ಸೆನ್ಸೆಕ್ಸ್‌ 593 ಅಂಕ ಏರಿಕೆ, 55,000 ಗಡಿ ದಾಟಿ ಹೊಸ ದಾಖಲೆ ಬರೆದ ಷೇರು ಮಾರುಕಟ್ಟೆ ಸೂಚ್ಯಂಕ

ಹೊಸದಿಲ್ಲಿ: ಶುಕ್ರವಾರ ಬಾಂಬೆ ಸೂಚ್ಯಂಕ 593 ಅಂಕ ಮೇಲೇರಿದ್ದು 55,000 ಅಂಕಗಳ ಗಡಿ ದಾಟಿ ಹೊಸ ಸಾರ್ವಕಾಲಿಕ ದಾಖಲೆ ಬರೆದಿದೆ. ಐಟಿ ಮತ್ತು ಫೈನಾನ್ಶಿಯಲ್‌ ಕಂಪನಿಗಳ ಷೇರುಗಳು ಮೇಲೇರಿದ್ದರಿಂದ ಸೆನ್ಸೆಕ್ಸ್‌ ಮತ್ತೊಮ್ಮೆ ಭಾರಿ ಏರಿಕೆ ದಾಖಲಿಸಿ, ದಿನದಂತ್ಯಕ್ಕೆ 55,488 ಅಂಕಗಳಿಗೆ ವಹಿವಾಟು ಮುಗಿಸಿತು. ಈ ಮೂಲಕ 50,000 ದಿಂದ 55,000ಕ್ಕೆ ತಲುಪಲು 7 ತಿಂಗಳುಗಳನ್ನು ತೆಗೆದುಕೊಂಡಂತೆ ಆಯಿತು. ಇನ್ನೊಂದೆಡೆ ರಾಷ್ಟ್ರೀಯ ಷೇರು ಮಾರುಕಟ್ಟೆ ಸೂಚ್ಯಂಕ 165 ಅಂಕ ಗಳಿಕೆ ಕಂಡು 16,529 ಅಂಕಗಳಿಗೆ ಏರಿಕೆ ಕಾಣುವ ಮೂಲಕ ಹೊಸ ದಾಖಲೆ ಬರೆದಿದೆ. ಸೆನ್ಸೆಕ್ಸ್‌ನಲ್ಲಿ ಟಿಸಿಎಸ್‌, ಎಲ್‌&ಟಿ, ಭಾರ್ತಿ ಏರ್‌ಟೆಲ್‌, ಎಚ್‌ಸಿಎಲ್‌ ಟೆಕ್‌, ಟಾಟಾ ಸ್ಟೀಲ್‌, ಬಜಾಜ್‌ ಆಟೋ ಮತ್ತು ರಿಲಯನ್ಸ್‌ ಷೇರುಗಳು ಶೇ. 3.22ರಷ್ಟು ಗಳಿಕೆ ದಾಖಲಿಸಿದವು. ಇದರ ನಡುವೆಯೂ ಪವರ್‌ಗ್ರಿಡ್‌, ಡಾ. ರೆಡ್ಡೀಸ್‌, ಇಂಡಸ್‌ಇಂಡ್‌ ಬ್ಯಾಂಕ್‌, ಬಜಾಜ್‌ ಫೈನಾನ್ಸ್‌, ಎನ್‌ಟಿಪಿಸಿ ಷೇರುಗಳು ಶೇ. 1.26ರಷ್ಟು ಮೌಲ್ಯ ಕಳೆದುಕೊಂಡವು. ನಿಫ್ಟಿಯಲ್ಲಿ ಐಟಿ ಷೇರುಗಳು ಶೇ. 1.43ರಷ್ಟು ಗಳಿಕೆ ದಾಖಲಿಸಿದ್ದು ಏರಿಕೆಗೆ ಪ್ರಮುಖ ಕಾರಣವಾಯಿತು. ಚಿಲ್ಲರೆ ಹೂಡಿಕೆದಾರರು ಹೆಚ್ಚಾಗಿ ಷೇರುಗಳ ಮೇಲೆ ಹೂಡಿಕೆ ಮಾಡುತ್ತಿರುವುದೂ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಇತ್ತ ನಿರ್ಮಲಾ ಸೀತಾರಾಮನ್‌ ಉದ್ಯಮಿಗಳಿಗೆ ನಿರಂತರ ಹಣಕಾಸಿನ ಬೆಂಬಲ ನೀಡುವುದಾಗಿ ಹೇಳಿದ್ದು, ಇದರಿಂದ ಬ್ಯಾಂಕಿಂಗ್‌ ಮತ್ತು ಫೈನಾನ್ಶಿಯಲ್‌ ಕಂಪನಿಗಳ ಷೇರುಗಳು ಗಳಿಕೆ ದಾಖಲಿಸಿದವು. ಇವೆಲ್ಲದರ ನಡುವೆ ಚಿಲ್ಲರೆ ಹಣದುಬ್ಬರ ಜುಲೈನಲ್ಲಿ ಶೇ. 5.59ಕ್ಕೆ ಕುಸಿತವಾಗಿದ್ದರೆ, ಕೈಗಾರಿಕಾ ಉತ್ಪಾದನೆ ಜೂನ್‌ನಲ್ಲಿ ಶೇ. 13.6ರಷ್ಟು ಏರಿಕೆಯಾಗಿದೆ. ಇದು ಕೂಡ ಹೆಚ್ಚಿನ ಹೂಡಿಕೆ ಹರಿದು ಬರಲು ಕಾರಣವಾಗಿದೆ. ಇನ್ನೊಂದೆಡೆ ಚೀನಾದಲ್ಲಿ ಹೆಚ್ಚಿನ ನಿಯಂತ್ರಣವನ್ನು ಹೇರುತ್ತಿರುವುದರಿಂದ ವಿದೇಶಿ ಹೂಡಿಕೆದಾರರು ಭಾರತದತ್ತ ಮುಖಮಾಡಿದ್ದಾರೆ. ಈ ಎಲ್ಲಾ ಕಾರಣಗಳಿಂದ ದೇಶದಲ್ಲಿ ಷೇರು ಮಾರುಕಟ್ಟೆ ಸೂಚ್ಯಂಕಗಳು ಮೇಲೇರುತ್ತಲೇ ಇವೆ.