ಕೊರೊನಾ 3ನೇ ಅಲೆ ಎದುರಿಸಲು ಕೇಂದ್ರದಿಂದ ಸಿದ್ಧತೆ, ಔಷಧ ದಾಸ್ತಾನಿಗೆ ಮುಂದಾದ ಸರಕಾರ

ಹೊಸದಿಲ್ಲಿ: ಕೊರೊನಾ ಸೋಂಕಿನ ಮೂರನೇ ಅಲೆ ಎದುರಿಸಲು ಸಿದ್ಧವಾಗುತ್ತಿರುವ ಕೇಂದ್ರ ಸರಕಾರವು, ಕನಿಷ್ಠ 30 ದಿನಗಳಿಗೆ ಸಾಲುವಷ್ಟು ಅಗತ್ಯ ಔಷಧಗಳನ್ನು ದಾಸ್ತಾನು ಮಾಡಿಕೊಳ್ಳಲು ನಿರ್ಧರಿಸಿದೆ. ಕೊರೊನಾ ಚಿಕಿತ್ಸೆಯಲ್ಲಿ ಬಳಸುವ ಪ್ಯಾರಾಸೆಟಮಾಲ್‌, ರೆಮ್‌ಡಿಸಿವಿರ್‌, ಫೆವಿಪಿರಾವಿರ್‌ಗಳ ಜತೆಗೆ ಆ್ಯಂಟಿಬಯಾಟೆಕ್‌, ವಿಟಮಿನ್‌ ಔಷಧಗಳನ್ನು ದಾಸ್ತಾನು ಮಾಡಿಟ್ಟುಕೊಳ್ಳಲು ಸರಕಾರ ತೀರ್ಮಾನಿಸಿದೆ. ಔಷಧ ಉತ್ಪಾದಕ ಸಂಸ್ಥೆಗಳಿಗೆ ಮುಂಗಡವನ್ನೂ ಪಾವತಿಸಿದೆ. ಖಾಸಗಿ ಆಸ್ಪತ್ರೆಗಳು ಸಹ ಈ ಔಷಧಗಳನ್ನು ದಾಸ್ತಾನು ಮಾಡಿಕೊಳ್ಳಬೇಕು ಎಂದು ಸರಕಾರ ಸೂಚಿಸಿದೆ. ದೇಶದಲ್ಲಿ ಆಗಸ್ಟ್‌ ವೇಳೆಗೆ ಮೂರನೇ ಅಲೆ ಅಪ್ಪಳಿಸಬಹುದು ಎಂದು ಅಂದಾಜಿಸಲಾಗಿದೆ. ದಕ್ಷಿಣ ಆಫ್ರಿಕಾದ 23 ದೇಶಗಳಲ್ಲಿ ಈಗಾಗಲೇ ಮೂರನೇ ಅಲೆ ಕಾಣಿಸಿಕೊಂಡಿದೆ. ಡೆಲ್ಟಾ ಕಾರಣ"ದೇಶಾದ್ಯಂತ ನಿತ್ಯ ದಾಖಲಾಗುತ್ತಿರುವ ಕೊರೊನಾ ಸೋಂಕಿನ ಹೊಸ ಪ್ರಕರಣಗಳಲ್ಲಿ ಶೇ.80ರಷ್ಟು ಡೆಲ್ಟಾ ರೂಪಾಂತರಿ ಪ್ರಕರಣಗಳಾಗಿವೆ. ಇದೇ ರೀತಿ ರೂಪಾಂತರಿ ಮೈರಾಣುಗಳ ಸಂಖ್ಯೆ ಹೆಚ್ಚಾದರೆ, ಸೋಂಕಿತರ ಸಂಖ್ಯೆಯೂ ಹೆಚ್ಚಲಿದೆ. ಮೂರನೇ ಅಲೆಗೂ ಇದೇ ಕಾರಣವಾಗಬಹುದು," ಎಂದು ಕೊರೊನಾ ಕುರಿತ ಉನ್ನತ ಸಮಿತಿ ಅಧ್ಯಕ್ಷ ಡಾ.ಎನ್‌.ಕೆ.ಅರೋರಾ ತಿಳಿಸಿದ್ದಾರೆ. ''ಅಲ್ಫಾ ರೂಪಾಂತರಿಗಿಂತ ಡೆಲ್ಟಾ ರೂಪಾಂತರಿಯು ಶೇ.40-60ರಷ್ಟು ಹೆಚ್ಚು ಪ್ರಸರಣ ಸಾಮರ್ಥ್ಯ ಹೊಂದಿದೆ. ಇವು ಈಗಾಗಲೇ ಬ್ರಿಟನ್‌, ಅಮೆರಿಕ ಸೇರಿ 80ಕ್ಕೂ ಅಧಿಕ ರಾಷ್ಟ್ರಗಳಿಗೆ ವ್ಯಾಪಿಸಿವೆ. ಡೆಲ್ಟಾ ರೂಪಾಂತರಿಯು ಹೆಚ್ಚು ಮಾರಣಾಂತಿಕ ಎಂಬುದು ಈಗಾಗಲೇ ಸಾಬೀತಾಗಿದೆ. ಜನ ಲಸಿಕೆ ಪಡೆಯುವುದು ಹಾಗೂ ಮಾಸ್ಕ್‌ ಧಾರಣೆಯಂತಹ ಮುಂಜಾಗ್ರತೆ ಕ್ರಮ ಕೈಗೊಳ್ಳುವುದೇ ಸದ್ಯದ ಪರಿಹಾರ,'' ಎಂದು ಅವರು ತಿಳಿಸಿದ್ದಾರೆ.