ಕ್ರಿಪ್ಟೋ ಕರೆನ್ಸಿ ನಿಯಂತ್ರಣ ಕುರಿತು ಆರ್‌ಬಿಐ ಹಾಗೂ ವಹಿವಾಟುದಾರರ ನಡುವೆ ಮೊದಲ ಸಭೆ!

ಮುಂಬಯಿ: ಭಾರತದಲ್ಲಿ ಕ್ರಿಪ್ಟೋ ಕರೆನ್ಸಿಗಳ ಬಳಕೆ ಹೆಚ್ಚುತ್ತಿರುವಂತೆ, ಇದರ ಬಗ್ಗೆ ಹಾಗೂ ಕ್ರಿಪ್ಟೋ ಕರೆನ್ಸಿ ವಹಿವಾಟುದಾರರ ನಡುವೆ ಮೊದಲ ಸಭೆ ನಡೆದಿದೆ. ನವೆಂಬರ್‌ 2ರಂದು ನಡೆದ ಈ ಸಭೆಯಲ್ಲಿ ಕ್ರಿಪ್ಟೋ ಕರೆನ್ಸಿಗಳ ಬಗ್ಗೆ ಹಲವು ಆಯಾಮಗಳಲ್ಲಿ ಚರ್ಚಿಸಲಾಗಿದೆ. ಕ್ರಿಪ್ಟೋ ಕರೆನ್ಸಿಗಳನ್ನು ಪೂರೈಸುತ್ತಿರುವವರು ಯಾರು? ಭಾರತದಲ್ಲಿಇದರ ಮೈನಿಂಗ್‌ ನಡೆಯುತ್ತಿದೆಯೇ? ಭಾರತದಲ್ಲಿಎಷ್ಟು ಕ್ರಿಪೊ್ಟಕರೆನ್ಸಿಗಳು ಇವೆ? ಅವುಗಳಲ್ಲಿಯಾವುದಕ್ಕೆ ಮಾನ್ಯತೆ ನೀಡಬುದು? ಹೂಡಿಕೆದಾರರ ರಕ್ಷಣೆಗೆ ಏನು ಕ್ರಮಗಳಿವೆ? ಇತ್ಯಾದಿ ಪ್ರಶ್ನೆಗಳನ್ನು ಕೇಳಲಾಯಿತು. ಒಂದು ವೇಳೆ ಕ್ರಿಪೊ್ಟ ಕರೆನ್ಸಿಗಳನ್ನು ನಿಯಂತ್ರಕ ವ್ಯವಸ್ಥೆಗೆ ತಂದರೆ ಏನು ಮಾಡಬೇಕು ಎಂಬುದರ ಬಗ್ಗೆ ಚರ್ಚಿಸಲಾಯಿತು. ಆರ್‌ಬಿಐ ವಕ್ತಾರರು ಈ ಬಗ್ಗೆ ಪ್ರತಿಕ್ರಿಯಿಸಿಲ್ಲ. ಭಾರತಕ್ಕೆ ಪ್ರವೇಶಿಸಿದ್ದು ಹೇಗೆ? ಕ್ರಿಪ್ಟೋ ಕರೆನ್ಸಿಗಳು ಭಾರತಕ್ಕೆ ಪ್ರವೇಶಿಸಿದ್ದು ಹೇಗೆ ಎಂಬುದರ ಬಗ್ಗೆ ಸ್ಪಷ್ಟತೆ ಇಲ್ಲ.ಇವುಗಳಿಗೆ ಯಾವುದೇ ವಿವರಗಳ ಅಧಿಕೃತ ಘೋಷಣೆಯ ಅಗತ್ಯ ಮತ್ತು ಕಾನೂನು ಚೌಕಟ್ಟು ಸದ್ಯಕ್ಕೆ ಇಲ್ಲದಿರುವುದರಿಂದ ಇವುಗಳ ಪ್ರವೇಶ ಹೇಗಾಯಿತು ಎಂಬುದು ಅಸ್ಪಷ್ಟ. ಹೂಡಿಕೆದಾರರ ಇ-ವ್ಯಾಲೆಟ್‌ಗಳಲ್ಲಿ ಎಷ್ಟು ಕ್ರಿಪ್ಟೋ ಕರೆನ್ಸಿಗಳು ಇವೆ ಎಂಬ ಅಂದಾಜು ಲೆಕ್ಕವೂ ಸಿಗುವುದಿಲ್ಲ. ಕ್ರಿಪ್ಟೋ ಕರೆನ್ಸಿಗಳ ವಿನಿಮಯ ಕೇಂದ್ರಗಳು ತಮ್ಮನ್ನು ಖರೀದಿದಾರ ಮತ್ತು ಮಾರಾಟಗಾರರ ನಡುವಣ ವಿನಿಯಮ ವೇದಿಕೆ ಎಂದು ಮಾತ್ರ ಗುರುತಿಸಿಕೊಳ್ಳುತ್ತಿವೆ. ಸದ್ಯದ ಪರಿಸ್ಥಿತಿಯಲ್ಲಿ ಯಾರಾದರೂ ವಿದೇಶದಲ್ಲಿ ಕ್ರಿಪ್ಟೋ ಕರೆನ್ಸಿಯನ್ನು ಖರೀದಿಸಿ ಭಾರತದಲ್ಲಿರುವ ಸ್ಥಳೀಯ ವಿನಿಮಯ ಕೇಂದ್ರದಲ್ಲಿ ಮಾರಾಟ ಮಾಡಿದರೂ ಗೊತ್ತಾಗುವುದಿಲ್ಲ. ಅಮೆರಿಕದಲ್ಲಿ ಬಿಡುಗಡೆಯಾಗುವ ಕ್ರಿಪ್ಟೋ ಕರೆನ್ಸಿ ಭಾರತದಲ್ಲಿ ಕೆಲವೇ ದಿನಗಳಲ್ಲಿ ಕೊಡು-ಕೊಳ್ಳುವಿಕೆಯಾಗುತ್ತದೆ. ಇದು ಹೇಗೆ? ಚೀನಾದಲ್ಲಿ ಕ್ರಿಪ್ಟೋ ಕರೆನ್ಸಿಗಳಿಗೆ ನಿಷೇಧ ವಿಧಿಸಲಾಗಿದೆ. ಆದರೆ ಆ ರೀತಿ ನಿಷೇಧ ವಿಧಿಸುವುದಕ್ಕಿಂತಲೂ ಕೆಲವು ನಿಯಂತ್ರಕ ಕ್ರಮಗಳೊಂದಿಗೆ ಭಾರತದಲ್ಲಿ ಅನುಮತಿ ನೀಡಬಹುದು ಎಂಬ ಸಲಹೆಗಳೂ ಇವೆ. ಮೂಲವನ್ನು ಪತ್ತೆಹಚ್ಚಲು ಸಾಧ್ಯವಾಗುವ ಸ್ವರೂಪಗಳು ಇರುವಂಥ ಕ್ರಿಪ್ಟೋ ಕರೆನ್ಸಿಗಳಿಗೆ ಅನುಮತಿ ನೀಡಬಹುದು ಎಂಬ ಅಭಿಪ್ರಾಯ ಇದೆ. ಅಕ್ರಮ ವರ್ಗಾವಣೆ ತಡೆಯಲು ಕ್ರಿಪ್ಟೋ ಕರೆನ್ಸಿಗಳಿಗೆ ಕೆವೈಸಿ ಪ್ರಕ್ರಿಯೆಯನ್ನೂ ಅಳವಡಿಸಲು ತಜ್ಞರು ಸಲಹೆ ನೀಡಿದ್ದಾರೆ. ವಿದೇಶಿಯರು ಸ್ಥಳೀಯ ವಿನಿಮಯ ಕೇಂದ್ರಗಳಲ್ಲಿ ವ್ಯವಹರಿಸದಂತೆ ನಿರ್ಬಂಧಿಸಬಹುದು. ಕ್ರಿಪ್ಟೋ ಕರೆನ್ಸಿಗಳ ಬಳಕೆ ಯಾವುದೇ ನಿಯಂತ್ರಕ ವ್ಯವಸ್ಥೆ ಇಲ್ಲದೆ ವ್ಯಾಪಕ ಚಲಾವಣೆಗೀಡಾದರೆ ಹಣಕಾಸು ಅಸ್ಥಿರತೆ ಉಂಟಾಗಬಹುದು ಎಂಬ ಆತಂಕ ಆರ್‌ಬಿಐಗೆ ಇದೆ. ಹೊಸ ಕ್ರಿಪ್ಟೋ ಕರೆನ್ಸಿಗಳು ಬಿಡುಗಡೆಯಾಗುತ್ತಿರುವುದರಿಂದ ಅವುಗಳ ಬಳಕೆಯೂ ಹೆಚ್ಚುತ್ತಿದೆ. ಭಾರತದಲ್ಲಿ ಅಂದಾಜು 2 ಕೋಟಿ ಹೂಡಿಕೆದಾರರು 4-5 ಶತಕೋಟಿ ಡಾಲರ್‌ ಮೌಲ್ಯದ ಕ್ರಿಪ್ಟೋ ಕರೆನ್ಸಿಗಳನ್ನು (ಅಂದಾಜು 29,600-37,000 ಕೋಟಿ ರೂ.) ಹೊಂದಿದ್ದಾರೆ ಎನ್ನಲಾಗಿದೆ. ಒಂದೇ ಅಲ್ಲ: ಕೇವಲ ಬಿಟ್‌ ಕಾಯಿನ್‌ ಮಾತ್ರವಲ್ಲದೆ ಸಾವಿರಾರು ಕ್ರಿಪ್ಟೋ ಕರೆನ್ಸಿಗಳು ಚಲಾವಣೆಯಲ್ಲಿವೆ. ಆದ್ದರಿಂದ ಕ್ರಿಪ್ಟೋ ಕರೆನ್ಸಿಯನ್ನು ಒಂದು ಆಸ್ತಿ ಎಂದು ಪರಿಗಣಿಸಬೇಕು, ಕರೆನ್ಸಿ ಎಂದು ಪರಿಗಣಿಸಬಾರದು ಎನ್ನುತ್ತಾರೆ ತಜ್ಞರು. ಸೈಬರ್‌ ದಾಳಿ ಸಂಭವ: ಕ್ರಿಪ್ಟೋ ಕರೆನ್ಸಿಗಳ ದರಗಳು ಗಗನಕ್ಕೇರಿರುವುದರಿಂದ ಸೈಬರ್‌ ದಾಳಿಗೆ ಗುರಿಯಾಗುವ ಅಪಾಯಗಳು ಹೆಚ್ಚು ಎಂದು ವರದಿಯಾಗಿದೆ. ಝೆಬ್‌ಪೇ ಎಂಬುದು ಹಳೆಯ ಮತ್ತು ದೊಡ್ಡ ಕ್ರಿಪ್ಟೋ ಕರೆನ್ಸಿ ವಿನಿಮಯ ಕೇಂದ್ರಗಳಲ್ಲೊಂದು. ಆಗಿಂದಾಗ್ಗೆ ಸೈಬರ್‌ ದಾಳಿಗೆ ಗುರಿಯಾಗುತ್ತದೆ. ಇದರಿಂದ ಹೂಡಿಕೆದಾರರಿಗೆ ಅಪಾರ ನಷ್ಟವಾಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಸೈಬರ್‌ ದಾಳಿಗಳನ್ನು ಪತ್ತೆ ಹಚ್ಚುವ ಮತ್ತು ತಡೆಯುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಬೇಕು ಎನ್ನುತ್ತಾರೆ ತಜ್ಞರು. ಪ್ರಮುಖ ಕ್ರಿಪ್ಟೋ ಕರೆನ್ಸಿ ವಿನಿಮಯ ಕೇಂದ್ರಗಳು ಇತ್ತೀಚಿನ ತಿಂಗಳುಗಳಲ್ಲಿ ತಿಂಗಳಿಗೆ 2-3 ಸಲ ಸೈಬರ್‌ ದಾಳಿಗೆ ಗುರಿಯಾಗಿವೆ. ಆದ್ದರಿಂದ ಇಂಥ ಕೇಂದ್ರಗಳು ಸೈಬರ್‌ ದಾಳಿ ತಡೆಗೆ ಕ್ರಮಗಳನ್ನು ಕೈಗೊಳ್ಳುತ್ತಿವೆ.