Russia Ukraine Crisis : ಹೊಸ ನಗರಗಳ ಮೇಲೆ ಪುಟಿನ್‌ ಪಡೆಗಳ ದಾಳಿ; ಉಕ್ರೇನ್ ಮೇಲೆ ನಿಯಂತ್ರಣಕ್ಕೆ ಮುಂದಾದ ರಷ್ಯಾ
ಉಕ್ರೇನ್ ಮೇಲೆ ದಾಳಿ ಮುಂದುವರೆಸಿರುವ ರಷ್ಯಾ ಈಗ ಉಕ್ರೇನ್ ನ ಬೇರೆ ನಗರಗಳ ಮೇಲೂ ದಾಳಿ ನಡೆಸುತ್ತಿದೆ. ಹಲವು ನಗರಗಳಿಗೆ ತನ್ನ ದಾಳಿ ವಿಸ್ತರಿಸಿರುವ ರಷ್ಯಾ ಇಡೀ ದೇಶದ ಮೇಲೆ ನಿಯಂತ್ರಣ ಸಾಧಿಸಲು ಹೊರಟಿದೆ. ಈ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
Admin
0
3
ಕೀವ್‌: ಇದುವರೆಗೆ ಉಕ್ರೇನ್‌ನ ಪ್ರಮುಖ ನಗರ, ಬಂದರು, ಪರಮಾಣು ಘಟಕಗಳ ಮೇಲೆ ದಾಳಿ ಮಾಡುತ್ತಿದ್ದ ರಷ್ಯಾ ಈಗ ಬೇರೆ ನಗರಗಳ ಮೇಲೂ ಕಣ್ಣುಹಾಯಿಸಿದೆ. ಹಾಗಾಗಿ, ಯುದ್ಧದ ದಿಕ್ಕು ಬದಲಿಸಿರುವ ಪುಟಿನ್‌ ಪಡೆಗಳು ಎಲ್ಲ ನಗರಗಳನ್ನು ವಶಪಡಿಸಿಕೊಳ್ಳುವ ಮೂಲಕ ಇಡೀ ದೇಶದ ಮೇಲೆ ನಿಯಂತ್ರಣ ಸಾಧಿಸಲು ಹೊರಟಿದೆ.
ಕೀವ್‌, ಕಾರ್ಕಿವ್‌, ಲ್ವಿವ್‌, ಮರಿಯಾ-ಪೋಲ್‌ ಸೇರಿ ಕೆಲವು ನಗರಗಳಿಗೆ ಸೀಮಿತವಾಗಿದ್ದ ರಷ್ಯಾ ವಾಯುದಾಳಿಯು ಶುಕ್ರವಾರ ಇವಾನೋ, ಫ್ರಾಂಕಿವ್‌ಸ್ಕ್‌, ಡ್ನಿಪ್ರೊ ಹಾಗೂ ಲುಸ್ಕ್‌ ಸೇರಿ ಹಲವು ನಗರಗಳಿಗೆ ವಿಸ್ತರಣೆಯಾಗಿದೆ. ಕ್ಷಿಪಣಿ, ರಾಕೆಟ್‌ಗಳ ದಾಳಿ ಮೂಲಕ ಹೊಸ ನಗರಗಳನ್ನು ನರಕಸದೃಶವನ್ನಾಗಿಸಿದೆ.
ಡ್ನಿಪ್ರೊ ನಗರವೊಂದರ ಮೇಲೆಯೇ ಮೂರು ವಾಯುದಾಳಿ ಮಾಡಲಾಗಿದ್ದು, ನರ್ಸರಿ, ಶೂ ಕಾರ್ಖಾನೆ ಹಾಗೂ ವಸತಿ ಕಟ್ಟಡ ಗುರಿಯಾಗಿಸಿ ದಾಳಿ ನಡೆಸಲಾಗಿದೆ. ದಾಳಿ ವೇಳೆ ಒಬ್ಬರು ಮೃತಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ಅದೃಷ್ಟವಶಾತ್‌, ಕಾರ್ಕಿವ್‌ನಲ್ಲಿರುವ ಆಸ್ಪತ್ರೆ ಮೇಲೆ ನಡೆದ ದಾಳಿಯಲ್ಲಿ ಯಾವುದೇ ಸಾವು-ನೋವು ಸಂಭವಿಸಿಲ್ಲಎಂದು ಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದಾರೆ.
ಆಸ್ಪತ್ರೆಯಲ್ಲಿ 30 ಸಿಬ್ಬಂದಿ ಹಾಗೂ 300 ರೋಗಿಗಳು ಇದ್ದರು. ವೈರಿರಾಷ್ಟ್ರದ ಸೈನಿಕರ ದಾಳಿ ಹಿನ್ನೆಲೆಯಲ್ಲಿ ಇವಾನೋ-ಫ್ರಾಂಕಿವ್‌ಸ್ಕ್‌ನಲ್ಲಿ ಕಟ್ಟೆಚ್ಚರ ಘೋಷಿಸಲಾಗಿದ್ದು, ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಜನರಿಗೆ ಸೂಚಿಸಲಾಗಿದೆ. ಲುಸ್ಕ್‌ ನಗರದ ವಿಮಾನ ನಿಲ್ದಾಣ ಬಳಿಯೂ ವಾಯುದಾಳಿ ನಡೆಸಲಾಗಿದ್ದು,ಸುತ್ತಮುತ್ತಲಿನ ಜನರನ್ನು ಸ್ಥಳಾಂತರ ಮಾಡಲಾಗುತ್ತಿದೆ. ಸ್ಯಾಟಲೈಟ್‌ ಹಲವು ಫೋಟೊಗಳು ಸಹ ಲಭ್ಯವಾಗಿದ್ದು, ರಷ್ಯಾ ದಾಳಿಯ ಭೀಕರತೆಯನ್ನು ತೆರೆದಿಟ್ಟಿವೆ.
ಕೀವ್‌ ನಗರದತ್ತ ಸೇನೆ! ಉಕ್ರೇನ್ ಮೇಲೆ ದಾಳಿ ನಡೆಸಿದ ಆರಂಭದಲ್ಲಿಯೇ ರಾಜಧಾನಿ ಕೀವ್‌ಅನ್ನು ವಶಪಡಿಸಿಕೊಂಡಿದ್ದ ರಷ್ಯಾ ಪಡೆಗಳು ಈಗ ಮತ್ತೆ ರಾಜಧಾನಿಯನ್ನು ವಶಪಡಿಸಿಕೊಳ್ಳಲು ಮುಂದಾಗಿವೆ. ಉಕ್ರೇನ್ ಸೇನೆ ಪ್ರತಿರೋಧವೊಡ್ಡಿ ಕೀವ್‌ ಮೇಲೆ ನಿಯಂತ್ರಣ ಸಾಧಿಸಿತ್ತು. ಆದರೆ, ಈಗ ಮತ್ತೆ ವಶಪಡಿಸಿಕೊಳ್ಳಲು ರಷ್ಯಾ ಸೈನಿಕರು ಮುಂದಾಗಿದ್ದು, ನಗರವನ್ನು ಸಮೀಪಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.
