ಕ್ರಿಪ್ಟೋ ಕರಡು ಮಸೂದೆ: ಕ್ರಿಪ್ಟೋಕರೆನ್ಸಿಯನ್ನು ಆಸ್ತಿಯಾಗಿ ಪರಿಗಣಿಸಲು ಮುಂದಾದ ಸರಕಾರ
ಕೇಂದ್ರ ಸರಕಾರ ಕ್ರಿಪ್ಟೋಕರೆನ್ಸಿ ಮಸೂದೆ ಜಾರಿಗೆ ತರಲು ಉದ್ದೇಶಿಸಿದ್ದು, ವರ್ಚುವಲ್ ಕರೆನ್ಸಿಗಳ ಬಳಕೆಯ ಪ್ರಕರಣಗಳ ಆಧಾರದ ಮೇಲೆ ಅವುಗಳನ್ನು ವಿಭಜಿಸಲು ಕರಡು ಮಸೂದೆಯಲ್ಲಿ ಉದ್ದೇಶಿಸಿದೆ.
Admin
0
4
ಹೊಸದಿಲ್ಲಿ: ತೆರಿಗೆ ಸೇರಿದಂತೆ ಎಲ್ಲಾ ಉದ್ದೇಶಗಳಿಗೆ ಕ್ರಿಪ್ಟೋ ಕರೆನ್ಸಿಯನ್ನು ಸರಕು/ಆಸ್ತಿಯಾಗಿ ವ್ಯಾಖ್ಯಾನಿಸಲು ಮುಂದಾಗಿದೆ.
ವರ್ಚುವಲ್ ಕರೆನ್ಸಿಗಳ ಬಳಕೆಯ ಪ್ರಕರಣಗಳ ಆಧಾರದ ಮೇಲೆ ಅವುಗಳನ್ನು ವಿಭಜಿಸಲು ಕರಡು ಮಸೂದೆಯಲ್ಲಿ ಉದ್ದೇಶಿಸಲಾಗಿದೆ. ಕ್ರಿಪ್ಟೋಕರೆನ್ಸಿಗಳನ್ನು ಬಳಸಿದ ತಂತ್ರಜ್ಞಾನದ ಪ್ರಕಾರ ವರ್ಗೀಕರಿಸುವುದು ಇದೇ ಮೊದಲು. ಆದರೆ ಸರ್ಕಾರದ ಗಮನವು ನಿಯಂತ್ರಕ ಉದ್ದೇಶಗಳಿಗಾಗಿ ಸ್ವತ್ತು ವರ್ಗದ ಅಂತಿಮ ಬಳಕೆಯ ಮೇಲೆ ಆಧಾರಿತವಾಗಿದೆ.
ಈ ಕ್ರಮವು ಕ್ರಿಪ್ಟೋ ಹೂಡಿಕೆದಾರರಿಗೆ ನೈತಿಕ ಸ್ಥೈರ್ಯ ತುಂಬಬಹುದು, ಇದು ಕ್ರಿಪ್ಟೋಕರೆನ್ಸಿಗಳ ಶಿಕ್ಷಣ, ಅರಿವು, ಹೂಡಿಕೆ ಮತ್ತು ಸ್ವೀಕಾರವನ್ನು ಹೆಚ್ಚಿಸುತ್ತದೆ ಎಂದು ಉದ್ಯಮದ ವ್ಯಕ್ತಿಗಳು ಹೇಳಿದ್ದಾರೆ.
ಉದ್ಯಮದ ತಜ್ಞರು ಮತ್ತು ವಿನಿಮಯಗಳು ಸರಕಾರದ ನಡೆಯ ಬಗ್ಗೆ ಸಕಾರಾತ್ಮಕವಾಗಿವೆ ಮತ್ತು ಸರ್ಕಾರದ ಉದ್ದೇಶಗಳನ್ನು ಸ್ವಾಗತಿಸುತ್ತಿವೆ. ಆದಾಗ್ಯೂ, ತಾವು ಹೊಂದಿರುವ ಗೊಂದಲಗಳ ನಿವಾರಣೆಗೆ, ಹೆಚ್ಚಿನ ಸ್ಪಷ್ಟತೆಗಾಗಿ ಮಸೂದೆಯನ್ನು ಇವರು ಎದುರು ನೋಡುತ್ತಿದ್ದಾರೆ.
ಉದ್ಯಮದ ತಜ್ಞರು ಮತ್ತು ವಿನಿಮಯಗಳು ಹೇಳುವುದೇನು?
ಭಾರತದಲ್ಲಿ ಸರಿಯಾದ ರೀತಿಯ ನಿಯಮಗಳನ್ನು ಹೊಂದಲು ಕ್ರಿಪ್ಟೋವನ್ನು ವರ್ಗೀಕರಿಸುವುದು ಬಹಳ ಮುಖ್ಯ ಎಂದು ವಜೀರ್ ಎಕ್ಸ್‌ನ ಸಂಸ್ಥಾಪಕ ಮತ್ತು ಸಿಇಒ ನಿಶ್ಚಲ್ ಶೆಟ್ಟಿ ಹೇಳಿದ್ದಾರೆ. ಕ್ರಿಪ್ಟೋವನ್ನು ಪ್ರಾಥಮಿಕವಾಗಿ ಜಾಗತಿಕ ಮಟ್ಟದಲ್ಲಿ ನಾಲ್ಕು ಪ್ರಮುಖ ವರ್ಗಗಳಾಗಿ ವರ್ಗೀಕರಿಸಲಾಗಿದೆ: ಆಸ್ತಿ, ಉಪಯುಕ್ತತೆ, ಕರೆನ್ಸಿ ಮತ್ತು ಭದ್ರತೆ. "ಕ್ರಿಪ್ಟೋ ಉದ್ಯಮಕ್ಕೆ ಈ ನಡೆಯು ತುಂಬಾ ಸಕಾರಾತ್ಮಕವಾಗಿದೆ ಮತ್ತು ಕ್ರಿಪ್ಟೋ ನಿಯಂತ್ರಣದ ಕಡೆಗೆ ಸರ್ಕಾರವು ಈ ದಿಕ್ಕನ್ನು ತೆಗೆದುಕೊಳ್ಳುತ್ತಿರುವುದಕ್ಕೆ ನನಗೆ ಸಂತೋಷವಾಗಿದೆ," ಎಂದು ಅವರು ತಿಳಿಸಿದ್ದಾರೆ.
ಕ್ರಿಪ್ಟೋ ಕರೆನ್ಸಿಯನ್ನು ಸ್ವತ್ತುಗಳೆಂದು ಗುರುತಿಸುವ ಕರಡು ಮಸೂದೆಯನ್ನು ತರಲು ಸರ್ಕಾರ ಯೋಜಿಸಿದೆ. ಇದು ಸರಿಯಾದ ದಿಕ್ಕಿನಲ್ಲಿ ಒಂದು ದೊಡ್ಡ ಹೆಜ್ಜೆಯಾಗಿದೆ. "ಕ್ರಿಪ್ಟೋ ಮಸೂದೆಯನ್ನು ಸರಿಯಾದ ಪರಿಗಣನೆ ಮತ್ತು ಬುದ್ದಿಮತ್ತೆಯೊಂದಿಗೆ ರಚಿಸುವುದು ಭಾರತದ ಕ್ರಿಪ್ಟೋ ಉದ್ಯಮಕ್ಕೆ ಗೇಮ್‌ ಚೇಂಜರ್‌ ಆಗಲಿದೆ," ಎಂದು ಮುದ್ರೆಕ್ಸ್‌ ಸಿಇಒ ಮತ್ತು ಸಹ ಸಂಸ್ಥಾಪಕ ಎಡುಲ್‌ ಪಟೇಲ್‌ ಹೇಳಿದ್ದಾರೆ.
ಕ್ರಿಪ್ಟೋಕರೆನ್ಸಿಗಳನ್ನು ಬ್ಲಾಕ್‌ಚೈನ್ ತಂತ್ರಜ್ಞಾನದ ವಿವಿಧ ವ್ಯವಹಾರ ಬಳಕೆಯ ಸಂದರ್ಭಗಳಲ್ಲಿ ಪೂರೈಸಲು ವಿನ್ಯಾಸಗೊಳಿಸಲಾಗಿದೆ. "ಇದನ್ನು ಒಪ್ಪಿಕೊಳ್ಳುವುದು ಮತ್ತು ಕ್ರಿಪ್ಟೋಕರೆನ್ಸಿಗಳ ವರ್ಗೀಕರಣಕ್ಕೆ ಕ್ರಮಗಳನ್ನು ತೆಗೆದುಕೊಳ್ಳುವುದು ಭಾರತೀಯ ಸರ್ಕಾರದ ಒಂದು ಉತ್ತಮ ಕ್ರಮವಾಗಿದೆ. ಇದು ಪ್ರಬುದ್ಧ ಮತ್ತು ಸರ್ಕಾರದ ಉತ್ತಮ ಚಿಂತನೆಯ ಹೆಜ್ಜೆ" ಎಂದು itsblockchain.comನ ಸಂಸ್ಥಾಪಕ ಹಿತೇಶ್‌ ಮಾಲ್ವಿಯಾ ಅಭಿಪ್ರಾಯಪಟ್ಟಿದ್ದಾರೆ.
ಕ್ರಿಪ್ಟೋಕರೆನ್ಸಿಯ ವರ್ಗೀಕರಣವು ಹೂಡಿಕೆದಾರರಿಗೆ ಅವುಗಳ ಸ್ವರೂಪ, ಉಪಯೋಗಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ಕ್ರಿಪ್ಟೋಕರೆನ್ಸಿಗಳ ಬಳಸಲು ಸಹಾಯ ಮಾಡುತ್ತದೆ. ಹಾಗಾಗಿ ಅವರು ತಾವೇ ಸರಿಯಾದ ಹೂಡಿಕೆ ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದು. ಈ ಹಂತವು ಹೂಡಿಕೆದಾರರನ್ನು ವಿವಿಧ ಕ್ರಿಪ್ಟೋಕರೆನ್ಸಿ-ಸಂಬಂಧಿತ ಹಗರಣಗಳಿಂದ ರಕ್ಷಿಸುತ್ತದೆ ಎಂದು ಅವರು ವಿವರಿಸಿದ್ದಾರೆ.
ಕ್ರಿಪ್ಟೋಗಳ ಸುತ್ತ ಸ್ಪಷ್ಟ ನಿಯಂತ್ರಕ ಚೌಕಟ್ಟನ್ನು ಹೊಂದಿರುವುದು ಹೂಡಿಕೆದಾರರು, ವ್ಯವಹಾರಗಳು ಮತ್ತು ಉದ್ಯಮಿಗಳಿಗೆ ಈ ಉದ್ಯಮದಲ್ಲಿ ವಿಶ್ವಾಸದಿಂದ ಭಾಗವಹಿಸಲು ಸಹಾಯ ಮಾಡುತ್ತದೆ. "ನಾವು ಸರ್ಕಾರದಿಂದ ಮುಂಬರುವ ಮಾರ್ಗಸೂಚಿಗಳು ಮತ್ತು ನೀತಿಗಳನ್ನು ಎದುರು ನೋಡುತ್ತಿದ್ದೇವೆ. ಕ್ರಿಪ್ಟೋಗಳನ್ನು ಆಸ್ತಿ ವರ್ಗವಾಗಿ ವರ್ಗೀಕರಿಸಲಾಗುವುದು ಮತ್ತು ಇತರ ಹಣಕಾಸು ಮಾರುಕಟ್ಟೆಗಳಂತೆ ಅವರ ತೆರಿಗೆಯ ಮೇಲೆ ಕಾನೂನುಗಳು ಜಾರಿಯಲ್ಲಿರುತ್ತವೆ ಎಂದು ನಾವು ಭಾವಿಸುತ್ತೇವೆ" ಎಂದು ಝೆಬ್‌ಪೇ ಸಹ ಸಿಇಒ ಅವಿನಾಶ್‌ ಶೇಖರ್‌ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
