಲ್ಲಿ: ಚುನಾವಣೆ ಸನ್ನಿಹಿತವಾಗಿರುವ ರಾಜ್ಯದಲ್ಲಿ ಮುಖ್ಯಮಂತ್ರಿ ವಿರುದ್ಧದ ಶಾಸಕರು ಹಾಗೂ ಸಚಿವರ ಬಂಡಾಯಕ್ಕೆ ನಾಯಕತ್ವ ಸೊಪ್ಪು ಹಾಕಿಲ್ಲ. ಇದರಿಂದ ವೇಳೆ ಪರ್ಯಾಯ ಮುಖ್ಯಮಂತ್ರಿ ಅಭ್ಯರ್ಥಿಯನ್ನು ಹೊಂದುವ ನವಜೋತ್ ಸಿಂಗ್ ಸಿಂಧು ಪಾಳೆಯದ ಪ್ರಯತ್ನಕ್ಕೆ ತೀವ್ರ ಹಿನ್ನಡೆಯಾಗಿದೆ. ಮುಂಬರುವ ವಿಧಾನಸಭೆ ಚುನಾವಣೆಯಲ್ಲಿ ಅಮರಿಂದರ್ ಸಿಂಗ್ ಅವರೇ ಪಕ್ಷವನ್ನು ಮುನ್ನಡೆಸಲಿದ್ದಾರೆ ಎಂದು ಪಕ್ಷದ ಹಿರಿಯ ಮುಖಂಡ ಹರೀಶ್ ರಾವತ್ ಹೇಳಿದ್ದಾರೆ.
'ನಾವು 2022ರ ಪಂಜಾಬ್ ಚುನಾವಣೆಯನ್ನು ಕ್ಯಾಪ್ಟನ್ ಅಮರಿಂದರ್ ಸಿಂಗ್ ನಾಯಕತ್ವದಲ್ಲಿ ಎದುರಿಸಲಿದ್ದೇವೆ' ಎಂದು ಪಂಜಾಬ್ ಕಾಂಗ್ರೆಸ್ ಉಸ್ತುವಾರಿಯಾಗಿರುವ ರಾವತ್ ತಿಳಿಸಿದ್ದಾರೆ.
ಕಾಂಗ್ರೆಸ್ ಹೈಕಮಾಂಡ್ ನಿರ್ಧಾರ, ಅಮರಿಂದರ್ ಬದಲಾವಣೆಗೆ ಒತ್ತಾಯಿಸಿ ಬಂಡಾಯವೆದ್ದಿದ್ದ ಸಿಧು ಪಾಳೆಯಕ್ಕೆ ಮುಖಭಂಗ ಉಂಟುಮಾಡಿದೆ. ಪಾಕಿಸ್ತಾನ ಹಾಗೂ ಕಾಶ್ಮೀರದ ಕುರಿತು ಪಂಜಾಬ್ ಕಾಂಗ್ರೆಸ್ ಮುಖ್ಯಸ್ಥ ಸಲಹೆಗಾರರು ನೀಡಿದ ಹೇಳಿಕೆ ವಿರುದ್ಧ ಅಮರಿಂದರ್ ಅಸಮಾಧಾನ ವ್ಯಕ್ತಪಡಿಸಿದ್ದರು. ಅದರ ಬೆನ್ನಲ್ಲೇ, ನಾಲ್ವರು ಸಚಿವರು ಸೇರಿದಂತೆ 23 ಶಾಸಕರು ಹಾಗೂ ಕೆಲವು ಮಾಜಿ ಶಾಸಕರು ಸಭೆ ನಡೆಸಿ ಬಂಡಾಯದ ಸೂಚನೆ ನೀಡಿದ್ದರು.
'ಕ್ಯಾಪ್ಟನ್ ಅವರನ್ನು ಬದಲಿಸದೆ ಇದ್ದರೆ ಕಾಂಗ್ರೆಸ್ ಉಳಿಯುವುದಿಲ್ಲ. ನಾವು ಸೋನಿಯಾ ಗಾಂಧಿ ಅವರನ್ನು ಭೇಟಿ ಈ ಬಗ್ಗೆ ಚರ್ಚೆ ನಡೆಸುತ್ತೇವೆ. ಮುಖ್ಯಮಂತ್ರಿ ಬದಲಾವಣೆಗೆ ಒತ್ತಾಯಿಸುತ್ತೇವೆ' ಎಂದು ಸಚಿವ ತೃಪ್ತ್ ರಾಜಿಂದರ್ ಸಿಂಗ್ ಬಾಜ್ವಾ ಹೇಳಿದ್ದರು.
