ಉಪಚುನಾವಣೆ ಸೋಲು: ಹಿಮಾಚಲ, ರಾಜಸ್ಥಾನದಲ್ಲಿ ಬಿಜೆಪಿ ನಾಯಕತ್ವ ಬದಲು?

ಹೊಸದಿಲ್ಲಿ: ಲೋಕಸಭೆ ಚುನಾವಣೆಗೆ ಮುನ್ನುಡಿ ಎಂದೇ ಹೇಳಲಾಗಿರುವ ಉತ್ತರ ಪ್ರದೇಶ ಸೇರಿ ಐದು ರಾಜ್ಯಗಳ ವಿಧಾನಸಭೆ ಚುನಾವಣೆಗೂ ಮುನ್ನ ನಡೆದ ಹಲವು ರಾಜ್ಯಗಳ ಉಪ ಚುನಾವಣೆ ಬಿಜೆಪಿಗೆ ಎಚ್ಚರಿಕೆ ಸಂದೇಶ ರವಾನಿಸಿದೆ. ಮತ್ತು ರಾಜಸ್ಥಾನದಲ್ಲಿ ಪಕ್ಷಕ್ಕೆ ಮುಖಭಂಗವಾಗಿದೆ. ಹಿನ್ನಡೆಯಾದ ರಾಜ್ಯಗಳಲ್ಲಿ ಈಗ ನಾಯಕತ್ವ ಬದಲಾವಣೆ ಕುರಿತು ಚಿಂತನೆ ನಡೆಸಿದೆ. ''ಕೆಲವಷ್ಟು ರಾಜ್ಯಗಳಲ್ಲಿ ಬಿಜೆಪಿಗೆ ಮುನ್ನಡೆಯೂ ಆಗಿದೆ. ಅದನ್ನು ಗಮನದಲ್ಲಿಟ್ಟುಕೊಂಡೇ ಹಿನ್ನಡೆಯಾದ ಕೆಲವು ರಾಜ್ಯಗಳಲ್ಲಿ ಮಾತ್ರ ನಾಯಕತ್ವ ಬದಲಾವಣೆ ಪ್ರಸ್ತಾಪ ಮಾಡಲಾಗಿದೆ,'' ಎಂದು ಪಕ್ಷದ ಮೂಲಗಳು ತಿಳಿಸಿವೆ. ಹಿಮಾಚಲ ಪ್ರದೇಶದಲ್ಲಿ ವಿಧಾನಸಭೆಯ ಮೂರು ಕ್ಷೇತ್ರ ಹಾಗೂ ಒಂದು ಲೋಕಸಭೆ ಕ್ಷೇತ್ರಗಳಿಗೆ ಉಪ ಚುನಾವಣೆ ನಡೆದಿದ್ದು, ಎಲ್ಲ ಕ್ಷೇತ್ರದಲ್ಲೂ ಕಾಂಗ್ರೆಸ್‌ ಗೆಲುವು ಸಾಧಿಸಿದೆ. ರಾಜಸ್ಥಾನದಲ್ಲಿ ಎರಡೂ ವಿಧಾನಸಭೆ ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಗೆಲುವು ಸಾಧಿಸಿರುವುದು ಬಿಜೆಪಿಗೆ ಹಿನ್ನಡೆಯಾಗಿದೆ. ಪಶ್ಚಿಮ ಬಂಗಾಳದ ನಾಲ್ಕೂ ಕ್ಷೇತ್ರದಲ್ಲಿ ಟಿಎಂಸಿ ಜಯಭೇರಿ ಬಾರಿಸಿದೆ. ಹಾಗಾಗಿ ಈ ಮೂರೂ ರಾಜ್ಯಗಳಲ್ಲಿ ಬಿಜೆಪಿಯಲ್ಲಿ ಸಂಘಟನಾತ್ಮಕ ಹಾಗೂ ನಾಯಕತ್ವ ಬದಲಾವಣೆ ಕುರಿತು ಚರ್ಚೆ ನಡೆಯುತ್ತಿದೆ ಎಂದು ತಿಳಿದುಬಂದಿದೆ. ಹಾಗೆ ನೋಡಿದರೆ ಬಿಜೆಪಿಗೆ ಅಸ್ಸಾಂನಲ್ಲಿ ಭಾರಿ ಮುನ್ನಡೆ ಸಿಕ್ಕಿದೆ. ಮೇಘಾಲಯದಲ್ಲೂ ಎನ್‌ಡಿಎಗೆ ಲಾಭವಾಗಿದೆ. ಮಧ್ಯಪ್ರದೇಶದಲ್ಲೂ ನಿರೀಕ್ಷಿತ ಫಲಿತಾಂಶವೇ ಬಂದಿದೆ. ಆಂಧ್ರ ಪ್ರದೇಶ, ಬಿಹಾರ, ಹರಿಯಾಣ, ಮಹಾರಾಷ್ಟ್ರ, ಮಿಜೋರಾಂನಲ್ಲಿ ಲಾಭವೂ ಆಗಿಲ್ಲ, ನಷ್ಟವೂ ಆಗಿಲ್ಲ. ಹಾಗಾಗಿ ಎಲ್ಲ ರಾಜ್ಯಗಳ ಮೇಲೂ ಹೈಕಮಾಂಡ್‌ ಕೆಂಗಣ್ಣಿಲ್ಲ. ಆದರೆ, ಕೆಲವು ರಾಜ್ಯದಲ್ಲಿ ಮಾತ್ರ ನಿರಾಸೆ ಆಗಿರುವುದರಿಂದ ನಾಯಕತ್ವ ಬದಲಾವಣೆ ವಿಷಯವು ಮುನ್ನೆಲೆಗೆ ಬಂದಿದೆ. ಆಂತರಿಕ ಭಿನ್ನಮತ, ದುರ್ಬಲ ನಾಯಕತ್ವವು ಮುಂದಿನ ಚುನಾವಣೆಯಲ್ಲಿ ಪರಿಣಾಮ ಬೀರಬಾರದು ಎಂಬುದು ಹೈಕಮಾಂಡ್‌ ಸದ್ಯದ ಲೆಕ್ಕಾಚಾರವಾಗಿದೆ. ರಾಜಸ್ಥಾನದಲ್ಲೇಕೆ ಬದಲು ಎರಡು ಕ್ಷೇತ್ರಗಳಲ್ಲಿ ಬಿಜೆಪಿ ಸೋಲುವ ಜತೆಗೆ ಅಭ್ಯರ್ಥಿಗಳು ಧರಿಯಾವಾಡದಲ್ಲಿ ಮೂರನೇ ಹಾಗೂ ವಲ್ಲಭನಗರದಲ್ಲಿ ನಾಲ್ಕನೇ ಸ್ಥಾನಕ್ಕೆ ತಳ್ಳಲ್ಪಟ್ಟಿರುವುದು ಪಕ್ಷಕ್ಕೆ ತೀವ್ರ ಮುಜುಗರವಾಗಿದೆ. ಅಲ್ಲದೆ, ಮಾಜಿ ಮುಖ್ಯಮಂತ್ರಿ ವಸುಂಧರಾ ರಾಜೆ ಹಾಗೂ ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ಸತೀಶ್‌ ಪೂನಿಯಾ ನಡುವಿನ ಬಿಕ್ಕಟ್ಟು ಪಕ್ಷದ ಮೇಲೆ ಪರಿಣಾಮ ಬೀರುತ್ತಿದೆ. ಇದರ ಜತೆಗೆ ಕಳೆದ ವಿಧಾನಸಭೆ ಚುನಾವಣೆ ಸೋಲಿನ ಬಳಿಕ ರಾಜೆ ಅವರು ಅಷ್ಟೊಂದು ಸಕ್ರಿಯವಾಗಿಲ್ಲ. ಹಾಗಾಗಿ ರಾಜ್ಯದಲ್ಲಿ ನಾಯಕತ್ವ ಬದಲಾವಣೆಗೆ ಹೈಕಮಾಂಡ್‌ ಚಿಂತನೆ ನಡೆಸುತ್ತಿದೆ. ಪಶ್ಚಿಮ ಬಂಗಾಳದಲ್ಲಿ ಕಳೆದ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ ಬಹುಮತ ಗಳಿಸದಿದ್ದರೂ ಹೆಚ್ಚಿನ ಕ್ಷೇತ್ರ ಗಳಿಸಿತ್ತು. ಆದರೆ, ಉಪ ಚುನಾವಣೆಯಲ್ಲಿ ಹಿನ್ನಡೆಯಾಗಿರುವುದು ಹೈಕಮಾಂಡ್‌ ಕಣ್ಣು ಬಂಗಾಳದತ್ತ ನೆಡುವಂತೆ ಮಾಡಿದೆ. ಹಿಮಾಚಲದಲ್ಲಿ ಸಿಎಂ ವಿರುದ್ಧವೇ ಅಸಮಾಧಾನ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಅವರ ರಾಜ್ಯವಾದ ಹಿಮಾಚಲ ಪ್ರದೇಶದಲ್ಲಿ ನಡೆದ ಲೋಕಸಭೆ ಒಂದು ಹಾಗೂ ವಿಧಾನಸಭೆ ಮೂರು ಕೇತ್ರಗಳಲ್ಲಿಸೋಲನುಭವಿಸಿದ್ದು, ಮುಖ್ಯಮಂತ್ರಿ ಜೈರಾಮ್‌ ಠಾಕೂರ್‌ ವಿರುದ್ಧವೇ ಅಸಮಾಧಾನ ಕೇಳಿಬರುತ್ತಿದೆ. ಚುನಾವಣೆ ವೇಳೆ ಜನರಿಗೆ ಸರಕಾರದ ಸಾಧನೆ ಮನವರಿಕೆ ಸೇರಿ ಹಲವು ವಿಷಯಗಳನ್ನು ಜನರಿಗೆ ತಿಳಿಸದಿರುವುದು ಸೇರಿ ಸೋಲಿಗೆ ವಿವಿಧ ಕಾರಣಗಳನ್ನು ಹುಡುಕುತ್ತಿದ್ದು, ಜೈರಾಮ್‌ ಠಾಕೂರ್‌ ಅವರ ನಾಯಕತ್ವದ ಕುರಿತು ಸಹ ಪ್ರಶ್ನೆಗಳು ಉದ್ಭವಿಸುತ್ತಿವೆ. ಹಾಗಾಗಿ ಇಲ್ಲಿ ಸಹ ನಾಯಕತ್ವ ಬದಲಾವಣೆ ಸಾಧ್ಯತೆ ಇದೆ. 3 ರಾಜ್ಯಗಳ ಮುಖಂಡರಿಗೆ ಧೈರ್ಯ ಹೇಳದ ಹೈಕಮಾಂಡ್‌ ಯಾವುದೇ ಚುನಾವಣೆ ಇರಲಿ, ಉಪ ಚುನಾವಣೆ ಇರಲಿ ಪಕ್ಷದ ಪ್ರದರ್ಶನದ ಕುರಿತು ಬಿಜೆಪಿ ಹೈಕಮಾಂಡ್‌ ಶುಭ ಕೋರುತ್ತಿತ್ತು. ಗೆದ್ದರೆ ಅಭಿನಂದನೆ, ಸೋತರೆ ಮುಂದಿನ ದಿನಗಳಲ್ಲಿ ಪಕ್ಷ ಬಲವರ್ಧನೆ ಎನ್ನುತ್ತಿತ್ತು. ಆದರೆ, ಹಿಮಾಚಲ ಪ್ರದೇಶ, ರಾಜಸ್ಥಾನದಲ್ಲಿಪಕ್ಷದ ಅಭ್ಯರ್ಥಿಗಳು ಸೋತ ಕಾರಣ ರಾಜ್ಯ ಘಟಕ ಅಧ್ಯಕ್ಷರು ಸೇರಿ ಯಾರಿಗೂ ಹೈಕಮಾಂಡ್‌ನಿಂದ ಧೈರ್ಯ ತುಂಬುವ ಕೆಲಸವಾಗಿಲ್ಲ. ಕರ್ನಾಟಕದಲ್ಲಿ ಎರಡು ಕ್ಷೇತ್ರಗಳಲ್ಲಿ ಒಂದು ಕ್ಷೇತ್ರ ಬಿಜೆಪಿ ಪಾಲಾದರೂ ಹೈಕಮಾಂಡ್‌ನಿಂದ ಪ್ರತಿಕ್ರಿಯೆ ಬಂದಿಲ್ಲ. ಇಲ್ಲೆಲ್ಲ ಪಕ್ಷದ ಪ್ರದರ್ಶನದ ಕುರಿತು ಹೈಕಮಾಂಡ್‌ ಅಸಮಾಧನಗೊಂಡಿದೆ ಎಂದು ಹೇಳಲಾಗುತ್ತಿದೆ. ಅತ್ತ, ಗೆಲುವು ಕಂಡ ರಾಜ್ಯಗಳ ಬಿಜೆಪಿ ಮುಖಂಡರಿಗೂ ಅಭಿನಂದನೆ ಸಲ್ಲಿಸದಿರುವುದು ಒಟ್ಟಾರೆ ಫಲಿತಾಂಶವು ಹೈಕಮಾಂಡ್‌ಗೆ ಸಂಪೂರ್ಣವಾಗಿ ತೃಪ್ತಿ ತಂದಿಲ್ಲಎಂಬುದು ಸ್ಪಷ್ಟವಾಗಿದೆ.