ನೆಲಮಂಗಲ: ಕೋವಿಡ್‌ ನಿಯಮ ಉಲ್ಲಂಘಿಸಿ 7 ಮಂದಿ ಜೈಲು ಪಾಲು
ಕೊರೊನಾ ನಿಯಮಗಳನ್ನು ಉಲ್ಲಂಘಿಸಿದ ಕಾರಣಕ್ಕೆ ಬೆಂಗಳೂರಿನ ನೆಲಮಂಗಲದಲ್ಲಿ ಡಿವೈಎಸ್ಪಿ ಹೆಚ್‌.ಸಿ.ಜಗದೀಶ್‌ ಮಾರ್ಗದರ್ಶನದಲ್ಲಿ 6 ಪ್ರಕರಣಗಳನ್ನು ದಾಖಲಿಸಿ 7 ಮಂದಿ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
Admin
0
10
ನೆಲಮಂಗಲ: ರಾಜ್ಯ ಸಾಂಕ್ರಾಮಿಕ ರೋಗಗಳ ಅಧಿನಿಯಮ ಕಾಯ್ದೆ 2020 ಕಲಂ 5(4) ಹಾಗೂ ಭಾರತೀಯ ದಂಡ ಸಂಹಿತೆ ಕಲಂ 269ರ ಅಡಿ ಪಟ್ಟಣ ಪೊಲೀಸ್‌ ಠಾಣೆ ಸಬ್‌ಇನ್ಸ್‌ಪೆಕ್ಟರ್‌ ಸುರೇಶ್‌ ನೇತೃತ್ವದ ತಂಡ ಡಿವೈಎಸ್ಪಿ ಹೆಚ್‌.ಸಿ.ಜಗದೀಶ್‌ ಮಾರ್ಗದರ್ಶನದಲ್ಲಿ 6 ಪ್ರಕರಣಗಳನ್ನು ದಾಖಲಿಸಿ 7 ಮಂದಿ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
ಸಿ. ದಯಾನಂದ್‌ (29) ಜ್ಯೋತಿನಗರ ವಾಜರಹಳ್ಳಿ, ನೆಲಮಂಗಲ ನಿವಾಸಿಗಳಾದ ರಾಜು(28) ರಾಯನ್‌ನಗರ ,ಅಶ್ವಖ್‌ ಪಾಷಾ (30) ದೇವಾಂಗ ಬೀದಿ, ರಮೇಶ್‌ (28)ಸೊಂಡೆಕೊಪ್ಪ ರಸ್ತೆ, ರಾಖೇಶ್‌ (22) ಸೊಂಡೆಕೊಪ್ಪ ರಸ್ತೆ, ಜಬೀವುಲ್ಲಾ(30) ಇಸ್ಲಾಂಪುರ, ಚಂದ್ರಕಲಾ (36) ಬಸವನಹಳ್ಳಿ ಕ್ರಾಸ್‌ ಬಂಧಿತ ಆರೋಪಿಗಳಾಗಿದ್ದು ಮೇ 5ರ ವರೆಗೆ 13 ದಿನಗಳ ಕಾಲ ನ್ಯಾಯಾಂಗ ಬಂಧನಕ್ಕೆ ಆದೇಶಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಗರದಲ್ಲಿ ಕೋವಿಡ್‌ ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರಕಾರ ಏ.21ರಿಂದ ಮೇ 4ರ ವರೆಗೆ ಕೆಲವು ನಿಯಮಗಳನ್ನು ರೂಪಿಸಿ ಮಾರ್ಗಸೂಚಿಗಳೊಂದಿಗೆ ಆದೇಶ ಜಾರಿಗೊಳಿಸಿದೆ. ಸದರಿ ಆದೇಶವನ್ನು ತಾಲೂಕಿನಾದ್ಯಂತ ಪ್ರಚುರಪಡಿಸಲಾಗಿದ್ದು, ಉಪವಿಭಾಗ ವ್ಯಾಪ್ತಿಯಲ್ಲಿ ಆಟೋ ಧ್ವನಿವರ್ಧಕದ ಮೂಲಕವು ಸಾರ್ವಜನಿಕರಿಗೆ ಕೋವಿಡ್‌ ಮಾರ್ಗಸೂಚಿಗಳನ್ನು ತಿಳಿಸಲಾಗಿದೆ.
ಆದರೂ, ಸರಕಾರದ ಆದೇಶ ಉಲ್ಲಂಘಿಸಿ ತಮ್ಮ ಅಂಗಡಿಗಳ ಮುಂದೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ ಅವಧಿ ಮೀರಿ ಅಂಗಡಿಗಳಲ್ಲಿ ಚಟುವಟಿಕೆ ನಡೆಸಿ ಸಾಂಕ್ರಾಮಿಕ ರೋಗ ಹರಡಲು ಕಾರಣರಾಗಿರುವ ಕಾರಣಕ್ಕೆ ಬಂಧಿತರ ವಿರುದ್ಧ ಕಟ್ಟುನಿಟ್ಟಿನ ಕಾನೂನು ಕ್ರಮ ಜರುಗಿಸಲಾಗಿದೆ ಎಂದು ಸಬ್‌ ಇನ್ಸ್‌ಪೆಕ್ಟರ್‌ ಸುರೇಶ್‌ ತಿಳಿಸಿದ್ದಾರೆ.
