ಕೋವಿಡ್‌ನಿಂದ ಚೇತರಿಸಿದವರಿಗೆ ತಕ್ಷಣ ವಿಮೆ ಖರೀದಿ ಕಷ್ಟ, ಕೂಲಿಂಗ್‌ ಆಫ್‌ ಅವಧಿ ಹೆಚ್ಚಳ
ಕೋವಿಡ್‌ ಸಾಂಕ್ರಾಮಿಕ ರೋಗದ ದೀರ್ಘಕಾಲೀನ ಪರಿಣಾಮಗಳ ಬಗ್ಗೆ ಸ್ಪಷ್ಟತೆ ಇಲ್ಲದಿರುವುದರಿಂದ, ಸೋಂಕಿನಿಂದ ಚೇತರಿಸಿದವರಿಗೆ ಕನಿಷ್ಠ 3 ತಿಂಗಳಿನ ಅಂತರದಲ್ಲಿ ಹೊಸ ಪಾಲಿಸಿ ವಿತರಣೆಗೆ ಕಂಪನಿಗಳು ಒಲವು ತೋರಿವೆ.
Admin
0
10
ಹೊಸದಿಲ್ಲಿ: ಕೋವಿಡ್‌-19ನಿಂದ ಗುಣಮುಖರಾದವರಿಗೆ ಹೊಸ ಖರೀದಿಸುವಾಗ ವಿಳಂಬ ಉಂಟಾಗಬಹುದು ಎಂದು ವಿಮೆ ವಲಯದ ತಜ್ಞರು ತಿಳಿಸಿದ್ದಾರೆ.
ಕೋವಿಡ್‌ ಸಾಂಕ್ರಾಮಿಕ ರೋಗದ ದೀರ್ಘಕಾಲೀನ ಪರಿಣಾಮಗಳ ಬಗ್ಗೆ ಸ್ಪಷ್ಟತೆ ಇಲ್ಲದಿರುವುದೇ ಇದಕ್ಕೆ ಕಾರಣ ಎಂದು ವಿಮೆ ತಜ್ಞರು ಹೆಳಿದ್ದಾರೆ.
ಪ್ರಮುಖ ಖಾಸಗಿ ಆರೋಗ್ಯ ವಿಮೆ ಕಂಪನಿಗಳು ಕೋವಿಡ್‌-19ರಿಂದ ಚೇತರಿಸಿದವರಿಗೆ ಹೊಸ ವಿಮೆ ವಿತರಿಸುವ ನಿಟ್ಟಿನಲ್ಲಿ ಕನಿಷ್ಠ ಮಧ್ಯಂತರ ಅವಧಿಯನ್ನು (ಕೂಲಿಂಗ್‌ ಆಫ್‌) 2 ವಾರಗಳಿಂದ ಮೂರು ತಿಂಗಳಿನ ತನಕ ವಿಸ್ತರಿಸಿವೆ. ಕೋವಿಡ್‌ನಿಂದ ಇತ್ತೀಚೆಗೆ ಚೇತರಿಸಿಕೊಂಡಿರುವವರಿಗೆ ತಕ್ಷಣವೇ ಪಾಲಿಸಿಗಳನ್ನು ಮಾರಾಟ ಮಾಡದಿರುವಂತೆ ವಿಮೆ ಕಂಪನಿಗಳು ತಮ್ಮ ಏಜೆಂಟರಿಗೆ ಸಲಹೆ ನೀಡುತ್ತಿವೆ ಎಂದು ವರದಿಯಾಗಿದೆ.
ಕೋವಿಡ್‌ನಿಂದ ಚೇತರಿಸಿದ ವ್ಯಕ್ತಿಗಳಲ್ಲಿ ನಂತರವೂ, ಶ್ವಾಸಕೋಶದ ಸಮಸ್ಯೆಗಳು, ಹೃದಯ ಸಂಬಂಧಿತ ತೊಂದರೆಗಳು ಕಾಣಿಸಿಕೊಂಡಿರುವ ಉದಾಹರಣೆಗಳೂ ಇರುವುದರಿಂದ, ಅಂಥವರಿಗೆ ಹೊಸ ಪಾಲಿಸಿಗಳನ್ನು ತಕ್ಷಣವೇ ಕೊಡಲು ಕಂಪನಿಗಳು ಹಿಂದೇಟು ಹಾಕುತ್ತಿವೆ.
ಕೋವಿಡ್‌ ಸುತ್ತಮುತ್ತ ಉಂಟಾಗಿರುವ ಅನಿಶ್ಚಿತತೆ, ಹೆಚ್ಚುತ್ತಿರುವ ಕ್ಲೇಮ್‌ಗಳು ವಿಮೆ ಕಂಪನಿಗಳಿಗೆ ಸವಾಲಾಗಿವೆ. ಹೀಗಾಗಿ ಗುಣಮುಖರಾದವರಿಗೆ ಹೊಸ ವಿಮೆ ಪಾಲಿಸಿಯನ್ನು ಯಾವಾಗ ನೀಡಬಹುದು ಎಂಬುದರ ಬಗ್ಗೆ ಕಂಪನಿಗಳ ನಡುವೆ ನೀತಿಗಳು ಭಿನ್ನವಾಗಿವೆ.
ಕೋವಿಡ್‌ನಿಂದ ಚೇತರಿಸಿದವರಿಗೆ ಹೊಸ ವಿಮೆ ಪಡೆಯಲು ವೈದ್ಯಕೀಯ ಪರೀಕ್ಷೆ ಕಡ್ಡಾಯವಲ್ಲ. ಹೀಗಿದ್ದರೂ ಗ್ರಾಹಕನ ವಯಸ್ಸು, ಖರೀದಿಸಲು ಬಯಸುವ ಆರೋಗ್ಯ ವಿಮೆಯ ಕವರೇಜ್‌ ಇತ್ಯಾದಿ ಅಂಶಗಳನ್ನು ಆಧರಿಸಿ, ಅಗತ್ಯವಿದ್ದರೆ ವೈದ್ಯಕೀಯ ಟೆಸ್ಟ್‌ ಬೇಕಾಗಬಹುದು. ಗ್ರಾಹಕರ ಆರೋಗ್ಯ ಪರಿಸ್ಥಿತಿಯನ್ನು ಸಮರ್ಪಕವಾಗಿ ಮೌಲ್ಯಮಾಪನ ಮಾಡಲು ಕಾಲಾವಕಾಶ ಅಗತ್ಯ ಎನ್ನುತ್ತಾರೆ ತಜ್ಞರು.
