ಕೋವ್ಯಾಕ್ಸಿನ್‌ಗೆ ಇನ್ನೂ ಸಿಗದ WHO ಅನುಮೋದನೆ: ಹೆಚ್ಚಿನ ಮಾಹಿತಿ ಕೇಳಿದ ಟಿಎಜಿ

ಹೊಸದಿಲ್ಲಿ: ಭಾರತದಲ್ಲಿಯೇ ತಯಾರಾದ ಮೊದಲ ಸ್ವದೇಶಿ ಕೋವಿಡ್ ಲಸಿಕೆ ಕೋವ್ಯಾಕ್ಸಿನ್, ಇಲ್ಲಿಯವರೆಗೂ (ಡಬ್ಲ್ಯೂಎಚ್‌ಒ) ಅನುಮೋದನೆ ಪಡೆಯುವಲ್ಲಿ ಸಫಲವಾಗಿಲ್ಲ. ಕೋವ್ಯಾಕ್ಸಿನ್ ಲಸಿಕೆಯ ಜಾಗತಿಕ ಬಳಕೆಯ ತೊಂದರೆ-ಪ್ರಯೋಜನಗಳ ಮೌಲ್ಯನಿರ್ಣಯವನ್ನು ನಡೆಸಲು ಹೈದರಾಬಾದ್ ಮೂಲದ ಸಂಸ್ಥೆಯಿಂದ ತಾಂತ್ರಿಕ ಸಲಹಾ ಗುಂಪು (ಟಿಎಜಿ) ಹೆಚ್ಚುವರಿ ಸ್ಪಷ್ಟೀಕರಣಗಳನ್ನು ಕೇಳಲು ನಿರ್ಧರಿಸಿದೆ ಎಂದು ತಿಳಿಸಿದೆ. ಜಿನೇವಾದಲ್ಲಿ ಮಂಗಳವಾರ ನಡೆದ ಸಭೆ ಬಳಿಕ ಟ್ವೀಟ್ ಮಾಡಿದ ಡಬ್ಲ್ಯೂಎಚ್‌ಒ ಮುಖ್ಯ ವಿಜ್ಞಾನಿ ಸೌಮ್ಯಾ ಸ್ವಾಮಿನಾಥನ್, 'ವಿಶ್ವ ಆರೋಗ್ಯ ಸಂಸ್ಥೆಯ ಸ್ವತಂತ್ರ ತಾಂತ್ರಿಕ ಸಲಹಾ ಗುಂಪು ಇಂದು ಸಭೆ ಸೇರಿತ್ತು. ಕೋವ್ಯಾಕ್ಸಿನ್ ಲಸಿಕೆಯ ಜಾಗತಿಕ ಬಳಕೆಗಾಗಿ ಅಂತಿಮ ಇಯುಎಲ್ ತೊಂದರೆ-ಪ್ರಯೋಜನ ಮೌಲ್ಯನಿರ್ಣಯ ನಡೆಸಲು ಉತ್ಪಾದಕ ಸಂಸ್ಥೆ ಭಾರತ್ ಬಯೋಟೆಕ್‌ನಿಂದ ಹೆಚ್ಚುವರಿ ಸ್ಪಷ್ಟೀಕರಣ ಕೋರಿದೆ. ಶೀಘ್ರದಲ್ಲಿಯೇ ದತ್ತಾಂಶ ದೊರೆತರೆ ನವೆಂಬರ್ 3ರ ಬುಧವಾರ ಅಂತಿಮ ಮೌಲ್ಯ ನಿರ್ಣಯಕ್ಕೆ ಮತ್ತೆ ಸಭೆ ಸೇರಲಾಗುವುದು' ಎಂದು ತಿಳಿಸಿದ್ದಾರೆ. 'ಎಲ್ಲ ಮಾಹಿತಿ ಸಮರ್ಪಕವಾಗಿ ದೊರೆತರೆ ಮತ್ತು ಎಲ್ಲ ಸರಾಗವಾಗಿ ನಡೆದರೆ ಹಾಗೂ ಸಮಿತಿಗೆ ತೃಪ್ತಿ ಸಿಕ್ಕರೆ, ಮುಂದಿನ 24 ಗಂಟೆಯೊಳಗೆ ಶಿಫಾರಸು ಬರಬಹುದು ಎಂದು ನಿರೀಕ್ಷಿಸಬಹುದು' ಎಂದು ವಿಶ್ವ ಆರೋಗ್ಯ ಸಂಸ್ಥೆ ಸಮಿತಿ ವಕ್ತಾರೆ ಮಾರ್ಗರೆಟ್ ಹ್ಯಾರಿಸ್ ತಿಳಿಸಿದ್ದಾರೆ. ಕೋವ್ಯಾಕ್ಸಿನ್ ಬಗ್ಗೆ ಒಂದು ಹೆಚ್ಚುವರಿ ಮಾಹಿತಿ ತುಣುಕನ್ನು ನಿರೀಕ್ಷಿಸಲಾಗುತ್ತಿದೆ. ಇಯುಎಲ್ ಅನುಮೋದಿಸಲು ಡಬ್ಲ್ಯೂಎಚ್‌ಒ ಪರಿಣತರು ಅದನ್ನು ಪರಿಶೀಲಿಸಲಿದ್ದಾರೆ ಎಂದು ಡಬ್ಲ್ಯೂಎಚ್‌ಒ ಸೋಮವಾರ ತಿಳಿಸಿತ್ತು. 'ಕೋವ್ಯಾಕ್ಸಿನ್ ಲಸಿಕೆಯನ್ನು ಕೋವಿಡ್ 19 ತುರ್ತು ಬಳಕೆ ಪಟ್ಟಿಗೆ ಸೇರ್ಪಡೆ ಮಾಡುವ ವಿಶ್ವ ಆರೋಗ್ಯ ಸಂಸ್ಥೆ ಶಿಫಾರಸಿಗೆ ಅನೇಕ ಜನರು ಕಾಯುತ್ತಿದ್ದಾರೆ ಎನ್ನುವುದು ನಮಗೆ ಅರಿವಿದೆ. ಆದರೆ ನಾವು ಅದಕ್ಕಾಗಿ ವಿನಾಯಿತಿಗಳನ್ನು ನೀಡಲಾಗುವುದಿಲ್ಲ. ತುರ್ತು ಬಳಕೆಗೆ ಉತ್ಪನ್ನವೊಂದನ್ನು ಶಿಫಾರಸು ಮಾಡುವ ಮುನ್ನ ನಾವು ಅದರ ಸುರಕ್ಷತೆ ಮತ್ತು ಪರಿಣಾಮಕಾರತ್ವವನ್ನು ಸೂಕ್ಷ್ಮವಾಗಿ ಮೌಲ್ಯಮಾಪನ ಮಾಡಬೇಕು' ಎಂದು ಸಂಸ್ಥೆ ಹೇಳಿತ್ತು. ಕೋವ್ಯಾಕ್ಸಿನ್ ಲಸಿಕೆಯನ್ನು ವಿದೇಶಿ ಸರ್ಕಾರಗಳು ಒಪ್ಪಿಕೊಳ್ಳಬೇಕೆಂದರೆ ವಿಶ್ವ ಆರೋಗ್ಯ ಸಂಸ್ಥೆಯ ಅನುಮೋದನೆ ಅಗತ್ಯ. ಕೋವ್ಯಾಕ್ಸಿನ್ ಲಸಿಕೆ ಪಡೆದ ಭಾರತೀಯರು ವಿದೇಶ ಪ್ರಯಾಣಕ್ಕೆ ತೆರಳುವಾಗ ಇಯುಎಲ್ ಬಹಳ ಮುಖ್ಯವಾಗಿದೆ. ಭಾರತದಲ್ಲಿ ಜನವರಿಯಲ್ಲಿ ಲಸಿಕೆ ಬಳಕೆಯ ಅನುಮೋದನೆ ದೊರೆತಿತ್ತು. ಆದರೆ ಈವರೆಗೂ ಅದಕ್ಕೆ ಡಬ್ಲ್ಯೂಎಚ್‌ಒ ಅನುಮೋದನೆ ದೊರಕಿಲ್ಲ. ಹೀಗಾಗಿ ಕೋವ್ಯಾಕ್ಸಿನ್ ಲಸಿಕೆ ಪಡೆದ ಜನರಿಗೆ ವಿದೇಶಿ ಪ್ರಯಾಣ ಸಮಸ್ಯೆಯಾಗಿಯೇ ಉಳಿದಿದೆ. ವಿಶ್ವ ಆರೋಗ್ಯ ಸಂಸ್ಥೆ ಭಾರತಕ್ಕೆ ಬಹಳ ಮಹತ್ವದ್ದಾಗಿದೆ. ಮುಖ್ಯವಾಗಿ ಕೋವ್ಯಾಕ್ಸಿನ್ ಸ್ವದೇಶಿ ನಿರ್ಮಿತ ಸಂಸ್ಥೆಯಾಗಿದ್ದು, ಅನೇಕ ದೇಶಗಳಿಗೆ ತನ್ನ ಲಸಿಕೆಯನ್ನು ರವಾನಿಸಲು ತುದಿಗಾಲಲ್ಲಿ ನಿಂತಿದೆ. ಅಲ್ಲದೆ ಇತ್ತೀಚೆಗಷ್ಟೇ 2-18 ವರ್ಷ ವಯಸ್ಸಿನ ಮಕ್ಕಳಿಗೂ ಕೋವ್ಯಾಕ್ಸಿನ್ ಲಸಿಕೆ ನೀಡಲು ಭಾರತ ಸರ್ಕಾರ ಇತ್ತೀಚೆಗೆ ಅನುಮತಿ ನೀಡಿತ್ತು. ಈ ಹಿನ್ನೆಲೆಯಲ್ಲಿ ಜಾಗತಿಕ ಮಾನ್ಯತೆ ಬಹು ಮುಖ್ಯವಾಗಿದೆ.