ಕೊರೊನಾ ವೈರಸ್: ಡೆಲ್ಟಾ ಪ್ಲಸ್ ಕೋವಿಡ್ ತಳಿಗೆ ಮಹಾರಾಷ್ಟ್ರದಲ್ಲಿ ಮೂವರು ಬಲಿ
ಮಹಾರಾಷ್ಟ್ರದಲ್ಲಿ ಡೆಲ್ಟಾ ಪ್ಲಸ್ ತಳಿಯ ಸೋಂಕಿನಿಂದ ಮೂವರು ಮೃತಪಟ್ಟಿದ್ದಾರೆ. ಮುಂಬಯಿಯಲ್ಲಿ ಮಹಿಳೆಯೊಬ್ಬರು ಕೊರೊನಾ ವೈರಸ್‌ನ ಈ ರೂಪಾಂತರಿ ತಳಿಯಿಂದ ಮೃತಪಟ್ಟಿದ್ದಾರೆ.
Admin
0
7
ಮುಂಬಯಿ: ಸೋಂಕಿನ ತಳಿ ಮಹಾರಾಷ್ಟ್ರದಲ್ಲಿ ಮೂವರನ್ನು ಬಲಿ ತೆಗೆದುಕೊಂಡಿದೆ. ಅದರಲ್ಲಿ ಒಬ್ಬ ರೋಗಿ ಮುಂಬಯಿಯವರು. ಸರ್ಕಾರವು ರಾಜ್ಯದಲ್ಲಿ ಹಲವು ತಿಂಗಳಿನಿಂದ ಜಾರಿಯಲ್ಲಿರುವ ನಿರ್ಬಂಧಗಳನ್ನು ಸಡಿಲಗೊಳಿಸಲು ಮುಂದಾಗಿರುವಾಗಲೇ ಡೆಲ್ಟಾ ಪ್ಲಸ್ ಅಪಾಯ ಎಚ್ಚರಿಕೆ ಕರೆಗಂಟೆ ಮೊಳಗಿಸಿದೆ.
ಮುಂಬಯಿಯಲ್ಲಿ 63 ವರ್ಷದ ಮಹಿಳೆಯೊಬ್ಬರು ಜುಲೈ 27ರಂದು ಕೋವಿಡ್‌ನಿಂದ ಮೃತಪಟ್ಟಿದ್ದರು. ಅವರಿಗೆ ಕೋವಿಡ್ ಸೋಂಕಿನ ಡೆಲ್ಟಾ ಪ್ಲಸ್ ತಳಿ ತಗುಲಿತ್ತು ಎಂದು ದೃಢಪಟ್ಟಿದೆ. ರಾಯಗಡದಲ್ಲಿ 69 ವರ್ಷದ ವೃದ್ಧ ಹಾಗೂ ರತ್ನಗಿರಿಯಲ್ಲಿ 80 ವರ್ಷದ ವೃದ್ಧರೊಬ್ಬರು ಮೃತಪಟ್ಟಿದ್ದರು. ಅವರಿಗೆ ಡೆಲ್ಟಾ ಪ್ಲಸ್ ಬಾಧಿಸಿದ್ದು ಖಚಿತವಾಗಿದೆ.
ಮಹಿಳೆಯಲ್ಲಿ ಜುಲೈ 21ರಂದು ಸೋಂಕು ದೃಢಪಟ್ಟಿತ್ತು. ಅವರಲ್ಲಿ ಮಧುಮೇಹ ಸೇರಿದಂತೆ ಅನೇಕ ಆರೋಗ್ಯ ಸಮಸ್ಯೆಗಳಿದ್ದವು. ಅವರಿಗೆ ಎರಡೂ ಡೋಸ್ ಲಸಿಕೆ ನೀಡಲಾಗಿತ್ತು. ನಗರದಲ್ಲಿ ಡೆಲ್ಟಾ ಪ್ಲಸ್ ಪಾಸಿಟಿವ್ ಕಂಡುಬಂದ ಏಳು ರೋಗಿಗಳಲ್ಲಿ ಅವರೂ ಒಬ್ಬರಾಗಿದ್ದರು. ಈ ಮಹಿಳೆಯ ಜೆನೋಮ್ ಸೀಕ್ವೆನ್ಸಿಂಗ್ ಫಲಿತಾಂಶ ಬುಧವಾರ ಅಧಿಕಾರಿಗಳ ಕೈಸೇರಿದೆ.
ಈ ಮಹಿಳೆಗೆ ಯಾವುದೇ ಪ್ರಯಾಣ ಇತಿಹಾಸ ಇರಲಿಲ್ಲ. ಆಕೆಯ ಇಬ್ಬರು ಸಮೀಪದ ಸಂಪರ್ಕಿತರಲ್ಲಿ ಡೆಲ್ಟಾ ಪ್ಲಸ್ ಸೋಂಕು ಪತ್ತೆಯಾಗಿತ್ತು. ಆ ಮಹಿಳೆ ಆಕ್ಸಿಜನ್ ನೆರವು ಪಡೆಯುತ್ತಿದ್ದರು. ಸ್ಟೀರಾಯ್ಡ್ ಮತ್ತು ರೆಮ್ಡಿಸಿವಿರ್ ಲಸಿಕೆಗಳನ್ನು ನೀಡಲಾಗಿತ್ತು.
ಮುಂಬಯಿಯ ಏಳು ಪ್ರಕರಣಗಳ ಜತೆಗೆ ಮಹಾರಾಷ್ಟ್ರದ ವಿವಿಧೆಡೆ 13 ಮಂದಿಯಲ್ಲಿ ಡೆಲ್ಟಾ ಪ್ಲಸ್ ಸೋಂಕು ಪತ್ತೆಯಾಗಿತ್ತು. ಇದರಿಂದ ಒಟ್ಟು ಡೆಲ್ಟಾ ಪ್ಲಸ್ ಪ್ರಕರಗಳ ಸಂಖ್ಯೆ 65ಕ್ಕೆ ಏರಿದೆ. ದೇಶಾದ್ಯಂತ ಒಟ್ಟು ಡೆಲ್ಟಾ ಪ್ಲಸ್ ಪ್ರಕರಣಗಳ ಸಂಖ್ಯೆ 86ಕ್ಕೆ ಏರಿಕೆಯಾಗಿದೆ ಎಂದು ಕೇಂದ್ರ ಸರ್ಕಾರ ಬುಧವಾರ ತಿಳಿಸಿತ್ತು.
