GST Council Meeting: ಆನ್ಲೈನ್ ಫುಡ್‌ ಆರ್ಡರ್‌ ಮಾಡುವವರಿಗೆ ಶೀಘ್ರವೇ ಕೇಂದ್ರ ಸರ್ಕಾರದಿಂದ ಶಾಕ್‌..?
ಆನ್ಲೈನ್ ಫುಡ್‌ ಡೆಲಿವರಿಗೂ ತೆರಿಗೆ ವಿಧಿಸಬೇಕು ಎಂದು ಜಿಎಸ್‌ಟಿ ಸಮಿತಿ, ಜಿಎಸ್‌ಟಿ ಕೌನ್ಸಿಲ್‌ಗೆ ಪ್ರಸ್ತಾವನೆ ಸಲ್ಲಿಸಿದೆ. ಒಂದು ವೇಳೆ ಈ ಪ್ರಾಸ್ತಾವನೆಯನ್ನು ಅಂಗೀಕರಿಸಿದ್ದೇ ಆದಲ್ಲಿ, ಆನ್ಲೈನ್ ಫುಡ್‌ ಆರ್ಡರಿಂಗ್‌ ಮತ್ತಷ್ಟು ದುಬಾರಿಯಾಗಲಿದೆ.
Admin
0
7
ಆನ್ಲೈನ್ ಮೂಲಕ ಆಹಾರ ತರಿಸುವ ಫುಡ್‌ ಪ್ರೀಯರಿಗೆ ಶಿಘ್ರವೇ ಬೆಲೆ ಏರಿಕೆಯ ಬಿಸಿ ತಟ್ಟುವ ನಿರೀಕ್ಷೆ ಇದೆ. ಆನ್ಲೈನ್ ಫುಡ್‌ ಡೆಲಿವರಿಯನ್ನೂ ಜಿಎಸ್‌ಟಿ ಅಡಿಯಲ್ಲಿ ಸೇರಿಸಲು ಕೇಂದ್ರ ಸರ್ಕಾರ ಮುಂದಾಗಿದ್ದು, ಸೆಪ್ಟೆಂಬರ್‌ 17 ರಂದು ನಡೆಯಲಿರುವ ಸಭೆಯಲ್ಲಿ ಈ ಬಗ್ಗೆ ಚರ್ಚೆ ನಡೆಯಲಿದೆ.
ಒಂದು ವೇಳೆ ಚರ್ಚೆಯಲ್ಲಿ ಒಪ್ಪಿಗೆಯಾದರೇ ಆನ್ಲೈನ್ ಫುಡ್‌ ಡೆಲಿವರಿ ಕೂಡ ಜಿಎಸ್‌ಟಿ ಅಡಿಯಲ್ಲಿ ಬರಲಿದ್ದು, , ಮೂಲಕ ಆಹಾರ ತರಿಸುವವರ ಜೇಬು ಭಾರವಾಗಲಿದೆ.
ಆನ್ಲೈನ್ ಫುಡ್‌ ಡೆಲಿವರಿಗೂ ತೆರಿಗೆ ವಿಧಿಸಬೇಕು ಎಂದು ಜಿಎಸ್‌ಟಿ ಸಮಿತಿ, ಜಿಎಸ್‌ಟಿ ಕೌನ್ಸಿಲ್‌ಗೆ ಶಿಫಾರಸ್ಸು ಮಾಡಿದ್ದು, ಡೈನ್‌ ಇನ್‌, ಡೋರ್ ಡೆಲಿವರಿ, ಟೇಕ್‌ ಅವೇ, ಸೆಂಟ್ರಲ್‌ ಕಿಚನ್‌ ಮುಂತಾದವುಗಳು 'ರೆಸ್ಟೋರೆಂಟ್‌ ಸೇವೆಗಳ' ಪರಿಧಿಯಲ್ಲಿ ಬರಲಿವೆಯಾ ಎನ್ನುವ ಚರ್ಚೆಯೂ ನಡೆಯಲಿದೆ.
ಆನ್ಲೈನ್ ಫುಡ್‌ ಡೆಲಿವರಿಗೆ ತೆರಿಗೆ ವಿಧಿಸಲು ಎರಡು ಪ್ರಸ್ತಾಪಗಳನ್ನು ಇಡಲಾಗಿದೆ. ಮೊದಲನೆಯದು, ಆನ್ಲೈನ್ ಡೆಲಿವರಿಯನ್ನು 'ಡೀಮ್ಡ್‌ ಸಪ್ಲೈಯರ್ಸ್‌' ಎಂದು ಪರಿಗಣಿಸುವುದು. ಇದರಲ್ಲಿ ರೆಸ್ಟೋರೆಂಟ್‌ನಿಂದ ಡೆಲಿವರಿ ಪಾರ್ಟ್ನರ್‌ ವರೆಗಿನ ಸೇವೆಗೆ ಇನ್ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ನೊಂದಿಗೆ ಶೇ.18 ರಷ್ಟು ತೆರಿಗೆ ವಿಧಿಸುವುದು. ಇನ್ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ ಇಲ್ಲದೇ ಶೇ.5 ರಷ್ಟು ತೆರಿಗೆ ವಿಧಿಸುವುದು.
ಎರಡನೆಯದು, ಡೆಲಿವರಿ ಪಾರ್ಟ್ನರ್ಸ್‌ನಿಂದ ಗ್ರಾಹಕರವರೆಗಿನ ಸೇವೆಗೆ ಶೇ.5 ರಷ್ಟು ಜಿಎಸ್‌ಟಿ ವಿಧಿಸುವುದು. ಇದಕ್ಕೆ ನಿಯಮಿತ ಇನ್ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ ಲಭ್ಯ. ಎರಡನೆಯ ಪ್ರಾಸ್ತಾಪದಲ್ಲಿ ಡೆಲಿವರಿ ಪಾರ್ಟ್ನರ್‌ಗಳ ಮೇಲೆ ತೆರಿಗೆ ಹೊರೆ ಬೀಳಲಿದ್ದು, ತಾವು ಮಾಡಿದ ಎಲ್ಲಾ ಡೆಲಿವರಿಗೂ ಜಿಎಸ್‌ಟಿ ಪಾವತಿ ಮಾಡಬೇಕು. ಈ ಹೊರೆ ಗ್ರಾಹಕರ ಮೇಲಾಗಲಿದ್ದು, ಜೊಮ್ಯಾಟೋ, ಸ್ವಿಗ್ಗಿ ಸೇರಿ ಆನ್ಲೈನ್ ಫುಡ್‌ ಡೆಲಿವರಿ ಆ್ಯಪ್‌ಗಳಲ್ಲಿ ತರಿಸುವ ಆಹಾರದ ದರ ತುಟ್ಟಿಯಾಗಲಿದೆ.
ಅಲ್ಲದೇ ₹ 7,500 ಕ್ಕಿಂತ ಹೆಚ್ಚಿನ ಆರ್ಡರ್‌ಗಳಿಗೆ ಜಿಎಸ್‌ಟಿ ಅನ್ವಯಿಸಬಾರದು ಎನ್ನುವ ಪ್ರಸ್ತಾಪ ಕೂಡ ಇದೆ. ಅಲ್ಲದೇ ಫುಡ್‌ ಡೆಲಿವರಿ ಮಾಡುವ ಸಂಸ್ಥೆಗಳು ತೆರಿಗೆ ಸಂಗ್ರಹಿಸಿದ ಹಾಗೂ ಪಾವತಿ ಮಾಡಿದ ವಿವಿರಗಳನ್ನು ಪ್ರತ್ಯೇಕ ಜಿಎಸ್‌ಟಿನ್‌ ಮೂಲಕ ಘೋಷಣೆ ಮಾಡಬೇಕು ಎನ್ನುವ ಪ್ರಸ್ತಾಪ ಕೂಡ ಕೌನ್ಸಿಲ್‌ ಮುಂದೆ ಇದೆ. ಈ ಬಗ್ಗೆ ಯಾವ ನಿರ್ಧಾರ ತೆಗೆದುಕೊಳ್ಳಲಿದೆ ಎನ್ನುವುದನ್ನು ಕಾದು ನೋಡಬೇಕಿದೆ.
ಮೂಲಗಳ ಪ್ರಕಾರ ಫುಡ್‌ ಡೆಲಿವರಿ ಮಾಡುವುದಕ್ಕೂ ತೆರಿಗೆ ವಿಧಿಸಬೇಕು ಎನ್ನುವ ಜಿಎಸ್‌ಟಿ ಸಮಿತಿಯ ಪ್ರಸ್ತಾಪಕ್ಕೆ ಜಿಎಸ್‌ಟಿ ಕೌನ್ಸಿಲ್‌ ಒಪ್ಪಿಗೆ ನೀಡುವ ಸಾಧ್ಯತೆ ಇದೆ. ಒಂದು ವೇಳೆ ತೆರಿಗೆ ವಿಧಿಸುವುದಕ್ಕೆ ಕೌನ್ಸಿಲ್‌ ಅಸ್ತು ಅಂದರೇ, ತಮ್ಮ ಸಾಫ್ಟ್‌ವೇರ್‌ಗಳಲ್ಲಿ ಅಗತ್ಯ ಬದಲಾವಣೆ ಉಂಟು ಮಾಡಲು ಫುಡ್‌ ಡೆಲಿವರಿ ಸಂಸ್ಥೆಗಳಿಗೆ ಮೂರು ತಿಂಗಳ ಕಾಲಾವಕಾಶ ದೊರೆಯಲಿದೆ ಎನ್ನಲಾಗಿದೆ.
ಫುಡ್‌ ಡೆಲಿವರಿ ಸಂಸ್ಥೆಗಳನ್ನು ಸೇವೆ ನೀಡುವ ಸಂಸ್ಥೆಗಳೆಂದು ಪರಿಗಣಿಸಲಾಗಿದ್ದು, ಕನಿಷ್ಠ 20 ಲಕ್ಷ ವಹಿವಾಟು ಇದ್ದರೆ ಮಾತ್ರ ಜಿಎಸ್‌ಟಿ ನೋಂದಣಿ ಮಾಡಿಕೊಳ್ಳಬಹುದು. ಜತೆಗೆ ಒಂದು ಸಂಸ್ಥೆಯನ್ನು ರೆಸ್ಟೋರೆಂಟ್‌ ಎಂದು ಪರಿಗಣಿಸಲು ಕಾನೂನು ವ್ಯಾಖ್ಯೆಗಳಿಲ್ಲ. ಹೀಗಾಗಿ ಈ ಸವಾಲು ಕೂಡ ಜಿಎಸ್‌ಟಿ ಕೌನ್ಸಿಲ್‌ ಮುಂದೆ ಇದೆ.
