ಕೈ ಮೀರುತ್ತಿದೆ ಕೊರೊನಾ! ಆಮ್ಲಜನಕಕ್ಕೆ ಹಾಹಾಕಾರ! ರಾಜ್ಯದಲ್ಲಿ ಆಕ್ಸಿಜನ್‌ ವಾರ್‌ ರೂಮ್‌!

ಬೆಂಗಳೂರು/ಹೊಸದಿಲ್ಲಿ: ಕರ್ನಾಟಕವೂ ಸೇರಿದಂತೆ ಇಡೀ ದೇಶದಲ್ಲಿ ಕೊರೊನಾ ಸೋಂಕು ಕೈ ಮೀರುತ್ತಿರುವ ನಡುವೆಯೇ 'ಆಕ್ಸಿಜನ್‌ ಎಮರ್ಜೆನ್ಸಿ' ಎದುರಾಗಿದೆ. ನಿತ್ಯ 2 ಲಕ್ಷಕ್ಕೂ ಮೀರಿದ ಹೊಸ ಸೋಂಕಿನ ಪ್ರಕರಣಗಳ ಸ್ಫೋಟದ ಜತೆಗೆ ಎಲ್ಲೆಡೆ ಆಮ್ಲಜನಕ, ಐಸಿಯು ಹಾಸಿಗೆಗಳಿಗೆ ಹಾಹಾಕಾರ ಎದ್ದಿದೆ. ಅದರಲ್ಲೂಸೋಂಕು ಹೆಚ್ಚಾಗಿರುವ ಮಹಾರಾಷ್ಟ್ರ, ದಿಲ್ಲಿ, ಮಧ್ಯ ಪ್ರದೇಶ, ಕರ್ನಾಟಕ, ಗುಜರಾತ್‌ ಸೇರಿದಂತೆ 10ಕ್ಕೂ ಹೆಚ್ಚು ರಾಜ್ಯಗಳಲ್ಲಿಪರಿಸ್ಥಿತಿ ಗಂಭೀರವಾಗಿದೆ. ಉಸಿರಾಟದ ಸಮಸ್ಯೆಯಿಂದ ಆಸ್ಪತ್ರೆಗೆ ದಾಖಲಾಗುತ್ತಿರುವವರಿಗೆ ಬೆಡ್‌ ಸಿಗುತ್ತಿಲ್ಲ. ಒಂದು ವೇಳೆ ಬೆಡ್‌ ಸಿಕ್ಕರೂ ಜೀವವಾಯು ಆಕ್ಸಿಜನ್‌ ಸಿಗುತ್ತಿಲ್ಲ. ಎಲ್ಲೆಡೆ ಆಸ್ಪತ್ರೆಗೆ ದಾಖಲಾಗುತ್ತಿರುವ ರೋಗಿಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ದಿಢೀರ್‌ ಹೆಚ್ಚಿದ ಬೇಡಿಕೆಗೆ ತಕ್ಕಂತೆ ಆಮ್ಲಜನಕ ಪೂರೈಕೆ ಇಲ್ಲದಿರುವುದು ಇದಕ್ಕೆ ಕಾರಣ. ಮಧ್ಯಪ್ರದೇಶದ ಶಹ್ದೋಲ್‌ ಆಸ್ಪತ್ರೆಯಲ್ಲಿ ಆಮ್ಲಜನಕ ಸಿಗದೆ ಆರು ಮಂದಿ ಭಾನುವಾರ ಮೃತಪಟ್ಟಿದ್ದಾರೆ. ಈ ಮಧ್ಯೆ, ಆಮ್ಲಜನಕ ಪೂರೈಕೆ ಹೆಚ್ಚಳಕ್ಕೆ ಕೇಂದ್ರ ಸರಕಾರ ಹಲವು ಕ್ರಮಗಳನ್ನು ಪ್ರಕಟಿಸಿದೆ. ಆದರೂ ಸೋಂಕಿನ ಪ್ರಮಾಣ ಮಿತಿ ಮೀರುತ್ತಿರುವ ಹಿನ್ನೆಲೆಯಲ್ಲಿ ಪರಿಸ್ಥಿತಿ ನಿಯಂತ್ರಣಕ್ಕೆ ಸರಕಾರಗಳು ಮತ್ತು ಜಿಲ್ಲಾಡಳಿತಗಳು ಹರಸಾಹಸ ನಡೆಸುತ್ತಿವೆ. ಕೇಂದ್ರದ ಸಹಾಯ ಕೋರಿದ ಕೇಜ್ರಿವಾಲ್‌ ರಾಜಧಾನಿ ದಿಲ್ಲಿಯಲ್ಲಿ ಕೊರೊನಾ ಆರ್ಭಟ ತೀವ್ರಗೊಂಡಿದ್ದು, ಸೋಂಕಿತರ ಚಿಕಿತ್ಸೆಗೆ ಹಾಸಿಗೆ, ಆಮ್ಲಜನಕ ಒದಗಿಸುವಂತೆ ಸಿಎಂ ಕೇಜ್ರಿವಾಲ್‌ ಅವರು ಪ್ರಧಾನಿ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ. ''ನಮ್ಮ ಸರಕಾರದ ಸಕಲ ಪ್ರಯತ್ನಗಳೂ ಸೋಂಕಿನ ವೇಗಕ್ಕೆ ಇವು ಸರಿ ಹೊಂದುತ್ತಿಲ್ಲ. ಪರಿಸ್ಥಿತಿ ಕೈಮೀರಿದೆ. ಕೇಂದ್ರ ಸರಕಾರದ ಆಸ್ಪತ್ರೆಗಳಲ್ಲಿ ಕನಿಷ್ಠ 7 ಸಾವಿರ ಹಾಸಿಗೆಗಳನ್ನು ಮೀಸಲಿಡಬೇಕು. ತ್ವರಿತವಾಗಿ ಆಮ್ಲಜನಕದ ಸೌಕರ್ಯ ಕಲ್ಪಿಸಬೇಕು,'' ಎಂದಿದ್ದಾರೆ ಕೇಜ್ರಿವಾಲ್‌. 12 ದಿನಗಳಲ್ಲಿ ಪಾಸಿಟಿವಿಟಿ ದುಪ್ಪಟ್ಟು ದೇಶದಲ್ಲಿ ಕೊರೊನಾ ಸೋಂಕು ದೃಢಪಡುವ ಪ್ರಮಾಣ (ಪಾಸಿಟಿವಿಟಿ ರೇಟ್‌) ಕಳೆದ 12 ದಿನಗಳಲ್ಲಿದುಪ್ಪಟ್ಟಾಗಿದೆ. ಶೇ.8ರಿಂದ ಶೇ. 16.69ಕ್ಕೆ ಜಿಗಿದಿದೆ. ಇದರಿಂದ ಸೋಂಕು ವೇಗವಾಗಿ ಹರಡುತ್ತಿರುವುದು ಸ್ಪಷ್ಟವಾಗಿದೆ. ಕೇಂದ್ರದಿಂದ ತುರ್ತು ಕ್ರಮ ಆಮ್ಲಜನಕ ಬೇಡಿಕೆ ನೀಗಿಸುವ ಸಲುವಾಗಿ ಎಲ್ಲಾರಾಜ್ಯಗಳ ಸಾರ್ವಜನಿಕ ಆಸ್ಪತ್ರೆಗಳಲ್ಲಿ 300 ಆಮ್ಲಜನಕ ಉತ್ಪಾದನಾ ಘಟಕಗಳನ್ನು ತೆರೆಯಲು ಕೇಂದ್ರ ಸರಕಾರ ಅನುಮೋದನೆ ನೀಡಿದೆ. ಈಗಾಗಲೇ 201.58 ಕೋಟಿ ವೆಚ್ಚದಲ್ಲಿ 162 ಇಂತಹ ಘಟಕಗಳನ್ನು ಕರ್ನಾಟಕದಲ್ಲಿ 2 ಸೇರಿದಂತೆ ಹಲವು ರಾಜ್ಯಗಳಲ್ಲಿ ತೆರೆಯಲಾಗಿದೆ. ಏಪ್ರಿಲ್‌ ಅಂತ್ಯದ ವೇಳೆಗೆ 59, ಮೇ ಅಂತ್ಯದ ವೇಳೆಗೆ ಇನ್ನೂ 80 ಘಟಕಗಳು ತಲೆ ಎತ್ತಲಿವೆ ಎಂದು ಕೇಂದ್ರ ತಿಳಿಸಿದೆ. ಆಕ್ಸಿಜನ್‌ ಎಕ್ಸ್‌ಪ್ರೆಸ್‌ ರೈಲು: ಲಿಕ್ವಿಡ್‌ ಆಕ್ಸಿಜನ್‌ ಮತ್ತು ಆಕ್ಸಿಜನ್‌ ಸಿಲಿಂಡರ್‌ಗಳನ್ನು ತುರ್ತು ಅಗತ್ಯವಿರುವ ರಾಜ್ಯಗಳು, ನಗರಗಳಿಗೆ ಪೂರೈಸಲು ವಿಶೇಷ ರೈಲುಗಳನ್ನು ಓಡಿಸಲು ರೈಲ್ವೆ ಇಲಾಖೆ ನಿರ್ಧರಿಸಿದೆ. ರಾಜ್ಯದಲ್ಲಿ ಆಕ್ಸಿಜನ್‌ ವಾರ್‌ ರೂಮ್‌ ರಾಜ್ಯದಲ್ಲಿಆಕ್ಸಿಜನ್‌ ಪೂರೈಕೆಯಲ್ಲಿ ಕಂಡುಬಂದಿರುವ ತೊಂದರೆಯನ್ನು ನಿವಾರಿಸಲು ಆಕ್ಸಿಜನ್‌ ವಾರ್‌ ರೂಮ್‌ ಸ್ಥಾಪಿಸಲಾಗಿದೆ. ''ರಾಜ್ಯ ಡ್ರಗ್‌ ಕಂಟ್ರೋಲರ್‌ ಕಚೇರಿಯಲ್ಲಿ ಸ್ಥಾಪಿಸಲಾಗಿರುವ ಈ ವಾರ್‌ ರೂಂ ಸರಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳಲ್ಲಿಆಕ್ಸಿಜನ್‌ ಲಭ್ಯತೆಯನ್ನು ಖಾತ್ರಿಪಡಿಸಲಿದೆ,'' ಎಂದು ಆರೋಗ್ಯ ಸಚಿವ ಡಾ. ಕೆ. ಸುಧಾಕರ್‌ ಹೇಳಿದರು. ಕೇಂದ್ರ ಸರಕಾರದಿಂದ 7500 ದೊಡ್ಡ ಗಾತ್ರದ ಸಿಲಿಂಡರ್‌ಗಳಿಗೆ ಬೇಡಿಕೆ ಇಡಲಾಗಿದೆ. ಈ ಜಂಬೊ ಸಿಲಿಂಡರ್‌ಗಳನ್ನು ಆಕ್ಸಿಜನ್‌ ಪ್ಲಾಂಟ್‌ ಇಲ್ಲದಿರುವ ಖಾಸಗಿ ಆಸ್ಪತ್ರೆಗಳಿಗೆ ಒದಗಿಸಲಾಗುವುದು ಎಂದು ಸಚಿವ ಸುಧಾಕರ್‌ ತಿಳಿಸಿದ್ದಾರೆ. ಸಾಮರ್ಥ್ಯ ಮೀರಬಹುದು ಬೇಡಿಕೆ: ರಾಜ್ಯದಲ್ಲಿನಾಲ್ಕು ಆಕ್ಸಿಜನ್‌ ಬಾಟ್ಲಿಂಗ್‌ ಪ್ಲಾಂಟ್‌ಗಳಿವೆ. ಇವುಗಳ ಒಟ್ಟು ಉತ್ಪಾದನಾ ಸಾಮರ್ಥ್ಯ 800 ಮೆಟ್ರಿಕ್‌ ಟನ್‌ ಮಾತ್ರ. ಇದರಲ್ಲಿ200 ಟನ್‌ ವೈದ್ಯಕೀಯ ವಲಯಕ್ಕೆ, ಉಳಿದ ಭಾಗ ಕೈಗಾರಿಕೆಗೆ ಬಳಕೆಯಾಗುತ್ತದೆ. ಆದರೆ, ಈಗ ಕೆಲವು ದಿನಗಳಿಂದ ಆಕ್ಸಿಜನ್‌ ಬೇಡಿಕೆ ವಿಪರೀತವಾಗಿ ಏರಿದೆ. ಇದು ಸದ್ಯವೇ 600 ಮೆಟ್ರಿಕ್‌ ಟನ್‌ಗೆ ಏರುವ ಸಾಧ್ಯತೆ ಇದೆ. (ಮೊದಲನೇ ಅಲೆ ವೇಳೆ ಗರಿಷ್ಠ 600 ಮೆಟ್ರಿಕ್‌ ಟನ್‌ ಬಳಕೆಯಾಗಿತ್ತು.) ಹೀಗಾದಾಗ ಕೈಗಾರಿಕಾ ಬಳಕೆಯನ್ನು ನಿಲ್ಲಿಸಿ ವೈದ್ಯಕೀಯ ಕ್ಷೇತ್ರಕ್ಕೇ ನೀಡಬೇಕಾದೀತು. ಇದಕ್ಕೆ ಸೂಕ್ತವಾದ ವಿತರಣಾ ವ್ಯವಸ್ಥೆ ಮಾಡುವುದು ಅನಿವಾರ್ಯವಾಗಿದೆ. "ಆಸ್ಪತ್ರೆಗಳ ಆಕ್ಸಿಜನ್‌ ಬೇಡಿಯನ್ನು ಪೂರೈಸಲು ಸಾಧ್ಯವಾಗುತ್ತಿಲ್ಲ. 10 ಸಿಲಿಂಡರ್‌ ಕೇಳುತ್ತಿದ್ದ ಆಸ್ಪತ್ರೆಗಳು ಈಗ 50 ಕೇಳುತ್ತಿವೆ. ಉತ್ಪಾದನಾ ಸಾಮರ್ಥ್ಯವನ್ನು ಶೇ. 10ರಷ್ಟು ಮಾತ್ರ ಜಾಸ್ತಿ ಮಾಡಬಹುದು. ಮುಂದಿನ ದಿನದಲ್ಲಿ ಇನ್ನಷ್ಟು ಆಕ್ಸಿಜನ್‌ ಕೊರತೆ ಉಂಟಾಗುವುದರಲ್ಲಿ ಯಾವುದೇ ಸಂಶವಿಲ್ಲ." - ನಾಗಭೂಷಣ್‌ ಶಾಸ್ತ್ರಿ , ಯೂನಿವರ್ಸಲ್‌ ಗ್ಯಾಸ್‌ ಅಸಿಸ್ಟೆಂಟ್‌ ಜನರಲ್‌ ಮ್ಯಾನೇಜರ್‌