ಪ್ರಧಾನಿ ಮೋದಿ ಜನ್ಮದಿನಕ್ಕೆ ವಿಶೇಷ ಉಡುಗೊರೆ: ಒಂದೇ ದಿನ 2 ಕೋಟಿಗೂ ಅಧಿಕ ಡೋಸ್ ಲಸಿಕೆ ದಾಖಲೆ!
ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನದ ಅಂಗವಾಗಿ ಶುಕ್ರವಾರ ಲಸಿಕೆ ಅಭಿಯಾನಕ್ಕೆ ಹೆಚ್ಚಿನ ಒತ್ತು ನೀಡಿದ್ದರ ಫಲವಾಗಿ, ದೇಶಾದ್ಯಂತ ಒಂದೇ ದಿನ ಎರಡು ಕೋಟಿಗೂ ಅಧಿಕ ಕೋವಿಡ್ ಲಸಿಕೆಗಳನ್ನು ನೀಡಲಾಗಿದೆ.
Admin
0
7
ಹೊಸದಿಲ್ಲಿ: ಪ್ರಧಾನಿ ಅವರ ಜನ್ಮದಿನದಂದು (ಸೆ. 17) ಕೋವಿಡ್ ನೀಡುವ ಅಭಿಯಾನದಲ್ಲಿ ಭಾರತ ಜಾಗತಿಕ ದಾಖಲೆ ನಿರ್ಮಿಸಿದೆ. ಒಂದೇ ದಿನ ದೇಶಾದ್ಯಂತ 2 ಕೋಟಿಗೂ ಅಧಿಕ ಲಸಿಕೆಗಳನ್ನು ನೀಡುವ ಸಾಧನೆ ಮಾಡಲಾಗಿದೆ. ಪ್ರಧಾನಿ ಮೋದಿ ಅವರ ಜನ್ಮದಿನವನ್ನು ವಿಶೇಷವಾಗಿಸುವ ಸಲುವಾಗಿ ಕೋವಿಡ್ ಲಸಿಕೆ ಅಭಿಯಾನವನ್ನು ಚುರುಕುಗೊಳಿಸಿದ್ದರ ಫಲವಾಗಿ ಈ ಸಾಧನೆ ಸಾಧ್ಯವಾಗಿದೆ.
ಕೋವಿನ್ ಪೋರ್ಟಲ್‌ನಲ್ಲಿನ ದಾಖಲೆಗಳ ಪ್ರಕಾರ, ಶುಕ್ರವಾರ ಸಂಜೆ 5.45ರ ವೇಳೆಗೆ ದೇಶದಲ್ಲಿ 2.10 ಕೋಟಿಗೂ ಅಧಿಕ ಡೋಸ್‌ಗಳಷ್ಟು ಲಸಿಕೆ ನೀಡಲಾಗಿದೆ. ದಿನದಾದ್ಯಂತಕ್ಕೆ ಈ ಸಂಖ್ಯೆ ಮತ್ತಷ್ಟು ಹೆಚ್ಚಾಗಲಿದೆ. ಇದರೊಂದಿಗೆ ದೇಶದಲ್ಲಿ ಈವರೆಗೂ 78.68 ಕೋಟಿ ದಾಖಲೆಯ ಕೋವಿಡ್ ಲಸಿಕೆ ನೀಡಿದಂತಾಗಿದೆ.
ಕಳೆದ ಒಂದು ತಿಂಗಳಿಗೂ ಕಡಿಮೆ ಅವಧಿಯಲ್ಲಿ ಭಾರತ ಒಂದೇ ದಿನ ಒಂದು ಕೋಟಿಗೂ ಅಧಿಕ ಡೋಸ್ ಲಸಿಕೆ ನೀಡಿರುವುದು ಇದು ನಾಲ್ಕನೆಯ ಬಾರಿಯಾಗಿದೆ. ಆಗಸ್ಟ್ 27ರಂದು ಮೊದಲ ಬಾರಿ ಒಂದೇ ದಿನ ಒಂದು ಕೋಟಿಗೂ ಹೆಚ್ಚು ಡೋಸ್ ಲಸಿಕೆ ನೀಡಲಾಗಿತ್ತು. ಬಳಿಕ ಆಗಸ್ಟ್ 31 ಮತ್ತು ಸೆಪ್ಟೆಂಬರ್ 6ರಂದು ಕೂಡ ಈ ಸಾಧನೆ ಮಾಡಲಾಗಿತ್ತು.
ಸೆ. 17ರಂದು ಎರಡು ಕೋಟಿಗೂ ಹೆಚ್ಚು ಡೋಸ್ ನೀಡುವ ಮೂಲಕ ಭಾರತ ಈ ಕ್ಷೇತ್ರದಲ್ಲಿ ಅಭೂತಪೂರ್ವ ಸಾಧನೆ ಮಾಡಿದೆ. ಜಗತ್ತಿನಾದ್ಯಂತ ಲಸಿಕೆ ಅಭಿಯಾನ ಆರಂಭವಾಗಿ 9 ತಿಂಗಳಿಗೂ ಹೆಚ್ಚು ಸಮಯ ಕಳೆದಿದ್ದರೂ ಅನೇಕ ಅಭಿವೃದ್ಧಿ ಹೊಂದಿದ ದೇಶಗಳು ಸಹ ಈವರೆಗೂ ಒಂದು ಕೋಟಿ ಡೋಸ್ ಲಸಿಕೆ ನೀಡಲೂ ಸಾಧ್ಯವಾಗಿಲ್ಲ. ಈ ವಿಚಾರದಲ್ಲಿ ಭಾರತದ ಸಾಧನೆ ಗಮನಾರ್ಹವಾಗಿದೆ.
ಮೊದಲ 10 ಕೋಟಿ ಗಡಿಯನ್ನು ತಲುಪಲು ಭಾರತ 85 ದಿನಗಳನ್ನು ತೆಗೆದುಕೊಂಡಿತ್ತು. ನಂತರದ 10 ಕೋಟಿಗೆ 45 ದಿನ, 30 ಕೋಟಿಗೆ 29 ದಿನಗಳನ್ನು ತೆಗೆದುಕೊಂಡಿತ್ತು. 40 ಕೋಟಿ ಡೋಸ್ ದಾಟಲು 24 ದಿನಗಳು, 50 ಕೋಟಿಗೆ 20 ದಿನಗಳನ್ನು ತೆಗೆದುಕೊಳ್ಳಲಾಗಿತ್ತು. ಬಳಿಕ 60 ಕೋಟಿ ಡೋಸ್ ಗಡಿಯನ್ನು ಕೇವಲ 19 ದಿನಗಳಲ್ಲಿ ಮುಟ್ಟಿದ್ದರೆ, 60 ರಿಂದ 70 ಕೋಟಿಗೆ ತಲುಪಲು ಸೆಪ್ಟೆಂಬರ್ 7ರಂದು ಕೇವಲ 13 ದಿನ ತೆಗೆದುಕೊಂಡಿತ್ತು.
ಕರ್ನಾಟಕದಲ್ಲಿ ಸಾಧನೆಪ್ರಧಾನಿ ಜನ್ಮದಿನದಂದು ಕರ್ನಾಟಕದಲ್ಲಿ 20.76 ಲಕ್ಷ ಡೋಸ್ ಲಸಿಕೆಗಳನ್ನು ನೀಡಲಾಗಿದೆ. ಕರ್ನಾಟಕ ಇದುವರೆಗೂ 5.07 ಕೋಟಿ ಡೋಸ್ ಲಸಿಕೆಗಳನ್ನು ನೀಡಿದೆ. ಇವರಲ್ಲಿ 3.67 ಒಂದು ಡೋಸ್, ಹಾಗೂ 1.39 ಲಕ್ಷ ಎರಡೂ ಡೋಸ್ ಲಸಿಕೆ ಪಡೆದವರಿದ್ದಾರೆ. ಬೆಂಗಳೂರು ನಗರದಲ್ಲಿ ಶುಕ್ರವಾರ 3.14 ಲಕ್ಷ ಡೋಸ್ ಲಸಿಕೆ ಸಾಧಿಸಲಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನದ ಅಂಗವಾಗಿ ವ್ಯಾಪಕ ಕೋವಿಡ್ 19 ಲಸಿಕೆ ಕಾರ್ಯಕ್ರಮ ನಡೆಸುವಂತೆ ಆರೋಗ್ಯ ಸಚಿವ ಕರೆ ನೀಡಿದ್ದರು. ಇದು ಅವರ ಜನ್ಮದಿನಕ್ಕೆ ನೀಡುವ ಉಡುಗೊರೆ ಎಂದಿದ್ದರು. ಈ ಸಂದರ್ಭದಲ್ಲಿ ದೇಶದಲ್ಲಿ ಹೆಚ್ಚಿನ ಜನರು ಲಸಿಕೆ ಪಡೆದುಕೊಳ್ಳಲು ನೆರವಾಗುವಂತೆ ಬಿಜೆಪಿ ಘಟಕಗಳಿಗೆ ಸೂಚಿಸಲಾಗಿತ್ತು.
'ಲಸಿಕೆ ಸೇವೆಯು ಪ್ರಧಾನಿ ಅವರ ಜನ್ಮದಿನಕ್ಕೆ ಆರೋಗ್ಯ ಕಾರ್ಯಕರ್ತರು ಮತ್ತು ದೇಶವಾಸಿಗಳ ಪರವಾಗಿ ನೀಡಲಾದ ಉಡುಗೊರೆ. ನರೇಂದ್ರ ಮೋದಿ ಅವರ ಜನ್ಮದಿನದಂದು ಇಂದು, ಭಾರತವು ಒಂದು ದಿನದಲ್ಲಿ 2 ಕೋಟಿ ಡೋಸ್‌ನ ಐತಿಹಾಸಿಕ ಗುರಿ ದಾಟಿದೆ. ಈ ಮೂಲಕ ದಾಖಲೆ ಸೃಷ್ಟಿಸಿದೆ' ಎಂದು ಮನ್ಸುಖ್ ಟ್ವೀಟ್ ಮಾಡಿದ್ದಾರೆ.
