ಖಾಸಗಿ ಜೀವನದ ಬಗ್ಗೆ ಮಾತನಾಡಿದ ನಟ ; ತರಾಟೆಗೆ ತೆಗೆದುಕೊಂಡ 'ಕಿರಾತಕ' ಸಿನಿಮಾ ನಟಿ ಓವಿಯಾ

ಸೋಶಿಯಲ್ ಮೀಡಿಯಾ ಬಳಕೆದಾರರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಇನ್ನು ಈ ಮೂಲಕ ಅನೇಕರು ಹಣ ಗಳಿಸುತ್ತಿದ್ದಾರೆ. ಕಾಂಟ್ರವರ್ಸಿ, ಅಸಹ್ಯ, ಖಾಸಗಿ ಜೀವನದ ಬಗ್ಗೆ ವಿಡಿಯೋ ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಹರಿಬಿಟ್ಟರೆ ಸಿಕ್ಕಾಪಟ್ಟೆ ವೀಕ್ಷಣೆ ಪಡೆಯಬಹುದು ಎಂದು ಕೆಲವರು ಅಂದುಕೊಂಡಿದ್ದಾರೆ. ಅದರಲ್ಲೂ ಸೆಲೆಬ್ರಿಟಿಗಳ ಜೀವನ ತಿಳಿದುಕೊಳ್ಳುವ ಕುತೂಹಲ ಪ್ರೇಕ್ಷಕರಿಗೆ ಇರುತ್ತದೆ. ಇದನ್ನೇ ಬಂಡವಾಳವಾಗಿಟ್ಟುಕೊಂಡು ಅನೇಕರು ಯುಟ್ಯೂಬ್ ಚಾನೆಲ್ ಸೃಷ್ಟಿ ಮಾಡಿಕೊಂಡು ಮನಬಂದಂತೆ ಮಾತನಾಡುತ್ತಾರೆ. ಈಗ ಯುಟ್ಯೂಬರ್‌, ನಟರೂ ಆಗಿರುವ ಒಬ್ಬರನ್ನು 'ಕಿರಾತಕ' ಸಿನಿಮಾ ನಟಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯವಾಗಿರುವ ನಟಿ ಓವಿಯಾಗೆ ದೊಡ್ಡ ಮಟ್ಟದ ಅಭಿಮಾನಿ ಬಳಗವಿದೆ. ಬಿಗ್ ಬಾಸ್ ಶೋನಲ್ಲಿ ಅವರು ಭಾಗವಹಿಸಿ ಕಮಾಲ್ ಮಾಡಿದ್ದರು. ಅದನ್ನು ಆಧರಿಸಿ ಅವರ ಬಗ್ಗೆ ಬಯಿಲ್ವನ್ ರಂಗನಾಥನ್ ಎಂಬುವವರು ವಿಡಿಯೋ ಮಾಡಿ ಅವರ ಯೂಟ್ಯೂಬ್ ಚಾನೆಲ್‌ನಲ್ಲಿ ಅಪ್‌ಲೋಡ್ ಮಾಡಿದ್ದಾರೆ. ಆ ವಿಡಿಯೋದಲ್ಲಿ ಓವಿಯಾ ಖಾಸಗಿ ಜೀವನ, ವೃತ್ತಿ ಜೀವನದಲ್ಲಿ ಏರಿಳಿತಗಳು ಇವೆ. ಈಗಾಗಲೇ ಬಯಿಲ್ವನ್ ರಂಗನಾಥನ್ ಅವರು ಸಾಕಷ್ಟು ನಟಿಯರ ಖಾಸಗಿ ಜೀವನ, ಚಿತ್ರರಂಗದಲ್ಲಿ ಸೋಲು-ಗೆಲುವು ಬಗ್ಗೆ ವಿಡಿಯೋ ಮಾಡಿ ಅಪ್‌ಲೋಡ್ ಮಾಡಿದ್ದಾರೆ. ಕಿರುಕುಳದಿಂದ ಚಿತ್ರರಂಗದಿಂದ ಓಡಿಹೋದವರು ಎಂದು ಟೈಟಲ್ ಕೊಟ್ಟು ವಿಡಿಯೋ ಅಪ್‌ಲೋಡ್ ಮಾಡಿದ್ದಾರೆ. ನಟಿ ಸದಾ, ಸಂಧ್ಯಾ, ಅಭಿರಾಮಿ, ಸುನೈನಾ, ಪೂಜಾ, ಸೋನಿಯಾ ಅಗರ್‌ವಾಲ್, ಓವಿಯಾ ಮುಂತಾದವರ ಬಗ್ಗೆ ಬಯಿಲ್ವನ್ ಮಾತನಾಡಿದ್ದಾರೆ. ನಟಿಯರ ಖಾಸಗಿ ಜೀವನ, ಹವ್ಯಾಸ, ದೇಹದ ಆಕಾರದ ಬಗ್ಗೆ ಈ ವಿಡಿಯೋಗಳು ಇವೆ. ಈ ವಿಡಿಯೋ ಓವಿಯಾ ಕಣ್ಣಿಗೆ ಬಿದ್ದಿದ್ದು, ಟ್ವಿಟ್ಟರ್‌ನಲ್ಲಿ ಅವರು ರಂಗನಾಥ್ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. "ಲೈಂಗಿಕವಲ್ಲದ ದೌರ್ಜನ್ಯ ಅಂದರೆ ಇದು" ಎಂದು ಓವಿಯಾ ಟ್ವೀಟ್ ಮಾಡಿದ್ದಾರೆ. ಅಷ್ಟೇ ಅಲ್ಲದೆ ಈ ಟ್ವೀಟ್‌ಗಳಿಗೆ ಅವರು #WomensRights ನೀಡಿದ್ದಾರೆ. ಓವಿಯಾ ಟ್ವೀಟ್‌ಗೆ ಸಾಕಷ್ಟು ಜನರು ಬೆಂಬಲ ಸೂಚಿಸುತ್ತಿದ್ದಾರೆ. ಈ ರೀತಿ ವಿಡಿಯೋಗಳನ್ನು ಯುಟ್ಯೂಬ್‌ನಿಂದ ತೆಗೆದು ಹಾಕಿ ಎಂಬ ಮಾತು ಕೂಡ ಕೇಳಿ ಬರುತ್ತಿದೆ. "ಈ ಮನುಷ್ಯ ಶಾಶ್ವತವಾಗಿ ಹೀಗೆ ಇರುತ್ತಾನೆ. ಅವನಂತೆಯೇ ಇರುವ ಪ್ರೇಕ್ಷಕರಿಂದ ಈ ಮಟ್ಟಕ್ಕೆ ಏರಿದ್ದಾನೆ" ಎಂದು ಓವಿಯಾ ಟ್ವೀಟ್ ಮಾಡಿದ್ದಾರೆ. ಈ ಟ್ವೀಟ್‌ಗೆ ಗಾಯಕಿ ಚಿನ್ಮಯಿ ಶ್ರೀಪಾದ್ ಅವರು ಬೆಂಬಲ ಸೂಚಿಸಿದ್ದಾರೆ. ಕಳೆದ ಫೆಬ್ರವರಿಯಲ್ಲಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಚೆನ್ನೈಗೆ ಆಗಮಿಸಿದ್ದಾಗ ಓವಿಯಾ ಅವರು #GoBackModi ಎಂದು ಟ್ವೀಟ್ ಮಾಡಿದ್ದರು. ಸಾರ್ವಜನಿಕವಾಗಿ ಅಗೌರವ ತೋರಿದ್ದಕ್ಕಾಗಿ ಅವರ ಮೇಲೆ ತಮಿಳುನಾಡು ಬಿಜೆಪಿ ರಾಜ್ಯ ಕಾರ್ಯದರ್ಶಿ ಡಿ ಅಲೆಕ್ಸಿಸ್ ಸುಧಾಕರ್ ಅವರು ಎಸ್‌ಪಿ, ಸಿಬಿ-ಸಿಐಡಿಗೆ ದೂರು ನೀಡಿದ್ದು, ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿದ್ದರು. 2007ರಿಂದ ಇಲ್ಲಿಯವರೆಗೆ ಓವಿಯಾ ನಟಿಸಿದ ಸಿನಿಮಾಗಳ ಸಂಖ್ಯೆ ತುಂಬ ಕಡಿಮೆ. ತೆಲುಗು, ತಮಿಳು, ಮಲಯಾಳಂ ಭಾಷೆಯ ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ, ಗಾಯಕಿಯಾಗಿಯೂ ಗುರುತಿಸಿಕೊಂಡಿದ್ದಾರೆ.