ಜನರ ಮೇಲೆ ಫಾರ್ಚೂನರ್ ಕಾರು ಹಾಯಿಸುವವ ನೇತಾರನಲ್ಲ: ಯುಪಿ ಬಿಜೆಪಿ ಮುಖ್ಯಸ್ಥ!

ಲಕ್ನೋ: ಜನರ ಮೇಲೆ ತನ್ನ ಫಾರ್ಚೂನರ್ ಕಾರನ್ನು ಹಾಯಿಸುವವ ಎಂದಿಗೂ ಜನನಾಯಕನಾಗಲು ಸಾಧ್ಯವಿಲ್ಲ ಎಂದು ಉತ್ತರ ಪ್ರದೇಶ ಬಿಜೆಪಿ ಮುಖ್ಯಸ್ಥ ಮಾರ್ಮಿಕವಾದ ಹೇಳಿಕೆ ನೀಡಿದ್ದಾರೆ. ಲಖಿಂಪುರ ಖೇರಿಯಲ್ಲಿ ಸ್ವಪಕ್ಷೀಯ ನಾಯಕನ ಪುತ್ರನಿಂದಲೇ ಪ್ರತಿಭಟನಾನಿರತ ರೈತರ ಮೇಲೆ ಕಾರು ಹಾಯಿಸಿದ ಘಟನೆ ಇನ್ನೂ ತಾಜಾ ಇರುವಾಗಲೇ, ಸ್ವತಂತ್ರ ದೇವ್ ಇಂತದ್ದೊಂದು ಮಾರ್ಮಿಕ ಹೇಳಿಕೆ ನೀಡಿರುವುದು ಚರ್ಚೆಗೆ ಗ್ರಾಸವಾಗಿದೆ. ಬಿಜೆಪಿ ಅಲ್ಪಸಂಖ್ಯಾತ ಘಟಕದ ರಾಜ್ಯ ಕಾರ್ಯಕಾರಿಣಿ ಸಭೆ ಉದ್ಘಾಟಿಸಿ ಮಾತನಾಡಿದ ಸ್ವತಂತ್ರ ದೇವ್ ಸಿಂಗ್, ಜನರ ಮೇಲೆ ತನ್ನ ಹಾಯಿಸುವವನನ್ನು ಜನನಾಯಕ ಎನ್ನಲಾಗುತ್ತದೆಯೇ ಎಂದು ಪ್ರಶ್ನಿಸಿದರು. ರೈಲು ನಿಲ್ದಾಣದಲ್ಲಿ ಚಹಾ ಮಾರುತ್ತಿದ್ದ ಬಾಲಕನೋರ್ವ ಇದೀಗ ಈ ದೇಶದ ಪ್ರಧಾನಿಯಾಗಿದ್ದಾನೆ. 'ನಾ ಖಾವೂಂಗಾ, ನಾ ಖಾನೇ ದೂಂಗಾ'(ನಾನು ತಿನ್ನಲ್ಲ, ಇತರರಿಗೂ ತಿನ್ನಲು ಬಿಡಲ್ಲ) ಎಂದು ಭ್ರಷ್ಟಾಚಾರದ ವಿರುದ್ಧ ಯುದ್ಧ ಸಾರಿದ್ದಾನೆ. ಸಹಜತೆ, ಸರಳತೆ ಆತನ ವ್ಯಕ್ತಿತ್ವದ ಭಾಗ. ಇಂತಹ ನಾಯಕರು ಮಾತ್ರ ಜನರ ಧರೀಣರಾಗಲು ಸಾಧ್ಯ ಎಂದು ಪ್ರಧಾನಿ ಮೋದಿ ಕುರಿತು, ಸ್ವತಂತ್ರ ದೇವ್ ಸಿಂಗ್ ಮೆಚ್ಚುಗೆಯ ಮಾತುಗಳನ್ನಾಡಿದರು. ಪ್ರಧಾನಿ ಮೋದಿ ದೇಶದ ಎಲ್ಲಾ ಬಡವರಿಗೆ ಜನಧನ್ ಯೋಜನೆಯಡಿ ಬ್ಯಾಂಕ್ ಖಾತೆ ತೆರೆಯಿಸಿಕೊಟ್ಟಿದ್ದಾರೆ. ಲಕ್ಷಾಂತರ ಬಡ ಜನರಿಗೆ ಮನೆಗಳನ್ನು ಕಟ್ಟಿಸಿಕೊಟ್ಟಿದ್ದಾರೆ. ಕೊರೊನಾ ವೈರಸ್‌ಗೆ ದೇಶದ ಪ್ರತಿಯೊಬ್ಬ ನಾಗರಿಕನಿಗೂ ಉಚಿತವಾಗಿ ಲಸಿಕೆ ನೀಡುತ್ತಿದ್ದಾರೆ. ಇದರಲ್ಲಿ ಪ್ರಧಾನಿ ಮೋದಿ ಜಾತಿ ಧರ್ಮವನ್ನು ಪರಿಗಣಿಸಲಿಲ್ಲ ಎಂದು ಸ್ವತಂತ್ರ ದೇವ್ ಸಿಂಗ್ ನುಡಿದರು. ಜನನಾಯಕನಾಗುವ ಅರ್ಥ ನೀವು ಲೂಟಿ ಮಾಡಬೇಕು ಎಂದೆನಿಲ್ಲ. ಜನನಾಯಕನಾಗುವ ಅರ್ಥ ನೀವು ಜನರ ಮೇಲೆ ನಿಮ್ಮ ಪಾರ್ಚೂನರ್ ಕಾರು ಹಾಯಿಸಬೇಕು ಎಂದೇನಿಲ್ಲ ಎಂದು ಹೇಳುವ ಮೂಲಕ, ಸ್ವತಂತ್ರ ದೇವ್ ಸಿಂಗ್ ಘಟನೆಯನ್ನು ಪರೋಕ್ಷವಾಗಿ ಉಲ್ಲೇಖಿಸಿದ್ದಾರೆ. ಒಬ್ಬರ ನಡವಳಿಕೆಯ ಆಧಾರದ ಮೇಲೆ ಚುನಾವಣೆಗಳನ್ನು ಗೆಲ್ಲಬೇಕು. ರಾಜಕೀಯ ಎಂದರೆ ನಿಮ್ಮ ಸಮಾಜ, ನಿಮ್ಮ ರಾಷ್ಟ್ರದ ಸೇವೆ. ಇದರಲ್ಲಿ ಯಾವುದೇ ಜಾತಿ ಮತ್ತು ಧರ್ಮದ ಸಂಬಂಧವಿಲ್ಲ. ರಾಜಕೀಯ ನಾಯಕರಾಗಿರುವುದರಿಂದ ನೀವು ಲೂಟಿ ಮಾಡುತ್ತೀರಿ ಎಂದರ್ಥವಲ್ಲ, ನಾವು ಬಡವರ ಸೇವೆಗಾಗಿ ಈ ಪಕ್ಷದಲ್ಲಿದ್ದೇವೆ. ರಾಜಕೀಯ ಅರೆಕಾಲಿಕ ಕೆಲಸವಲ್ಲ ಎಂದು ಸಿಂಗ್ ಮಾರ್ಮಿಕವಾಗಿ ನುಡಿದರು.