ಗಾಯಕಿ ಶಮಿತಾ ಮಲ್ನಾಡ್ ಮಗನ ಪ್ರಶ್ನೆಗೆ ಉತ್ತರ ನೀಡಿದ ಕ್ರಿಕೆಟಿಗ ವಿರಾಟ್ ಕೊಹ್ಲಿ!

'ಮಧುರ ಪಿಸುಮಾತಿಗೆ' ಹಾಡಿನ ಗಾಯಕಿ ಅವರು ಸೋಶಿಯಲ್ ಮೀಡಿಯಾದಲ್ಲಿ ಖುಷಿಯ ವಿಚಾರ ಹಂಚಿಕೊಂಡಿದ್ದಾರೆ. ಅವರ ಮಗ ಅದ್ವೈತ್ ಹೆಗಡೆ ಪ್ರಶ್ನೆಗೆ ಭಾರತೀಯ ತಂಡದ ನಾಯಕ ಅವರು ಉತ್ತರ ನೀಡಿದ್ದಾರೆ. ಇತ್ತೀಚೆಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಸೆಲೆಬ್ರಿಟಿಗಳು ಅಭಿಮಾನಿಗಳ ಜೊತೆ ಸಂವಾದ ನಡೆಸುತ್ತಿದ್ದಾರೆ. ವಿರಾಟ್ ಕೊಹ್ಲಿ ಕೂಡ ಇನ್‌ಸ್ಟಾಗ್ರಾಮ್‌ನಲ್ಲಿ ಅಭಿಮಾನಿಗಳು ಕೇಳಿದ ಪ್ರಶ್ನೆಗೆ ಉತ್ತರ ನೀಡುವುದಾಗಿ ಹೇಳಿದ್ದರು. ಆ ವೇಳೆ ಅವರು ಕೆಲ ಪ್ರಶ್ನೆಗಳಿಗೆ ಉತ್ತರ ನೀಡಿದ್ದು, ಅವುಗಳಲ್ಲಿ ಶಮಿತಾ ಮಲ್ನಾಡ್ ಮಗನ ಪ್ರಶ್ನೆಯೂ ಇದೆ. ನಿಮಗೆ ಕನ್ನಡ ಅರ್ಥ ಆಗತ್ತಾ? ಮಾತನಾಡೋಕೆ ಬರತ್ತಾ? ಅಂತ ಶಮಿತಾ ಮಲ್ನಾಡ್ ಮಗ ಅದ್ವೈತ್ ಹೆಗಡೆ ಅವರು ವಿರಾಟ್‌ ಕೊಹ್ಲಿಗೆ ಪ್ರಶ್ನೆ ಮಾಡಿದ್ದರು. ಅದಕ್ಕೆ ವಿರಾಟ್ ಉತ್ತರ ನೀಡಿದ್ದು, " ಸ್ವಲ್ಪ ಸ್ವಲ್ಪ ಸರ್, ಆದರೆ ಎಲ್ಲವೂ ಅರ್ಥ ಆಗಲ್ಲ" ಎಂದು ಹೇಳಿದ್ದಾರೆ. ಮೆಚ್ಚಿನ ಆಟಗಾರನಿಂದ ಬಂದ ಉತ್ತರ ಕೇಳಿ ಅಭಿಮಾನಿಯೂ ಆಗಿರುವ ಅದ್ವೈತ್ ಹೆಗಡೆ ಫುಲ್ ಖುಷಿಯಾಗಿದ್ದಾನೆ ಎಂದು ಶಮಿತಾ ಹೇಳಿಕೊಂಡಿದ್ದಾರೆ. ವೃತ್ತಿಯಲ್ಲಿ ಡೆಂಟಿಸ್ಟ್ ಆಗಿರುವ ಶಮಿತಾ ಮಲ್ನಾಡ್ ಅವರು ಗಾಯನ, ನಿರೂಪಣೆ, ಕಂಠದಾನ ಕಲಾವಿದೆಯಾಗಿ ಗುರುತಿಸಿಕೊಂಡಿದ್ದಾರೆ. ಸುಗಮ ಸಂಗೀತ, ಭಕ್ತಿಗೀತೆಗಳ ಜೊತೆಗೆ ಅನೇಕ ಸಿನಿಮಾ ಹಾಡುಗಳನ್ನು ಅವರು ಹಾಡಿದ್ದಾರೆ. 'ಕರಿಯ', 'ರಂಗ ಎಸ್‌ಎಸ್‌ಎಲ್‌ಸಿ', 'ಲಾಲಿಹಾಡು', 'ಗೋಕರ್ಣ', 'ರಾಮ ಶ್ಯಾಮ ಭಾಮ', 'ಚೆಲ್ಲಾಟ', 'ಕೆಂಪೇಗೌಡ' ಮುಂತಾದ ಸ್ಟಾರ್ ನಟರ ಸಿನಿಮಾಗಳ ಹಾಡಿಗೆ ಶಮಿತಾ ಮಲ್ನಾಡ್ ಅವರು ದನಿಯಾಗಿದ್ದಾರೆ. ಶಮಿತಾ ಹಾಡಿಗೆ ಫಿಲ್ಮ್‌ಫೇರ್ ಸೇರಿ ಕೆಲ ಪ್ರತಿಷ್ಠಿತ ಪ್ರಶಸ್ತಿಗಳು ಸಿಕ್ಕಿವೆ. 11 ಭಾಷೆಗಳಲ್ಲಿ 300ಕ್ಕೂ ಅಧಿಕ ಸಿನಿಮಾಗಳಿಗೆ ಒಟ್ಟಾರೆಯಾಗಿ 6500 ಹಾಡುಗಳನ್ನು ಶಮಿತಾ ಹಾಡಿದ್ದಾರೆ. 1500 ಟಿವಿ ಶೋಗಳ ನಿರೂಪಣೆ ಮಾಡಿದ್ದಾರೆ. 1000 ಶೋಗಳಲ್ಲಿ ಹಾಡು ಹಾಡಿದ್ದರು.