ಕೋವಿಡ್-19 ಸಂಬಂಧ ಭೀತಿ ಸೃಷ್ಟಿಸದಂತೆ ಮಾಧ್ಯಮಗಳಿಗೆ ಮಾನಸಿಕ ತಜ್ಞರ ಮನವಿ
ಕೊರೊನಾ ಸಾಂಕ್ರಾಮಿಕದ ಸಂದರ್ಭದಲ್ಲಿ ಮುಖ್ಯವಾಹಿನಿಯ ಮಾಧ್ಯಮಗಳು ಬಹಿರಂಗವಾಗಿ ನಕಾರಾತ್ಮಕ, ಆತ್ಮ ಸ್ಥೈರ್ಯ ಕುಗ್ಗಿಸುವ ಸುದ್ದಿಗಳ ಪ್ರಸಾರಕ್ಕೆ ಇಳಿದಿರುವುದನ್ನು ಸರಿಯಲ್ಲ ಎಂದು ಮಾನಸಿಕ ಆರೋಗ್ಯ ತಜ್ಞರು ಹೇಳಿದ್ದಾರೆ.
Admin
0
6
ಬೆಂಗಳೂರು: ಕೊರೊನಾ ಸಂದರ್ಭದಲ್ಲಿ ಭೀತಿ ಸೃಷ್ಟಿಸದಂತೆ ದೇಶದ ಖ್ಯಾತ ತಜ್ಞರು ಮಾಧ್ಯಮಗಳಿಗೆ ಮನವಿ ಮಾಡಿದ್ದಾರೆ. ಮನೋವೈದ್ಯಶಾಸ್ತ್ರದ ಹಿರಿಯ ಪ್ರಾಧ್ಯಾಪಕ ಮತ್ತು ಪ್ರಸ್ತುತ ನಿಮ್ಹಾನ್ಸ್ ಐಎಂಡಿ ವಿಭಾಗದ ನಿರ್ದೇಶಕ ಡಾ.ಬಿ.ಎನ್. ಗಂಗಾಧರ್ ಹಾಗೂ ಇನ್ನೂ ಹಲವು ಆರೋಗ್ಯ ತಜ್ಞರು ಈ ಸಂಬಂಧ ಬಹಿರಂಗ ಪತ್ರ ಬರೆದಿದ್ದಾರೆ.
ಶವಸಂಸ್ಕಾರಗಳಿಂದ ಕೋವಿಡ್ -19 ಸಾವುಗಳನ್ನು ವರದಿ ಮಾಡುವ ಮೂಲಕ ಮಾಧ್ಯಮಗಳು ಜನರಲ್ಲಿ ಗಾಬರಿ ಮತ್ತು ಭೀತಿಯನ್ನು ಉಂಟುಮಾಡಿವೆ ಎಂದು ಇವರುಗಳು ಪತ್ರದಲ್ಲಿ ಟೀಕಿಸಿದ್ದಾರೆ. ನಕಾರಾತ್ಮಕ ಮತ್ತು ನಿರಾಶಾವಾದಿ ಸುದ್ದಿಗಳು ಒಮ್ಮಿಂದೊಮ್ಮೆಲೆ ಸ್ಫೋಟಿಸಿದಾಗ ವ್ಯಕ್ತಿಯು ಎದುರಿಸಬಹುದಾದ ವಿವಿಧ ಮಾನಸಿಕ ಆರೋಗ್ಯ ಸಮಸ್ಯೆಗಳನ್ನೂ ಪತ್ರದಲ್ಲಿ ವಿವರವಾಗಿ ದಾಖಲಿಸಲಾಗಿದೆ.
“ಸಮೂಹ ಮಾಧ್ಯಮಗಳಿಗೆ ಏಕಕಾಲದಲ್ಲಿ ಲಕ್ಷಾಂತರ ಜನರೊಂದಿಗೆ ಸಂವಹನ ನಡೆಸುವ ಶಕ್ತಿ ಇದೆ. ತಲುಪುವಿಕೆಯು ತುಂಬಾ ದೊಡ್ಡದಾದಾಗ, ಪ್ರತಿ ಪದ, ಪ್ರತಿ ಚಿತ್ರ ಮತ್ತು ಪ್ರತಿಯೊಂದು ಸೂಕ್ಷ್ಮ ವ್ಯತ್ಯಾಸಗಳು ಮುಖ್ಯವಾಗುತ್ತವೆ. ಬಹಳ ಸೌಮ್ಯವಾಗಿ ಹೇಳಬೇಕೆಂದರೆ ನಮ್ಮ ಟಿವಿ ಪರದೆಗಳು, ಮೊಬೈಲ್ ಪರದೆಗಳು ಮತ್ತು ಪತ್ರಿಕೆಗಳಲ್ಲಿ ನಾವು ನೋಡುತ್ತಿರುವುದು ಅನಾನುಕೂಲಕರವಾಗಿದೆ,” ಎಂದು ವಿಷಾದ ವ್ಯಕ್ತಪಡಿಸಿದ್ದಾರೆ.
ಕೊರೊನಾ ಸಾಂಕ್ರಾಮಿಕದ ಸಂದರ್ಭದಲ್ಲಿ ಮುಖ್ಯವಾಹಿನಿಯ ಮಾಧ್ಯಮಗಳು ಬಹಿರಂಗವಾಗಿ ನಕಾರಾತ್ಮಕ, ಆತ್ಮ ಸ್ಥೈರ್ಯ ಕುಗ್ಗಿಸುವ ಸುದ್ದಿಗಳ ಪ್ರಸಾರಕ್ಕೆ ಇಳಿದಿರುವುದನ್ನು ಪತ್ರವು ಟೀಕಿಸಿದೆ.
"ಶವಸಂಸ್ಕಾರದ ಮೈದಾನದಲ್ಲಿ ದೇಹಗಳು ಹೊತ್ತಿ ಉರಿಯುತ್ತಿರುವ ಚಿತ್ರಗಳು, ಸತ್ತವರ ಸಂಬಂಧಿಕರು ಅಸಹನೀಯವಾಗಿ ಅಳುವುದು; ಇಂಥಹ ಭಾವನಾತ್ಮಕ ಆಕ್ರೋಶಗಳ ಮೂಲಕ ವರದಿಗಾರರು, ಕ್ಯಾಮೆರಾಮೆನ್‌ಗಳು ಹಾದು ಹೋಗುತ್ತಾರೆ. ಇದು ಜನರ ದೃಷ್ಟಿಯನ್ನು ತಮ್ಮತ್ತ ಸೆಳೆಯಲು ಮಾಧ್ಯಮಗಳಿಗೆ ಸಹಾಯ ಮಾಡಬಹುದು. ಆದರೆ ಇಂಥಹ ಸುದ್ದಿ ಪ್ರಸಾರಕ್ಕೆ ಬೆಲೆ ತೆರಬೇಕಾಗುತ್ತದೆ," ಎಂದು ಮಾನಸಿಕ ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ.
ಈ ಬಗ್ಗೆ ಉದಾಹರಣೆ ಸಹಿತ ವಿವರಿಸುವ ತಜ್ಞರು, "ಯಾರೋ ಒಬ್ಬರು ಕೊರೊನಾ ಸೋಂಕಿತರಾಗಿದ್ದಾರೆ ಎಂದುಕೊಳ್ಳಿ. ಶವಸಂಸ್ಕಾರದ ಮೈದಾನದ ಸುದ್ದಿ ಪ್ರಸಾರವನ್ನು ಅವರು ನೋಡಿದರೆ, ಅದು ಅವರ ಮನಸ್ಸು ಮತ್ತು ಅವರ ಪ್ರೀತಿಪಾತ್ರರ ಮನಸ್ಸಿನ ಮೇಲೆ ಗಾಢ ಪರಿಣಾಮ ಬೀರುತ್ತದೆ. ಕೊರೊನಾದಿಂದ ಚೇತರಿಸಿಕೊಂಡಿರುವವರ ಸಂಖ್ಯೆ ಅಪಾರವಾಗಿದ್ದರೂ ಈ ಅಂಶ ಇಲ್ಲಿ ಅಪ್ರಸ್ತುತವಾಗುತ್ತದೆ. ಚಿತ್ರಗಳು ಮತ್ತು ಭಾವನೆಗಳು ಮಾತ್ರ ಅವರೊಂದಿಗೆ ಉಳಿಯುತ್ತವೆ," ಎಂದು ವಿವರಿಸಿದ್ದಾರೆ.
ಸಕಾರಾತ್ಮಕ ಮನಸ್ಥಿತಿಯ ಅಗತ್ಯವನ್ನು ಒತ್ತಿ ಹೇಳಿರುವ ಮಾನಸಿಕ ಆರೋಗ್ಯ ತಜ್ಞರು ವಿಚಲಿತಗೊಳಿಸುವ, ಪ್ರಚೋದಿಸುವ ಸುದ್ದಿ ಪ್ರಸಾರದಿಂದ ದೂರವಿರುವಂತೆ ವಿನಂತಿಸಿಕೊಂಡಿದ್ದಾರೆ.
“ಸತ್ಯಗಳನ್ನು ವರದಿ ಮಾಡಬಾರದು ಎಂದು ನಾವು ಹೇಳುತ್ತಿಲ್ಲ. ಗಾಬರಿ ಮತ್ತು ಭೀತಿ ಉಂಟುಮಾಡುವ ವ್ಯಾಪ್ತಿಯನ್ನು ತಪ್ಪಿಸಬೇಕು ಎಂದಷ್ಟೆ ನಾವು ಹೇಳುತ್ತಿದ್ದೇವೆ,” ಎಂದು ಇವರು ಸ್ಪಷ್ಟಪಡಿಸಿದ್ದಾರೆ.
“ಮಾನಸಿಕ ಆರೋಗ್ಯ ವೃತ್ತಿಪರರಾಗಿ, ನಾವು ಹೇಳುವುದಿಷ್ಟೆ, ಕೆಲವು ನಿರ್ದಿಷ್ಟ ಮಾಹಿತಿಯು ಜನರನ್ನು ಎಚ್ಚರಿಸುತ್ತದೆ ಮತ್ತು ಯಾವುದೇ ಸವಾಲನ್ನು ಎದುರಿಸಲು ಅವರನ್ನು ಸಿದ್ಧಗೊಳಿಸುತ್ತದೆ. ಆದರೆ ಭೀತಿ ಅವರನ್ನು ದುರ್ಬಲಗೊಳಿಸುತ್ತದೆ."
ಈ ಪತ್ರದ ಮೂಲಕ ಮಾನಸಿಕ ಆರೋಗ್ಯ ತಜ್ಞರು, ಅಧಿಕೃತ ಮಾಹಿತಿಯನ್ನು ಹಂಚಿಕೊಳ್ಳುವ ಮತ್ತು ಭಯವನ್ನು ನಿವಾರಿಸುವ ಜವಾಬ್ದಾರಿಗಳನ್ನು ಮಾಧ್ಯಮಗಳಿಗೆ ನೆನಪಿಸಿದ್ದಾರೆ.
ಪತ್ರಕ್ಕೆ ನಿಮ್ಹಾನ್ಸ್ ಐಎಂಡಿ ವಿಭಾಗದ ನಿರ್ದೇಶಕ ಡಾ.ಬಿ.ಎನ್.ಗಂಗಾಧರ್, ನಿಮ್ಹಾನ್ಸ್ ಮನೋವೈದ್ಯಶಾಸ್ತ್ರ ವಿಭಾಗದ ಮುಖ್ಯಸ್ಥೆ ಪ್ರತಿಮಾ ಮೂರ್ತಿ, ಇಂಡಿಯನ್‌ ಸೈಕ್ಯಾಟ್ರಿಕ್‌ ಸೊಸೈಟಿ ಅಧ್ಯಕ್ಷ ಗೌತಮ್‌ ಸಿನ್ಹಾ, ಏಮ್ಸ್‌ನ ಮನೋವೈದ್ಯಶಾಸ್ತ್ರ ವಿಭಾಗದ ಪ್ರಾಧ್ಯಾಪಕ ರಾಜೇಶ್‌ ಸಾಗರ್‌ ಸಹಿ ಮಾಡಿದ್ದಾರೆ.
