ನಿರ್ದೇಶಕ ಶಶಾಂಕ್‌ ಹೊಸ ಸಿನಿಮಾದ ಟೈಟಲ್‌ಗೆ ಕ್ರಿಕೆಟಿಗ ಎಬಿ ಡಿವಿಲಿಯರ್ಸ್ ಸ್ಫೂರ್ತಿ!

ಪದ್ಮಾ ಶಿವಮೊಗ್ಗ ಲವ್‌ ಸ್ಟೋರಿಯಲ್ಲಿ ಹೊಸತನ್ನು ಹುಡುಕುವ ನಿರ್ದೇಶಕ ಶಶಾಂಕ್‌ ಈಗ 360 ಡಿಗ್ರಿಯಲ್ಲಿ ಪ್ರೇಮದ ಪರಿಯನ್ನು ಹೇಳಲು ಹೊರಟಿದ್ದಾರೆ. ಹೊಸಬರಿಗಾಗಿ ನಿರ್ದೇಶನ ಮಾಡುತ್ತಿರುವ ಅವರು ಚಿತ್ರಕ್ಕೆ 'ಲವ್‌ 360' ಎಂಬ ಟೈಟಲ್‌ ಇಟ್ಟಿದ್ದಾರೆ. ಚಿತ್ರದಲ್ಲಿ ನವ ನಟ ಪ್ರವೀಣ್‌ರನ್ನು ಪರಿಚಯಿಸುತ್ತಿದ್ದಾರೆ. ದ್ವಿಭಾಷಾ ಸಿನಿಮಾ ಇದಾಗಿದೆ. ಹೀರೋ ಆಗಲಿರುವ ಪ್ರವೀಣ್‌ ಮೂಲತಃ ವೈದ್ಯರಾಗಿದ್ದು, ನಟನಾಗುವ ಕನಸು ಹೊತ್ತು ಸ್ಯಾಂಡಲ್‌ವುಡ್‌ಗೆ ಕಾಲಿಡುತ್ತಿದ್ದಾರೆ. ಯೂನಿವರ್ಸಲ್‌ ಟೈಟಲ್‌ 'ಟೈಟಲ್‌ ಹೇಳುವಂತೆ ಚಿತ್ರದಲ್ಲಿ ಲವ್‌ ಸ್ಟೋರಿ ಇರಲಿದೆ. ಕಂಪ್ಲೀಟ್‌ ಲವ್‌. ಸಿನಿಮಾದಲ್ಲಿ ಲವ್‌ ಬಿಟ್ಟು ಬೇರೇನೂ ಇರೋಲ್ಲ. ಚಿತ್ರದ ಹೀರೋ ಯಾವ ರೀತಿಯ ಹುಡುಗಿಯನ್ನು ಪ್ರೀತಿಸುತ್ತಾನೆ ಎನ್ನುವುದು ಸಿನಿಮಾದಲ್ಲಿ ಇರಲಿದೆ. ಪುಟ್ಟ ಪಟ್ಟಣದಲ್ಲಿಇರುವ ಹುಡುಗ ಹುಡುಗಿಯ ನಡುವಿನ ಪ್ರೇಮ ಕಥೆ ಇದು. ಚಿತ್ರದ ಟೈಟಲ್‌ಗೆ ಬಹಳ ಹುಡುಕಾಡಿದೆವು. ನಮಗೆ ಯೂನಿವರ್ಸಲ್‌ ಆಗಿರುವ ಟೈಟಲ್‌ ಬೇಕಿತ್ತು. ಕನ್ನಡ ಮತ್ತು ತೆಲುಗು ಎರಡೂ ಭಾಷೆಯಲ್ಲಿ ಸಿನಿಮಾ ತೆರೆಕಾಣಲಿರುವುದರಿಂದ ಒಂದೊಂದು ಭಾಷೆಗೆ ಒಂದೊಂದು ಹೆಸರನ್ನಿಡುವುದು ನಮಗೆ ಇಷ್ಟವಿರಲಿಲ್ಲ. ಈ ಹುಡುಕಾಟದಲ್ಲಿಸಿಕ್ಕ ಟೈಟಲ್‌ ಇದು. 360 ಡಿಗ್ರಿಯಲ್ಲಿ ಹುಡುಗ ಹೇಗೆ ಲವ್‌ ಮಾಡ್ತಾನೆ ಎಂಬುದು ಸಿನಿಮಾದಲ್ಲಿರಲಿದೆ' ಎಂದಿದ್ದಾರೆ ಶಶಾಂಕ್‌. ಟೈಟಲ್‌ಗೆ ಎಬಿ ಡಿವಿಲಿಯರ್ಸ್‌ ಸ್ಫೂರ್ತಿ ತಮ್ಮ ಚಿತ್ರಕ್ಕೆ 'ಲವ್‌ 360' ಎಂಬ ಟೈಟಲ್‌ ಇಡಲು ದಕ್ಷಿಣ ಆಫ್ರಿಕಾದ ಕ್ರಿಕೆಟಿಗ ಎಬಿ ಡಿವಿಲಿಯರ್ಸ್ ಸ್ಫೂರ್ತಿ ಎಂದಿದ್ದಾರೆ ಅವರು. 'ಬೆಂಗಳೂರು ಆರ್‌ಸಿಬಿಗೆ ಆಡುವ ಎಬಿ ಡಿವಿಲಿಯರ್ಸ್‌ಗೆ ಮಿಸ್ಟರ್‌ 360 ಎಂದು ಕರೆಯುತ್ತಾರೆ. ಅವರು ಬ್ಯಾಟಿಂಗ್‌ ಮಾಡುವಾಗ ಗ್ರೌಂಡ್‌ನಲ್ಲಿಎಲ್ಲಾ ಕಾರ್ನರ್‌ಗೆ ಬಾಲನ್ನು ಬೀಸುತ್ತಾರೆ. ಅದೇ ಈ ಸಿನಿಮಾದ ಟೈಟಲ್‌ಗೆ ಸ್ಫೂರ್ತಿ' ಎಂದಿದ್ದಾರೆ . ತೆಲುಗು ಮತ್ತು ಕನ್ನಡ ಭಾಷೆಗಳೆರಡರಲ್ಲೂಏಕಕಾಲದಲ್ಲಿ ಚಿತ್ರೀಕರಣ ಮಾಡಲು ನಿರ್ಧರಿಸಿದ್ದಾರೆ. 'ಹೆಚ್ಚು ಮಾತಿರೋಲ್ಲ. ವಿಷುಯಲ್ಸ್‌ನಲ್ಲಿ ಹೆಚ್ಚು ಕಥೆ ಸಾಗುತ್ತೆ. ಮುಂದಿನ ತಿಂಗಳು ಚಿತ್ರೀಕರಣ ಪ್ರಾರಂಭವಾಗಲಿದೆ. ಹೀರೋ ಪ್ರವೀಣ್‌ ಆ್ಯಕ್ಟಿಂಗ್‌ ಕೋರ್ಸ್‌ ಮಾಡಿ ಬಂದಿದ್ದಾರೆ. ನಾಯಕಿಯ ಆಯ್ಕೆ ಅಗಬೇಕಿದೆ. ಈಗಾಗಲೇ ಶಾರ್ಟ್‌ ಲಿಸ್ಟ್‌ ಮಾಡಿದ್ದೇವೆ. ಹೊಸ ನಟಿಯನ್ನು ಬೆಳ್ಳಿತೆರೆಗೆ ಪರಿಚಯಿಸಬೇಕು ಎಂದಿದ್ದೇವೆ. ಕಿರುತೆರೆ, ಆಲ್ಬಂ ಸಾಂಗ್‌, ಕಿರುಚಿತ್ರಗಳಲ್ಲಿ ನಟಿಸಿದ ಅನುಭವ ಇರುವವರೂ ಲಿಸ್ಟ್‌ನಲ್ಲಿದ್ದಾರೆ' ಎಂದಿದ್ದಾರೆ ಶಶಾಂಕ್‌. ನಟನೆಯ ಚಿತ್ರವನ್ನೂ ಶಶಾಂಕ್‌ ನಿರ್ದೇಶನ ಮಾಡಲಿದ್ದಾರೆ. ಈಗಾಗಲೇ ಸೆಟ್ಟೇರಬೇಕಿದ್ದ ಚಿತ್ರ ಲಾಕ್‌ಡೌನ್‌ನಿಂದಾಗಿ ಮುಂದಕ್ಕೆ ಹೋಗಿದೆ. 'ಮೊದಲು ಉಪೇಂದ್ರ ಅವರ ಸಿನಿಮಾವನ್ನೇ ನಿರ್ದೇಶನ ಮಾಡಬೇಕಿತ್ತು. ಪ್ರಿ-ಪ್ರೊಡಕ್ಷನ್‌ ಕೆಲಸವೆಲ್ಲಾ ಮುಗಿದಿತ್ತು. ಇನ್ನೇನು ಸೆಟ್ಟೇರಬೇಕು ಎನ್ನುವಾಗ ಕೊರೊನಾ ಬಂತು. ಆ ಚಿತ್ರವನ್ನು ಬೇರೆ ಬೇರೆ ರಾಜ್ಯ ಮತ್ತು ವಿದೇಶಗಳಲ್ಲಿ ಚಿತ್ರೀಕರಣ ಮಾಡಬೇಕಾಗಿದೆ. ಈ ಪರಿಸ್ಥಿತಿಯಲ್ಲಿ ಸದ್ಯಕ್ಕೆ ಅದು ಸಾಧ್ಯವಿಲ್ಲ. ಹಾಗಾಗಿ ಮುಂದಕ್ಕೆ ಹಾಕಿದೆವು. ಆದ್ದರಿಂದ ಈಗ ಚಿಕ್ಕ ಬಜೆಟ್‌ನ ಹೊಸಬರ ಚಿತ್ರವನ್ನು ಕೈಗೆತ್ತಿಕೊಂಡೆ' ಎಂದಿದ್ದಾರೆ ಅವರು. ಕೋಟ್ಸ್‌ ಚಿತ್ರದಲ್ಲಿ ಪ್ರಾರಂಭದಿಂದ ಕೊನೆಯವರೆಗೆ ಲವ್‌ ಬಿಟ್ಟು ಬೇರೇನೂ ಹೇಳುತ್ತಿಲ್ಲ. ತಾನು ಇಷ್ಟಪಟ್ಟ ಹುಡುಗಿಗೆ ಹೀರೋ ತನ್ನ ಪ್ರೀತಿಯನ್ನು ಹೇಗೆಲ್ಲಾ ವ್ಯಕ್ತಪಡಿಸುತ್ತಾನೆ, ಏನೇನು ಮಾಡುತ್ತಾನೆ ಎನ್ನುವುದು ಚಿತ್ರದಲ್ಲಿದೆ. ಅವನ ಪ್ರೀತಿ 360 ಡಿಗ್ರಿಯಲ್ಲಿರುತ್ತದೆ. ಅದಕ್ಕೆ ಲವ್‌ 360 ಎಂದು ಟೈಟಲ್‌ ಇಟ್ಟಿದ್ದೇವೆ. -ಶಶಾಂಕ್‌, ನಿರ್ದೇಶಕ