ಕೇಂದ್ರ ಸಂಪುಟಕ್ಕಿಂತಲೂ ದೊಡ್ಡದಾದ ತಿರುಪತಿ ದೇವಸ್ಥಾನ ಮಂಡಳಿ: 81 ಸದಸ್ಯರ ನೇಮಕ

ತಿರುಪತಿ: ತಿರುಮಲ ದೇವಸ್ಥಾನಂ (ಟಿಟಿಡಿ) ಮಂಡಳಿಗೆ 29 ಸದಸ್ಯರು ಮತ್ತು 52 ವಿಶೇಷ ಆಹ್ವಾನಿತರನ್ನು ಸರ್ಕಾರ ಗುರುವಾರ ನೇಮಕ ಮಾಡಿದೆ. ತಿರುಮಲದಲ್ಲಿ ಬಾಲಾಜಿ ದೇವಸ್ಥಾನವನ್ನು ನಿರ್ವಹಣೆ ಮಾಡುತ್ತಿರುವ ಮಂಡಳಿಯನ್ನು ಬೃಹತ್ ಮಟ್ಟದಲ್ಲಿ ಹಿಗ್ಗಿಸಲಾಗಿದೆ. ಇದು ವಿಶ್ವದ ಅತಿ ಶ್ರೀಮಂತ ಹಿಂದೂ ದೇವಾಲಯ ಸಂಸ್ಥೆಯಾಗಿರುವ ಟಿಟಿಡಿಯ ಇತಿಹಾಸದಲ್ಲಿಯೇ ಅತ್ಯಂತ ದೊಡ್ಡ ಮಂಡಳಿಯಾಗಿದೆ. ಈ ಹಿಂದಿನ ಟ್ರಸ್ಟ್ ಮಂಡಳಿ 40ಕ್ಕಿಂತಲೂ ಕಡಿಮೆ ಸದಸ್ಯರನ್ನು ಹೊಂದಿತ್ತು. ಆದರೆ ಈಗ ಹೊಸದಾಗಿ ರಚನೆಯಾಗಿರುವ ಮಂಡಳಿಯು ವಿಶೇಷ ಆಹ್ವಾನಿತರು ಮತ್ತು ಮಾಜಿ ಅಧಿಕಾರಿ ಸದಸ್ಯರನ್ನು ಒಳಗೊಂಡಂತೆ 81 ಸದಸ್ಯರನ್ನು ಹೊಂದಿದೆ. ವಿಶೇಷವೆಂದರೆ ಟಿಟಿಡಿ ಟ್ರಸ್ಟ್ ಮಂಡಳಿಯು ಕೇಂದ್ರ ಸಚಿವ ಸಂಪುಟಕ್ಕಿಂತಲೂ ದೊಡ್ಡದಾಗಿದೆ. ಕೇಂದ್ರ ಸಂಪುಟವು ಗರಿಷ್ಠ 81 ಸಚಿವರನ್ನು ಹೊಂದಲು ಅವಕಾಶವಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಸಂಪುಟ ಪ್ರಸ್ತುತ 78 ಸಚಿವರನ್ನು ಹೊಂದಿದೆ. ಅಂದರೆ ಟಿಟಿಡಿ ಕೇಂದ್ರ ಸಂಪುಟಕ್ಕಿಂತಲೂ ಮೂವರು ಹೆಚ್ಚು ಸದಸ್ಯರನ್ನು ಹೊಂದಿದೆ. ಟಿಟಿಡಿ ಟ್ರಸ್ಟ್ ಮಂಡಳಿಯಲ್ಲಿ ಇಂಡಿಯಾ ಸಿಮೆಂಟ್ಸ್ ಅಧ್ಯಕ್ಷ ಎನ್ ಶ್ರೀನಿವಾಸನ್, ಮೈ ಹೋಮ್ ಸಮೂಹದ ಅಧ್ಯಕ್ಷ ಜೆ ರಾಮೇಶ್ವರ ರಾವ್, ಹಿಟೆರೋ ಸಮೂಹದ ಅಧ್ಯಕ್ಷ ಬಿ ಪಾರ್ಥಸಾರಥಿ ರೆಡ್ಡಿ ಅವರನ್ನು ಮರಳಿ ನೇಮಕ ಮಾಡಲಾಗಿದೆ. ಆಂಧ್ರಪ್ರದೇಶದ ಭಾಗವಾಗಿದ್ದ ಮತ್ತೊಂದು ತೆಲುಗು ರಾಜ್ಯ ತೆಲಂಗಾಣದ ಏಳು ಸದಸ್ಯರು ಮಂಡಳಿಯಲ್ಲಿದ್ದಾರೆ. ಹಿಂದಿನ ಮಂಡಳಿಯಲ್ಲಿ ಒಂಬತ್ತು ಸದಸ್ಯರು ಸ್ಥಾನ ಪಡೆದಿದ್ದರು. ಮಂಡಳಿ ಸದಸ್ಯತ್ವಕ್ಕೆ ಭಾರಿ ಬೇಡಿಕೆ ಬರುತ್ತಿರುವ ಹಿನ್ನೆಲೆಯಲ್ಲಿ ವಿಶೇಷ ಆಹ್ವಾನಿತರ ವಿಭಾಗದಲ್ಲಿ ಅನೇಕ ವಿಐಪಿಗಳನ್ನು ಆಂಧ್ರ ಪ್ರದೇಶ ಸರ್ಕಾರ ನೇಮಕ ಮಾಡಿದೆ. ಅನೇಕ ಪ್ರಭಾವಿಗಳು ಟ್ರಸ್ಟ್ ಮಂಡಳಿಯಲ್ಲಿ ಸ್ಥಾನಕ್ಕಾಗಿ ಲಾಬಿ ನಡೆಸಿದ್ದರು. ರಾಜ್ಯ ಸರ್ಕಾರ ವಿಶೇಷ ಆಹ್ವಾನಿತರನ್ನು ಹೆಚ್ಚಾಗಿ ನೇಮಕ ಮಾಡುವ ಮೂಲಕ ಅವರಿಗೆ ಅವಕಾಶ ನೀಡಿದೆ. ಮೂರು ಆದೇಶಗಳು ರಚನೆ ಸಂಬಂಧ ರಾಜ್ಯ ಸರ್ಕಾರ ಮೂರು ಆದೇಶಗಳನ್ನು ಹೊರಡಿಸಿತ್ತು. ಟ್ರಸ್ಟ್ ಮಂಡಳಿ ಅಧ್ಯಕ್ಷರನ್ನಾಗಿ ಆಗಸ್ಟ್ 8ರಂದು ಮುಖ್ಯಮಂತ್ರಿ ವೈಎಸ್ ಜಗನ್ ಮೋಹನ್ ರೆಡ್ಡಿ ಅವರ ಚಿಕ್ಕಪ್ಪ ವೈವಿ ಸುಬ್ಬಾ ರೆಡ್ಡಿ ಅವರನ್ನು ನೇಮಿಸಲಾಗಿತ್ತು. ಮೊದಲ ಆದೇಶದಲ್ಲಿ 29 ಸದಸ್ಯರ ಟ್ರಸ್ಟ್ ಮಂಡಳಿ ರಚನೆ ಮಾಡಲಾಗಿತ್ತು. ಬಳಿಕ ಮತ್ತೊಂದು ಆದೇಶದಲ್ಲಿ ವಿಶೇಷ ಆಹ್ವಾನಿತರಾಗಿ ತಿರುಪತಿ ಶಾಸಕ ಭುಮನಾ ಕರುಣಾಕರ ರೆಡ್ಡಿ ಹಾಗೂ ಬ್ರಾಹ್ಮಣ ಕಾರ್ಪೊರೇಷನ್ ಅಧ್ಯಕ್ಷ ಸುಧಾಕರ್ ಅವರನ್ನು ನೇಮಿಸಲಾಗಿತ್ತು. ಮೂರನೇ ಆದೇಶದಲ್ಲಿ ಮತ್ತೆ 50 ವಿಶೇಷ ಆಹ್ವಾನಿತರನ್ನು ನೇಮಿಸಲಾಗಿದೆ. ಟ್ರಸ್ಟ್ ಸದಸ್ಯರ ಜತೆಗೆ ವಿಶೇಷ ಆಹ್ವಾನಿತರೂ ಸೌಲಭ್ಯಗಳನ್ನು ಪಡೆಯಲಿದ್ದಾರೆ. ಆದರೆ ಅವರಿಗೆ ಮತದಾನದ ಹಕ್ಕು ಇರುವುದಿಲ್ಲ. ಯಾವ ರಾಜ್ಯದಿಂದ ಎಷ್ಟು ಮಂದಿ?ಟಿಟಿಡಿ ಟ್ರಸ್ಟಿ ಪಟ್ಟಿಯಲ್ಲಿದ್ದ ಮೂವರು ಅಧಿಕಾರಿ ಸದಸ್ಯರನ್ನು ಹೊರತುಪಡಿಸಿದರೆ ಆಂಧ್ರಪ್ರದೇಶದ 10, ತೆಲಂಗಾಣದ 7, ಕರ್ನಾಟಕ, ಮಹಾರಾಷ್ಟ್ರ ಮತ್ತು ತಮಿಳುನಾಡಿನ ತಲಾ 2, ಪಶ್ಚಿಮ ಬಂಗಾಳ, ಗುಜರಾತ್ ಮತ್ತು ಪುದುಚೆರಿಯ ತಲಾ 1 ಸದಸ್ಯರನ್ನು ಟ್ರಸ್ಟ್ ಮಂಡಳಿ ಒಳಗೊಂಡಿದೆ. ಈ ಬೃಹತ್ ಗಾತ್ರದ ಮಂಡಳಿಯ ರಚನೆಯೊಂದಿಗೆ ಆಡಳಿತವು ಸಭೆಯ ವೇಳೆ ಮಂಡಳಿಯ ಸಭಾಗೃಹ, ಎಲ್ಲಾ 81 ಸದಸ್ಯರಿಗೆ ವಾಹನ ಹಾಗೂ ವಸತಿ ವ್ಯವಸ್ಥೆಗಳು ಸೇರಿದಂತೆ ಅಗತ್ಯ ಸವಲತ್ತುಗಳನ್ನು ಒದಗಿಸುವ ವ್ಯಾಪಕ ಬದಲಾವಣೆಗಳನ್ನು ಆರಂಭಿಸಬೇಕಿದೆ.