ಕೋವ್ಯಾಕ್ಸಿನ್ ಲಸಿಕೆ ಫಾರ್ಮುಲಾ ಹಂಚಿಕೊಂಡರೂ ಉತ್ಪಾದನೆ ಸುಲಭವಲ್ಲ!: ಕಾರಣಗಳು ಇಲ್ಲಿವೆ

ಹೊಸದಿಲ್ಲಿ: ದೇಶದಲ್ಲಿ ಕೋವಿಡ್ ಲಸಿಕೆಗೆ ಬೇಡಿಕೆ ಅಧಿಕವಾಗಿರುವ ಹಾಗೂ ಲಸಿಕೆಯ ಅಭಾವವಾಗಿರುವ ಸನ್ನಿವೇಶದಲ್ಲಿ, ಇತರೆ ಲಸಿಕೆ ತಯಾರಕ ಕಂಪೆನಿಗಳಲ್ಲಿಯೂ ಲಸಿಕೆ ಉತ್ಪಾದಿಸಲು ಅವಕಾಶ ನೀಡಬೇಕೆಂಬ ಒತ್ತಾಯ ತೀವ್ರವಾಗಿದೆ. ಕೋವ್ಯಾಕ್ಸಿನ್ ಲಸಿಕೆಯು ಭಾರತ ಸರ್ಕಾರದ ಸಹಯೋಗದೊಂದಿಗೆ ಹೈದರಾಬಾದ್ ಮೂಲದ ಅಭಿವೃದ್ಧಿಪಡಿಸಿದ್ದಾಗಿದೆ. ಹೀಗಾಗಿ ಭಾರತದ್ದೇ ಆದ ಲಸಿಕೆಯ ಸೂತ್ರವನ್ನು ದೇಶದ ಇತರೆ ಕಂಪೆನಿಗಳ ಜತೆ ಹಂಚಿಕೊಂಡು ಅದರ ಉತ್ಪಾದನೆ ಹೆಚ್ಚಿಸಲು ಅವಕಾಶ ನೀಡಬಹುದು ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಈ ನಡುವೆ ಕೇಂದ್ರ ಸರ್ಕಾರ ಹಾಗೂ ಭಾರತ್ ಬಯೋಟೆಕ್ ಕೋವ್ಯಾಕ್ಸಿನ್ ಫಾರ್ಮುಲಾ ಹಂಚಿಕೊಳ್ಳಲು ಆಸಕ್ತಿ ತೋರಿಸಿದ್ದು, ಕಂಪೆನಿಗಳಿಗೆ ಆಹ್ವಾನ ನೀಡಲು ಮುಂದಾಗಿವೆ. ಆದರೆ ಫಾರ್ಮುಲಾ ಹಂಚಿಕೊಂಡರೂ ದೇಶದ ಕೆಲವೇ ಔಷಧ ತಯಾರಿಕಾ ಕಂಪೆನಿಗಳು ಅದನ್ನು ನಿರ್ವಹಿಸಲು ಸುಸಜ್ಜಿತ ವ್ಯವಸ್ಥೆ ಹೊಂದಿವೆ ಎಂದು ತಜ್ಞರು ತಿಳಿಸಿದ್ದಾರೆ. 'ಅಭಾವ ನೀಗಿಸುವ ಸಲುವಾಗಿ ಕೋವ್ಯಾಕ್ಸಿನ್ ಉತ್ಪಾದಿಸಲು ಲಸಿಕೆ ತಯಾರಕರಿಗೆ ಆಹ್ವಾನ ನೀಡಲಾಗಿದೆ. ಎಷ್ಟು ಕಂಪೆನಿಗಳು ಮುಂದಾಗಲಿವೆ ಎನ್ನುವುದು ಆಸಕ್ತಿ ಮೂಡಿಸಿದೆ' ಎಂದು ಬಯೋಕಾನ್ ಮುಖ್ಯಸ್ಥೆ ಕಿರಣ್ ಮಜುಂದಾರ್ ಶಾ ಟ್ವೀಟ್ ಮಾಡಿದ್ದಾರೆ. ಸುಲಭವಲ್ಲ 'ಜೀವಂತ ವೈರಸ್‌ಗಳ ಜತೆ ಅಥವಾ ವಿರುದ್ಧ ಕೆಲಸ ಮಾಡಲು ವಾಸ್ತವವಾಗಿ ಯಾರೂ ಬಯಸುವುದಿಲ್ಲ. ಜಗತ್ತಿನ ಯಾವ ಭಾಗದಲ್ಲಿಯೂ ಯಾರೂ ಈ ಧೈರ್ಯ ಮಾಡುವುದಿಲ್ಲ. ಹೀಗಾಗಿ ಬಹುತೇಕ ಉತ್ಪಾದಕರು ಪ್ರೊಟೀನ್ ಆಧಾರಿತ ಲಸಿಕೆಗಳತ್ತ ಒಲವು ತೋರಿಸುತ್ತಿದ್ದಾರೆ. ಆದರೆ, ಸಾಂಕ್ರಾಮಿಕದ ಸಂದರ್ಭದಲ್ಲಿ ಜೀವಂತ ವೈರಸ್ ಅನ್ನು ತೆಗೆದು ಅದನ್ನು ನಿಷ್ಕ್ರಿಯಗೊಳಿಸುವುದು ಲಸಿಕೆ ಅಭಿವೃದ್ಧಿಪಡಿಸುವ ವೇಗದ ಮಾರ್ಗವಾಗಿದೆ' ಎಂದು ಮುಂಚೂಣಿ ಕಂಪೆನಿಯೊಂದರ ಮುಖ್ಯಸ್ಥರೊಬ್ಬರು ತಿಳಿಸಿದ್ದಾರೆ. ಲಸಿಕೆಯಲ್ಲಿರುವುದು ಫಾರ್ಮುಲಾ ಅಲ್ಲ! 'ಮೊದಲನೆಯದಾಗಿ, ಲಸಿಕೆಯಲ್ಲಿ ಯಾವುದೇ ಫಾರ್ಮುಲಾ ಇರುವುದಿಲ್ಲ. ಅದೊಂದು ಪ್ರಕ್ರಿಯೆ ಹಾಗೂ ತಂತ್ರಜ್ಞಾನ. ಇದು ಬೇರೆಯವರಿಗೆ ದೊರೆತರೂ, ಅದಕ್ಕೆ ಹೊಂದಿಕೊಳ್ಳಲು ಕನಿಷ್ಠ 6-8 ತಿಂಗಳು ಬೇಕಾಗುತ್ತದೆ. ಅಧಿಕ ಕಂಟೇನ್ಮೆಂಟ್‌ನ ಬಯೋ-ಸುರಕ್ಷತಾ ಮಟ್ಟ 3ರಲ್ಲಿ (BSL-3) ಉತ್ಪಾದನೆ ಆರಂಭಿಸುವುದಕ್ಕಾಗಿಯೇ 3-6 ತಿಂಗಳು ತಗುಲುತ್ತದೆ. ಜೀವಂತ ವೈರಾಣುಗಳನ್ನು ನಿರ್ವಹಿಸಲು ಸಿಬ್ಬಂದಿಗೆ ತರಬೇತಿ ನೀಡಲು ಕನಿಷ್ಠ ಆರು ತಿಂಗಳು ಬೇಕು. ಇದು ಖಂಡಿತಾ ಜೋಕ್ ಅಲ್ಲ' ಎಂದು ಶಾಂತಾ ಬಯೋಟೆಕ್ ಸಂಸ್ಥಾಪಕ ಕೆಐ ವರಪ್ರಸಾದ್ ರೆಡ್ಡಿ ಹೇಳಿದ್ದಾರೆ. ಬಿಎಸ್ಎಲ್-3 ಸೌಲಭ್ಯದ್ದೇ ಸಮಸ್ಯೆ ಕೋವ್ಯಾಕ್ಸಿನ್ ಔಷಧದ ಪೂರಕ ಉತ್ಪನ್ನಗಳನ್ನು ಉತ್ಪಾದಿಸುತ್ತಿರುವ ಇಂಡಿಯನ್ ಇಮ್ಯುನೊಲೊಜಿಸ್ಟ್ ಲಿಮಿಟೆಡ್ ಸಂಸ್ಥೆಗೂ 'ಕೋವ್ಯಾಕ್ಸಿನ್' ಲಸಿಕೆಯನ್ನು ಉತ್ಪಾದಿಸಲು ತನ್ನಲ್ಲಿನ ಬಿಎಸ್‌ಎಲ್-2 + ರೇಬಿಸ್ ಲಸಿಕೆ ಸೌಲಭ್ಯವನ್ನು ಮರು ಸಂಯೋಜನೆ ನಡೆಸಲು ಕನಿಷ್ಠ ಮೂರು ತಿಂಗಳು ಬೇಕಾಗುತ್ತದೆ. ಈ ಸಂಸ್ಥೆಗೆ ಅಕ್ಟೋಬರ್ ಬಳಿಕವಷ್ಟೇ ಪೂರ್ಣಾವಧಿ ಲಸಿಕೆ ಉತ್ಪಾದನೆ ಸಾಧ್ಯವಾಗುತ್ತದೆ. ಕೋವ್ಯಾಕ್ಸಿನ್ ಉತ್ಪಾದನೆಗಾಗಿ ಭಾರತ್ ಇಮ್ಯುನೊಲಜಿಕಲ್ ಮತ್ತು ಬಯಾಲಾಜಿಕಲ್ಸ್, ಹಫ್‌ಕಿನ್ ಸಂಸ್ಥೆಗಳನ್ನು ಭಾರತ ಸರ್ಕಾರ ಸಂಪರ್ಕಿಸಿದ್ದು, ಅವುಗಳಿಗೂ ಬಿಎಸ್‌ಎಲ್-3 ಸೌಲಭ್ಯ ಸ್ಥಾಪಿಸಲು ಕೆಲವು ತಿಂಗಳು ಸಮಯ ಬೇಕಾಗುತ್ತದೆ. ಕೋವ್ಯಾಕ್ಸಿನ್ ಉತ್ಪಾದನೆಗೆ ಬಿಎಸ್‌ಎಲ್‌-3 ವ್ಯವಸ್ಥೆ ಕಲ್ಪಿಸುವ ಅಗತ್ಯವನ್ನು ವಿವರಿಸಿರುವ ಸಿಸಿಎಂಬಿ ಮಾಜಿ ನಿರ್ದೇಶಕ ಡಾ. ರಾಕೇಶ್ ಕೆ ಮಿಶ್ರಾ, ಕೋವ್ಯಾಕ್ಸಿನ್ ಉತ್ಪಾದನೆಗಾಗಿ ಜೀವಂತ ಸಾರ್ಸ್-ಕೋವ್-2 ವೈರಸ್‌ ಅಭಿವೃದ್ಧಿಪಡಿಸಲು ಬೃಹತ್ ಪ್ರಮಾಣದ ಬಿಎಸ್ಎಲ್-3 ಸೌಲಭ್ಯ ಮುಖ್ಯವಾಗಿರುತ್ತದೆ ಎಂದು ತಿಳಿಸಿದ್ದಾರೆ. ಇತರೆ ಸವಾಲುಗಳು ಸಹ ಇವೆ 'ಬಿಎಸ್ಎಲ್-3 ಸೌಲಭ್ಯದ ಜತೆಗೆ, ವೈರಸ್‌ನ ನಕಲು ತಪ್ಪಿಸಲು ಅದನ್ನು ನಿಷ್ಕ್ರಿಯಗೊಳಿಸುವ ಪ್ರಕ್ರಿಯೆ ಕೂಡ ಅವಶ್ಯಕ. ಉತ್ಪಾದಕರು ಕೋವ್ಯಾಕ್ಸಿನ್ ಬಳಸುವ ಸಹಾಯಕ ವಸ್ತುಗಳನ್ನೂ ಉತ್ಪಾದಿಸುವ ಸಾಮರ್ಥ್ಯದ ಅಗತ್ಯವಿದೆ' ಎಂದು ಸಿಎಸ್‌ಐಆರ್ ವಿಜ್ಞಾನಿ ಡಾ. ಸಿಎಚ್ ಮೋಹನ್ ರಾವ್ ತಿಳಿಸಿದ್ದಾರೆ. 'ಹೀಗಾಗಿ ಸೌಲಭ್ಯ ಮಾತ್ರವಲ್ಲ, ತಂತ್ರಜ್ಞಾನ, ಮಾದರಿ ಹಾಗೂ ಕೌಶಲಯುತ ಮಾನವಶಕ್ತಿಯೂ ಮುಖ್ಯವಾಗಿದೆ. ಇದು ಯಾರಿಗೂ ಸಾಧ್ಯವಿಲ್ಲ ಎನ್ನಲಾರೆ. ಅದು ಸಾಧ್ಯ. ಆದರೆ ಸಮಸ್ಯೆ ಇರುವುದು ಸುರಕ್ಷತೆ ಹಾಗೂ ತರಬೇತಿಯುಳ್ಳ ಮಾನವ ಸಂಪನ್ಮೂಲ' ಎಂದು ಅವರು ವಿವರಿಸಿದ್ದಾರೆ. ಆಸ್ಟ್ರಾಜೆನಿಕಾ-ಆಕ್ಸ್‌ಫರ್ಡ್ ಅಭಿವೃದ್ಧಿಪಡಿಸಿದ, ಭಾರತದಲ್ಲಿ ಸೀರಮ್ ಇನ್‌ಸ್ಟಿಟ್ಯೂಟ್ ಉತ್ಪಾದಿಸುತ್ತಿರುವ ಕೋವಿಶೀಲ್ಡ್, ಫೈಜರ್, ಮಾಡೆರ್ನಾದಂತಹ ಎಂಆರ್‌ಎನ್‌ಎ ಲಸಿಕೆಗಳಿಗೆ ಬಿಎಸ್ಎಲ್-3 ಸೌಲಭ್ಯ ಬೇಕಿರುವುದಿಲ್ಲ. ಹೀಗಾಗಿ ಅವುಗಳ ಉತ್ಪಾದನೆ ಸುಲಭ ಎಂದು ತಜ್ಞರು ಹೇಳುತ್ತಾರೆ. ಬಿಎಸ್ಎಲ್-3 ಸೌಲಭ್ಯವುಳ್ಳ ಯಾವುದೇ ಪ್ರಾಣಿ ಲಸಿಕಾ ಕೇಂದ್ರಗಳನ್ನು ಕೂಡ ಕೋವ್ಯಾಕ್ಸಿನ್ ತಯಾರಿಕೆಗಾಗಿ ಪರಿವರ್ತಿಸಲು ಮತ್ತು ಸೂಕ್ತ ಅನುಮತಿಗಳನ್ನು ಪಡೆಯಲು ಹಲವು ತಿಂಗಳು ಬೇಕಾಗುತ್ತದೆ.